13
1 Amyu masha ni hpe Mawshe a Tara ja ja hti dan mu ai shaloi, dai laika hta Amon hte Moba masha kadai mung Karai Kasang a amyu masha ni hte galoi mung matut mahkai lu na ahkang n nga nga ai. Ref 13:1-2: Trj 23:3-5.
2 Dai gaw hpa majaw nga yang, Amon hte Moba masha ni gaw Egutu mung kaw nna pru wa ai hkrun lam hta Israela amyu masha ni hpe lusha hte ntsin n jaw ai hta sha n-ga, shing rai galaw na malai, shanhte gaw Israela hpe matsa na matu Balam hpe gumhpraw jaw ma ai; rai ti mung anhte a Karai Kasang gaw matsa mawa ga hpe shaman ga shatai kau ya nu ai. Ref 13:2: Bhk 22:1-6.
3 Dai tara hti ai lam hpe Israela amyu masha ni na ai shaloi, maigan masha ni yawng hpe Israela hpawng kaw nna jahka kau mu ai.
4 Nawku Htingnu a sut gawk ni hpe hpareng ai hkinjawng Eliashib gaw shaning na na kaw nna Tobia hte kanawn wa sai wa rai nga ai.
5 Shi gaw Tobia hpe Nawku Htingnu hta lang ai nsi naisi hkungga, manam pyaw ai baw hte arung arai hpe mung, hkinjawng ni a matu hkungga ni hpe mung, Lewi masha ni, Nawku Htingnu na mahkawn mangoi chye ai ni hte Nawku Htingnu sin ai ni hpe jaw ya ai htam shi hta na htam mi re ai nai mam nsi naisi, sabyi ntsin hte tsanlun sau re ai ni hpe tawn da na matu shatawng shada da ai gawk kaba langai mi lang na ahkang jaw ya wu ai.
6 Ndai lam byin nga ai aten hta, ngai chyawm gaw Yerusalem e n nga nngai; hpa majaw nga yang, Babelon Hkawhkam Artazazi hkaw dung ai sumshi lahkawng ning hta, shi kaw shiga tang madun na matu ngai nhtang shang wa nngai. Tsawmra mi na ai hpang, shi kaw na ahkaw ahkang lu la ai hte,
7 Yerusalem mare de nhtang wa nngai. Dai yang e Eliashib gaw Tobia hpe Nawku Htingnu kata na gawk langai lang na ahkang jaw ya ai hpe ngai wa mu kajawng nngai.
8 Ngai gaw masin yu kahtet ai hte Tobia madu tawn ai arung arai ni yawng hpe htawm shapraw kau ya nngai.
9 Ngai gaw gawk dai ni hpe htung hte maren jasan jaseng kau nhtawm Nawku Htingnu hte seng ai arung arai, shadung hkungga ni hte manam pyaw ai baw ni hpe bai jashawn da na matu hkang da nngai.
10 Amyu masha ni mung Nawku Htingnu na mahkawn mangoi chye ai ni hte kaga Lewi masha ni hpe malu masha law ram hkra n jaw ya ai majaw shanhte gaw Yerusalem mare kaw nna pru mat wa nhtawm shanhte a yi sun hkauna nga ai de nhtang mat wa shajang ma ai hpe ngai chye nngai. Ref 13:10: Trj 12:19.
11 Ngai gaw Nawku Htingnu hpe n gawn n sawn di kau shangun mu ai du salang ni hpe daru sharin we ai. Ngai mung Lewi masha ni hte mahkawn mangoi chye ai ni hpe Nawku Htingnu de bai woi la nhtawm amu bai galaw shangun we ai.
12 Israela amyu masha yawng mayawng hte mung Nawku Htingnu sut gawk ni de nai mam nsi naisi htam shi hta na htam mi, sabyi ntsin hte tsanlun sau re ai ni hpe bai la sa shajang ma ai.
13 Ngai gaw sut gawk ni hpe hpareng na matu ndai masha ni hpe san tawn nngai: dai ni gaw hkinjawng Shelemia, Tara sara ninghkrin Zadok, Lewi masha Pedaia; Matania a kashu, Zahkura a kasha Hanan gaw shanhte hpe karum shingtau na wa rai nga ai.
Ndai masha ni gaw myit malang nga ma ai rai nna shanhte a hpu nau amu galaw masha ni hpe karan jaw ai amu hta kam mai nga ai gaw ngai chye nga nngai.
14 Nye a Karai Kasang e, na a Nawku Htingnu a matu mung, dai hte seng ai nawku daw jau ai amu ngu ai ngai galaw ni ai ndai amu yawng hte hpe adum nga u law.
15 Dai aten, Yuda mung hta Bansa Nhtoi e sabyi htumbyen kabye ai hpe mung, kaga ni mung nsi naisi, sabyi ntsin, sabyi si, maihpang si hte kaga arung arai ni hpe shanhte a lawze ni hta htaw let Yerusalem mare de yu wa nga ma ai hpe mung ngai mu nngai. Ngai gaw shanhte hpe Bansa Nhtoi hta arai hpa mung n dut na matu sadi jaw ni ai.
16 Turu mare masha nkau mi gaw Yerusalem mare hta nga nga ma ai rai nna shanhte mung nga hte kaga arai amyu baw hkum sumhpa la sa ai hte Bansa Nhtoi e anhte a amyu masha ni hpe sa dut jaw ma ai.
