1 Dai Madu gaw Mawshe hte Arun yan hpe Israela amyu masha ni 2 hkan sa na tara ni hpe tsun matsun na matu hkang da wu ai. Loi mi mung ra n rawng ai hte lit garai n gun yu ai dumsu upra ahkyeng langai Mawshe yan Arun hpang de la sa nhtawm, 3 shanhte gaw dai hpe hkinjawng Eleaza hpang de sa ap ya na rai ma ai. Dai hpe dap shinggan de shapraw la nna shi a man e sat na rai wu ai. 4 Dai hpang Eleaza gaw shi a layung hte de a asai loi mi la nna Sum maga de sanit lang lapri bun na rai wu ai. 5 Yam nga hkum ting hpe mung, de a ahpyi, ashan asai hte ahkyi ni hte nawng hkinjawng wa a man e nat kau na rai wu ai. 6 Dai hpang shi mung marau hpun, kungla pu matsun hte hkyeng ai sumri nkau mi la nhtawm wan de kabai bang na rai wu ai. 7 Dai hpang shi gaw shi a hpun palawng ni hkrut nhtawm shi a hkum shin kau nna dap kata de shang wa mai nga ai; rai ti mung shana de du hkra shi gaw n san n seng naw rai nga ai. 8 Dai dumsu nat ai wa mung shi a hpun palawng ni hpe hkrut nhtawm hkum shin kau lu na rai wu ai; rai ti mung shana de du hkra shi gaw n san n seng naw rai nga ai. 9 Dai hpang san seng ai masha langai gaw dai dumsu wan wu ni sa magawn la nna dap shinggan na san seng ai shara e sa tawn da na rai wu ai. Dai hpe Israela amyu ting a matu jasan jaseng ai ntsin hpaw la ai shara hta shanhte kyem da na rai ma ai. Dai gaw yubak mara la kau ya ai lai rai nga ai. Ref 19:9: Heb 9:13.* 10 Wan wu sa magawn la ai wa mung shi a hpun palawng ni hkrut kau lu na rai wu ai; rai ti mung shi gaw shana de du hkra n san n seng naw rai nga ai. Ndai tara gaw Israela amyu masha ni a matu mung, shanhte a lapran hta hkan shanu nga ai maigan masha ni a matu mung prat dingsa hkan nga na shagrin da sai matsun maroi rai nga ai.

11 Si mang hkra ai wa kadai mung htung masa hku nhtoi sanit ya tup n san n seng nga ai. 12 Shanhte gaw tinang hkum hpe masum ya shani hte sanit ya shani hta hka hte jasan jaseng lu na rai ma ai. Dai hpang shanhte san seng wa na mara ai. Rai ti mung shanhte gaw tinang hkum hpe masum ya hte sanit ya nhtoi lahkawng hta n jasan n jaseng ai rai yang, shanhte hkum dai san seng na ma ai n rai. 13 Si mang hkra ai wa kadai mung tinang hkum hpe n jasan ai sha naw nga nga ai wa gaw shi hkum hpe hka n jaw bun ai majaw n san n seng nga ai. Shanhte gaw dai Madu a Sum hpe awu asin di ma ai rai nna shing re ai wa gaw Karai Kasang a amyu masha kaw na sumri dan kau ai hkrum na rai wu ai.

14 Sum kata hta masha langai ngai si ai rai yang, dai si ai aten hta sum kata e shang ai hte rawng nga ai ni kadai mung sanit ya tup n san n seng rai nga ai. 15 Sum kata na magap n rawng ai yam hte di bu shagu mung n san n seng rai nga ai. 16 Sat kau hkrum ai, shing n rai shinggan e shi hkrai si taw ai masha nrut nra shing n rai lup hkra ai wa kadai mung sanit ya tup n san n seng nga ai.

17 N san n seng ai hpe la kau na matu dumsu hkyeng nat la ai htingrai hkungga wan wu loi mi la nhtawm di bu langai hta bang nna hka san jat bang na rai nga ai. 18 Shawng na lang hta san seng ai wa gaw kungla pu matsun langai la nna hka hta tsing la nhtawm sum hpe mung, dai hta rawng ai arai ni yawng hpe mung, dai yang ma masha ni hpe mung, lapri bun na rai wu ai. Lahkawng lang ngu na hta san seng ai wa gaw masha nrut nra, si mang hte lup re ai ni hpe hkra ai wa hpe lapri bun na rai wu ai. 19 San seng ai wa gaw n san n seng ai wa hpe masum ya shani mung, sanit ya shani mung lapri bun na rai wu ai. Sanit ya du ai shani hta shi gaw dai wa hpe jasan jaseng na rai wu ai. Dai wa mung shi a hpun palawng ni hkrut nhtawm hka shin kau ai hte shana de du jang san seng na ra ai.

20 N san n seng ai wa kadai mung jasan jaseng na matu hka n shin wu ai majaw shi hkum hpe n jasan ai hte n san n seng naw rai nga ai. Shi gaw Madu a Sum hpe awu asin di ai majaw Karai Kasang a amyu masha hta na sumri dan kau ai hkrum na rai wu ai. 21 Nanhte gaw ndai tara hpe prat dingsa hkan sa na rai myit dai. Jasan jaseng ai ntsin lapri ai wa mung shi a hpun palawng hkrut kau na rai wu ai. Ntsin dai hpe hkra ai wa kadai mung shana de du hkra n san n seng naw rai nga ai. 22 N san n seng ai wa hkra ai arai hpa mung n san n seng nga ai; dai arai hkra ai wa kadai mung shana de du hkra n san n seng naw rai nga ai.