7
(Mat 8:5-13)
1 Dai shaloi Yesu gaw shawa masha ni hpe ndai lam ni yawng tsun ngut ai hpang, Kaperna-um mare de sa mat wa ai.
2 Dai mare kaw nga ang ai Roma hpyen du langai mi hta, shi grai tsaw ra ai shangun ma langai mi nga ai. Dai wa gaw machyi nna si wa magang nga ai.
3 Dai du wa gaw Yesu a lam na jang, Yuda agyi salang nkau ni hpe shangun dat nna, shi a shangun ma hpe sa shamai ya na, Yesu hpe hpyi dat wu ai.
4 Dai ni gaw Yesu kaw du ma yang, ?Ndai masha gaw nang karum la ai hpe hkam la na hkrak sha ging dan ai wa rai nga ai.
5 Hpa majaw nga yang anhte amyu masha ni hpe shi tsaw ra ai hte anhte a matu tara jawng langai mi, shi nan gap ya mani ai,? nga nna akroi anoi shi hpe hpyi ma ai.
6 Dai rai nna Yesu gaw, shanhte hte rau sa wa ai. Shi dai nta hte gade n tsan ai kaw du jang, hpyen du wa gaw shi a jinghku ni hpe shangun dat nna, ?Madu e na a hkum hpe hkum shatsang et, nye nta magaw npu e nang sa shang na gaw, ngai n ging n dan nngai.
7 Ngai hkum nan mung nang kaw sa na ging dan nngai ngu nna n myit nngai, na a ga hkaw mi sha tsun dat rit, shaloi nye a ma mai na ra ai.
8 Hpa majaw nga yang, ngai mung lahta de na du ni e dang da hkrum ai masha rai nngai, nye a lawu de mung hpyen la ni nga ma ai. Ngai gaw, ndai langai wa hpe, ?Sa su!,? ngu yang shi sa wa ai; Kaga wa hpe ?Wa rit!,? ngu yang shi wa ai; nye mayam wa hpe mung, ?Ndai galaw u!,? ngu yang shi galaw nga ai,? ngu nna tsun shangun dat wu ai.
9 Yesu gaw dai ga na jang, dai wa a lam mau nna, shi kaw hkan nang ai shawa masha ni hpe kayin yu let, ?Nanhte hpe ngai tsun made ga, Israela amyu hta pyi, ndai zawn kam sham ai gaw ngai n mu hkrup nngai,? ngu mu ai.
10 Shangun dat ai ni nta de bai du wa ma yang, dai machyi ai shangun ma gaw, akaja sha rai nga la ai hpe, wa mu ma ai.
11 Dai hpang gade n na yang, Na-in ngu ai mare de shi sa wa ai rai nna, shi a sape ni hte shawa masha hpung kaba mung, shi hte rau sa wa ma ai.
12 Dai mare chyinghka de shi du magang yang, si mat ai masha langai mi hpe lup makoi na matu mang hpai ai ni hpai pru sa wa mara ai; si ai wa gaw gaida jan langai mi a shadang sha shingtai rai nga ai; mare masha law law mung dai num hte rau hkan sa nang ma ai.
13 Madu gaw, dai gaida jan hpe mu jang, shi hpe matsan yu dum nna, ?Hkum hkrap et,? shi hpe ngu wu ai.
14 Dai hpang shi ani sha sit sa nna, dai da-u hpe ahtawk wu ai; hpai ai ni mung hkring tsap ya ma ai; shaloi shi gaw, ?Shabrang e, ngai nang hpe tsun de ai, rawt u!? ngu wu ai.
15 Si ai wa mung rawt dung nna ga tsun hpang nga ai, dai Madu gaw shi hpe kanu a lata de ap ya wu ai.
16 Masha yawng hte mung hkrit let mau mat shajang ma ai rai nna, Karai Kasang hpe shagrau sha-a let, ?Myihtoi kaba anhte kaw paw pru ra ai, nga nna mung; Karai Kasang gaw shi a amyu hpe hkye la na matu du sa ra ai, nga nna mung,? shanhte tsun gara ma ai.
17 Ndai Yesu a lam a shiga gaw, Yuda mung ting hte grup yin shara shagu kajai gumhkawng mat wa ai.
(Mat 11:2-19)
18 Shaloi, Yawhan a sape ni gaw dai lam yawng mayawng Yawhan hpe wa tsun dan mu ai.
19 Yawhan gaw, shi a sape lahkawng hpe shaga la nhtawm, dai Madu hpang de shangun dat nna, ?Nang gaw Yawhan tsun ai dai du sa na ra ai wa rai nga n ni?,? ngu nna san dat wu ai. ?Shing n rai kaga hpe anhte naw myit mada lu na rai nga a ni?,? ngu nna shi hpe san mu ai.
