14
(Mat 26:1-5; Luk 22:1-2; Yhn 11:45-53)
1 Ya, Shalai Wa ai Poi hte matsi n rawng ai muk sha ai Azuma poi du na lahkawng ya sha ra sai. Shaloi hkinjawng agyi ni hte Tara Sara ni gaw Yesu hpe kaning di nna makoi magap ai hku rim la nhtawm sat kau lu na lam tam nga ma ai. Ref 14:1: Pru 12:1-27; Mat 26:2; Luk 22:1; Yhn 11:55.
2 Rai ti mung shanhte gaw, mung masha ni kabring kabrawng rai wa na hpe tsang ai
majaw, ?Poi laman hta anhte dai n galaw
ga,? nga nna shanhte tsun ma ai.
(Mat 26:6-13; Yhn 12:1-8)
3 Yesu gaw Behtani kahtawng na manggang ana kap yu ai Simun a nta e du nga ai. Ya,
Yesu lusha sha dung nga yang, numsha
langai mi gaw, nachying hpu ging nna
manam pyaw ai mura nardu sau jet hpring
hkra rawng ai lunghpraw ndum langai mi
lang nna shang wa ai. Shi gaw dai hpe
gang daw nna Yesu a baw hta e ru bun
ya wu ai. Ref 14:3: Mat 26:6; Luk 7:37-38; Yhn 12:1,3.
4 Dai yang na masha nkau mi yu pawt nga ma ai hte, ?Ndai zawn manam
pyaw ai sau hpe lahpawt lama di kau
ai gaw hpa akyu nga ai i?
5 Dai hpe gumhpraw lap masum tsa hte dut la nhtawm, lu ai gumhpraw hpe
matsan mayan ni hpe karan jaw lu
na rai nga ai,? nga nna shada da
tsun hkat ma ai. Bai numsha hpe
mung shanhte aja wa mara shagun
daru kau mu ai.
6 Rai ti mung Yesu gaw, ?Dai numsha nga nga u ga! Nanhte hpa rai nna shi
hpe shatsang nga myit ta? Shi gaw kaja
ai hte tsawm htap ai amu nye a matu
galaw nu ai.
7 Matsan mayan ni gaw nanhte hte rau galoi mung anga nga na ma ai rai nna,
nanhte ra ai aten galoi rai tim shanhte
hpe karum la lu myit dai. Rai ti mung
ngai gaw nanhte hte rau tut nawng
nga nga lu na n rai. Ref 14:7: Trj 15:11.
8 Shi gaw shi rai lu ai hte maren galaw nu ai; shi gaw manam pyaw ai sau nye
a hkum hta ru bun nna lup makoi na
shawng e hkyen lajang ai bungli galaw
ya ni ai.
9 Ngai nanhte hpe teng teng tsun made ai gaw, dai Kabu Gara Shiga hpe
mungkan ting hkaw tsun ai shara
shagu hta e, shi hpe dum na matu
ya shi galaw ai amu hpe hkai dan na
maru ai,? ngu nna tsun mu ai.
(Mat 26:14-16; Luk 22:3-6)
10 Shaloi sape shi lahkawng hta na langai mi rai nga ai Yuda Iskarut gaw, Yesu hpe
hkinjawng agyi ni a lata de ap ya na matu
shanhte hpang de pru sa wa ai.
11 Shanhte gaw shi sa tsun ai ga hpe na ma yang, kabu gara nga ma ai rai nna
shi hpe gumhpraw jaw na ga sadi hkam
la ma ai. Dai rai nna Yesu hpe kaning di
nna shanhte a lata de ap ya lu na, ahkaw
ahkang ginjang kaja tam magang nga ai.
(Mat 26:17-25; Luk 22:7-14, 21-23; Yhn 13:21-30)
12 Ya Shalai Wa Ai Sagu Kasha hkungga ni sat nna Matsi n rawng ai Muk sha ai Azuma poi a nnan shani e, Yesu a sape ni gaw, ?Dai
Shalai wa ai Poi sha na, gara shara hta e
na a matu anhte hpe sa shachyip shangun mayu
nga n ta?,? ngu nna shi hpe san mu ai.
