9
(Mat 10:5-15; Mrk 6:7-13)
1 Yesu gaw sape shi lahkawng hte hpe shaga la nhtawm, nat ni yawng hpe shaden kau lu na hte ana ahkya ni hpe shamai ya lu na atsam hte ahkaw ahkang shanhte hpe jaw mu ai.
2 Dai hpang, Karai Kasang a Mungdan lam hkaw tsun dan na hte, machyi makaw shamai ya na matu, shi shanhte hpe shangun dat mu ai.
3 Shi shanhte hpe, ?Hkrun lam na matu, dawhkrawng, htingpa, malu masha, gumhpraw re ai ni hpa mung hkum gun, hkum lang myit, palawng lahkawng mung hkum gun myit.
4 Gara nta hta rai rai nanhte hpe hkap la ai nta kaw shang nna, dai mare na pru wa ai ten du hkra nga nga mu.
5 Gara kaw rai rai, masha ni nanhte hpe n hkap la ai rai yang, shanhte hpe shadum ai kumla hku nna nanhte a lagaw hta kap ai ga nhpu hpe ahpu sharun kau da nna dai mare kaw na pru mat wa mu,? ngu nna shanhte hpe tsun dat mu ai.Ref 9:5: Mat 10:14; Kas 13:51.
6 Shing rai sape ni pru sa nna, kahtawng shagu hkan e dai Kabu Gara Shiga hkaw dan let, shara magup hkan e shamai shatsai ya hkawm ma ai.
(Mat 14:1-12; Mrk 6:14-29)
7 Shing rai byin ai lam yawng hpe Galile Ginwang up ai Herod munggyi na la nna myit grai ung ang bu nga ai, hpa majaw nga yang, masha nkau mi Hkalup sara Yawhan si ai kaw na bai hkrung rawt wa sai.Ref 9:7: Mat 14:1; Mrk 6:14.
8 Nkau mi gaw myihtoi Elia bai paw pru ra ai, bai kaga ni gaw, shawng na myihtoi ni hta na langai ngai asak bai hkrung wa ai, nga nna tsun shajang ma ai.
9 Herod gaw, ?Yawhan hpe ngai baw htau kau se ai, rai ti mung, ndai hte wa ngai na ai gaw, kadai wa rai ta?,? nga nna Yesu hpe mu yu na tam nga ai.
(Mat 14:13-21; Mrk 6:30-44; Yhn 6:1-14)
10 Kasa ni bai wa ma yang, shanhte galaw ai amu a lam shagu Yesu hpe hkai dan ma ai. Shi chyawm gaw shanhte hpe woi la nna, Betsaida ngu ai mare de shanhte hkrai lagyim sa mat wa ma ai.Ref 9:10: Mat 10:13; Mrk 6:30.
11 Shawa masha ni mung dai hpe hkan chye jang, shi hpang de hkan sa ma ai rai nna, shanhte hpe hkap la nhtawm, Karai Kasang a Mungdan lam hkaw dan let machyi mai mayu ai ni hpe shamai ya mu ai.
12 Ya jan du wa magang nga ai; dai rai nna sape shi lahkawng gaw Madu kaw sit sa nna, ?Dai shawa masha ni hpe grup yin hkan na kahtawng ni hte yi, sun hkauna wa hkan e yup nna lusha tam sha mu ga, shabawn dat u, hpa majaw nga yang, ndai shara gaw masha hte tsan ai shara she rai nga ai,? ngu nna shi hpe tsun mu ai.
13 Rai ti mung, Yesu gaw, ?Nanhte nan shanhte hpe sha na lama ma jaw mu,? ngu nna tsun mu ai.
Shanhte gaw, ?Anhte kaw muk tawng manga hte nga lahkawng hta kaga hpa mung n nga ai. Ndai shawa masha mahkra ting a matu, anhte hpe lusha sa mari shangun mayu nga n ni?,? ngu mu ai.
14 Hpa majaw nga yang, shawa masha ni gaw la ni hkrai pyi masha hkying manga daram rai nga ai.
Shaloi Yesu gaw, ?Ndai shawa masha ni hpe hpung mi hta manga shi daram di nna dung nga shangun mu,? ngu nna shi a sape ni hpe tsun wu ai.
