10
(Mrk 3:13-19; Luk 6:12-16)
1 Madu Yesu gaw shi a sape shi lahkawng hte hpe shaga la nna, n seng ai nat ni hpe shaden kau lu mu ga hte, ana ahkya amyu myu, machyi makaw amyu myu hpe shamai shatsai lu na ahkang shanhte hpe jaw mu ai.
2 Ya dai kasa shi lahkawng a mying ni gaw ndai ni rai nga malu ai; shawng na wa Petru ngu ai Simun hte shi a kanau Andre; Zebedi a kasha Yaku hte shi a kanau Yawhan;
3 Hpilip hte Barhtolume; Htawma hte kang hta ai wa Mahte; Alhpe a kasha Yaku hte Htade;
4 myu tsaw myit grai rawng ai Kanan masha Simun hte Yesu hpe ap kau ai Yuda Iskarut hte rai ma ai.
(Mrk 6:7-13; Luk 9:1-6)
5 Dai shi lahkawng hte hpe Yesu shangun dat nna matsun dat mu ai gaw, ?Tara Maigan masha ni nga ai buga ginra hte kaga Samari mare ni hta mung hkum shang hkum sa mu.
6 Shing rai na malai, Israela amyu hta na dam mat ai sagu ni kaw she shawng sa mu.
7 Pru hkawm nna ?Sumsing lamu a Mungdan gaw ni wa magang ra ai,? ngu nna hkaw tsun dan mu.
8 Machyi makaw hkrum ai ni hpe shamai ya mu; si mat ai ni hpe sharawt dat mu; manggang kap ai ni hpe jaseng ya mu; nat ni hpe shaden kau mu; jahpu n jaw ai sha nanhte lu la manit ai rai nna jahpu n hpyi ai sha she jaw ya mu.
9 Nanhte a sumbu ni hta, aja, gumhpraw, magri dingsen ni hkum gun da mu;
10 hkrun lam na matu nhpye hte palawng shajan hkum gun, kyepdin hte dawhkrawng mung hkum lang myit: hpa majaw nga yang, amu galaw ai wa gaw shi a shahpa lu la ging nga ai. Ref 10:10: 1Ko 9:14; 1Tm 5:18.
11 Gara mare, kahtawng hta rai ti mung, nanhte shang ai shaloi nanhte hpe hkap tau hkalum la mayu ai wa hpe tam mu: dai shara na pru wa ai ten du hkra shi hte rau nga mu.
12 Nanhte nta langai langai hta shang myit yang, ?Ngwi pyaw nga myit ga,? ngu nna tsun mu.
13 Dai nta na masha ni nanhte hpe hkap hkalum la myit yang gaw, nanhte a shaman ai ga shanhte a ntsa e nga nga u ga: rai ti mung, nanhte hpe shanhte n hkalum la ma yang gaw nanhte a shaman ai ga nanhte kaw bai nhtang wa u ga.
14 Nanhte hpe n hkap hkalum la nna nanhte a ga hpe n madat yang gaw, dai nta kaw na, shing n rai, dai mare kaw na pru wa nhtawm, nanhte a lagaw hta kap ai nhpu hpe ahpu da mu. Ref 10:14: Neh 5:13; Mrk 6:11; Kas 13:51.
15 Ngai nanhte hpe teng teng tsun made ai gaw, tara dara ai nhtoi hta e dai mare masha ni gaw Sodom hte Gomora mare hta grau nna yubak ari hkrum sha na mara ai. Ref 10:15: Mat 11:22,24.
(Mrk 13:9-13; Luk 21:12-17)
16 ?Madat mu! chyahkyawn ni a ka-ang de sagu hpe zawn, ngai nanhte hpe shangun dat made ai. Dai rai nna nanhte gaw lapu zawn hpaji rawng nna hkrudu zawn myit sumnung shingdi nga mu. Ref 10:16: Luk 10:3; Rom 16:19; 1Ko 14:20; Ehp 5:15.
17 Masha ni hpe sadi nga mu, hpa majaw nga yang, shanhte gaw nanhte hpe rim la nna tara rung de ap kau na mara ai rai nna, tara jawng ni hta e nanhte hpe anu kayat na marin dai. Ref 10:17: Mrk 13:9; Luk 12:11; Kas 5:40.
18 Nye a majaw nanhte hpe up hkang ai du ni hte hkawhkam ni a man e jeyang na matu dun bang wa ai hkrum na marin dai. Dai rai nna shanhte a man e mung, tara maigan masha ni a man e mung, dai Kabu Gara Shiga hpe tsun dan na ahkang lu na marin dai.
19 Nanhte hpe ap kau myit dai shaloi, kaning ngu nna, hpa hku tsun lu na hpe hkum tsang myit; dai aten du jang, hpa tsun na gaw, nanhte hpe shadum na marin dai.
20 Hpa majaw nga yang, nanhte tsun na ga ni gaw nanhte a ga ni n rai, nanhte a Kawa a Wenyi gaw nanhte hta ga tsun nga na ra ai.
21 Masha ni gaw tinang a kahpu kanau shada da langai hte langai si na matu ap kau na mara ai. Kawa ni mung dai hte maren kasha ni hpe, kasha ni mung kawa ni hpe si na matu ap kau na mara ai. Ref 10:21: Mat 10:35-36; Luk 21:16; Mrk 13:22.