13 Shaloi Yesu gaw shi a sape lahkawng hpe, ?Dai mare de sa masu, ntsin di bu hpai ai la
langai mi gaw nan hpe hkap tau la na ra ai.
14 Shi kaw hkan nang wa mu. Shi shang wa ai nta na nta madu wa hpe nye a sape ni hte rau
dai Shalai Wa Ai Poi ngai sha lu na, gawk
kanang rai ta? nga nna sara gaw san shangun
dat mi ai ngu mu.
15 Shaloi shi gaw, lajang shachyip jahting da ai ntsa gawk kaba langai mi nan hpe madun na ra
ai. Dai yang e anhte a matu ra mara shachyip
da mala,? ngu nna matsun nhtawm shangun dat
mu ai.
16 Dai sape yan pru sa wa nna mare de shang wa ma yang, Yesu shan hpe tsun da mu ai hte maren
mu ma ai rai nna, dai Shalai Wa Ai Shana Shat
Sha Poi shachyip da ma ai.
17 Ya nrim rim rai yang dai sape shi lahkawng hte rau shi sa du ai.
18 Shanhte sha ku grup dung nna sha nga ma yang, Yesu gaw, ?Ngai nanhte hpe teng
teng tsun made ga, ngai hte rau sha nga
ai, nanhte hta na marai langai mi, ngai
hpe ap kau na ra ai,? ngu mu ai.
19 Sape ni myit yawn nna, langai hte langai, ?Dai wa gaw kaja wa ngai rai na a ni?,?
ngu nna Madu hpe san mu ai.
20 Yesu gaw, ?Dai wa gaw nanhte shi lahkawng hta na langai wa mi rai nna, shi a muk hpe
ngai hte rau wan hta tsing manaw sha nga ai
wa rai nga ai.
21 Dai Masha Kasha gaw Chyum Laika ni hta tsun da nga ai hte maren si hkam na ra ai;
rai ti mung, dai Masha Kasha hpe ap kau ai
wa hta hkrithpa dingnye nga na ra ai. Dai
masha n shangai taw gaw, shi a matu grau
kaja nga ai,? ngu nna shanhte hpe tsun mu
ai. Ref 14:21: Mat 26:24; Luk 22:22.
(Mat 26:26-30; Luk 22:14-20; 1Ko 11:23-25)
22 Shanhte sha nga ma yang Yesu gaw muk la nna Karai Kasang a chyeju hpe shakawn let akyu
hpyi nhtawm, ahkyep alep nna sape ni hpe jaw
let, ?Ndai la sha mu, ndai muk gaw nye a hkum
rai nga li ai,? ngu nna tsun mu ai.
23 Dai hpang gawm hpe mung shi la nna, Karai Kasang a chyeju hpe shakawn ngut jang, shanhte hpe jaw mu ai; shanhte yawng dai hta na lu ma ai.
24 Yesu gaw, ?Ndai gaw law law a matu ru kau ya ai, Karai Kasang a ga shaka hpe dazik dawk
ya ai nye a asai rai nga li ai. Ref 14:24:
Pru 24:8; Yer 31:31-34; Luk 22:20;
1Ko 11:25; 2Ko 3:6; Heb 8:12.
25 Nanhte hpe ngai teng teng tsun made ga, Karai Kasang a Mungdan hta e sabyi nnan
hpe ngai lu lu ai nhtoi du hkra, ndai
sabyi hpe ngai galoi mung bai lu lu na
n rai,? ngu nna tsun mu ai.
26 Dai hpang shanhte gaw mahkawn mangoi langai mi mahkawn shakawn ngut jang, Tsanlun bum
de pru sa wa ma ai.
(Mat 26:31-35; Luk 22:31-34; Yhn 13:36-38)
27 Yesu gaw shanhte hpe, ?Nanhte yawng hprawng mat nna ngai hpe kau tawn da na marin dai;
hpa majaw nga yang, ?Karai Kasang gaw sagu
rem wa hpe sat kau nna, sagu ni ayai aya bra
mat na mara ai,? nga nna Chyum Laika ni hta
ka da nga ai. Ref 14:27: Zeh 13:7; Mat 26:31.
