11
(Mat 6:9-13; 7:7-11)
1 Lani mi na nhtoi hta, Yesu gaw shara mi hta akyu hpyi nga ai. Shi akyu hpyi ngut jang, shi a sape ni hta na langai mi gaw, ?Madu e, Yawhan gaw shi a sape ni hpe akyu hpyi sharin ya ai zawn, anhte hpe mung sharin ya mi,? ngu nna shi hpe tsun wu ai.
2 Yesu gaw shanhte hpe, ?Nanhte akyu hpyi yang ning ngu mu:
?Wa e:
Na a mying nsang chyoi pra nga lit ga;
na a mungdan du wa ru ga.
3 Anhte hta ra ai lusha, shani shagu anhte hpe jaw mi.
4 Anhte hpe shut ai ni yawng mayawng a mara, anhte raw kau ya ga ai majaw,
anhte a mara ni hpe mung raw kau ya mi;
agung alau nga ai shara de mung anhte hpe hkum sa shangun mi,?? ngu nna shanhte hpe tsun mu ai.
5 Bai shi gaw shanhte hpe, ?Nanhte hta na marai langai mi, jinghku langai mi a nta de, shana yuptung hpawa e shi kaw sa nna, ?Jinghku wa e, muk tawng masum ngai hpe gan hkoi ya e,
6 nye a jinghku wa langai mi hkrun lam de nna, ngai kaw ya sha du wa ai rai nna, shi hpe jaw sha na hpa mung n lu mat ai!,? ngu wu yang,
7 nhku de na wa gaw, ?Ngai hpe hkum shatsang et, chyinghka mung la kau se ai, ngai sha ni hte ngai mung yupra shang mat saga ai, nang hpe jaw na ngai n rawt lu mat ni ai!,? ngu nna hkap htan ai rai yang hpa byin na a ta?
8 Rai sa, ngai nanhte hpe tsun made ga, nta madu wa gaw jinghku langai mi hku, yupra kaw nna rawt nhtawm, muk la jaw na ra ai n rai; rai ti mung, n kaya ai sha akroi anoi matut nna hpyi nga ai majaw, dai wa hpe ra mara rawt jaw na wu ai.
9 ?Bai, ngai nanhte hpe tsun made ga, hpyi mu, shaloi nanhte lu na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai.
10 Hpa majaw nga yang, hpyi ai wa kadai mung lu la ai, tam ai wa mung mu ai, akawk ai wa hpe mung hpaw ya na ra ai.
11 Nanhte hta na, kawa tai ai kadai wa mung, kasha nga hpyi yang lapu jaw na wu ni?
12 Shing n rai, u di hpyi yang, n-gaw gawk jaw na wu ni?
13 Nanhte n hkru n kaja nga myit dai ni pyi, tinang a kasha ni hpe kaja ai kumhpa chye jaw myit yang gaw, dai hta grau nna sumsing lamu na Kawa gaw shi e hpyi ai ni hpe dai Chyoi Pra Ai Wenyi jaw na n rai hka!,? ngu nna tsun wu ai.
(Mat 12:22-30; Mrk 3:20-27)
14 Ya Yesu gaw n chye shaga ai nat hpe shapraw kau ya wu ai, nat pru mat wa ai hpang, n chye shaga ai wa gaw ga shaga hpang wa ai. Shawa masha ni gaw mau mahka mat ma ai.
15 Rai ti mung, shanhte hta na nkau mi gaw, nat agyi wa Bezebula l 11:15: Bezebula: Maigan masha ni a hpara mying re. Yuda ni gaw, ndai wa hpe n seng ai nat ni hpe up ai hkawhkam wa, du wa ngu nna shamying ma ai.* a atsam jaw ya ai hte, shi nat ni hpe shaden kau lu nga ai,? nga ma ai.Ref 11:15: Mat 9:34; 10:25; 12:24.
16 Nkau mi mung, shi hpe chyam dinglik yu mayu nna, Karai Kasang lawm n lawm madun na matu, lamu de na lamik kumla langai mi hpyi ma ai.Ref 11:16: Mat 12:38; 16:1.
17 Rai ti mung, Yesu shanhte hpa baw myit mang maw mawn nga ai hpe chye ya da mu ai. Shing rai, shi shanhte hpe, ?Mungdan langai mi hta mung masha ni myit n hkrum ai hku shada gasat hkat ai rai yang, dai mungdan gade n na yang, hten run mat wa na sha re. Nta dinghku langai mi hta, nta masha ni myit mang n hkrum ai rai yang, dai dinghku gaw hten run mat na sha re.
18 Dai rai nna, Satan a mungdan hta myit n hkrum nna, shada da gasat hkat nga ai rai yang, kaning rai grin nga lu na rai ta? Ngai gaw Bezebula jaw ai atsam hte, nat ni hpe shaden kau nga ai, nga nna tsun myit dai.
19 Lama wa, ngai Bezebula atsam hte nat ni hpe shaden kau mawe ai rai yang gaw, nanhte a hpang hkan nang ai ni gade a atsam hte nat ni hpe shaden kau nga ma ta? Dai majaw shanhte gaw nanhte shut nga ai lam sakse tai nga ma ai.
