NAHUM LAIKA
(NAHUM)
Ga Nhpaw
Ndai Nahum Laika gaw Israela amyu masha ni a kaji kawa ni prat kaw nna dip gamyet sha lai wa sai Asuri masha ni a mungdan mare daju Ninewe mare hkrat sum mat wa ai lam hpe masat poi hku nna ka da ai ga shagawp laika rai nga ai. Ninewe mare hkrat sum mat ai aten gaw Hkristu garai n shangai ai Jaw 7 B.C. a jahtum daw de rai nga ai. Ninewe mare hkrat sum mat ai lam gaw Karai Kasang gaw gumshem ai hte myit tsaw myit dap rawng ai amyu baw hpe tara jeyang nga ai hpe mu lu nga ai.
1
Ndai gaw Ninewe hte seng ai mungga rai nga ai, Elkosha mare na Nahum mu ai shingran a lam rai nga ai. Ref 1:1-3:19: Esa 10:5-34; 14:24-27; Zep 2:13-15.
Madu Karai Kasang gaw shingjawng kashun ai amu hpe hkam sharang ai n rai;
shi gaw shi hte ninghtan shai ai ni hpe ari jaw nga ai.
Shi a masin kahtet ai a majaw, shanhte hpe matai htang nga ai.
Dai Madu gaw loi loi hte masin pawt ai n rai,
rai ti mung shi gaw daru magam n-gun rawng nga ai hte
mara lu ai wa hpe ari n jaw ai sha galoi mung dat dat ai n rai.
 
Dai Madu hkawm ai shara hta, laru ru nga ai;
sumwi ni gaw shi a lagaw a npu na ga nhpu rai nga a hka!
Shi panglai hka hpe daru ai hte hka gaw hkun hkraw mat a hka!
Shi gaw hka nu ni hpe hkyet shangun nga ai.
Bashan tsingdu pa ni kyip mat nna,
Hkarmela Bum mung hkraw mat nga ai;
Lebanon a nampan pu ni nyip mat nga ai.
Bum ni gaw dai Madu a man e ashun nga ai;
kawng ni shi a man e byawng mat nga ai.
Dai Madu dan pru ai shaloi ginding aga ashun nga ai;
mungkan ga hte dai hta nga ai masha ni hkrit gari ma ai.
Shi pawt sindawng ai shaloi, kadai hkrung nga lu a ta?
Shi a hkrithpa masin kahtet ai a majaw, kadai hkrung lu nga a ta?
Shi gaw agrung nga ai shi masin kahtet ai hpe ru bun nga ai;
shi a man e, lunghkrung ni ga nhpu zawn agrawp mani mat nga ai.
 
Dai Madu gaw mai kaja nga ai;
shi gaw shi a amyu masha ni hpe ru tsang hkrum ai aten ni hta makawp maga la nga ai;
shi hpang de kayin wa ai ni hpe shi bau sin ya nga ai.
Shi gaw shi a gumlau hpyen ni hpe mawru kaba zawn atsai awai jahten kau nga ai;
shi gaw shi hte nhtan shai ai ni hpe shanhte a si du a lata de sa dat ya nga ai.
Nanhte gaw Madu hpe ninghkap na hpa baw maw mawn nga myit ni?
Shi gaw nang hpe jahten shaza kau na ra ai.
Kadai mung shi hpe kalang mi hta jan nna ninghkap lu ai n rai.
10 Tsa chyaru nang ai ni gaw gindun hkri ai ju hpun hte
yihku jahkraw hpe zawn nat kau hkrum na mara ai!
 
11 Ninewe e, nang kaw nna dai Madu hpe gumlau maw mawn na tara n lang ai hku hpaji daw ai masha langai paw pru nga sai. 12 Ndai gaw dai Madu shi a amyu masha Israela hpe tsun ai mungga rai nga ai: ?Asuri masha ni n-gun ja nna law nga ti mung, shanhte gaw shamyit kau hkrum ai hte hkoi mat wa na mara ai. Nye a amyu masha ni e, ngai nanhte hpe nni nkri jahkrum ni ai, rai ti mung ngai gaw dai amu bai galaw na nngai n rai. 13 Ya chyawm gaw, nanhte hpe up hkang ai Asuri a daru magam n-gun hpe jahtum kau ya nna nanhte hpe gyit hkang da ai sumri ni hpe di kau ya na we ai.?
14 Ndai gaw Asuri masha ni hte seng nna dai Madu daw dan ai mungga rai nga ai: ?Shanhte hta shanhte a amying shingteng matut ya na aru arat ni pyi n nga mat na mara ai. Ngai gaw shanhte a karai ni a htingnu hta nga ai hpara sumla ni hpe jahten shaza ya na nngai. Ngai gaw Asuri masha ni a matu lupwa lajang ya nga nngai-shanhte asak hkrung nga na n ging nga masai!?
15 Yu mu, shiga gun ai wa langai mi gaw kabu gara shiga hte bum lang ntsa hku nna du sa wa ra ai! Shi gaw awng padang ninglaw ndau shabra na matu du sa wa nga ai. Yuda amyu masha ni e, nanhte a masat dingsat poi galaw mu; Karai Kasang hpe dagam ga shaka rap raw mu. Tara n lang ai ni gaw nanhte a mungdan hpe galoi mung shang gasat lu na mara ai n rai. Shanhte gaw tsep kawp jahten shaza kau hkrum nga masai!