2
(Mat 1:18-25)
1 Dai ten e, Roma mungdan ting hta nga ai masha jahpan hta la na matu, Roma hkawseng Augustu kaw nna mungga shapraw dat wu ai.
2 Dai jahpan hta la ai aten gaw Kureni (Quirinius) ngu ai wa Suri mung hta munggyi tai nga yang, shawng hta la ai jahpan rai nga ai.
3 Shaloi masha mahkra gaw amying shalawm na matu, langai hte langai tinang a mare de wa ma ai.
4 Yosep mung, Dawi a aru arat hte kashu kasha rai nga ai majaw, Galile mung na Nazaret mare kaw nna Yuda mung na Dawi hkawhkam a shangai daidaw buga rai nga ai Betlehem mare de lung wa ai.
5 Shi gaw, shi mahtan da ai num Mari hte rau, amying wa bang na matu lung wa ai. Mari chyawm gaw na-um nasin hkum rai nga ai.
6 Shan Betlehem e naw nga nga yang, Mari a matu shangai nhtoi gu nu ai.
7 Shi gaw shadang sha alat shangai nu ai: nbat hte kayawp nhtawm ushat wakang hta kaleng tawn da wu ai; kaning rai nme law, manam jarawp hta shanhte a matu nga shara n nga malu ai.
8 Ya dai ginwang daw ni hta sagu rem ai masha ni urawng udat hkan e nga ma ai rai nna, shanhte a sagu hpung ni hpe shana na ahkying ladaw ni hta sin nga ma ai.
9 Shaloi dai Madu a lamu kasa langai mi shanhte a man e dan pru nna, dai Madu a hpung shingkang shanhte a grup yin htoi kabrim wa ai. Dai rai nna shanhte gaw hkrit kaba hte hkrit mat ma ai.
10 Rai ti mung, lamu kasa gaw, ?Hkum hkrit myit! Masha nlang a matu nachying kabu gara mai ai shi ga ngai nanhte kaw gun sa ring ngai.
11 Dai ni na nhtoi hta Hkye Hkrang La ai Wa Hkristu ngu ai Madu gaw, Dawi a mare e nanhte a matu shangai wa sai.
12 Ma chyangai langai mi nbat hte kayawp nna ushat wakang hta kaleng taw nga ai hpe nanhte mu na marin dai; dai gaw shangai wa sai ma teng teng rai nga ai lam nanhte chye lu na matu kumla rai na ra ai,? ngu nna shanhte hpe tsun mu ai.
13 Ya, dai lamu kasa hte rau, lamu na lamu kasa wunawng wuwa ga daga, akajawng sha dan pru nna, Karai Kasang hpe shakawn kungdawn let,
14 ?Matsaw lahta tang e Karai Kasang gaw hpung shingkang rawng nga u ga;
Ga ntsa e mung, shi sharawng awng ai masha ni hta, ngwi pyaw ai gaw anga nga nu ga law!? nga ma ai.
15 Lamu kasa ni sagu rem ai ni kaw na wa mat jang, shanhte gaw, ?Betlehem de du hkra nan anhte sa nna, byin wa sai hte, dai Madu anhte hpe sa tsun dan ai lam hpe hpu yu saga,? nga nna shada da tsun ma ai.
16 Shingrai shanhte tin tin sa nna, Mari yan Yosep hpe mung, ushat wakang hta kaleng taw nga ai ma hpe mung mu ma ai.
17 Sagu rem ai ni dai ma hpe mu ma ai shaloi, dai ma a lam lamu kasa ni shanhte e tsun dan ai ga hpe, shanhte tsun kajai dat ma ai.
18 Sagu rem ai ni tsun kajai dan ai ga na mana ni mung, dai ga a majaw mau ma ai.
19 Mari chyawm gaw dai lam yawng mayawng matsing gun la nna, shi kraw kata e aru yu nga ai.
20 Sagu rem ai ni mung shanhte wa nna, shanhte hpe lamu kasa tsun dan manu ai hte maren, na la, mu la, ai lam mahkra a majaw, Karai Kasang hpe shagrau sha-a nna, shakawn kungdawn let bai wa ma ai.