20 Rai ti mung, ngai gaw Karai Kasang a n-gun atsam hte she nat ni hpe shaden kau nngai majaw, Karai Kasang a Mungdan nanhte kaw du sai sakse rai nga ai.
21 ?N-gun ja ai wa gaw laknak hkum sumhpa hte, shi a nta hpe sin nga yang, shi a sutgan arung arai ni ashim sha rai nga lu ai.
22 Rai ti mung, shi hta n-gun grau ja ai wa sa gasat nna dang kau ngut jang she, shi kam hpa nga ai laknak ni hpe magawn la kau ya na ra ai. Shi shawng de la tawn ai lanep rai ni hpe mung karan kachyan di la kau ya na ra ai.
23 Ngai hpang maga de n nga ai wa gaw, gumlau maga de rai nga ai, ngai hte kahkyin gumdin n re ai wa gaw, ayai aya rai nga ai.
(Mat 12:43-45)
24 ?Dai n hkru ai nat langai mi gaw masha langai mi hta na pru nhtawm, hkun hkraw ai shara hkan hkawm sa wa nna, hkring sa na shara langai mi tam nga ai, n mu jang, ?Ngai pru kau da se ai nta de ngai bai nhtang wa na nngai,? nga ai.
25 Bai du wa yu yang, dai nta gaw asan awan, ye kau nna, mawn da nga la ai hpe wa mu wu ai.
26 Shaloi shi nhtang sa nna, shi hta grau n hkru ai nat sanit hpe shaga woi nhtawm, dai nta hta shang rawng nga ma ai. Dai rai nna, dai masha wa a hpang jahtum daw na nsam gaw shawng de na hta grau ru wa lu ai,? ngu nna tsun wu ai.
27 Yesu ndai ga tsun ngut ai shaloi, dai shawa hpawng kata na numsha langai mi gaw shi a nsen shaja nna, ?Nang hpe shangai nna chyu jaw ai numsha gaw gade wa a nga a hka!,? nga nna shi hpe tsun wu ai.
28 Rai ti mung, Yesu gaw, ?Karai Kasang a mungga madat la nna, hkan nang ai ni mahtang gade wa a lu nga ma hka!,? ngu nna htan wu ai.Ref 11:28: Luk 8:21.
(Mat 12:38-42)
29 Shawa masha ni gumbawm wa ma ai shaloi, shi tsun mu ai gaw, ?Ndai prat na masha ni gaw nde wa n hkru n kaja ai ni rai nga ma hka! Shanhte lamik kumla hpyi nga ma ai, rai ti mung, Yona a lamik hta kaga, hpa lamik kumla mung shanhte hpe madun dan na n rai.Ref 11:29: Mat 12:38-39; 16:4; Mrk 8:12.
30 Yona gaw Ninewe mare masha ni a matu, lamik kumla tai wa ai zawn, dai Masha Kasha mung ndai prat na masha ni a matu kumla tai na ra ai.Ref 11:30: Yon 1:17; 2:10; 3:4.
31 Tara Dara ai Nhtoi hta Sheba mung a hkawhkam num rawt tsap nna ndai prat na masha ni hpe mara shagun na ra ai, hpa majaw nga yang, Shawlumon a hpaji rawng ai sharin shaga ai ga hpe madat na matu sumtsan mung kaw nna sa du ai; dai rai nna, ngai nanhte hpe tsun made ga, ndai yang e Shawlumon hta grau kaba ai wa nga nga ai.Ref 11:31: 1Hk 10:1-10; 2Hl 9:1-12.
32 Tara Dara ai Nhtoi hta Ninewe mare masha ni rawt nna nanhte hpe mara shagun na mara ai, hpa majaw nga yang, shanhte gaw Yona hkaw tsun ai ga hpe na ai shaloi, shanhte a yubak mara ni kaw na myit malai lu ma ai. Yu mu! ndai yang, Yona hta grau kaba ai wa nga nga ai!
(Mat 5:15; 6:22-23)
33 ?Pyengdin shatu nhtawm, makoi shinggang ai, shing n rai, mung hte dagup tawn da ai gaw kadai n galaw ga ai; shing di na malai, nta de shang wa ai masha ni nhtoi mu lu mu ga; pyengdin shadun hta shadun da ga ma ai.Ref 11:33: Mat 5:15; Mrk 4:21; Luk 8:16.
34 Na a myi gaw hkum hkrang a matu pyengdin langai mi zawn rai nga ai. Na a myi kaja nga lit yang gaw, na a hkum ting nhtoi lu la nga ai, rai ti mung, na a myi n kaja nga lit yang gaw, na a hkum mung asin chyip rai nga na ra ai.
35 Dai re ai majaw, nanhte hta rawng ai nhtoi gaw nsin n tai mat u ga, sadi nga mu.
36 Na a hkum hkrang ting hta shara mi mung n sin ai, hkum ting htoi nga ai rai yang gaw, pyengdin a htoi tu kabrim ai hte nang hpe jahtoi ya ai zawn, na a hkum hkrang ting htoi tu na ra ai,? ngu wu ai.