20 Dai yan gaw Yesu kaw du jang, ?Hkalup sara Yawhan gaw nang hpe san yu na matu an hpe shangun dat mi ai. Nang gaw Hkalup sara Yawhan shi tsun da ai dai du sa na ra ai wa rai nga n ni? Shing n rai, kaga hpe anhte naw myit mada lu na rai nga a ni?,? ngu nna tsun mu ai.
21 Dai ahkying e nan Yesu gaw, shanhte a machyi makaw ni, ana ahkya ni hte n hkru ai nat kap ai ni hpe shamai kau ya mu ai, myi kyaw ai masha law law hpe mung myi bai mu lu shangun mu ai.
22 Yawhan a kasa yan hpe shi htan mu ai gaw, ?Wa nna Yawhan hpe, nan mu lu, na lu ai lam ni tsun dan mu, myi n mu ai ni myi bai mu lu ma ai; Lagaw hten ai ni bai hkawm sa ma ai; manggang kap ai ni san pra wa lu ma ai; na lahpang ai ni na lu ma ai; si mat ai ni sharawt la ai hkrum ma ai; matsan mayan ni hpe Kabu Gara Shiga hkaw dan nga ai.Ref 7:22: Luk 4:18; Esa 35:5; Mat 11:4.
23 Ngai hta myit kataw ai lam n mu ai ni kadai mung a lu nga ai,? ngu nna tsun mu ai.
24 Yawhan a kasa yan wa mat ai hpang, Yesu gaw Yawhan a lam hte lakap nna shawa masha ni hpe tsun hpang wu ai gaw, ?Nanhte nam mali de Yawhan kaw sa ai shaloi hpa hpe hpu yu na myit mada nna sa myit ta? Nbung e kanga ai mai-aw hpe rai ni?
25 Shing n rai, hpa hpe yu na sa myit ta? Mani tsawm ai bu hpun palawng bu hpun tawn ai wa hpe rai ni? Dai zawn tsawm htap ai bu hpun palawng bu hpun nna nhpaw n-ya ningngai nga lu ai gaw, hkawhkam htingnu ni hta mu lu nga ai.
26 Nanhte hpa hpe sa yu na matu pru sa ai lam ngai hpe tsun dan yu marit, myihtoi hpe rai ni? Kaja wa rai nga ai, rai ti mung, myihtoi hta grau kaba ai wa hpe nanhte mu manit dai.
27 Hpa majaw nga yang, Chyum Laika hta tsun ai gaw, Yawhan shi hpe ngu ai rai nga ai; dai gaw, ?Na a shawng e na a lam lajang magang na, nye a kasa hpe ngai shangun dat na nngai,? nga nna Karai Kasang tsun ai,?Ref 7:27: Mal 3:1.
28 ?Nanhte hpe ngai tsun made ga, numsha kaw na shangai ai ni hta, Yawhan hta grau kaba ai langai mi mung n nga yu ai, rai ti mung, Karai Kasang a Mungdan hta kaji htum ai wa gaw Yawhan hta grau kaba ai wa rai nga ai,? ngu mu ai.
29 Masha yawng mayawng gaw Yawhan a ga na la ma ai; shing rai shanhte hte, kang hta ai ni pyi gaw Yawhan a lata hta hkalup sa hkam la let dai Karai Kasang a ding man ai lam hpe sak se hkam shagrau ma ai.Ref 7:29: Luk 3:12; Mat 3:5.
30 Rai ti mung, Hparishe ni hte Tara Sara ni chyawm gaw, shanhte a matu Karai Kasang a shatawng shada ai lam hpe n hkap la ma ai hta n-ga, Yawhan a lata hta hkalup n hkam la ma ai.
31 Yesu matut nna tsun ai gaw, ?Ndai prat na masha ni hpe ngai hpa hte shadawn na rai ta? Shanhte hpa hte bung ma ta?
32 Shanhte gaw, gat hkan e dung nga ai ma ni hte bung nga ma ai. Dai ma ni hta na hpung mi gaw kaga hpung mi hpe jahtau gintan nna tsun ai gaw, ?Anhte gaw nanhte a matu, hkungran poi galaw chyai ai hku mahkawn sumpyi dum ya timung, nanhte n ka myit dai! Anhte makoi mayang poi galaw chyai ai hku yawn hkyen mahkawn, mahkawn ya timung, nanhte n hkrap myit dai!?
33 Hpa majaw nga yang, Hkalup Sara Yawhan sa du nna, muk n sha, sabyi n lu ai nga yang mung, ?Shi Nat kap ai wa rai nga ai,? nga myit dai.
