8
1 Dai hpang gade n na yang, Yesu gaw Mare ni hte kahtawng ni de du hkawm sa nna, Karai Kasang a Mungdan lam Kabu Gara Shiga ni hpe hkaw tsun nga ai. Sape shi lahkawng hte mung shi hte rau hkawm sa ma ai.
2 N hkru ai nat kap ai hte machyi makaw hta na shamai la hkrum ai numsha nkau mi mung, nat sanit pru mat ai Magdala Mari;Ref 8:2: Mat 27:55; Mrk 16:9.
3 Herod a nta dinghku hpe yu hpajang ai kunhting wa Kuhta a madu jan Yawhana Susanna hte num ni law law wa, tinang a lu lawm ai ja gumhpraw arung arai ni hte, Madu hte sape ni hpe karum madi shadaw jai lang nna galaw daw let hkan nang nga ma ai.
(Mat 13:1-9; Mrk 4:1-9)
4 Mare shagu na masha ni du sa wa nna shawa hpawng kaba byin wa ai shaloi Yesu ndai ga shadawn hte tsun wu ai gaw;
5 ?Kalang mi na nli gat na matu pru sa wa ai masha langai mi nga ai. Shi gaw yi hta nli hpe gat dat wu yang, nkau mi lam makau e hkrat nna, masha e kabye kau ai hte, ntsa malen na u ni hta sha kau ma ai.
6 Nkau mi gaw nlung hkrai re ai ga ntsa e hkrat nna, tu pru wa yang, ga n madi nga ai majaw nyip si mat ma ai.
7 Nkau mi gaw ju hpun ka-ang e hkrat nna, ju hpun ni hte rau tu kaba wa ai hte, dai hpe lim kau mu ai.
8 Nkau mi gaw ga sau kaja ai ga hta hkrat ai rai nna, tu kaba wa jang, htam latsa si mayat wa ai,? ngu wu ai.
Shing rai Yesu gaw, ?Na la na na tu ai wa gaw na la u ga!? nga nna jahtau tsun ai hte ga hpungdim wu ai.
(Mat 13:10-17; Mrk 4:10-12)
9 Shi a sape ni Yesu hpe, ?Ndai ga shadawn gaw hpa baw hpe ngu mayu ai rai kun?,? nga nna san ma ai.
10 Shi gaw, ?Karai Kasang a Mungdan a sung htum ai lam ni hpe chye na na ahkang nanhte hpe jaw da manit dai, masha gale ni chyawm gaw, yu layu e n mu mu ga, na lana e n chye na mu ga, ga shadawn hku ngai tsun nga nngai.
(Mat 13:18-23; Mrk 4:13-20)
11 ?Ya, ndai ga shadawn a lachyum gaw ndai hku rai nga ai,
12 Lam makau e hkrat ai nli tum ni gaw, mungga na la ai hpang, kam sham ai hte hkye hkrang la ai kaw n du lu mu ga, dai mungga hpe shanhte a kraw lawang ni kaw na nat e shaw la kau ya ai hkrum ai ni hpe ngu ai rai nga ai.
13 Nlung hkrai re ai ga hta hkrat ai nli tum ni gaw, dai mungga hpe na la nna kabu gara ai myit hte hkap la ma ai. Rai ti mung, shanhte hta ru sung sung n jung ai majaw, tawng marang mi sha kam sham nhtawm, agung alau hkrum ai ten du jang, shanhte bai htak mat ai ni hpe ngu ai rai nga ai.
14 Ju sumwum ni hta hkrat ai nli tum ni gaw, mungga na la ai hpang aten na mat wa ai shaloi, ndai prat na myit ru myit tsang lam ni, sut lu sut su lam ni, pyaw daw tam ai lam ni hpring chyat bang wa nna lim kau ai majaw, ja kat ai asi galoi mung n si ai hte bung ai ni hpe ngu ai rai nga ai.
15 Ga sau kaja ai hta hkrat ai nli tum ni gaw, dai mungga hpe na la nhtawm, kaja ai hte madat mara ai myit masin kraw lawng hta lashum lanoi rai nna asi si ai ten du hkra hkam sharang ai ni hpe ngu ai rai nga ai.?
(Mrk 4:21-25)
16 ?Pyengdin shatu nhtawm, mung hte ka-up da ai shing n rai, yup ku npu e tawn da ai gaw kadai n galaw ga ai. Shing di na malai, nhku de shang wa ai masha ni nhtoi asan sha mu lu mu ga, shi gaw pyengdin shadun hta shadun da ga nga ai.Ref 8:16: Luk 11:33; Mat 5:15; Mrk 4:21.
17 Hpa majaw nga yang, makoi da ai arai hpa mung dan dawng ai de shapraw shadan dat na ra ai; ka-up magap da ai, hpa baw mung, mu lu ai nhtoi de shapraw dan na ra ai.Ref 8:17: Luk 12:2; Mat 10:26.