28 Rai ti mung, ngai bai sharawt la hkrum ai hpang e, Galile mung de nanhte a shawng e,
sa wa magang na nngai,? ngu nna tsun mu
ai. Ref 14:28: Mrk 16:7; Mat 28:16.
29 Petru gaw, ?Kaga ni yawng dai hku galaw ma ti mung, ngai gaw nang hpe galoi mung
n kabai kau tawn da na nngai,? ngu nna
htan wu ai.
30 Yesu gaw Petru hpe, ?Ngai nang hpe teng teng tsun de ga, dai na pyi u lahkawng lang
garai n goi yang, nang ngai hpe n chye nngai
nga nna masum lang nyet kau na rin dai,?
ngu nna tsun wu ai.
31 Petru chyawm gaw, ?Nang hte rau ngai si hkra rai ti mung, ngai nang hpe n nyet
kau na nngai!,? ngu nna grau nna aja awa
tsun wu ai.
Kaga ni yawng mung dai hte maren tsun nang ma ai.
(Mat 26:36-46; Luk 22:39-46)
32 Getsemane mying ai sun de shanhte du ma ai rai nna, Yesu gaw, ?Ngai akyu hpyi
nga yang, nanhte nang e dung nga mala,?
ngu nna shi a sape ni hpe tsun wu ai.
33 Petru, Yaku, Yawhan hte hpe gaw shi hte rau shaga woi mat wa ai. Shi myit mak wa
ai hte myit ru myit tsang ai lam, shi hta
byin nna,
34 shi shanhte hpe, ?Nye a myit masin hta si na daram yawn hkyen ai lam grai kaba nga ai
rai nna, dai gaw ngai hpe ganoi noi pyi anyawp
dang kau nga ai; nang e nga nga nna amaja nga
mala,? ngu nna shanhte hpe tsun mu ai.
35 Shi gaw shawng de loi mi shawn lai sa wa nna, shi hkum dai ga hta kabai tawn nhtawm
gum dagup let, byin mai yang dai nni nkri
hkrum ai aten ladaw shi hta n du u ga,
nga nna akyu hpyi nga ai.
36 ?Wa e, nye a Wa e! Nang gaw yawng mayawng hpe dang di lu nga ndai; ndai nni nkri ngu
ai gawm hpe ngai kaw na shalai kau ya rit.
Rai ti mung, Ngai ra ai hku n rai, na a myit
ra ai hku she rai u ga,? ngu nna akyu hpyi
wu ai.
37 Dai hpang shi bai wa yu yang sape ni marai masum hte yup pyaw taw nga ma ai hpe wa mu
wu ai rai nna, Petru hpe, ?Simun e, nang
yup pyaw nga n ni? Hkying hkum mi sha pyi
maja nga na, n sharang lu myit ni?
38 Agung alau ai hta nanhte n shang myit ga, amaja nga let akyu hpyi nga mu: Wenyi gaw
Karai Kasang a myit ra ai lam galaw shangun
mayu nga ai rai ti mung, hkum shan mahtang
gawng kya nga ai,? ngu nna tsun mu ai.
39 Shi gaw kalang mi bai sa nna shawng na ga ni hte maren kahtap hpyi wu ai.
40 Dai hpang sape ni hpang de bai nhtang wa yang, shanhte a myi ni yup shamwi ai a
majaw, shanhte naw yup pyaw nga ma ai hpe
shi mu wu ai. Shanhte gaw shi hpe kaning
ngu htan na mung n chye ma ai.
41 Masum lang ngu na nhtang wa yang, ?Nanhte gaw naw yup pyaw nga nna hkring sa la lu nga
myit ni? Ram sai! Ahkying aten du sai! Yu mu,
dai Masha Kasha gaw yubak kap ai ni a lata
hta ap kau ai hkrum na ra ai.