21 Bat mi a hpang, matsat ya ngu na shani, ma hpe matu gadoi lam jaw na aten du jang, hkritung hkriwang e shi garai n rawng yang lamu kasa shamying da ai amying hte maren, shi hpe Yesu ngu nna shamying mu ai.Ref 2:21: Luk 1:31,59; Jaw 12:3; Mat 1:21-25.
22 Mawshe a Tara hte maren, shanhte a jasan jaseng ai nhtoi gu jang, shadang sha alat shagu dai Madu a rai nga ai ngu na matu,
23 Madu a tara hta ka da nga ai hte maren, dai ma hpe Madu kaw sa ap ya na matu mung,Ref 2:23: Pru 13:2; 34:19; Bhk 3:13; 8:17.
24 Dai Madu a tara hta tsun da ai hte maren, hkrudu lahkawng, shing n rai ura kasha lahkawng, hkungga nawng ya na matu, shan gaw ma hpe Yerusalem mare de woi sa mu ai.Ref 2:24: Jaw 12:6,8.
25 Dai ten hta Simun mying ai masha langai mi Yerusalem mare e nga ai, dai wa gaw ding hpring ai hte Karai Kasang hpe hkrit hkungga nna, Israela hpe hkye hkrang la na lam myit mada ala nga ai wa rai nga ai.
26 Shi gaw dai Madu a ga sadi hte du sa na ra ai Meshiad 2:26: Meshia: Dai gaw Hebre ga rai nna namman jaw hkam ai wa (Anointed one) Hkristu ngu ai ga gaw Grik ga kaw na sa wa ai rai nna, Hebre hku Meshia ngu ai ga hpe Grik ga hku gale tawn ai, ?Namman jaw hkam ai wa,? ngu ai lachyum sha rai nga ai. Ahkang aya hte seng ai mying rai nga ai. (Mat 16:16; Mrk 8:29; Yhn 1:41; Kas 11:17; Rom 5:1.) hpe garai n mu yang, si na n rai nga nna, Chyoi Pra ai Wenyi e madun dan ai lu la wu ai.
27 Dai wa gaw Nawku Htingnu kata de Wenyi hte du sa ai. Kanu yan kawa gaw ma Yesu hpe tara htung hte maren di ya na woi sa ma ai.
28 Shaloi, Simun gaw shi a lata hte dai ma hpe pawn la nna Karai Kasang hpe chyeju dum shagrau sha-a let:
29 ?Ya, N-gawn Madu e, na a ga sadi tawn da nit dai hte maren,
na a shangun ma wa hpe ngwi pyaw ai hte wa shangun dat nit ga law.
30 Na a hkye hkrang la ai lam hpe nye a myi hte chyaw mu lu se ai,
31 masha amyu ni yawng mu lu na matu nang lajang nu ai:
32 Maigan amyu ni a man e na a myit ra ai lam shadan dan na nhtoi hte,
na a amyu Israela a matu hpung shingkang jaw ya na lam rai nga ai,? nga nna tsun ai.Ref 2:32: Esa 9:2; 60:1-3; Mat 4:16; Kas 13:47; 28:28.
33 Ma a kanu yan kawa gaw Simun shi a lam tsun ai ga a majaw, mau nga ma ai.
34 Simun gaw shanhte hpe shaman ya nna, kanu Mari hpe, ?Yu u, ndai ma gaw, Israela ni hta law law a matu kataw shara hte, law law a matu rawt wa na lam mung, masha law law ndang kalang hkat na Karai Kasang kaw na kumla matu mung san da ai wa rai nga ai.