18 ?Dai re ai majaw, nanhte gara hku madat la myit dai hpe sadi nga mu; hpa majaw nga yang, lu ai wa kadai hpe mung, naw jat jaw na ra ai; n lu ai wa kaw na chyawm gaw, shi lu dum ai kachyi mi hpe pyi naw shaw la kau ya na ra ai,? ngu mu ai.Ref 8:18: Luk 19:26; Mat 13:12.
(Mat 12:46-50; Mrk 3:31-35)
19 Yesu a kanu hte kanau ni shi kaw sa du ma ai; rai ti mung, shawa masha chyat nga ai majaw, shi hpang de n sit shang lu ma ai.
20 Dai shaloi masha marai langai mi gaw Yesu hpe, ?Na nnu hte nnau ni nang hpe hkrum mayu nna shinggan e tsap nga ma ai,? ngu nna tsun wu ai.
21 Yesu gaw shanhte yawng hpe, ?Karai Kasang a mungga na la nna madat mara hkan galaw ai ni gaw, ngai nu, ngai nau ni rai nga ma ai,? ngu nna htan wu ai.
(Mat 8:23-27; Mrk 4:35-41)
22 Lani mi hta, shi gaw shi a sape ni hte rau li langai mi hta shang nna, ?Anhte nawng wora hkran de rap sa wa ga,? ngu nna shanhte hpe tsun mu ai. Shaloi shanhte rap sa wa magang ma ai.
23 Shing rai shanhte rap sa wa nga yang, Yesu yup pyaw nga ai. Akajawng sha grai ja ai nbung laru langai mi dai nawng ntsa de bung hkrat wa nna, li hta hka hpring wa nga ai majaw, shanhte lup magang wa nga ma ai.
24 Sape ni Madu kaw sa nhtawm, ?Madu e, Madu e, anhte si na sha rai saga ai,? ngu nna shi hpe jasu mu ai.
Shaloi shi rawt nna, nbung hte hkaleng ni hpe daru kau wu ai, dai ni mung sim mat wa nna, dai yang e atsin sim rai nga ai.
25 Dai rai nna shi gaw, ?Nanhte a makam masham kanang rai wa malit ta?,? ngu nna shi a sape ni hpe tsun mu ai.
Shanhte chyawm gaw hkrit gari ai hte mau mahka mat nna, ?Ndai masha wa gaw kadai wa re ai i? Nbung hte hkaleng ni pyi, shi mungga dat nna daru wu yang, dai ni madat nga ma hka!? nga nna shada da tsun shajang ma ai.
(Mat 8:28-34; Mrk 5:1-20)
26 Shaloi Yesu hte sape ni gaw Galile mung hte taw tap re ai Gerasa mung de sa du ma ai.
27 Yesu hkin-gau ntsa de pru lung wa yang, dai mare na nat kap ai masha langai mi sa tau la wu ai. Dai wa gaw aten na na wa hpun palawng n bu hpun ai hte, nta e mung n nga ai sha, lupwa lungpu ni hkan e nga nga ai.
28 Dai wa gaw Yesu hpe mu jang, jahtau nna shi a man e dingnyawm dagup let, ?Tsaw Htum ai Karai Kasang a Kasha Yesu e, nang ngai hte hpa daw nga a ta? Nang ngai hpe n zingri n ga, ngai nang hpe hpyi nem nga nngai,? ngu nna marawn tsun wu ai.
29 Hpa majaw nga yang, Yesu gaw, n seng ai nat hpe dai wa kaw na pru mat wa na matu hkang da nu ai majaw rai nga ai. Dai nat gaw dai wa hta law law lang shung ai majaw, shi hpe bawng zawn hkanghkyi hkang hte, hpri sumri hte mung shi a lagaw lata ni hpe gyit hkang sharen da ai rai ti mung, dai sumri ni hpe gang dut kau nna, nat gaw dai wa hpe nam mali de shapoi la la arai nga ai.
30 Yesu gaw, ?Na a mying hpa rai lit ta?,? ngu nna shi hpe san wu ai.
Shi gaw, ?Legio rai li ai,? ngu wu ai. Hpa majaw nga yang, nat law law shi hta shang nga ma ai.
31 Nat ni mung, shanhte hpe sung htum ai shara de n gawt bang kau na shi kaw hpyi ma ai.
32 Ya dai makau mayang e, wa wunawng kaba langai mi kawng marawn ntsa hkan kanaw sha let nga nga ma ai. Shing rai, nat ni gaw dai wa ni hta shang lu na ahkang Yesu kaw hpyi nem ma ai. Shaloi shi shanhte hpe ahkang jaw dat mu ai.
33 Dai rai nna nat ni gaw, dai masha kaw na pru nna, wa ni hta shang ma ai. Shaloi dai wa wunawng ting gaw dai n gam mahka kaw nna nawng de gat ru bang wa nna, marit si mat ma ai.
34 Wa rem ai ni shing rai byin ai hpe mu jang, hprawng gat wa nna mare hte kahtawng ningchyawng hkan dai shiga hpe tsun shabra dat ma ai.
35 Masha ni mung dai byin ai lam hpe yu na pru sa wa ma ai. Shanhte Yesu kaw du ma yang, nat ni pru mat wa kau da ai wa gaw, hpun palawng bu hpun nna, shawoi na myit kaja hte Yesu a lagaw nhpang e dung nga la ai hpe mu ma ai shaloi hkrit kahpra mat ma ai.
