7
1 Myit mada shara n nga nga a hka! Ngai gaw myin ai namsi di la kau ngut sai hpun ni hte sabyi ru hta sabyi si ni n si mat sai hpe mu nna kawsi kyet ai masha wa zawn rai nga nngai. Sabyi si sumbaw ni yawng hte mu mai ai lakum si ni yawng hta la kau sai.
2 Dai yang e ding man ai masha langai mi pyi n nga nga ai; Karai Kasang hta sadi dung ai masha langai mi mung n nga nga ai. Langai hte langai gaw masha sat, sai jahkaw na ahkaw ahkang hpe ala nga ma ai. Masha hkum shagu shada da hkan gyam nga ma ai.
3 Shanhte yawng hte gaw n hkru ai amu galaw ai lam hta grai kung kyang ai ni rai ma ai. Up hkang du salang ni hte tara agyi ni mayun kumhpa hpyi ma ai. Daru magam lu ai masha wa gaw shi hpa baw ra marit ai lam shanhte hpe tsun dan nga ai majaw shanhte gaw myit langai sha jawm myit shapraw ma ai.
4 Shanhte hta kaja htum ai hte ding man dik htum ai wa pyi tsingdu tsingman ni zawn manu n dan nga ai.
Shi gaw shanhte hpe shanhte a sin langa, myihtoi ni hku nna sadi jaw ai zawn Karai Kasang gaw amyu masha ni hpe ari jaw na nhtoi du ra ai. Ya chyawm gaw shanhte kashuk kashak byin nga ma ai.
5 Na a htingbu ni hpe hkum kam myit; na a manang wa hpe hkum kamhpa myit; na a madu jan shing n rai madu wa a man e pyi nang hpa tsun shaga na lam sadi maja nga u.
6 Ndai prat aten hta, kasha ni gaw shanhte a kawa ni hpe angawk mana ni hpe zawn galaw na mara ai, shayi sha ni gaw shanhte a kanu ni hpe ninghkap na ra ai, kanam ni gaw shanhte a kamoi ni hte ga law ga la rai na ra ai; nanhte a gumlau hpyen ni gaw nanhte a dinghku masha ni kaw na rai ma ai.
7 Rai ti mung ngai gaw dai Madu hpe azi yu nga na nngai; ngai hpe hkye hkrang la ai Karai Kasang hpe kamhpa ai hte ngai ala nga na nngai. Nye a Karai Kasang gaw nye a ga madat ya na ra ai.
8 Anhte a gumlau hpyen ni gaw anhte a ntsa e lachyum kata, yu kabu nga ma ai. Anhte kataw mat ai rai ti mung bai rawt wa lu na ga ai. Ya, anhte nsin kata hta rawng nga ga ti mung, dai Madu gaw anhte hpe nhtoi jaw ya na ra ai.
9 Anhte gaw dai Madu hpe shut hpyit kau saga ai majaw, ya anhte shi a masin kahtet ai hpe aten ladaw langai mi a matu hkam sharang ra nga ga ai. Rai ti mung, jahtum na aten hta, shi gaw anhte hpe makawp maga la na ra ai; anhte shut hpyit kau sai lam ni hpe shajaw ya na ra ai. Shi gaw anhte hpe nhtoi de shapraw dat na ra ai, anhte gaw shi anhte hpe hkye hkrang la na ra ai hpe mu lu na ga ai.
10 Dai hpang, anhte a gumlau hpyen ni dai lam hpe mu wa nna kaya kahpa hkrum wa na mara ai. Dai gumlau hpyen ni gaw anhte hpe, ?Na a Madu Karai Kasang kanang nga nga lit ta?,? nga nna san ashu ai ni gaw lam ka-ang na hkumpup zawn kabye hkrum ai hte sum kadawng mat ai hpe anhte mu lu na ga ai.
11 Yerusalem masha ni e, mare bunghku bai gaw gap da ai aten du wa ra ai. Dai aten e, na a lamu ga jarit ni maden jat wa na ra ai.
12 Dai shani e, sinpraw maga Asuri mung, dingda maga Egutu mung, Uhprat hka nu lapran hkan na mung, grai tsan ai panglai hte, bum ni kaw nna mung, shara shagu hkan chyam bra hkawm nga ai na a amyu masha ni nang hpang de bai nhtang wa na mara ai.
13 Rai ti mung dai mungkan ga hta nga ai ni a n hkru ai amu ni a majaw, mungkan ga gaw katsi katsang shara tai mat na ra ai.
14 Madu e, nang lata san da sai na a amyu masha ni a matu sagu rem wa tai nga u. Shanhte gaw nam mali kata hkan dumbri dumbra rai nga nga ma ti mung, dai shara hta ga sau kaja ai lamu ga gaw shanhte hpe gawan da nga ai. Bashan hte Gilead mung na udat shara hta lai sai aten shanhte nga ningngai lu ma ai zawn shanhte sa nna sha lu mu ga.
15 Madu e, nang gaw anhte hpe Egutu mung kaw nna woi shapraw wa ai shani hta nang galaw dan sai amu ni zawn anhte a matu mauhpa amu galaw dan mi.
16 Masha amyu baw ni dai amu hpe mu wa nna shanhte a n-gun atsam yawng hpe dum na malai, dingbai dingna hkrum na mara ai. Shanhte gaw hkrit gari ai hte shanhte a n-gup magum nna shanhte a na ni pat mat na mara ai.
17 Shanhte gaw lapu ni zawn ga nhpu hta gumrawt hkawm wa na mara ai; shanhte gaw shanhte a ngang ai mare kata kaw nna hkrit gari ai hte pru mat wa na mara ai. Shanhte gaw anhte a Madu Karai Kasang hpang de hkrit kamyin ai hte nhtang wa na mara ai.
18 Madu e, nang hte bung ai kaga karai kadai mung n nga nga ai; naw ngam nga ai na a amyu masha ni a yubak ni hpe raw dat kau ya nna htani htana masin kahtet nga ndai n rai tim, anhte hpe madun dan nga ai dinggrin tsaw ra myit hta nang awng sharawng nga ndai.
19 Nang gaw anhte hpe kalang mi bai matsan dum la na rai nga ndai. Nang gaw anhte a yubak mara ni hpe lagaw npu de kabye kau na rin dai, dai ni hpe panglai htumpa de kabai bang kau na rin dai.
20 Nang gaw moi chyaloi nhkoi kaw nna anhte a kaji kawa ni hpe nang jaw ai ga shaka hte maren, Abraham hte Yaku a aru arat rai nga ai na a amyu masha ni hpe na a kangka re ai lam hte dinggrin tsaw ra myit madun dan na rai nga ndai.