35 Dai hta n ga, masha law law a kraw lawang hta makoi magap da nga ai myit mamyit lam hpe shadan shabrawng ya na hte, yawn hkyen ai lam gaw dai nna masen ai nhtu hte na kraw lawang hpe galun htinggrang ya ai zawn rai na ra ai,? ngu nna tsun wu ai.
36 Dai hta n-ga, Ashe amyu lakung hta na Hpanuela ngu ai wa a shayi sha, asak grai kaba sai gaida jan Anna ngu ai num myihtoi langai mi nga ai. Shi gaw hkungran ai kaw nna, sanit ning du hkra sha madu wa hte nga nhtawm, matsat shi mali ning tup gaida nga ai.
37 Dai num gaw Nawku Htingnu kaw na n pru ai sha, lusha gam nna akyu hpyi ai hte Karai Kasang hpe nawku daw jau let anga nga ai.Ref 2:37: Kas 27:7.
38 Shi mung dai ahkying e nan du sa wa nna Karai Kasang hpe shakawn kungdawn let, Yerusalem hpe hkye hkrang la na lam myit mada nga ai ni yawng hte hpe dai ma a lam tsun dan mu ai.
39 Yosep yan Mari gaw dai Madu a tara hte maren, lam magup shatup da ngut jang, Galile Ginwang na tinang a buga Nazaret mare de bai wa ma ai.
40 Dai ma gaw kaba wa ai hte n gun lapyin ja wa nna, hpaji byeng-ya hte hpring nga ai; Karai Kasang a chyeju mung shi a ntsa e nga nga ai.
41 Yesu a kanu yan kawa gaw, Shalai Wa ai Poi du jang, shaning shagu Yerusalem mare de sa ma ai.Ref 2:41: Pru 23:15; Trj 16:1,16.
42 Dai ma Yesu asak shi lahkawng ning du ai shaloi, dai poi a shawoi na htung hte maren shanhte lung wa ma ai.
43 Poi nhtoi ni ngut nna, shanhte nta de bai wa ma yang, ma Yesu chyawm gaw Yerusalem e hti nga mat ai. Shi a kanu yan kawa chyawm gaw dai lam n chye ma ai.
44 Rau wa manang hpung hta lawm nga a dawng, nga nna myit kam ma ai majaw shan gaw lani sat wa nna, mayu dama ni hte chye chyap ai jinghku jingyu ni kaw shi hpe hkan tam ma ai.
45 Dai ma hpe n mu jang, shan gaw Yerusalem de bai nhtang sa nna hkan tam ma ai.
46 Ya masum ya na wa sayang she, dai Nawku Htingnu kata, Yuda sara ni a ka-ang e, shanhte a ga madat la nna, shanhte hpe ga san ni san let dung nga ai hpe shan sa mu ma ai.
47 Shi a ga na mana ni gaw, shi a bawnu hpaji kungzet ai ga san hte mahtai jaw ai lam ni a majaw mau nga ma ai.
48 Shi hpe mu jang shan mau mat ma ai rai nna, shi a kanu gaw, ?Ngai sha e, hpa rai an e ning di mi ta? Yu u, na nwa hte an grai myit ru myit tsang ai hte nang hpe hkan tam nga ga ai,? ngu nna shi hpe tsun mu ai.
49 Shi gaw, ?Hpa rai ngai hpe tam myit ta? Nye wa a nta e ngai nga lu na mai ai nan n chye myit ni?,? ngu nna shan hpe htan mu ai.
50 Rai ti mung, shi shan hpe htan ai ga shan n chye na ma ai.
51 Shi chyawm gaw shan hte rau Nazaret mare de bai wa nna shan hpe madat mara let nga nga ai, Shi a kanu gaw ndai lam ni mahkra hpe shi kraw hta matsing da wu ai.
52 Yesu gaw gawng shingyan kaba wa nna, hpaji byeng-ya kung hpan wa ai hte, Karai Kasang a man e mung, masha a man e mung, myi man pa wa nga ai.Ref 2:52: Luk 2:40; 1Sa 2:26; Gsh 3:4.