15 Shanhte mung shing di nna, yawng hte hpe dung nga shangun mu ai.
16 Shaloi shi gaw, dai muk tawng manga hte nga lahkawng hpe la nna, lamu de mada yu let, shanhte a matu Karai Kasang kaw chyeju shakawn akyu hpyi shaman nhtawm, ahkyep alep di nna, shawa masha ni hpe hkan garan jaw na matu shi a sape ni hpe jaw da wu ai.
17 Shaloi shawa masha ni sha nna yawng hkru kat mat ma ai. Shanhte a angaw angam adaw ahkyep hkan hta lahkawn la yang, ka shi lahkawng hpring dem naw rai nga ai.
(Mat 16:13-19; Mrk 8:27-29)
18 Lang mi na Yesu shi hkrai akyu hpyi nga yang, sape ni shi hpang de sa du ma ai. Shaloi shi shanhte hpe, ?Shawa masha ni ngai hpe kadai wa re ai nga nga ma ta?,? ngu nna san yu mu ai.
19 Shanhte gaw, ?Nkau mi Hkalup Sara Yawhan re ai nga nna tsun ma ai; nkau mi Elia; nkau mi gaw moi shawng de na myihtoi langai ngai bai hkrung rawt ai rai nga ai, nga shajang ma ai,? ngu nna htan mu ai.Ref 9:19: Mat 14:2.
20 Shi gaw, ?Nanhte gaw gara hku rai ta? Nanhte mahtang ngai hpe kadai wa re ai nga nga myit ta?,? ngu nna shanhte hpe san mu ai.
Petru gaw, ?Nang gaw Karai Kasang a Meshia rai nga ndai,? ngu nna htan wu ai.Ref 9:20: Mat 16:16; Yhn 6:68-69.
(Mat 16:20-28; Mrk 8:30-9:1)
21 Dai shaloi Yesu gaw, ?Dai lam kadai hpe mung, hkum tsun dan myit,? ngu nna ginhtim da mu ai.
22 Shi shanhte hpe bai tsun mu ai gaw, ?Dai Masha Kasha gaw, nni nkri law law wa hkrum nna, agyi salang ni, hkinjawng agyi ni, tara sara ni e nyet kau ai hkrum na hte, sat kau ai hkrum na ra ai; rai ti mung, masum ya nhtoi hta hkrung sharawt la ai hkrum na rai nga ai,? nga ai.
23 Bai shi shanhte yawng hpe tsun mu ai gaw, ?Nye a hpang hkan sa mayu ai wa kadai mung, tinang hkum hpe ndang kau nna, shani shagu tinang a wudang hpai let, ngai kaw hkan nang ru ga.Ref 9:23: Mat 10:38; Mrk 8:34; Luk 14:27.
24 Tinang a asak hkye la mayu ai wa kadai mung, asak sum na ra ai; nye a jaw e tinang asak sum ai wa gaw, asak hkye la lu na wu ai.Ref 9:24: Mat 10:39; Luk 17:33; Yhn 12:25.
25 Masha gaw, ndai mungkan ting hpe madu lu da nna, tinang dai hten byak sum mat yang gaw, shi a matu hpa akyu nga lu ta? Kaja wa akyu n nga na re ai.
26 Masha langai mi gaw, ngai hte nye a sharin shaga ai ga a majaw kaya ai rai yang, dai Masha Kasha gaw, tinang a hpung shingkang hte mung, Kawa a hpung shingkang hte mung, chyoi pra ai lamu kasa ni a hpung shingkang hte mung du sa ai shaloi, dai wa hpe kaya kau na ru ai.
27 Nanhte hpe ngai teng teng tsun made ga, nang e lawm nga ai ni hta na nkau mi, Karai Kasang a Mungdan garai n mu mu gaw, si ai n hkrum na ma ai.
(Mat 17:1-8; Mrk 9:2-8)
28 Ndai lam ni tsun ai bat mi daram na ai hpang, Yesu gaw Petru Yawhan, Yaku hte hpe woi nna, akyu hpyi na nga, dai bum de lung wa ai.
29 Shi akyu hpyi nga yang, shi a myi man ahpraw nsam galai nna, shi a hpun palawng ni mung hpraw tu ai hte kabrim kabram rai wa lu ai.