42 Rawt mu, anhte sa wa saga. Yu mu, ngai hpe ap kau na masha wa gaw nang e rai nga ai,?
ngu nna shanhte hpe tsun mu ai.
(Mat 26:47-56; Luk 22:47-53 Yhn 18:3-12)
43 Yesu ga naw tsun nga yang pyi, sape shi lahkawng hta lawm ai Yuda du sa wa ai.
Hkinjawng agyi ni, tara sara ni hte agyi
salang ni shangun dat ai nhtu hte hkawn
lang ai shawa masha ni shi hte rau sa du
ma ai.
44 Yesu hpe hpyen ni a lata de ap kau na wa gaw, ?Ngai pup ai masha gaw nanhte ra
ai wa nan rai sai. Shi hpe rim la nna atsawm
sha hkrak sin let woi mat wa mu,? ngu nna
sa rim ai shawa masha ni hpe kumla langai
mi jaw tawn da nu ai.
45 Yuda gaw du ai shaloi jang, Yesu kaw hkre rai sa nna, ?Sara e!,? ngu nna shi
hpe pup wu ai.
46 Dai rai nna shanhte gaw shi hpe rim la nna ngang ngang tek da mu ai.
47 Rai ti mung dai kaw tsap nga ai ni hta na marai langai mi gaw, shi a nhtu shaw nna
Hkinjawng Agyi Kaba wa a mayam hpe kahtam
nna shi na di mat lu ai.
48 Dai shaloi Yesu shanhte hpe ga tsun mu ai gaw, ?Nanhte gaw tara tawt lai ai wa hpe
zawn rim la na matu nhtu hte hkawn lang nna
du sa wa marin ni?
49 Shani shagu nanhte hte rau Nawku Htingnu e sharin shaga let nga nga yang, nanhte ngai
hpe n rim la manit dai. Rai ti mung Chyum
Laika ni hta ka da nga ai hte maren chyawm
gaw dik wa lu na rai nga ai,? ngu nna tsun
mu ai. Ref 14:49: Shk 22:6; Esa 53:7;
Luk 19:47; 21:37; 22:37.
50 Dai shaloi sape ni yawng hte gaw shi hpe kau da nna hprawng mat wa ma ai.
51 Shabrang langai mi, lachyit nba sha lawai kau rai nna Yesu kaw hkan nang nga ai hpe
shanhte rim la na shakut ma ai.
52 Rai ti mung shi gaw dai nba hpe raw malu kau da nna singgu krin hprawng mat wa ai.
(Mat 26:57-68; Luk 22:54-55, 63-71; Yhn 18:13-14, 19-24)
53 Shaloi Yesu hpe Hkinjawng Agyi Kaba wa a nta de woi wa mu ai rai nna, dai kaw hkinjawng
agyi ni, agyi salang ni hte tara sara ni yawng
sa hpawng nga ma ai.
54 Petru gaw tsan tsan e Hkinjawng Agyi Kaba wa a nta wang du hkra hkan nang sa wa ai. Dai
kaw sin ai ni hte rau wan mang makau e dung
nna wan kra lawm nga ai.
55 Hkinjawng agyi ni hte salang hpawng ting gaw, Yesu hpe sat kau lu hkra sakse tam nga ma
ti mung, hpa mung n mu mu ai.
56 Marai law law wa, shi a lam masu ai sakse hkam ma ti mung, shanhte a sakse ga ni n hkrum hkraw
malu ai.
57 Shaloi masha nkau mi rawt tsap nhtawm, shi a lam masu ai sakse hkam let tsun ma ai gaw:
58 ?Ndai wa gaw, ?Masha lata hte galaw da ai ndai Nawku Htingnu hpe ngai run kau nna, masum ya
laman e, masha e galaw ai n re ai sha kaga
langai mi ngai bai de da na we ai,? nga nna
shi tsun ai ga hpe anhte na sagaw ai,? ngu mu
ai.Ref 14:58: Mrk 15:29; Yhn 2:19.
