15
(Mat 18:12-14)
1 Lani mi hta, kang hta ai ni hte, kaga kabai kau hkrum ai yubak kap ai masha ni law law wa, Yesu a ga madat na nga nna, shi hpang de sit sa ma ai.Ref 15:1: Mat 9:10.
2 Hparishe ni mung, Tara sara ni mung, ?Ndai wa gaw Yubak kap ai ni hpe hkap la nna, shanhte hte rau lu, rau sha nga ai!,? nga nna aput angun nga ma ai.
3 Dai majaw Yesu gaw, shanhte hpe ndai ga shadawn hte tsun mu ai gaw,
4 ?Nanhte hta marai langai mi sagu latsa lu ai hta na langai mi mat mat yang, shi hpa galaw a ta? Shi gaw, jahku shi jahku hpe wudat shara e tawn kau da nhtawm, mat mat ai sagu hpe n mu yang mu hkra hkan tam nga ai.
5 Dai hpe mu jang mung, shi grai kabu gara ai hte lahpa hta mara nna hpai wa na ra ai.
6 Shi nta de du wa jang, jinghku ni hte htingbu htingbyen ni hpe shaga nna, ?Nye a mat mat ai sagu hpe ngai bai mu la se ai, ngai hte rau kabu gara poi galaw ga,? nga na ra ai.
7 Dai hte maren, ngai nanhte hpe tsun made ga, myit malai lu shara n nga dum ai hkungga ging ai masha jahku shi jahku a majaw kabu gara ai hta, myit malai lu ai yubak kap ai wa langai mi a majaw, sumsing lamu kata e, grau nna kabu gara rai na ra ai.
8 ?Bai numsha langai mi, gumhpraw dengga shi lu ai hta na dengga mi mat mat ai rai yang, shi kaning rai galaw na rai ta? Shi, pyengdin shatu nhtawm, shi a nta hpe ye seng nna n mu yang mu hkra atsawm sha shara shagu tam yu wu ai.
9 Dai hpe mu jang, jinghku jingyu ni hte htingbu htingbyen ni hpe shaga nna; nye a mat mat ai gumhpraw dengga mi bai mu la se ai majaw, ngai grai kabu ni ai, ?Ngai hte rau kabu gara poi galaw ga,? nga na ra ai.
10 Dai hte maren, ngai nanhte hpe tsun made ga, Karai Kasang a lamu kasa ni gaw, yubak kap ai masha langai mi myit malai lu ai majaw kabu gara rai nga ai,? ngu mu ai.
11 Yesu bai matut tsun wu ai gaw, ?Kalang mi na, masha langai mi shadang sha lahkawng lu ai.
12 Kasha kaji wa mahtang kawa hpe, ?Wa e, ngai lu la ang ai sali kamhtaw ya ngai hpe karan ya rit,? ngu nna hpyi wu ai. Shing rai kawa mung kasha lahkawng yan hpe shi a sutgan garan ya wu ai.
13 Dai hpang nhtoi gade n na yang, kasha kaji wa gaw, shi lu ai sut rai ni yawng dut kau nna lu ai gumhpraw gun nhtawm nta na pru mat wa ai. Shi gaw tsan ai mung de sa wa nna, dai shara e shi gumhpraw ni hpe majoi jai ai hte pyaw daw kadaw hkawm nna ginlut shamat kau wu ai.
14 Lu ai gumhpraw yawng ma mat ai ten hta, dai mung e hkuwa kaba wa ai rai nna, shi matsan chyaren hkrum magang nga ai.
15 Shing rai dai mung na masha langai mi kaw, amu galaw ya na nga nna sa shingbyi nga ai: dai wa mung shi hpe sun de, wa ni hpe sa rem na matu shangun dat wu ai.
16 Shaloi shi gaw, wa ni sha nga ai shapre kawp hte sha pyi shi a kan jahkru mayu timung, gade e mung n jaw sha mu ai.
17 Hpang jahtum shi a kraw hta dum hprang wa nna, ?Nye wa a nta e shabrai sha nna bungli galaw ai masha ni gade wa n taw n tsang shat sha lu nga ma hka! Ngai wa gaw ndai yang e, kawsi kyet ai hte hten bya magang wa nga nngai.
18 Ngai rawt nna, nye wa kaw wa nhtawm, wa e, Karai Kasang hpe mung, nang hpe mung, ngai shut ni ai.
19 Ya kaw nna na nsha ngu na, ngai n ging n dan nngai, na a shabrai sha ai amu galaw masha langai mi zawn ngai hpe tawn da e law, ngu na we ai,? nga ai.
20 Shing rai shi rawt nna, shi a kawa hpang de wa magang nga ai.
?Shi nta kaw nna tsan tsan naw rai nga yang, kawa gaw shi hpe mu nna, matsan yu dum ai hte, gat sa nhtawm, kasha a du hta noi ginshum let, shi hpe pup wu ai.
21 Shaloi kasha wa gaw, ?Wa e, Karai Kasang hpe mung, nang hpe mung, ngai shut ni ai. Ya kaw nna na nsha ngu na ngai n ging n dan nngai,? ngu nna kawa hpe tsun nem wu ai.
22 Rai ti mung kawa gaw, shi a shangun ma ni hpe shaga nna, ?Reng htum ai hpun palawng alawan la sa nna shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru,
23 kawn tawn ai dumsu kasha mung sat mu, shing rai anhte kabu gara ai hte lusha poi galaw nna lu sha nga ga!
24 Hpa majaw nga yang, ndai ngai sha gaw si mat sai; ya bai hkrung sali ai; mat mat sai hpe ya bai mu la se ai,? ngu mu ai. Shing rai lusha poi galaw hpang nna pyaw pyaw rai nga ma ai.
25 ?Dai ten hta kasha kaba wa gaw yi de du nga ai. Dai de na wa nna nta du wa magang yang, chying bau dum ai hte ka manawt ai nsen na wu ai.
26 Shing rai shi gaw shangun ma ni hta na langai mi hpe shaga la nna, ?Dai kaning re ai rai nga a ta?,? ngu nna san yu wu ai.
27 Dai shangun ma gaw, ?Na nnau bai wa ra ai rai nna, nwa mung shi hpe ahkam akaja sha hkap la wu ai majaw, kawn tawn ai dumsu kasha sat nu ai,? ngu nna shi hpe tsun dan wu ai.
28 Dai na jang shi masin pawt nna nhku de n shang wa hkraw ai. Dai shaloi, shi a kawa pru sa nna, shi hpe sa nem wu ai.
29 Rai ti mung shi gaw, ?Yu u, nde nlaw ning tup mayam langai mi zawn na a amu galaw ya ni ai; na a hkang ai ga ni hpe ngai galoi n lale ga nngai; rai ti mung, nye a kanawn manang ni hte pyaw poi sha na matu bainam kasha langai mi pyi nang ngai hpe galoi n jaw ndai.
30 Shawa num ni hte kanawn nna, na a sut rai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka!,? ngu nna shi a kawa hpe htan wu ai.
31 Kawa gaw, ?Ngai sha e, nang gaw, ngai hte rau anga nga ndai, nye a sut rai nga manga gaw, na a hkrai rai nga ai.
32 Rai ti mung, anhte poi galaw nna pyaw pyaw rai kabu gara mai nga ai, hpa majaw nga yang, ndai na nnau wa gaw si mat sai, ya bai hkrung ra ai, mat mat sai mung, ya bai mu la saga ai,? ngu nna shi hpe nem wu ai,? ngu mu ai.