14
1 Amyu masha ni gaw shana tup myit ru ma ai rai nna jahtau shabam ma ai.
2 Shanhte gaw Mawshe yan Arun hpe aput let, ?Egutu mung shing n rai ndai Nam Mali hkan e si mat tim pyi grau kaja na saga ai law!
3 Dai Madu gaw anhte hpe hpa majaw dai mungdan de woi wa nga a ni? Anhte mung majan hta sat kau ai hkrum nna anhte a num ni hte kashu kasha ni mung rim la ai hkrum na manu ai. Egutu mung de bai nhtang wa yang, grai mai na n rai ni?,? ngu nna shanhte tsun ma ai.
4 Dai rai nna shanhte gaw, ?Marai langai ngai hpe ningbaw lata la nna Egutu mung de nhtang wa saga!,? ngu nna shada da tsun hkat ma ai.
5 Dai hpang amyu masha ni yawng a man e Mawshe yan Arun gum dagup dingnyawm ma ai.
6 Kin-yu galaw ai Nun a kasha Yawshu hte Yehpuna a kasha Hkaleb yan chyawm gaw yawn let,
7 shan a hpun palawng ni gang je kau nhtawm amyu masha ni hpe, ?Anhte kin-yu hku hkan yu maram ai dai mungdan gaw kaja dik htum ai mungdan rai nga ai.
8 Dai Madu anhte hpe awng sharawng mi ai rai yang gaw anhte hpe dai mungdan de woi wa nhtawm dai ngamu ngamai ai sut hte ningru ningja ai mungdan anhte hpe jaw na rai mi ai.
9 Dai Madu hpe hkum gumlau nga myit; dai mung e nga ai masha ni hpe mung hkum hkrit nga myit. Anhte gaw shanhte hpe aloi sha dang kau lu na ga ai. Dai Madu gaw anhte hte rau anga nga ai majaw shanhte hpe makawp maga la na karai ni hpe dang kau na nu ai; dai re ai majaw hkum hkrit nga myit,? ngu nna tsun ma ai. Ref 14:9: Heb 3:16.
10 Shawa hpung ting chyawm gaw shan hpe nlung hte kabai sat na hku jahkrit ma ai. Rai ti mung htoi tu ai dai Madu a hpung shingkang gaw Sum ntsa e dan hkung nga ai hpe amyu masha ni akajawng sha mu ma ai.
11 Dai Madu gaw Mawshe hpe, ?Ndai amyu masha ni galoi aten du hkra ngai hpe n hkap la na rai ma ta? Shanhte hpe ngai galaw dan sai mauhpa lamik kumla law law hpe mu nga ninglen ngai hpe kam sham na matu galoi aten du hkra shanhte ningdang nga na rai ma ta?
12 Ngai gaw shanhte hpang de ana zinli dat dat nna shamyit kau na mawe ai; rai ti mung nang hpe chyawm gaw shanhte hta grau kaba nna n-gun hte hpring ai amyu a kawa ngai shatai na we ai,? ngu nna tsun wu ai.
13 Rai ti mung Mawshe chyawm gaw dai Madu hpe, ?Shanhte hpe Egutu mung kaw na na a daru magam n-gun hte woi shapraw wa nit dai. Na a amyu masha ni hpe galaw ai lam Egutu masha ni na ma yang, Ref 14:13-19: Pru 32:11-14.
14 dai mung e nga ai masha ni hpe shanhte tsun dan na rai ma ai. Dai masha ni gaw nang Madu anhte hte rau rai nga ai lam mung, anhte a ntsa e na a sumwi yu dung ai shaloi nang hpe asan sha mu lu ai mung, shani e sumwi shadaw hte shana e wan shadaw hte anhte a shawng e nang sa wa ndai hpe mung na yu manu ai.
15 Nang na a amyu masha ni yawng hpe sat kau ai rai yang, na a mying dan hkung ai hpe na a amyu baw ni yawng chyawm gaw nang shanhte hpe jaw na ngu nna,
16 ga sadi jaw da ai mungdan de nang n woi wa lu ndai majaw na a amyu masha ni hpe nam mali kata e sat kau nu hka, nga nna tsun na mara ai.