59 Shaloi pyi gaw shanhte a sakse ga ni hpe hkrum hkra n galaw lu ma ai.
60 Hkinjawng Agyi Kaba wa gaw shanhte yawng a ka-ang e rawt tsap nna, Yesu hpe, ?Ya nang
hpe shanhte mara shagun tsun nga ma ai lam
hte seng nna nang tsun htan na lam hpa n nga
salit ni?,? ngu nna san wu ai.
61 Rai ti mung Yesu gaw atsin sha nga nna ga hkaw mi mung n htan wu ai. Bai Hkinjawng Agyi
Kaba wa gaw, ?A lu ai Karai Kasang a Kasha,
Meshia nang rai nga n ni?,? ngu nna shi hpe
san wu ai.
62 Yesu gaw, ?Ngai rai nga nngai; dai hta kaga, Masha Kasha gaw, daru magam hpung
shingkang rawng ai wa a hkra maga de dung
nga nna, lamu na sumwi ni hte du sa ai
hpe, nanhte mu na marin dai,? ngu wu ai.
Ref 14:62: Dan 7:13; Mat 24:30; 26:64; Luk 22:69.
63 Dai shaloi, Hkinjawng Agyi Kaba wa gaw, shi a palawng ni hpe gang je kau nna, Anhte
kaga sakse hpa mi n tam ra saga ai!
64 Nanhte ndai, Karai Kasang hpe masu matsa jahpoi ai ga hpe na lu manit dai. Nanhte
gara hku daw dan na myit ni?,? ngu mu ai.
Shanhte yawng gaw Shi mara lu ai lam dan leng sai majaw, si ari jaw ging ai wa re,
nga nna shi hpe daw dan mu ai.Ref 14:64: Jaw 14:26.
65 Shanhte hta na nkau mi gaw, shi hpe mayen mahtaw bun ai hte, shanhte shi hpe myi bam
kau ya nna kayat nhtawm shanhte gaw, ?Nang
hpe kadai kayat a ta? Tak yu u!,? ngu mu ai.
Hkinjawng Agyi Kaba wa a sin langa ni mung
shi hpe magra bye kahpret mu ai.
(Mat 16:69-75; Luk 22:56-62; Yhn 18:15-18,25-27)
66 Petru chyawm gaw dai wang kata de naw nga nga ai rai nna, Hkinjawng Agyi Kaba wa a
nchyang numsha ni hta langai mi shi a makau
de sa du ai.
67 Dai numsha gaw wan kra nga ai Petru hpe mu wu yang, shi hpe azi yu da nna, ?Nang mung,
Yesu ngu ai Nazaret masha hte rau nga ga
ndai,? ngu wu ai.
68 Rai ti mung shi nyet kau ai hte, ?Ngai n chye nngai, nang hpa tsun nga ai ngu ai
hpe ngai n chye na nngai,? ngu htan nhtawm
wang chyinghka lam de pru mat wa ai. Dai
shaloi jang u kalang mi goi sai.
69 Dai nchyang numsha shi hpe bai mu jang, grup yin tsap nga ai ni hpe, ?Ndai wa
mung, shanhte hta na langai mi rai nga
ai,? ngu nna kahtap tsun wu ai.
70 Rai ti mung Petru bai nyet kau wu ai.
Dai hpang gade nna yang, grup yin e tsap nga ai ni gaw, Petru hpe, ?Shanhte hta
lawm ai wa langai mi nang rai nga ndai
hpe nang n ningdang lu ndai,? ngu nna
shadu tsun wu ai.
71 Shaloi Petru gaw, ?Ngai teng man ai ga tsun nga nngai ngu nna dagam n ga! N rai
yang, Karai Kasang ngai hpe ari jaw u ga!
Nanhte tsun nga ai wa hpe ngai n chye
nngai!,? ngu wu ai.
72 Shaloi jang dai u lahkawng bat goi nga ai. Dai rai nna Petru gaw, ?U lahkawng lang
garai n goi yang, nang ngai hpe masum lang
nyet kau na rin dai,? nga nna Yesu shi
hpe tsun ai ga dum dat ai hte rau hkrap
gumpye taw nga ai.