22 Nye a majaw masha shagu gaw nanhte hpe n dawng n wawm na mara ai. Rai ti mung, htum hkra shakut sharang ai wa gaw, hkye hkrang la ai hkrum na ra ai. Ref 10:22: Mat 24:13; Mrk 13:13; Luk 21:17.
23 Mare langai mi hta nanhte hpe zingri zingrat myit yang gaw, kaga de hprawng sa mu. Nanhte hpe ngai teng teng tsun made ai gaw, Israela mare nga manga hte hta nanhte galaw ra ai amu n ngut kre shi yang, dai Masha Kasha gaw du na ra ai.
24 Sape gaw sara hta, grau ai n rai; mayam mung shi a madu hta grau ai n rai. Ref 10:24: Luk 6:40; Yhn 13:16; 15:20.
25 Dai rai nna sape gaw shi a sara zawn mayam gaw shi a madu zawn rai nga a yang gaw, myit dik ram nga ai. Shanhte gaw nta madu wa hpe Bezebula ngu mu yang gaw, shi a nta masha ni hpe grau n kaja dik ai mying ni shamying na mu ai n rai hka! Ref 10:25: Mat 12:24; Mrk 3:22; Yhn 14:52.
(Luk 12:2-7)
26 Dai re ai majaw, shanhte hpe hkum hkrit mu, Ya magap da ai hpa mung dan dawng wa na ra ai, makoi magap tawn ai rai shagu mung dan leng wa na ra ai. Ref 10:26: Luk 8:17.
27 Ngai nanhte hpe nsin kata e tsun dan ai lam hpe nhtoi hta e tsun dan mu: nanhte machyi shim ai hku na la ai lam hpe nta numgaw ntsa kaw nna ndau shana lu na rai myit dai.
28 Nanhte a hkum hkrang hpe sha sat kau nna Wenyi hpe n sat kau lu ai ni hpe hkum hkrit mu: Wenyi hte hpawn hkum hkrang hpe ngarai mung hta e jahten kau lu ai wa hpe grau nna hkrit nga mu.
29 U tsa lahkawng hpe pyeksan langai mi hte mari lu ai n rai ni? Rai ti mung, nanhte a Kawa a myit ra ai hku n rai yang gaw, dai ni hta na langai mi pyi ga de n hkrat ma ai.
30 Nanhte a baw na kara singgawng mahkra hpe pyi gaw hti da nu ai.
31 Dai re ai majaw hkum hkrit myit; u tsa law law hta nanhte grau hpu nga myit dai!
(Luk 12:8-9)
32 Kadai rai ti mung, masha ni a man e ngai hpe yin la ai wa hpe gaw, dai hte maren Sumsing lamu na Nye Wa a man e ngai yin la na we ai.
33 Masha ni a man e ngai hpe nyet kau ai wa hpe chyawm gaw, sumsing lamu e nga ai, nye Wa a man e ngai nyet kau na we ai.
(Luk 12:51-53; 14:26-27)
34 Mungkan ga de ngwi pyaw sim sa ai lam jaw na matu ngai du sa ai ngu nna hkum myit nga myit; ngwi pyaw sim sa ai lam jaw na matu ngai du sa nngai n rai, nhtu hpe mahtang ngai la sa ring ngai.
35 Kawa ni hte shadang sha ni, kanu ni hte shayi sha ni, kanam ni hte kamoi ni, ga law bra shangun na matu, ngai sa ring ngai rai nna, Ref 10:35: Mik 7:6.
36 masha langai wa a n kaja dik ai hpyen ni gaw, tinang a nta dinghku masha ni rai na mara ai.
37 Kadai mung ngai hpe tsaw ra ai hta, kanu kawa hpe grau tsaw ra ai wa gaw, nye a sape tai na matu n ging n dan nga ai; ngai hpe tsaw ra ai hta, shayi shadang sha hpe grau tsaw ra ai wa mung, nye a sape tai na n ging n dan nga ai.
38 Tinang a wudang hpai let, nye a hpang n hkan ai wa gaw, nye a sape tai na n ging n dan nga ai. Ref 10:38: Mat 16:24; Mrk 8:34; Luk 7:23.
39 Tinang a asak hpe lahpawt ai wa gaw, asak sum na ra ai; nye a jaw e, tinang a asak jasum ai wa chyawm gaw, asak mu la na ru ai. Ref 10:39: Mat 16:25; Luk 17:33; Yhn 12:25.
(Mrk 9:41)
40 Nanhte hpe hkap hkalum la ai wa kadai mung, ngai hpe hkap hkalum la ai wa rai nga ai; ngai hpe hkap hkalum la ai wa kadai mung ngai hpe shangun dat ai wa hpe hkap hkalum la ai wa rai nga ai. Ref 10:40: Luk 9:48; Yhn 12:44; Gal 4:16.
41 Kadai mung, Karai Kasang a myihtoi rai nga ai hpe tau nna, Karai Kasang a myihtoi wa hpe hkap hkalum la ai wa gaw, shi mung myihtoi a shabrai hpe lu la na ru ai. Ding hpring ai wa a myi man hpe tau nna, ding hpring ai wa hpe hkap hkalum la ai wa gaw, ding hpring ai wa a shabrai lu la na ru ai.
42 Ngai nanhte hpe teng teng tsun made ai gaw, nye a sape myi man hpe tau nna, nye a sape ni hta na kaji dik ai wa hpe ntsin katsi gawm mi sha jaw wu yang, shi gaw nye a sape rai nga ai majaw, dai jaw ai wa gaw shabrai teng teng n lu la ai nga na n rai,? ngu nna tsun mu ai.