34 Dai Masha Kasha sa du nna, lu nga, sha nga ai rai yang mung, nanhte gaw, Ndai masha wa hpe yu mu! Shi gaw lu lai sha lai ai wa, kang hta ai ni hte kaga yubak kap ai ni a jinghku wa rai nga ai, bai nga myit dai.
35 Rai ti mung, Karai Kasang a hpaji byeng-ya hpe hkap la ai ni yawng chyawm gaw, dai hpaji byeng-ya teng man nga ai lam madun dan ma ai.?
36 Hparishe langai mi gaw, shi kaw shana shat sha na matu Yesu hpe saw shaga wu ai. Dai rai nna, dai Hparishe a nta de Yesu shang nna sha na matu dung nga ai.
37 Ya dai mare kaw yubak kap ai numshai 7:37: Yubak kap ai numsha: Shawa num galaw sha ai numsha hpe ngu ai. langai mi nga ai rai nna, Yesu gaw Hparishe a nta e shat sha dung nga ai lam shi na wu ai. Shing rai shi gaw, manam pyaw ai baw mura sau hpring hkra rawng ai lunghpraw ndum langai mi la sa nhtawm,
38 Shingdu maga, Yesu a lagaw nhpang e hkrap tsap nga let, Madu a lagaw hpe myi prwi hte madit ya wu ai, dai hpang shi a kara hte katsut kau ya wu ai, shi a lagaw hpe mung pup nhtawm, manam pyaw ai mura hte chya ya wu ai.
39 Yesu hpe shaga ai Hparishe wa dai mu jang, ?Ndai wa kaja wa myihtoi langai mi rai yang gaw, ndai num gaw kadai re ai, shi hpe kadai wa sa hkra nga ai, ndai num gaw kaning re ai yubak kap ai jan rai nga ai mung, shi chye na wu ai,? nga nna shi a kraw e myit nga ai.
40 Yesu gaw htan let shi hpe tsun wu ai gaw, ?Simun e, ngai nang hpe tsun na lam lama mi lu nngai,? ngu wu ai.
Simun gaw, ?Rai sa, sara e, tsun rit,? ngu wu ai.
41 Shaloi Yesu gaw, ?Gumhpraw hkoi ya ai wa langai mi kaw hka kap ai masha lahkawng nga ma ai, langai wa mi hta lap manga tsa, langai wa mi hta manga shi kap ai.
42 Dai yan gaw hka wa na n lu ma ai majaw hka madu gaw shan lahkawng hpe shalawt dat wu ai. Shing re ai majaw, dai yan hta kadai wa mahtang shi hpe grau tsaw ra na ma ta?,? ngu wu ai.
43 Simun gaw, ?Grau law shalawt kau ya ai wa rai na re ai, ngai nawn nngai,? ngu nna htan wu ai.
Yesu gaw, ?Nang hparan ai hku jaw sai,? ngu wu ai.
44 Shaloi dai numsha hpang de shi kayin nna Simun hpe, ?Ndai numsha hpe nang mu da wu ni? Ngai na nta de shang tim, lagaw shin na ntsin nang n jaw ndai, shi chyawm gaw myi prwi hte nye a lagaw madit ya nna, shi a kara hte katsut kau ya ni ai.
45 Nang ngai hpe pup ai hte n hkalum la ndai; shi chyawm gaw, ngai nhku de shang ai ten kaw nna nye a lagaw hpe pup n sim nga ai.
46 Nye a baw hpe tsanlun sau n chya ya ndai; shi chyawm gaw nye a lagaw hpe mura chya ya ni ai.
47 Dai lam a majaw ngai nang hpe tsun de ga, dai numsha a tsaw ra myit law law madun ai lam a majaw, shi a law la ai yubak mara ni hpe dat kau ya hkrum sai, ngu ai sakse madun nga ai. Kadai rai ti mung, loi sha mi raw dat kau ya hkrum ai wa gaw, loi sha mi tsaw ra ai lam madun dan nga ai,? ngu nna tsun wu ai.
48 Dai hpang Madu gaw, ?Na a yubak mara ni hpe dat kau ya sade ai,? ngu nna numsha hpe tsun wu ai.
49 Rau shat sha dung nga ai ni gaw, ?Yubak mara ni hpe nan raw dat kau ya lu ai, ndai wa gaw, kadai wa rai ta?,? nga nna shanhte tsun shajang ma ai.
50 Rai ti mung, Yesu gaw numsha hpe, ?Na a kam sham ai gaw nang hpe hkye la nit dai, apyaw sha wa nu,? ngu nna tsun dat wu ai.