MIHKA LAIKA
(MICAH)
Ga Nhpaw
Myihtoi Mihka gaw Esaia hte rau paw pru nna, dingda mungdan, Yuda mung na mare langai mi kaw na myihtoi langai rai nga ai. Myihtoi Amo gaw dingdung mungdan hta byin wa na lam tsun sai hte maren, Yuda mung hta mung shingra tara a mayak manghkang lam ni hkrum sha na hte dai lam ni a majaw n tara ai amyu masha ni hpe Karai kasang ari jaw na wu ai hpe shi chye na da wu ai. Gara hku rai tim, Mihka a mungga hta du wa na aten ladaw a matu grau nna asan apra sha hte matsing la mai ai myit mada shara a kumla ni rawng nga ai.
Matsun mungga ni gaw Karai Kasang a npu hta ninggawn tawa hte seng ai ngwi pyaw sim sa lam a sumla hpe lak san manu dan ai hku madun dan nga ai (4:1-4); Dawi a dinghku lakung kaw na yu hkrat wa na galu kaba ai hkawhkam wa hte amyu masha ni hpang de ngwi pyaw sim sa lam la sa ya na lam hpe myihtoi htoi da ai (5:2-5a); Mihka 6:8 hta sha, Israela myihtoi ni kadun ai hku ning ngu tsun da nga ai: ?Shi anhte kaw na hpyi ai gaw ndai hku rai nga ai: teng man ai amu galaw na, dinggrin tsaw ra myit madun na hte anhte a Karai Kasang hte grit nem ai myit hte kanawn mazum nna asak hkrung na lam ni rai nga ai.?
1
1 Ndai gaw Yuda hkawhkam ni rai nga ai Yohtam, Ahaza hte Hezekia ni a lakhtak e, Morashet mare na Mihka hpang de Samari hte Yerusalem hte seng nna dai Madu jaw ya ai mungga rai nga ai. Ref 1:1: 2Hk 15:32-38; 2Hl 27:1-7.
2 Masha amyu baw ni yawng hte e, ndai lam na la mu;
Ginding aga ntsa e nga ai ni yawng hte e, ndai lam madat la mu!
Tsaw Htum ai dai Madu gaw nanhte hpe sakse madun na ra ai.
Madat mu! Shi gaw shi a sumsing htingnu kaw nna mungga tsun nga ai.
3 Dai Madu gaw shi a chyoi pra ai shara kaw nna pru sa nhtawm;
shi yu sa nna bum pungding ni hkan e kabye hkawm na ra ai.
4 Dai hpang, Bum ni gaw shi a npu hta wan kata na
gitbaw zawn byawng mat na ra ai;
kawng de na ru yu wa ai mawru hka zawn
shanhte gaw kadit layang de ru hkrat mat wa na mara ai.
5 Israela a shut hpyit ai yubak hte Karai Kasang hpe gumlau ai a majaw, ndai lam ni yawng byin wa na ra ai. Israela a gumlau ai amu a matu kadai wa hpe mara shagun na rai ta? Mare daju rai nga ai Samari shi nan Yuda mung hta hpara sumla nawku ai lai a mara lu ai wa n rai a hka? Yerusalem shi nan rai nga a hka!
6 Dai rai nna dai Madu gaw, ?Samari mare hpe asan sha jahten sharun sumpum tawn nna sabyi sun galaw ai shara shatai kau na nngai. Dai mare a nlung wut daw chyen ni hpe kadit de sharu kau nhtawm mare a npawt nhpang nlung ni hpe akrin sha shadawng da na nngai.
7 Shi a manu dan hpara sumla ni yawng, adaw atang rai mat hkra agrawp kau hkrum nna, htingnu na shawa num ni hpe jaw da ai arai yawng wan hta nat kau nhtawm de a hpara sumla ni yawng katsi katsang sumpum mat na ra ai. Samari gaw shi a ngamu ngamai lam a matu ndai ni yawng hpe lu tawn ai rai tim, ya gaw, shi a gumlau hpyen ni htingnu na shawa num ni hpe shara shagu hkan shachyam na matu shanhte hpe woi shapraw mat wa na mara ai,? ngu nna tsun ai.
8 Dai hpang, Mihka gaw, ?Ndai lam a majaw, ngai gaw sharung shayawt ai hte yawn madai nga nngai. Nye a yawn hkyen ai hpe madun dan na matu, lagaw kaman hte singgu krin hkawm kayin na nngai. Ngai gaw ga gwi zawn hkrap shabam nna u gawla-uk zawn ngoi na nngai.
9 Samari a ningma ni hpe tsi lajang lu na n rai; Yuda mung mung dai hte maren nni nkri hkam sha ra nna, dai gaw nye a amyu masha ni shanu nga ai Yerusalem chyinghka ni de du hkra jahten shaza ai lam hkan dep nang nga ai,? ngu nna tsun ni ai.
10 Anhte a hkrat sum ai lam hpe Gat mare na anhte a gumlau hpyen ni hpe hkum tsun dan myit; nang hkrap ai lam shanhte hpe hkum mu shangun et. Bet Leahpra mare masha ni shanhte a myit htum ai lam hpe ga nhpu galwi ai hku madun dan nga ma ai!
11 Shahpira mare masha ni e, kaya kahpa hte singgu krin rai nna, bawng dung sa wa masu. Zanan mare hta shanu nga ai ni shanhte a mare shinggan de n pru gwi nga ma ai. Betezela mare masha ni a sharung shayawt ai nsen hpe nang na ai shaloi, dai shara hta shingbyi shara n nga ai hpe nang chye na rin dai.
12 Dai Madu gaw tsin-yam tsindam hpe Yerusalem de shadu dat wu ai majaw, Marot mare masha ni shingbyi shara a matu myit tsang ai hte ala nga ma ai.
13 Lahkisha mare e shanu nga ai masha ni e, gumra ni hpe hpyen leng ni hta byau tawn mu. Nanhte gaw Israela a yubak lam hkan galaw nga myit dai rai nna Yerusalem hpe yubak shabyin dat nga manit dai.
14 Ya chyawm gaw, Yuda masha ni gaw Moreshet Gat a mare hpe shakram dat ma ai. Israela a hkawhkam ni gaw Akzib mare na karum la lam hkam la lu na ma ai n rai.
15 Maresha amyu masha ni e, dai Madu gaw nanhte hpe nanhte a mare zing la na gumlau hpyen wa a lata de ap kau na ra ai. Israela a ningbaw ni gaw Adulam hta nga ai lungpu de sa wa nna makoi rawng nga na mara ai.
16 Yuda amyu masha ni e, nanhte tsaw ra ai kashu kasha ni a matu sharung shayawt ai hta nanhte a kara ni hpe shakrin kau mu. Nanhte a kashu kasha ni tsan ai mungdan de bawng dung hkrum mat nga masai majaw, langda baw ni zawn shakrin kau mu.