30 Akajawng sha dai kaw, masha lahkawng shi hte ga shaga nga ma ai. Dai yan gaw Mawshe hte Elia rai nga ma ai.
31 Shan gaw hpung shingkang hte dan pru nna Karai Kasang a myit ra ai lam hte maren gade nna yang, Yerusalem mare e Madu Yesu shatup shadik ai hkam lu na lam shi hte ga tsun nga ma ai.
32 Petru hte shi a manang yan gaw yup shamwi taw nga ma ai, rai ti mung, dum hprang wa yu yang, shi a hpung shingkang hte shi hte rau tsap nga ai masha lahkawng hpe mu ma ai.
33 Dai yan gaw Yesu kaw na wa magang ma yang, Petru gaw Madu hpe, ?Madu e, ndai yang e anhte nga na grai mai nga ai! Nang e sum masum, na a matu langai mi, Mawshe a matu langai mi, Elia a matu langai mi anhte gap na ga ai,? ngu nna Yesu hpe tsun wu ai. (Shi hpa tsun nga ai hpe pyi shi atsawm sha n chye da wu ai.)
34 Shing nga, shi ga shaga nga yang, sumwi du nna shan hpe de a shingnip ka-up wa nga ai; dai sumwi kata de lawm shang wa ma yang sape ni hkrit nga ma ai.
35 Dai sumwi kaw nna mung nsen langai mi ngoi pru wa ai gaw, ?Ndai wa gaw ngai Sha, ngai lata la ai wa rai nga ai, shi a ga madat mara mu,? nga ai.Ref 9:35: Esa 42:1; Mat 3:17; 12:18; Mrk 1:11; Luk 3:22; Kas 3:22.
36 Dai nsen hkring ai shaloi, Yesu shi hkrai sha nga nga ai hpe, shanhte mu ma ai, Sape ni mung, ndai lam mahkra hte seng nna atsin sha nga nna, shanhte mu ai lam ni hpe dai nhtoi hte hta kadai hpe mung n tsun dan ma ai.
(Mat 17:14-18; Mrk 9:14-27)
37 Hpang shani Yesu hte sape ni marai masum gaw dai bum kaw nna yu wa ma yang, shawa masha hpawng kaba, Yesu hpe sa bawp la ma ai.Ref 9:37: Mat 17:14; Mrk 9:14,17.
38 Shaloi, dai shawa hpawng hta na masha langai mi jahtau nna, ?Sara e, nye a shadang sha hpe yu ya na, ngai nang hpe hpyi nem nngai. Shi gaw nye a shadang sha shingtai rai li ai.
39 Shi hta nat shung nna, akajawng sha shabam wa ai hte, hkumbawp pru hkra shi hpe bu shangun nna, machyi la hkra shatsang ngut jang she, grai yak la ai hte shi kaw na pru mat wa wa re ai.
40 Dai nat shaden kau ya na matu, na a sape ni hpe ngai hpyi nem nngai, rai ti mung shanhte n galaw lu ma ai,? ngu wu ai.
41 Yesu gaw, ?Makam masham n rawng ai hte, shut hpyit ai amyu ni e, ngai nanhte hte rau gade na hkra nga nga nna hkam sharang ya lu na rai nga a ta?,? ngu nna htan wu ai. Dai hpang shi gaw, ?Na nsha hpe nang de woi sa rit,? ngu nna dai masha wa hpe tsun wu ai.
42 Dai la sha ma sa wa nga yang pyi, nat gaw shi hpe kadawng tawn nna htan gari shangun nga ai. Yesu gaw, dai n seng ai nat hpe ma kaw na pru mat na hkang dat ai hte dai ma hpe shamai ya nhtawm, kawa hpe bai ap ya wu ai.
43 Masha nga manga hte mung, Karai Kasang a daru magam n-gun a majaw mau mahka nga ma ai.
(Mat 17:22-23; Mrk 9:30-32)
Shing rai Yesu galaw ai lam mahkra a majaw, masha ni naw mau nga ma yang, shi gaw shi a sape ni hpe,
44 ?Ngai nanhte hpe tsun dan hkyen ai ga hpe hkum malap kau mu, Masha Kasha gaw masha ni a lata de ap kau ai hkrum na ra ai,? ngu nna tsun mu ai.