(Mat 23:1-36; Mrk 12:38-40)
37 Yesu ga tsun ngut ai shaloi, Hparishe langai mi gaw Madu hpe shi hte rau shat sha na shi a nta de shaga wu ai, shaloi shi shang nna shat sha na matu dung nga ai.
38 Shat garai n sha yang, Yesu kashin kamun n re ai hpe dai Hparishe wa mu nna mau nga ai.
39 Dai rai nna, Madu gaw, ?Nanhte Hparishe ni gaw, nanhte a gawm hte ban hpe shinggan maga de sha kashin jasan nga myit dai, rai ti mung, nanhte a kata maga de gaw, kashun kashe re ai, nammak lawhpa mya lu mya sha ai myit, n hkru n shawp ai myit hte hpring chyat nga malit dai.
40 Masha angawk ni e! Shinggan maga galaw da ai Karai Kasang gaw kata maga de mung galaw da sai n rai ni?
41 Rai ti mung, nanhte a gawm hte ban ni hta rawng ai arai ni hpe matsan mayan ni e jaw kau mu, shing rai galaw yang, nanhte a matu nga manga san pra wa na malit dai.
42 ?Hparishe ni e, nanhte dingnye lu myit dai! Hpa majaw nga yang, nanhte gaw shingtawn pan, shinglim pan ni hte shatmai lap amyu myu hta na htam shi kaw na htam mi Karai Kasang hpe sak jaw myit dai. Rai ti mung, nanhte gaw tara rap ra ai hte Karai Kasang hpe tsaw ra ai lam hpe gaw hprai kau nga myit dai. Nanhte gaw htam shi hta htam mi alu jaw ai hta n ga, tara rap ra ai hte Karai Kasang hpe tsaw ra ai hta mung hkan sa galaw ang myit dai.Ref 11:42: Jaw 27:30; Mat 23:23.
43 ?Hparishe ni e, nanhte dingnye lu myit dai! Tara jawng ni hta grau reng ai, san da ai dung shara ni hpe mung, gat hkan e hkungga ai hte shachyen shaga hkam na hpe nanhte ra sharawng la myit dai.
44 Nanhte dingnye lu myit dai! Nanhte gaw, masat masa prai mat nna masha ni n chye ai majaw, de a ntsa e kabye hkawm shara shatai kau ai lup ni hte bung nga myit dai.?
45 Tara sara langai mi gaw, ?Sara e, nang shing nga ai gaw, anhte hpe mung roi lawm nga ndai,? ngu nna shi hpe tsun wu ai.
46 Yesu gaw, ?Nanhte tara sara ni mung dingnye lu myit dai! Nanhte gaw masha ni hpe gun yak ai lit shagun nhtawm, tinang ni gaw dai lit ni hpe gun karum na matu layung hte pyi n hkra yu myit dai.
47 Nanhte dingnye lu myit dai! Nanhte a nji nwa ni sat kau ai myihtoi ni a matu, nanhte tsawm htap ai lup ni hpe galaw lajang myit dai.
48 Nanhte a nji nwa ni tawt lai tawn ai amu ni hta nanhte maw mawn myit hkrum lawm ai ni rai nga myit dai, hpa majaw nga yang, shanhte gaw myihtoi ni hpe sat kau nna, nanhte mahtang shanhte a lup ni hpe galaw lajang myit dai.
49 Dai re ai majaw, Karai Kasang a Hpaji Byeng-Ya tsun ai gaw, ?Myihtoi hte kasa ni hpe, ngai shanhte hpang de shangun dat na mawe ai rai nna, dai ni hta na nkau mi hpe shanhte sat kau nna, nkau mi hpe zingri zingrat na maru ai.?
50 Shing rai, mungkan ga nnan lat kaw nna sat kau hkrum ai myihtoi ni yawng a bunglat hka a matu ndai prat na amyu ni mara daw dan ari hkrum lu na rai nga ai.
51 Abela hpe sat kau ai kaw nna tawn hkungri hte Chyoi pra ai Shara lapran sat kau hkrum ai Zahkaria du hkra, rai sa ngai nanhte hpe tsun made ga, dai ni yawng a bunglat gaw, ndai prat na amyu ni hpe shagun lu na rai nga ai.Ref 11:51: Nin 4:8; 2Hl 24:20-21.
52 ?Tara sara ni nanhte dingnye lu myit dai! Hpaji nta hpaw ai sumsaw gaw nanhte kyem tawn da myit htawm, nanhte nan mung n shang, shang mayu ai ni hpe mung, nanhte hkum shingdang da myit dai, ngu mu ai.?Ref 11:52: Mat 23:13.
53 Dai shara na pru wa yang, tara sara ni hte Hparishe ni gaw, shi hpe aja awa dinglun ai hku ndang kalang galaw bang wa ma ai.
54 Yesu a n-gup na pru ai ga langai ngai hte mara shagun lu hkra gyam ai hku lam law law hte shi hpe tsun shadut ma ai.