11
1 Dai amyu masha ni shanhte hkrum sha ai tsin-yam tsindam a majaw dai Madu hpe aput hpang wa ma ai. Dai Madu gaw dai lam ni na jang masin pawt nna amyu masha ni a ntsa e wan dat dat wu ai. Dai gaw shanhte a ka-ang e hkru wa ai hte dap a jahtum shara langai mi hpe jahten kau nga ai.
2 Amyu masha ni gaw Mawshe hpe jahtau let karum hpyi ma ai; Mawshe gaw dai Madu hpe hpyi nem wu ai majaw wan mung si mat nga ai.
3 Dai rai nna dai yang e, dai Madu a wan shanhte hta hkru wa ai majaw, shara dai hpe Tabera ngu nna shamying ma ai.
4 Israela amyu masha ni hte rau hkawm sa ai hta maigan masha ni mung lawm ma ai. Shanhte gaw lusha shahpa grai marim ai ni rai ma ai. Israela masha ni nan pyi, ?Anhte sha na shan loi mi sha lu saga ai wa!
5 Egutu mung e anhte ra ai nga amyu baw hkum sumhpa yawng anhte sha lu nna de a manu jahpu jaw ra ga ai n rai; dai mung na kumgyin, gyinshau si, shakau gaubyen, shakau hkyeng ni hte shakau hpraw anhte lu sha ga ai hpe dum mai nga ga ai n rai ni?
6 Rai ti mung ya gaw anhte n-gun lagaw htum mat saga ai; lani hte lani jahkrat jaw ai manna hte kaga sha na lusha hpa mung n nga nga ai!,? ngu nna aput hpang ma ai.
7 (Manna gaw kaji ai hkai tum ni hte bung nna hpraw hpraw htoi htoi re ai nsam rawng nga ai. Ref 11:7: Pru 16:31.
8-9 Dai gaw but ai dap hta numri hte rau shana e hkrat nga ai; amyu masha ni gaw dai ni hpe hpang jahpawt e sa tam magawn la nna dai hpe rin ai gaw rin, mani hkra htu ai gaw htu rai nna dai hpe shadu nhtawm muk pa galaw ma ai. Dai gaw tsanlun sau hte kabaw ai muk zawn mu nga ai.) Ref 11:8-9: Pru 16:13-15.
10 Amyu masha ni yawng shanhte a Sum chyinghka lam hkan e hpung hte hpung tsap let aput nga ma ai nsen hpe Mawshe na wu ai. Dai Madu mung shanhte hpe masin pawt wu ai majaw Mawshe myit htum wu ai. Shi shanhte hpe myit yu machyi da wu ai rai nna dai Madu hpe, ?Nang ngai hpe hpa majaw,
11 ndai zawn grai yak hkra galaw n ta? Nang ngai hpe hpa majaw n ra sharawng n ni? Ndai amyu masha ni yawng hte seng ai lit hpa majaw ngai hpe shagun da wu ni?
12 Ngai shanhte hpe hpan shalat ai n rai; Shanhte hpe shangai mawe ai n rai! Shanhte hpe ma chyangai ni hpe zawn nye a lata hta pawn la nna shanhte a kaji kawa ni hpe nang ga sadi jaw da sai mung de ma rem sarama langai mi zawn lakawn la na lam nang hpa majaw ngai hpe san da nga n ta?
13 Ndai amyu masha ni yawng a matu ashan hpe gara shara kaw na ngai alaw alam lu la lu na rai nga a ta? Shanhte gaw aput let ngai kaw ashan hpyi ma ai.
14 Ndai amyu masha ni yawng hte seng ai lit hpe ngai hkum nan lit n lu la na nngai; dai gaw nye a matu nau wa lit li la nga li ai.
15 Ngai hpe ndai zawn di na rai yang, matsan dum la ai hku nna ngai hpe sat kau et; na a gumshem ai hpe ngai matut nna loi mi mung n hkam jan lu na we ai,? ngu nna tsun wu ai.
16 Dai Madu gaw Mawshe hpe, ?Amyu masha ni a ningbaw hku nna hkap masat da hkrum ai hte hkungga shagrau ging ai marai sanit shi hte hpe jahpawng la nhtawm nye a hpung shingkang shanu nga ai Sum de ngai hpang de woi wa let dai yang e, na a makau hta wa tsap nga na shanhte hpe tsun u.
17 Dai yang e ngai yu sa nna nang hte ga shaka na we ai; nang hpe ngai jaw tawn da ai wenyi hta na nkau mi hpe ngai la nhtawm shanhte hpe jaw na we ai. Shanhte gaw ndai amyu masha ni hte seng ai lit nang hpe gun hpai karum lu na mara ai; nang chyu sha gun hpai nga lu na ndai n rai.