45 Rai ti mung sape ni gaw, dai ga hpa nga mayu ai n chye na ma ai. Shanhte dai hpe n chye na mu ga matu makoi magap da wu ai, de a lachyum mung shanhte n wam san ma ai.
(Mat 18:1-5; Mrk 9:33-37)
46 Sape ni gaw, shanhte hta na kadai wa mahtang kaba dik rai nga ai kun? nga nna shada da tsun dangrang hkat pru wa ma ai.Ref 9:46: Mat 18:1; Mrk 9:34; Luk 22:24.
47 Yesu gaw, shanhte hpa myit mang nga ai hpe chye ya ai majaw, ma kaji langai mi hpe shaga la nna, shi a makau e shatsap tawn da nhtawm,
48 ?Ndai ma hpe nye a mying a majaw hkap la ai wa kadai mung, ngai e shangun dat ai wa hpe hkap la ai rai nga ai, dai rai nna, nanhte mahkra hta grau kaji ai wa gaw, grau kaba ai wa rai nga ai,? ngu mu ai.Ref 9:48: Mat 10:40; 23:11-12; Mrk 9:37; Luk 10:16; Yhn 12:44; 13:20.
(Mrk 9:38-40)
49 Yawhan gaw, ?Madu e, na a mying hte nat ni hpe shaden kau nga ai masha langai mi hpe anhte mu hkrup ga ai. Shi gaw anhte kaw hkan nang ai wa n re majaw, anhte shi hpe hkum kau gaw ai,? ngu wu ai.
50 Yesu gaw, ?Shi hpe hkum hkum da myit; nanhte a gumlau maga n nga ai wa gaw, nanhte hpang maga nga ai wa rai nga ai,? ngu nna shi hpe tsun wu ai.
51 Ya Yesu hpe lamu de shalun la na nhtoi du wa magang yang, Yerusalem mare de sa wa na matu myit daw dan da wu ai.
52 Shi gaw shi a shawng de kasa ni hpe shangun dat wu ai. Shanhte gaw Madu a matu ra mara lajang shachyip da na matu, Samari masha ni a kahtawng langai mi de shang ma ai.
53 Rai ti mung, Madu Yesu gaw Yerusalem mare de sa wa nga ai lam dan leng nga ai majaw, kahtawng masha ni shi hpe n hkap la ma ai.
54 Sape Yaku yan Yawhan gaw, dai mu jang, ?Madu e, shanhte hpe jahten kau na, an gaw lamu de na wan shaga na, nang hkraw nga n ni?,? ngu mu ai.Ref 9:54: 2Hk 1:9-16.
55 Yesu gaw kayin nna shan hpe daru kau mu ai.
56 Dai hpang Yesu hte shi a sape ni gaw kahtawng kaga de sa mat wa ma ai.
(Mat 8:19-22)
57 Shanhte lam e sa wa nga ma yang, masha langai mi gaw, ?Nang sa ai shara shagu de, ngai nang kaw hkan sa na nngai,? ngu nna Yesu hpe tsun wu ai.
58 Yesu gaw, ?Chyahkyawn ni nhkun lu ma ai, ntsa malen pyen ai u ni mung, utsip ni lu ma ai; rai ti mung, dai Masha Kasha chyawm gaw, baw tawn na shara pyi n lu nga ai,? ngu nna shi hpe tsun wu ai.
59 Bai, kaga wa hpe, ?Ngai kaw hkan rit,? ngu wu ai.
Rai ti mung, dai masha wa gaw, ?Madu e, nye wa hpe wa lup makoi na ahkang naw shawng jaw rit,? ngu wu ai.
60 Yesu gaw, ?Masha jasi ni gaw tinang a jasi ni hpe makoi mu ga, nang gaw Karai Kasang a Mungdan lam sa hkaw dan su,? ngu nna htan wu ai.
61 Bai masha kaga langai wa mung, ?Madu e, ngai nang kaw hkan nang na nngai; rai ti mung, nye nta na ni hpe wa shakram da na ahkang naw jaw e,? ngu wu ai.Ref 9:61: 1Hk 19:20.
62 Yesu gaw, ?Na htai jum nna hpang de kayin yu ai wa kadai mung, Karai Kasang a Mungdan hte n ging dan nga ai,? ngu nna shi hpe tsun wu ai.