SHARUNG SHAYAWT LAIKA
(LAMENTATIONS)
Ga Nhpaw
Ndai Sharung Shayawt Laika gaw 586 B.C. shaning, Yerusalem hten za mat nna sharung shayawt nga ai lam hte dai hpang mare hten run mat nna kaga mung de gau kau hkrum ai lam ni hpe ga shagawp laika hkrang hku nna daw manga ka da ai hpe mahkawng shinggyin da ai laika rai nga ai. Ndai laika a malawng maga hta hkrap ngu hkrap ngoi ai shingra maka hkrai rawng nga ti mung, maga mi hku nna Karai Kasang hta kam hpa ai lam hte du na ra ai aten a matu myit mada shara hpe matsun madun ai ga mung rawng nga ai. Ndai ga shagawp ni hpe Yuda amyu masha ni shaning shagu nawku ma ai shaloi, lusha gam ai aten hte 586 B.C. shaning hta byin hkrum hkra ai amyu sha ting hte seng ai tsin-yam tsindam a sharung shayawt ai masat dingsat galaw ai shaloi lang nga ma ai.
1
Lang mi amyu masha law law hte wu wu di di nga yu sai Yerusalem gaw kade sha garen gari rai nga ma hka!
Lang mi mungkan hku nna shagrau shatsaw hkrum yu sai dai numsha gaw gaida jan zawn rai nga ai.
Mare ni hta na arawng lu htum ai mare gaw mayam prat de hkrat bang mat nu ai.
 
Shi gaw shana tup hkrap nga ai rai nna shi a shabyi hku myi prwi ni lwi hkrat nga ai.
Shi a shawng na jinghku ni yawng hta shi hpe shalan shabran na langai mi mung n nga nga ai.
Shi a myit hkrum manang ni shi hpe gumle gumlau ai hte ya gaw shi hte nhtan shai nga masai.
 
Yuda amyu masha ni gaw matsan mayan hkrum ai mayam ni rai nna, nta kaw na maja e gawt shapraw kau hkrum ma ai,
Shanhte gaw shanhte a lamu ga ngu nna tsun na shara hpa mung n nga ai,
Gumlau hpyen ni wang da hkrum nna hprawng lawt lam n nga ai tsasam mungdan ni hkan nga nga ma ai.
 
Ya chyawm gaw chyoi pra ai shani ni hta nawku na matu Nawku Htingnu de kadai mung n sa nga ai.
Dai shara hta mahkawn shakawn ai mahkawn ma ni nni nkri hkrum ma ai, hkinjawng ni mung madai sharung nga ma ai.
Mare chyinghka ni gaw katsi katsang rai nna, Ziun gaw tsin-yam tsindam hkrum nga ai.
 
Shi a gumlau hpyen ni awng padang lu ma ai; shanhte gaw shi hpe daru magam n-gun hte ka-up da ma ai.
Dai Madu gaw shi a law la ai yubak ni yawng a matu shi hpe nni nkri hkrum shangun wu ai;
Shi a ma kaji ni rim hkrum nna woi la hkrum nga ma ai.
 
Yerusalem a hkik hkam ai arawng sadang gaw lai sai aten na lam langai rai nga ai.
Shi a ningbaw ni mung shannga zawn kawsi hkrum nna gawng kya nga ma ai,
Dai ni gaw jaugawng ni a lata kaw na hprawng lawt ai zawn shanhte a n-gun atsam ganoi noi pyi she htum mat ma ai.
 
Ya garen gari rai hten run mat sai Yerusalem gaw moi shawng na shi a hkik hkam ai arawng sadang hpe myit dum nga ai.
Shi gaw gumlau hpyen a lata de hkrat mat ai shaloi, shi hpe karum la na masha langai mi mung n nga nga ai;
Shi hpe dang manga kau ai ni mung shi a hkrat sum ai hpe jahpoi asawng nga ma ai.
 
Shi a arawng sadang hkoi mat nu ai; shi gaw singgu krin rai nga ai hte n kaw n law di hkrum nga ai.
Shi gaw madai sharung ai hte shi a myi man hpe kaya ai hte makoi magap da nga ai.
Yerusalem gaw shi hkum hpe awu asin di nhtawm hkrit hpa yubak hte matsat shabat di kau wu ai.
 
Shi a n san n seng ai gaw aloi sha mu lu nga ti mung, shi gaw shi a htawm hpang na maka hpe myit tsang ai lam hpa mung n madun nga wu ai.
Shi a hkrat sum ai lam gaw hkrit kajawng hpa rai nna kadai mung shi hpe shalan shabran lu ai n rai.
Shi a gumlau hpyen ni shi hpe dang kau mu ai majaw matsan dum la na matu dai Madu hpe hpyi jahtau ma ai.
 
10 Gumlau hpyen ni gaw shi a sut gan yawng hpe kashun la kau manu ai.
Shi gaw maigan masha ni n shang na matu dai Madu hkum da ai Nawku Htingnu de
Shanhte shang wa ai hpe shi mu wu ai.
 