17 Dai re ai majaw Madu e, ya anhte hpe na a daru magam n-gun madun ai hte nang tsun da sai ga sadi hte maren galaw na matu mung, nang gaw, ?Ngai Madu nan myit galu kaba ai wa rai nna,
18 tsaw ra myit kaba hte sadi sahka ai hpe madun dan nhtawm yubak mara hte tara tawt nna gumlang ai lam hpe mara dat ya ai wa rai nga nngai. Rai ti mung kanu kawa ni shut kau ai yubak mara a majaw shanhte a kashu kasha ni hpe ban masum, ban mali du hkra ari n jaw ai sha nga na nngai n rai,? ngu nna tsun nit dai. Ref 14:18: Pru 20:5-6; 34:6-7; Trj 5:9-10.
19 Ya chyawm gaw Madu e, ndai amyu masha ni Egutu mung na pru wa ai shani kaw na nang shanhte hpe mara dat ya nga ai zawn, ya mung na a galu kaba ai dinggrin tsaw ra myit hte maren ndai amyu masha ni a yubak mara hpe raw dat kau ya na, ngai hpyi nem nngai,? ngu nna tsun wu ai.
20 Dai Madu gaw, ?Nang hpyi nem ai hte maren shanhte hpe mara dat ya na nngai.
21 Rai ti mung ngai gaw ahkrung nga nngai rai nna nye a hpung shingkang ga ntsa ting hta dan hkung nga ai hte maren,
22 ndai amyu masha ni kadai mung dai mung de shang lu na ma ai n rai, ngu nna ngai ga sadi tawn da nngai. Shanhte mahtang Egutu mung hte nam mali hkan ngai galaw dan sai mauhpa lamik kumla ni hte htoi tu ai nye a hpung shingkang hpe mu lu ma ti mung, nye a galu kaba ai myit hpe shanhte lang hte lang chyam dinglik yu nna nye a ga hpe n madat ya ma ai.
23 Shanhte a kaji kawa ni hpe jaw na ngu nna ga sadi jaw da sai mungdan de shanhte galoi mung shang lu na ma ai n rai. Ngai hpe n gawn n sawn di nna ningdang kau ai ni kadai mung dai mungdan de galoi mung shang lu na ma ai n rai. Ref 14:21-23: Heb 3:18.
24 Rai ti mung nye a shangun ma Hkaleb chyawm gaw laklai shai ai myit masin rawng nna ngai hta sadi dung nga ai majaw shi nan kin-yu hku hkan maram yu sai dai mung de ngai woi shawn nna shi a matu mara ni mung, Ref 14:24: Ysh 14:9-12.
25 Amalek masha ni hte Hkanan masha ni ya shanu nga ai Kadit ni hpe madu la lu na rai ma ai. Dai rai nna hpawt ni jang, nhtang kayin mat wa nhtawm Nawng Hkyeng maga de nga ai nam mali kata de shang mat wa mu,? ngu nna tsun wu ai.
26 Dai Madu gaw Mawshe yan Arun hpe,
27 ?Ndai n hkru ai amyu masha ni galoi aten du hkra ngai hpe aput shatsang na rai nga ma ta? Dai zawn nga ai aput angun ga ni hpe ngai na jin ni ai!
28 Ya chyawm gaw shanhte hpe ning ngu mahtai jaw u: ?Ngai gaw ahkrung nga ai hte maren nanhte san myit dai hku, ngai nanhte hpe galaw na nngai,? ngu ngai nan dagam da se ai. Ngai Madu nan tsun ni ai.
29 Nanhte mung si mat nhtawm nanhte a si mang ni gaw ndai nam mali hkan ayai taw nga na malit dai. Nanhte ngai hpe aput shatsang manit dai majaw, asak hkun ning lai sai ni kadai mung dai mung de shang lu na myit dai n rai. Ref 14:29: Heb 3:17.
