1 Dai Madu gaw Israela amyu masha ni a matu hkan sa na tara ni 2 Mawshe yan Arun hpe jaw wu ai. Lasha ni kadai mung tinang a la hkrang kaw ari ri ai rai yang, dai zawn re ai gaw n san n seng nga ai. 3 La hkrang kaw na yan pru ai rai tim, hkring mat ai rai tim, dai gaw n san n seng nga ai. 4 Shi dung ai shing n rai kaleng ai yup ra hpa mung n san n seng nga ai. 5 Shi a yup ra sa hkra ai wa kadai mung shing n rai, 6 shi dung ai shara hta hkan dung ai wa kadai mung tinang a hpun palawng hpe hkrut kau nna hka shin na rai wu ai. Shi gaw shana de du hkra n san n seng naw rai nga ai. 7 Dai masha wa hpe hkra ai wa kadai mung dai ari ana a majaw tinang a hpun palawng hkrut kau nna hka shin lu na rai wu ai. Dai gaw shana de du hkra n san n seng naw rai nga ai. 8 Masha langai mi gaw htung hte maren san seng nga ai wa hpe shi a mayen mahtaw bun ai rai yang, dai wa gaw shi a hpun palawng ni hpe hkrut kau nna hka shin na rai wu ai; dai gaw shana de du hkra n san n seng naw rai nga ai. 9 Ari ri ai wa jawn ai hking shing n rai, dung shara hpa mung n san n seng nga ai. 10 Dai wa dung ai npu na arai sa hkra ai wa kadai mung shana de du hkra n san n seng naw rai nga ai; dai arai ni hpai ai wa mung shi a hpun palawng ni hpe hkrut nna hka shin kau na rai wu ai. Dai gaw shana de du hkra n san n seng naw rai nga ai. 11 Ari ana lu ai wa lata n shin ai sha masha kaga hpe ahtawk hkra ai rai yang, dai wa gaw shi a hpun palawng ni hpe hkrut kau nna hka shin na rai wu ai; dai gaw shana de du hkra n san n seng naw rai nga ai. 12 Dai wa hkra ai ga di bu hpe mung agrawp kau na rai wu ai; shi gaw hpun hte galaw ai ntsin htung sa hkra ai rai yang, dai hpe kashin kau lu na rai nga ai.

13 Ari ana kap ai wa mai wa yang, shi hpe sanit ya tup la yu nna shi a hpun palawng hkrut kau nhtawm hka hpawk hta shin na rai wu ai, shaloi shi san seng wa na ra ai. 14 Matsat ya ngu na nhtoi hta dai wa gaw dai Madu a hpung shingkang shanu nga ai Sum a shang wa chyinghka lam de hkrudu lahkawng shing n rai ura kasha lahkawng la sa nna hkinjawng wa hpe ap ya na rai wu ai. 15 Hkinjawng wa mung htingrai hkungga a matu langai, wan nat hkungga a matu langai shatai nna nawng ya na rai wu ai. Ndai hku nna dai wa a matu jasan jaseng ai amu shi hkan shatsup ya na rai wu ai.

16 Lasha langai azu shapraw ai rai yang, shi a hkum ting hpe hka shin kau na rai wu ai. Dai gaw shana de du hkra n san n seng naw rai nga ai. 17 Azu hte hkra ai hpun palawng hte shanhpyi arai hpa hpe mung hkrut kau na rai wu ai. Dai gaw shana de du hkra n san n seng naw rai nga ai. 18 Lasha hte numsha kanawn ngut ai hpang shan lahkawng gaw hka shin kau na rai ma ai; dai gaw shana de du hkra n san n seng naw rai nga ai.

19 Numsha gaw shi a num hking sa ai shaloi shi hta sanit ya tup n san n seng nga ai; Shi hpe sa hkra ai wa mung shana de du hkra n san n seng naw rai nga ai. 20 Shi a num hking sa nga ai laman, shi dung kaleng ai hpa hta mung n san n seng nga ai; shi a yup ra hte shi dung ai arai sa hkra ai wa kadai mung, 21-23 shi a hpun palawng ni hpe hkrut nna hka shin na rai wu ai. Shi gaw shana de du hkra n san n seng naw rai nga ai. 24 Num hking sa nga ai numsha hte kanawn ai lasha gaw shi a n san n seng ai majaw awu asin rai nga ai rai nna sanit ya tup n san n seng nga ai. Shi kaleng ai yup ra mung n san n seng naw rai nga ai.

25 Numsha gaw num hking sa ai hta kaga nhtoi na na sai su ai rai yang, dai sai su n sim dingsa num hking n seng yang na zawn dai numsha gaw n san n seng naw rai nga ai. 26 Shi kaleng ai yup ra hte shi dung ai shara ni mung dai sai su nga ai laman n san n seng nga ai. 27 Dai arai ni hpe hkra ai wa kadai mung n san n seng nga ai rai nna shi a hpun palawng ni hpe hkrut kau nna hka shin na rai wu ai. Shi gaw shana de du hkra n san n seng naw rai nga ai. 28 Shi a sai su ai hkring mat ai hpang nhtoi sanit ya la ra lu na rai nga ai, dai hpang shi gaw htung hte maren san seng na ra ai. 29 Matsat ya du ai shani e, hkrudu lahkawng shing n rai ura lahkawng la nna dai Madu a hpung shingkang shanu nga ai Sum a shang wa chyinghka lam hta hkinjawng wa kaw sa ap ya na rai wu ai. 30 Hkinjawng wa mung htingrai hkungga a matu langai mi, wan nat hkungga a matu langai mi shatai nna nawng na rai wu ai. Ndai hku nna shi a matu jasan jaseng ai amu hkan shatsup ya na rai wu ai.

31 Dai Madu gaw Israela amyu masha ni a n san n seng ai lam hte seng nna shanhte hpe shadum jahprang na matu Mawshe hpe tsun wu ai; shing rai dap ka-ang e nga ai dai hpung shingkang hte hpring ai Sum hpe shanhte awu asin di lu na ma ai n rai. Shanhte galaw kau hkrup ai rai yang, sat kau ai hkrum na ma ai.

32 Ndai hte gaw ari ana, azu shapraw ai lasha, 33 hking lang ai numsha, n san n seng ai numsha hte kanawn ai lasha a lam ni hte seng ai tara ni rai nga ai.