11 Shanhte gaw sha na shahpa tam nga yang, shi a amyu masha ni madai nga ma ai;
Shanhte hkum nan asak hkrung nga lu na matu shanhte a sut gan ni hpe shahpa galai ma ai.
Dai Madu gaw, ?Ngai hpe mada yu rit, nye a nchyi nmu hpe mu ya rit,? nga nna dai mare jahtau tsun nga ai.
 
12 Shi gaw ndai lam hku lai ai masha shagu hte hpe, ?Ngai hpe mada yu mi! Ngai zawn kadai hta mung nchyi nmu hkoi n hkrum yu myit dawng,? ngu nna marawn jahtau wu ai.
Dai Madu gaw shi masin pawt ai aten hta nye a ntsa e dai nchyi nmu shapraw nu ai.
 
13 ?Shi gaw nye a hkum kata hkru na wan hpe ntsa kaw nna shangun dat wu ai.
Shi gaw nye a matu mahkam hkam da nu ai hte ngai hpe ga de jahkrat da ni ai.
Shi gaw ngai hpe kau da nu ai hte nhtum nni re ai nchyi nmu hta ngai hpe tawn da nu ai.
 
14 ?Shi gaw nye a yubak ni yawng hpe matsing da nhtawm dai ni yawng hpe gumhpawn gyit majaw da nga ai;
Shi gaw dai ni hpe nye a du grup grup gyit noi da ya mi ai majaw, ngai gaw dai yubak htumbyen kata e n-gun kya ai hte taw nga nngai.
Madu gaw ngai hpe nye a gumlau hpyen ni a lata de ap kau nu ai majaw, ngai gaw shanhte hpe ninghkap lu na matu karum la lam n lu rai nga nngai.
 
15 ?Madu gaw nye a n-gun ja htum ai hpyenla ni yawng hpe mani nga ai;
Shi gaw nye a shabrang ni hpe shamyit kau na matu hpyen luksuk shangun dat nga ai.
Shi gaw nye a amyu masha ni hpe sabyi htumbyen kata na sabyi si ni hpe zawn kabye agrawp kau nu ai.
 
16 ?Dai re ai majaw, nye a myi ni gaw myi prwi ni hte kabrat nga li ai.
Kadai mung ngai hpe shalan shabran lu ai n rai; kadai mung ngai hpe nden marai shajat ya lu ai n rai.
Gumlau hpyen gaw ngai hpe ka-up dang kau nu ai; nye a amyu masha ni hpa mung n lu mat manu ai.
 
17 ?Ngai gaw nye a lata ladawn nngai, rai ti mung kadai mung ngai hpe karum la na ra ai n rai.
Dai Madu gaw ngai hpe man grup grup kaw nna gumlang na matu, gumlau hpyen ni hpe shaga da nu ai;
Shanhte gaw ngai hpe matsat shabat re ai lama mi zawn di mi ai.
 
18 ?Rai ti mung, dai Madu gaw ding hpring nga ai, ngai mahtang shi a ga n madat kau nngai.
Shara shagu hkan nga ai amyu masha ni e, nye a ga madat mu; nye a nchyi nmu hpe mada yu mu.
Nye a shabrang ni hte mahkawn ni mung bawng rim hkrum mat wa manu ai.
 
19 ?Ngai gaw nye a jinghku manang ni hpe shaga ti mung, ngai hpe karum la na matu ningdang kau ma ai.
Hkinjawng ni hte ningbaw ni gaw shanhte hkum nan asak hkrung nga lu na matu lusha tam nga ma ti mung,
Mare nmaw lam hkan e si mat ma ai.
 
20 ?O Madu e, nye a tsin-yam tsindam hpe mung, nye a wenyi a ru yak makyin madut hpe mung mada yu u!
Nye a myit masin gaw nye yubak ni a majaw yawn hkyen ai hte daw hten mat sali ai.
Nmaw lam ni hkan masha sat amu nga nga ai; nhku kata e pyi si hkrung si htan gaw nga nga ai.
 
21 ?Nye a madai sharung ai nsen ni hpe madat ya et; ngai hpe shalan shabran la na langai mi mung n nga nga ai.
Nang gaw nye a ntsa e ru yak tsin-yam tsindam shapraw dat nit dai majaw, nye a gumlau hpyen ni kabu nga ma ai.
Nang ga sadi tawn da ai nhtoi hpe shadu nna, ngai hkam sha ai zawn nye a gumlau hpyen ni hpe nni nkri hkam sha shangun u.
 
22 ?Shanhte a n hkru ai amu yawng a matu shanhte hpe daw dan u;
Nye a shut hpyit ai yubak ni a majaw nang ngai hpe ari jaw ndai zawn, shanhte hpe ari jaw u.
Ngai gaw nchyi nmu hkrum ai hte madai sharung nga nngai; ngai myit machyi nga nngai.?