18 Ya chyawm gaw amyu masha ni hpe, ?Hpawt ni na matu nanhte a hkum ni hpe jasan jaseng da mu; nanhte shan sha lu na rai myit dai. Nanhte gaw Egutu mung hta ngamu ngamai ai hte nanhte ra sharawng ai shan sha lu ga ai, nga nna aput angun ai hte tsun ai ga hpe dai Madu na ya nu ai rai nna dai Madu nanhte hpe shan jaw na rai wu ai; nanhte dai hpe sha na rai myit dai.
19 Nanhte gaw dai hpe lani, ni ni, manga ya, shi ya, hkun ya sha n rai, sha lu na rai myit dai;
20 nanhte a ladi hta manam hkying nna ajin anang nga mat hkra shata mi tup sha lu na rai myit dai. Ya nang e nanhte hte rau nga nga ai dai Madu hpe nanhte ningdang kau myit nhtawm Egutu mung kaw na nanhte galoi mung n pru wa na rai sahka nga nna shi hpe aput angun myit dai majaw ndai lam byin wa na rai nga ai,?? ngu nna tsun mu ai.
21 Mawshe gaw dai Madu hpe, ?Amyu masha 600,000 hte hpe nang e, ya ngai woi awn nga nngai; nang shanhte hpe shata mi a matu shan alaw alam jaw na ngu nna tsun ai n rai ni?
22 Shanhte myit dik lu hkra, dumsu, sagu alaw alam sat lu na rai nga a ni? Panglai nga ni yawng mung shanhte a matu law na rai mu ni?,? ngu nna san wu ai.
23 Dai Madu gaw, ?Nye a daru magam n-gun hta shadawn shadang nga nga a ni? Ngai tsun sai ga byin na, n byin na gaw kade n na yang nang mu lu na rin dai,? ngu nna htan wu ai.
24 Dai rai nna Mawshe pru sa wa nhtawm amyu masha ni hpe dai Madu a ga htawn tsun wu ai. Amyu masha ni a ningbaw sanit shi hpe mung jahpawng la nna, dai Sum grup grup hta woi tawn da wu ai.
25 Dai Madu gaw sumwi hta yu hkrat wa nhtawm shi hpe ga shaga wu ai. Shi gaw Mawshe hpe jaw ya ai wenyi nkau mi hpe la nhtawm ningbaw sanit shi hte hpe jaw wu ai. Dai wenyi shanhte hta du jang, myihtoi ni zawn aten kadun mi hta marawn jahtau hpang wa ma ai.
26 Dai ningbaw sanit shi hta na Eldad hte Medad yan mahtang Sum de n pru sa ai sha dap kata e nga nga ma ai. Dai yan hta mung wenyi du nna shan mung dap kata e myihtoi ni zawn marawn jahtau hpang wa ma ai.
27 Shabrang langai mi gaw Mawshe hpang de kagat sa nhtawm Eldad hte Medad yan hta byin nga ai lam tsun dan wu ai.
28 Dai hpang shabrang prat kaw nna Mawshe hpe karum ai hkringmang ngu na Nun a kasha Yawshu mahtang Mawshe hpe, ?Madu e, shan hpe jahkring kau sanu!,? ngu nna tsun wu ai.
29 Mawshe gaw, ?Ngai hte seng ai amu hta myit hkan tsang nga n ni? Dai Madu gaw shi a amyu masha ni yawng hpe wenyi jaw ya nna myihtoi ni zawn shanhte yawng hpe marawn jahtau shangun na, ngai ra sharawng nga nngai!,? ngu nna htan wu ai.
30 Dai hpang Mawshe hte Israela ningbaw marai sanit shi hte gaw dap de nhtang wa ma ai.
31 Dai Madu gaw nbung hpe akajawng sha shabung dat nhtawm panglai de na u preng ni hpe ga ntsa kaw nna pe masum du hkra pyen shayu dat wu ai. Dai ni gaw dap ntsa hte de a grup yin deng tsawmra mi tsan hkra man maga shagu de hkrat nga ai.
32 Dai rai nna amyu masha ni mung dai shani tup, dai shana tup, hpang shani du hkra u preng ni hpe sa rim magawn la nga ma ai. Shanhte gaw dap grup yin shara shagu hkan u preng shan ni hpe lam jahkraw da ma ai.
33 Shanhte sha na u preng shan alaw alam naw lu nga yang, dai Madu gaw dai amyu masha ni hpe pawt nna shanhte a ka-ang e ana zinli shabyin dat ya wu ai.
34 Shanhte gaw shan sha marim ma ai majaw dai shara hpe Kibrot Hatawa ngu nna shamying ma ai; dai gaw ?Shan sha marim ai lup ni? ngu ai lachyum rai nga ai; hpa majaw nga yang shanhte gaw shan sha marim ai amyu masha ni hpe dai yang e lup da nga ma ai.
35 Amyu masha ni mung dai yang kaw na Hazerot de htawt sa wa nhtawm dai yang e dap jung nga ma ai.