8
Shata sanit ngu na hta, Israela amyu masha ni yawng shanhte a mare ni hkan nga nga ma ai. Dai shata a shawng shani e, shanhte yawng gaw Yerusalem mare na Hka Chyinghka kata maga de na dam lada shara hta sa hpawng nga ma ai. Shanhte gaw dai Madu gaw Israela hpe Mawshe a lata hku jaw da sai Tara Laika buk hpe Tara sara ninghkrin hkinjawng Ezra kaw hpyi ma ai. Dai re ai majaw, Ezra mung atsawm sha chye na lu sai numsha, lasha ni hte ma kaji ni ngu ai amyu masha ni hpawng nga ai shara de dai hpe la shapraw wu ai. Shi gaw jahpawt kaw nna shani ka-ang du hkra, chyinghka makau na dam lada ai shara hta Tara laika hti dan wu ai rai nna shanhte yawng myit maju jung ai hte madat la nga ma ai.
Ezra mung lak san galaw shachyaw da ai hpun pinra ntsa e rawt tsap nga ai. Ndai masha ni gaw shi a hkra maga de tsap ma ai; dai ni gaw Matihtia, Shema, Anaia, Uria, Hilkia hte Masea hte rai ma ai. Pai maga de mahtang Pedaia, Mishaela, Malhkiya, Hashum, Hashbadana, Zehkaria hte Meshulam ni rai ma ai.
Ezra gaw amyu masha ni hta grau tsaw ai pinra ntsa hta tsap nga ai rai nna, shanhte yawng shi hpe azi yu lu ma ai. Shing rai shi gaw laika buk hpaw dat wu ai hte rau shanhte yawng mung rawt tsap ma ai. Ezra gaw, ?Dai Madu galu kaba ai Karai Kasang hpe shakawn kungdawn mu!,? ngu nna tsun wu ai.
Amyu masha ni yawng mung ntsa de lata sharawt nhtawm, ?Amen! Amen!,? ngu nna htan ma ai. Shanhte gaw ga de du hkra gum dagup let hput di nawku ma ai.
Dai hpang shanhte gaw shanhte a shara ni hta rawt tsap nga ma yang, ndai Lewi masha ni rai nga ai Yeshua, Bani, Sherebia, Yamin, Akub, Shabehtai, Hodia, Masea, Kelita, Azaria, Yozabad, Haman, Pelaia hte gaw Tara a lam shanhte hpe tsun shaleng dan ma ai. Shanhte gaw Karai Kasang a Tara hpe n-gup hte ga byan dan nna shaleng dan ma ai majaw amyu masha ni dai lam hpe chye na lu ma ai.
Ya amyu masha ni Tara laika ga hpa rai nga ai lam na jang, shanhte grau sit sa nna hkrap ngu hkrap ngoi hpang wa ma ai. Dai rai nna munggyi Nehemia, hkinjawng Ezra ngu ai tara sara ninghkrin hte amyu masha ni yawng hpe Tara a lam tsun shaleng dan ai Lewi masha ni gaw, ?Dai ni na nhtoi gaw dai Madu nanhte a Karai Kasang a matu chyoi pra nga ai shani rai nga ai, dai rai nna nanhte gaw yawn hkyen ai hte hkrap ngu hkrap ngoi na myit dai n rai. 10 Ya chyawm gaw, dum nta de nhtang wa nna mu mai ai lusha sha manu. Alaw alam n lu ai ni hpe nanhte a malu masha hte sabyi ntsin ni karan jaw mu. Dai ni gaw anhte a Madu a matu chyoi pra ai shani rai nga ai, dai rai nna hkum yawn nga myit. Dai Madu nanhte hpe jaw ai kabu gara lam gaw nanhte hpe n-gun ja shangun na ra ai,? ngu nna tsun ma ai.
11 Lewi masha ni gaw ndai zawn chyoi pra ai shani hta amyu masha ni atsin sha nga nna n yawn n hkyen na matu shanhte hpe tsun ma ai. 12 Dai rai nna amyu masha ni yawng gaw shanhte hpe hti dan ai lam hpe chye na hkawn hkrang nga ma ai majaw shanhte yawng dum nta de wa nna kabu gara ai hte lu lu sha sha rai nhtawm kaga ni hpe lusha karan jaw ma ai.
13 Hpang shani e, amyu lakung ni a ningbaw ni hte hkinjawng ni, Lewi masha ni gaw Tara a sharin shaga ga ni hpe sharin achyin la na nga, Ezra hpang de sa ma ai. 14 Shanhte gaw dai Madu Mawshe a lata hku jaw ya sai Tara laika hpe mu tam la manu ai rai nna, Sum poi galaw ai laman, gan gawat galaw ai sum ni hta rawng nga na matu, Israela amyu masha ni hpe hkang da ma ai. 15 Dai rai nna shanhte gaw ndai sharin shaga lam ni jaw ya let Yerusalem mare hte kaga mare kahtawng ni yawng de shanhte hpe shangun dat ma ai: ?Tara laika hta ka da sai sharin achyin ga matsun ni hte maren, sum ni galaw na matu kawng ni de pru sa nhtawm marau, tsanlun, maihting, namhtan hte kaga hpun ni hta na lakung lakying ni hpe la wa mi.? Ref 8:14-15: Jaw 23:33-36, 39-43; Trj 16:13-15.
16 Dai re ai majaw amyu masha ni mung lakung lakying ni hpe la wa nhtawm tinang nang a nta numgaw ntsa e mung, tinang nang a wang kata e mung, Nawku Htingnu wang kata e mung, Hka Chyinghka hte Ehprim Chyinghka makau na dam lada re ai shawa shara hta sum ni hpe gap da ma ai. 17 Bawng dung hkrum ai kaw nna bai nhtang wa ai amyu masha ni yawng gaw sum ni hpe gap nna rawng nga ma ai. Nun a kasha Yawshu a aprat kaw nna ndai shani du hkra, ndai lang shawng galaw ai rai nna, masha shagu mung mau kajawng ai hte kabu gara nga ma ai. 18 Shanhte gaw poi hpang ai shani kaw nna hpang jahtum shani du hkra, Karai Kasang a Tara daw daw chyen chyen hpe shani shagu hti ma ai. Shanhte gaw sanit ya tup poi galaw ma ai, matsat ya shani gaw Tara nga ai hte maren hpungdim poi galaw ma ai.