MAHTE A LAIKA
(MATTHEW)
Ga Nhpaw
Mahte ka lajang da ai Kabu Gara Shiga Laika gaw, Ga Shaka Dingsa chyum mungga hta, Karai Kasang gaw shi a amyu masha ni hpe jaw da sai ga sadi ni hte maren, du sa wa na ra ai Hkye Hkrang la ai Madu gaw Madu Yesu nan rai nga sai lam Kabu Hpa Shiga hpe tsun ndau ya nga ai. Ndai Kabu Gara Shiga laika gaw, Yesu shangai wa nna asak hkrung shamu shamawt nga lai wa sai Yuda amyu masha ni a matu chyu sha n rai, mungkan ting a matu mung rai nga ai.
Mahte a Laika gaw atsawm sha jahtuk jahkrak nna ka da ai laika re. Ndai laika hpe Yesu a labau hte hpang nna, shi shangai wa ai lam, hkalup hkam ai hte agung alau hkrum ai lam, de a hpang, Galile mung e shi hkaw tsun sharin shaga, shamai shatsai, magam gun ai lam ni hpe ka matsing da nga ai.
Dai hpang Kabu Gara Shiga Laika ndai gaw, Yesu a hkrun lam hpe Galile mung kaw nna Yerusalem mare de rai wa ai lam, Yesu a hpang jahtum na bat laman hta byin wa ai lam ni hte shi si hkam nna bai hkrung rawt wa ai hta tsaw dik ai pungding wa madi ai hku ka matsing da nga ai.
Ndai Kabu Gara Shiga Laika gaw Yesu hpe Karai Kasang a jep ai Tara a lachyum htai dan na hte sumsing lamu mungdan a lam sharin ya na ahkang lam ni law malawng hpe ginlam langai hte langai san san di nna lam kaba manga garan nhtawm ka shinggyin da nga ai. (1) Bum ntsa na tara hkaw ga. Dai hta sumsing lamu mungdan a mungchying sha ni hte seng ai arawn asam, lit ni, hkam sha lu na ahkaw ahkang ni hte asak hkrung lam a jahtum na bandung shadaw a lam ni lawm nga ai. Mat 5-7; (2) Sape shi lahkawng hte hpe shanhte galaw sa wa na sasana magam bungli hte seng nna matsun dat ai lam ni, Mat 10; (3) Sumsing lamu mungdan a lam ga shadawn ni. Mat 13; (4) Sape tai ai ngu ai a lachyum hte seng nna sharin ya ai lam. Mat 18; (5) Ndai prat a hpang jahtum nhtoi a lam hte sumsing lamu a mungdan de da na ra ai lam sharin shaga ai ga ni rai nga ai. Mat 24-25.
1
(Luk 3:23-38)
1 Ndai gaw Abraham a aru arat rai nga ai Dawi a matu mara Yesu Hkristu a labau gawn ai hta lawm ai kaji kawa ni a mying jahpan rai nga ai.
2 Abraham a kasha gaw Isak, Isak a kasha gaw Yaku, Yaku a kasha ni gaw Yuda hte shi a kahpu kanau ni rai ma ai. Ref 1:2: Nin 21:2-3; 25:26; 29:35.
3 Yuda hte Htama kaw na shaprat ai kasha ni gaw Hparet yan Zerak; Hparet a kasha gaw Hesrum; Hesrum a kasha gaw Aram: Ref 1:3 Nin 38:27; Rut 4:18; 1Hl 2:5.
4 Aram a kasha gaw Aminadab; Aminadab a kasha gaw Nashon; Nashon a kasha
5 gaw Salmon hte Rahab kaw na shaprat ai kasha gaw Bua; Bua hte Ruhta kaw na shaprat ai kasha gaw Obed: Obed a kasha gaw Yese:
6 Yese a kasha gaw Dawi Hkawhkam; Dawi hte Uria a madu jan kaw na shaprat ai kasha gaw Shawlumon:Ref 1:6: 1Sa 16:1; 17:12; 2Sa 12:24.
7 Shawlumon a kasha gaw Rehoboam; Rehoboam a kasha gaw Abia; Abia a kasha gaw Asap; Asap a kasha gaw Yosahpat Ref 1:7: 1Hl 3:10.