36 Dai lam mu chye ai ni mung, nat kap ai wa hpe kaning di shamai ya ai lam, masha ni hpe hkap tsun dan mu ai.
37 Shaloi, buga ginwang hkan na masha ni yawng gaw, hkrit kaba hte hkrit ma ai majaw shanhte kaw na pru mat wa na matu Yesu hpe jawm hpyi nem ma ai. Dai rai nna Yesu gaw li de shang nhtawm, dai shara na pru mat wa ai.
38 Nat ni pru kau da ai masha wa gaw, Yesu hpe, ?Ngai nang kaw hkan nang na nngai,? ngu nna hpyi nem wu ai.
39 Rai ti mung Yesu gaw, ?Na nta de she wa nna, Karai Kasang nang hpe hpa galaw sai lam wa tsun dan su,? ngu nna shabawn dat wu ai.
Shaloi shi pru wa nna, Yesu shi hpe gade wa karum sai lam dai mare hkan tsun hkawm nga ai.
(Mat 9:18-26; Mrk 5:21-43)
40 Yesu gaw, nawng wora hkran de bai du wa yang, shi hpe grai la nga mala ai rai nna shanhte hpe hkap hkalum bawp la ma ai.
41 Shaloi, Yairu mying ai tara jawng up ai agyi wa langai mi sa du ai. Dai wa gaw, Yesu a lagaw nhpang e hput di nna, shi a nta de sa na matu shi hpe hpyi nem wu ai.
42 Hpa majaw nga yang asak shi lahkawng ning du sai shi a shayi sha shingtai machyi nna si wa magang nga lu ai.
Yesu hkan sa wa nga yang, shawa masha ni shi hpang de shadut bang wa ma ai.
43 Dai shawa hpawng hta shi lahkawng ning tup sai htaw machyi nna, shi hta lu lawm ai ja gumhpraw yawng htum hkra tsi sara ni hte tsi sai rai ti mung, gade e mung n shamai ya lu ai numsha langai mi lawm nga ai.
44 Shi gaw Yesu a shingdu maga hku shawa masha ni hte sanyen nna, Madu hpang de sit sa nhtawm, shi a palawng banbyau hpe ahtawk wu ai, shaloi jang shi a sai htaw ai ana gaw sim mat lu ai.
45 Shaloi Yesu gaw, ?Ngai hpe ahtawk ai kadai rai ta?,? nga nna san ai.
Nlang hte ndang nga ma yang, Petru gaw, ?Madu e, grup yin chyat nga ai shawa masha ni nang hpe htu kanawng matep nga ma ai majaw rai nga ai,? ngu wu ai.
46 Rai ti mung Yesu gaw, Marai langai ngai ngai hpe ahtawk sai, hpa majaw nga yang, ngai kaw na atsam pru wa sai hpe ngai chye nngai, nga ai.
47 Dai numsha gaw makoi magap n rai lu sai hpe chye wu jang, gari kawa rai sa nna, shi a lagaw nhpang e dingnyawm dagup let, hpa rai shi ahtawk ai lam, dai shaloi jang shi mai tsai mat ai lam masha mahkra a man e tsun dan wu ai.
48 Yesu gaw, ?Shayi sha e, na a kam sham ai gaw nang hpe shamai ya nit dai, ngwi pyaw ai hte wa u,? ngu nna shi hpe tsun dat wu ai.
49 Yesu ga naw tsun nga yang, tara jawng agyi a nta de na masha marai langai mi sa nna, ?Na a shayi sha si mat salit dai, dai sara hpe hkum shatsang nu,? nga nna sa tsun ai.
50 Yesu dai ga na jang, ?Hkum hkrit et, kam sham ai myit sha rawng u, shaloi shi mai na ra ai,? ngu nna Yairu hpe tsun wu ai.
51 Madu Yesu dai tara jawng agyi a nta de du yang, Petru, Yawhan, Yaku hte dai numsha ma a kanu yan kawa hta kaga, shi hte rau nhku de kadai hpe mung n shang shangun wu ai.
52 Yawng mayawng gaw, dai ma a majaw, hkrap ngu hkrap ngoi nga nna sharung shayawt nga ma ai. Yesu gaw, ?Hkum hkrap myit, shi si ai n rai, yup pyaw nga ai,? ngu mu ai.
53 Ma gaw si mat sai hpe shanhte chye ma ai majaw, shi hpe asawng asang ngu nna mani kau mu ai.
54 Rai ti mung Yesu chyawm gaw, dai ma a lata jum da nna, ?Ma e, rawt u!? ngu nna shaga wu ai.
55 Shi asak bai hkrung wa ai hte shaloi jang shi rawt wa ai; Yesu mung dai ma hpe lusha lama ma jaw sha na hkang da mu ai.
56 Dai ma a kanu yan kawa chyawm gaw, mau mahka mat ma ai. Rai ti mung, dai byin ai lam kadai hpe mung n tsun dan u ga, shi shanhte hpe ginhtim da mu ai.