30 Nanhte hpe dai mung e nga shangun na matu ngai ga sadi tawn da ni ai rai ti mung, Hkaleb hte Yawshu hta lai nna nanhte hta na kadai mung shang lu na myit dai n rai.
31 Nanhte a ma ni rim la hkrum na rai myit dai nga nna nanhte tsun myit ti mung, nanhte ningdang kau da ai mung de ngai shanhte hpe woi shang wa na nngai; dai mung gaw shanhte a dum nta tai na ra ai.
32 Nanhte chyawm gaw ndai yang na nam mali hta si mat na rai myit dai.
33 Nanhte hta na hpang jahtum ngam ai wa si mat ai aten du hkra sadi sahka n nga ai amu a majaw hkrum sha ai nni nkri hte nanhte a kashu kasha ni mung dai nam mali hta mali shi ning tup brak hkawm na rai myit dai. Ref 14:33: Kas 7:36.
34 Dai mung hpe kin-yu hku hkan yu maram ai nhtoi mali shi ya tup rai nga ai hte maren, lani mi hpe laning mi shatai nhtawm mali shi ning tup nanhte shut hpyit kau ai yubak mara a nni nkri hkam sha na rai myit dai. Shaloi nanhte hpe ngai ninghkap nna kabai kau na a lachyum hpe chye na na rai myit dai!
35 Nanhte gaw jawm hpawng de let ngai hpe gumlau ai n hkru ai amyu masha nanhte hpe dai zawn ngai di na we ai ngu nna dagam da se ai. Dai rai nna ndai yang na nam mali hta nanhte hkum shagu si mat na rai myit dai. Ngai Madu nan tsun ni ai,?? ngu nna tsun wu ai.
36-37 Dai mung hpe kin-yu hku hkan maram yu na matu, Mawshe shangun dat ai masha ni gaw n teng n man ai shiga hpe la wa nhtawm, amyu masha ni dai Madu hpe aput angun nga nna gumlau ai amu shapraw dat ma ai. Dai Madu mung shanhte hpe ana zinli hkrum sha shangun ai hte shanhte mung si mat ma ai.
38 Kin-yu marai shi lahkawng hta na Yawshu yan Hkaleb chyu sha hkrung ngam nga ma ai.
(Trj 1:41-46)
39 Mawshe gaw Israela masha ni hpe dai Madu tsun ai lam htawn tsun wu yang, shanhte grai myit n dawt let sharung shayawt ma ai.
40 Hpang jahpawt manap jau jau aten e, shanhte gaw bum ga shang gasat na nga rawt pru wa let, ?Dai Madu anhte hpe tsun da mani ai mung de lung wa na matu ya anhte jin jin rai nga saga ai. Anhte galaw shut kau saga ai yubak hpe mung yin la saga ai,? ngu nna tsun ma ai.
41 Rai ti mung Mawshe mahtang, ?Dai rai yang nanhte hpa majaw dai Madu a ga hpe ya n madat nga myit ni? Nanhte awng dang lu na myit dai n rai!
42 Hkum lung wa myit! Dai Madu gaw nanhte hte rau n rai nga malit dai. Nanhte a gumlau hpyen ni mahtang nanhte hpe dang kau na mara ai.
43 Amalek hte Hkanan masha ni hte nanhte man chyaw hkrum kadup hkat ai majan hta nanhte si mat na marin dai. Nanhte mahtang dai Madu a hpang hkan na matu ningdang kau myit dai majaw dai Madu nanhte hte rau n nga malit dai,? ngu nna tsun wu ai.
44 Dai Madu a Ga Shaka Sumpu hte Mawshe mahtang dap kaw na n pru sa ti mung, shanhte chyawm gaw bum ga de lung wa na matu naw gwi nga ma ai.
45 Dai hpang dai mung na Amalek hte Hkanan masha ni shanhte hpe gasat dang kau ai hte Horma mare du hkra shachyut kau ma ai.