8 Yosahpat a kasha gaw Yoram; Yoram a kasha gaw Uzia; Uzia a kasha gaw Yohtam:
9 Yohtam gaw Ahaza hpe shaprat wu ai; Ahaza gaw Hezekia hpe shaprat wu ai.
10 Hezekia a kasha gaw Manashe; Manashe a kasha gaw Amon: Amon a kasha gaw Yoshia; Ref 1:10: 2Hk 20:21; 1Hl 3:13.
11 Yoshia gaw Babelon mare de Israela masha ni hpe bawng dung na matu rim woi mat wa ai ten hta Yehoiahkin hte shi a kahpu kanau ni hpe shaprat wu ai. Ref 1:11: 2Hl 24:14-16; 1Hl 3:15-16; Yer 27:20; Dan 1:2.
12 Babelon mare de bawng dung na matu Israela amyu masha ni hpe rim woi mat wa ai hpang e, Yehkonia gaw Salahtila hpe shaprat wu ai. Salahtila a kasha gaw Zerubabela; Ref 1:12 1Hl 3:17; Eze 3:3; Neh 12:1; Hag 1:1.
13 Zerubabela a kasha gaw Abiu; Abiu a kasha gaw Eliakim; Eliakim a kasha gaw Azura:
14 Azura a kasha gaw Zadok: Zadok a kasha gaw Ahkim: Ahkim a kasha gaw Eliu;
15 Eliu a kasha gaw Eleaza; Eleaza a kasha gaw Mahtan: Mahtan a kasha gaw Yaku;
16 Yaku gaw Meshia ngu ai Yesu a kanu hpe hkungran la ai Yosep hpe shaprat wu ai.
17 Shing rai, Abraham a prat kaw nna Dawi prat du hkra; ahtik labau shi mali; bai, Dawi a prat kaw nna Babelon e bawng dung nga ai prat du hkra ahtik labau shi mali; bai, Babelon e bawng dung nga ai kaw nna Meshia shangai wa ai ten du hkra ahtik labau shi mali rai nga ai.
(Luk 2:1-7)
18 Ya, Yesu Hkristu kaning rai shangai chyinghkai wa ai lam ning rai nga ai; Shi a kanu Mari gaw Yosep hte mahtan da nga ai rai nna, shan garai n hkungran ai majaw garai n kanawn yang, Mari gaw dai Chyoi Pra ai Wenyi a majaw na-um nasin rai wa sai. Ref 1:18: Luk 1:27,35.
19 Yosep gaw myit ding hpring nna teng man ai hku galoi mung galaw ai masha langai mi rai nga ai hte maren, shi gaw Mari hpe masha a man e sari jahpoi ai lam n galaw mayu wu ai majaw, shi hte mahtan da ai lam hpe akatsi sha lagyim dawm kau na hkyen nga ai. Ref 1:19: Trj 24:1; 5:31; 19:7; Mrk 10:4.
20 Ya, shi ndai lam hpe naw myit aru yu nga yang, Madu a lamu kasa langai mi yupmang hta shi hpe hkum shadan dan nna, ?Dawi a kasha Yosep e, Mari hpe na a madu jan hku hkap la na hkum hkrit et, hpa majaw nga yang, shi a na-um nasin gaw, dai Chyoi Pra Ai Wenyi a majaw byin wa ai rai nga ai. Ref 1:20: Luk 1:35.
21 Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai,? ngu wu ai. Ref 1:21: Kas 4:12; 13:23,38.
22 Ndai lam ni gaw Madu nan myihtoi a n-gup hku nna tsun da sai ga dik wa u ga she byin wa sai.
23 Shi gaw, ?Yu u, dai hkawn sek gaw na-um nasin rai wa nna, shadang sha shangai na ra ai, shi a mying, Emanuela ngu shamying ya na maru ai,? nga ai. De a lachyum gaw, ?Karai Kasang anhte hte rau rai nga ai!,? nga ai re. Ref 1:23: Esa 7:14.
24 Dai rai nna Yosep gaw, yup pyaw ai kaw na rawt wa nhtawm, dai Madu a lamu kasa shi hpe hkang da wu ai hte maren, Mari hpe la wu ai.
25 Rai ti mung, dai shadang sha hpe shangai shaprat ai ten du hkra, shi hte hkum shan hku n kanawn mazum ai sha nga nga ai; dai shadang sha hpe shi Yesu ngu nna shamying wu ai. Ref 1:25: Esa 13:2; Luk 2:7,21.