17 Ngai mung Yuda ningbaw ni hpe, ?Nanhte galaw nga ai n hkru ai amu hpe yu yu mu! Nanhte gaw Bansa Nhtoi hpe n chyoi n pra shangun nga myit hka!
18 Ndai lam a majaw, Karai Kasang gaw nanhte a kaji kawa ni hpe ari jaw nna ndai mare hpe jahten sharun kau nga ai. Ya rai tim, Bansa Nhtoi hpe awu asin galaw let Karai Kasang a pawt sindawng ai hpe Israela a ntsa e grau nna du shangun na matu nanhte shadut shatsang nga myit hka!,? ngu nna daru let tsun wu ai.
19 Dai re ai majaw Ngai gaw dai Bansa Nhtoi shagu dai nhtoi du magang nna nrim rim rai wa yang, mare chyinghka ni hpe la da na hte Bansa Nhtoi lai mat wa ai shani du hkra bai n hpaw na lam hkang da se ai. Bansa Nhtoi hta e, mare kata de hpa lit mung n la shang wa na matu, nye a masha nkau mi hpe chyinghka lam ni hta atsawm yu na matu tawn da nngai.
20 Gun rai amyu hkum sumhpa dut ai hpaga ga ai ni gaw bunghku a shinggan e manga ya shana de kalang, lahkawng lang dang sa dut ma ai.
21 Ngai gaw shanhte hpe, ?Ndai yang e jahpawt nhtoi htoi hkra sa la nga ai gaw hpa akyu mi n nga nga ai. Nanhte ndai zawn bai galaw shakut myit dai rai yang, nanhte hpe n-gun hte ninghkap na made ai,? ngu nna sadi jaw wu ai. Dai aten kaw nna, Bansa Nhtoi e shanhte n sa mat ma ai.
22 Ngai gaw Lewi masha ni shanhte hkum jasan jaseng na matu mung, Bansa Nhtoi hpe teng teng chyoi pra nga na matu mung chyinghka ni hpe sin na matu mung, hkang da se ai.
O Karai Kasang, ndai lam a majaw ngai hpe dum nga e law, na a galu kaba ai tsaw ra myit a majaw ngai hpe matsan dum la e law.
23 Dai aten e, Yuda lasha law law ni mung Ashdod, Amon hte Moba numsha ni hpe hkungran la nga ma ai hpe ngai mu nngai. Ref 13:23-25: Pru 34:11-16; Trj 7:1-5.
24 Shanhte a kashu kasha ka-ang hkup daram gaw Ashdod ga shaga ma ai, nkau mi kaga ga shaga ma ai majaw anhte a ga kaning ngu shaga na n chye ma ai.
25 Ngai gaw dai lasha ni hpe daru sharin ai, shanhte hpe matsa dagam ai, anu kayat ai hte shanhte a kara ni hpe gang baw kau ya we ai. Dai hpang ngai gaw shanhte mung, shanhte a kashu kasha ni mung, maigan masha ni hte kayau kaya rai dinghku galoi mung n de shajang na matu Karai Kasang a mying nsang hta shanhte hpe dagam shaka shangun nngai.
26 Ngai gaw, ?Hkawhkam Shawlumon hpe yubak galaw shangun ai mung maigan num ni a majaw rai nga ai. Shi gaw kaga masha amyu baw ni a hkawhkam ni hta grau nna galu kaba ai wa rai nga ai. Karai Kasang gaw shi hpe tsaw ra ai hte Israela amyu yawng a matu shi hpe hkawhkam shatai nu ai; ti mung shi gaw yubak kata de lup shang mat wa nu ai. Ref 13:26: 2Sa 12:24-25; 1Hk 11:1-8.
27 Anhte gaw nanhte a kasi hkan let anhte a Karai Kasang a ga hpe n madat ai sha maigan numsha ni hpe hkungran la mai nga ga ni?,? ngu nna tsun wu ai.
28 Yoiada gaw Hkinjawng Kaba Eliashib a kasha rai nga ai, rai ti mung Yoiada a shadang sha langai mi gaw Bet Horon mare na Sanbalat a shayi sha hpe hkungran la nga ai; dai rai nna ngai gaw Yoiada hpe Yerusalem kaw nna pru mat wa shangun nngai. Ref 13:28: Neh 4:1.
29 Karai Kasang e, ndai masha ni gaw hkinjawng aya hpe mung, hkinjawng ni hte Lewi masha ni hte tawn da ai ga shaka hpe mung kaning rai awu asin di kau nga masai hpe adum nga u law.
30 Ngai gaw maigan arung arai shagu lang nga ai amyu masha ni hpe jasan jaseng ya nngai; hkinjawng ni hte Lewi masha ni a matu hkan sa na tara ni hkyen lajang ya ai rai nna, langai hte langai gaw tinang a lit hpe chye nga ma ai.
31 Ngai gaw htuk manu ai aten ni hta, shagu hkungga nat na hpun hte shawng si ai nsi naisi hte shawng myin ai namsi namsaw ni la sa na matu lajang da nngai.
O Karai Kasang e, ndai amu yawng mayawng hpe adum ya nga rit; dai amu a majaw ngai hpe chyeju jaw ya e law.