5
Suri hpyen luksuk hpe up hkang ai Naman gaw shi a lata hku nna dai Madu Suri masha ni hpe awng padang jaw ya wu ai majaw Suri hkawhkam e shagrau shatsaw ai hte arawng aya kaba hkam la hkrum ai wa rai nga ai. Shi gaw share ninghkrin hpyenla kaba wa rai nga ti mung, manggang ana hkam sha nga wu ai. Lang mi na Israela ni hpe shang gasat ai shaloi Suri masha ni gaw Israela mahkawn ma langai mi hpe woi wa ma ai; shi gaw Naman a madu jan a shangun ma langai tai wa nga ai. Lani mi na aten hta, shi gaw shi a nta madu jan hpe, ?Nye a madu wa gaw Samari mare e nga ai myihtoi wa kaw sa lu na hpe ngai sharawng nngai law! Shi a ana ahkya hpe dai myihtoi wa shamai ya na wu ai,? ngu nna tsun dan wu ai. Dai lam hpe Naman na jang, hkawhkam wa hpang de shi sa nna dai mahkawn ma kaning nga tsun ai lam shi hpe tsun dan wu ai. Dai hkawhkam wa gaw, ?Israela hkawhkam wa hpang de sa nna ndai laika shi hpe la sa ya su,? ngu nna tsun wu ai.
Dai rai nna Naman gaw gumhpraw dengga mun masum, ja dengga hkying kru hte mani tsawm ai hpun palawng gahti galai man shi hte hpe la gun nna pru mat wa wu ai. Shi la sa wa ai laika hta ning nga rawng nga ai: ?Ndai laika gaw nye a du Naman hpe shachyen dat ya ai lam rai nga ai. Shi a manggang ana hpe shamai shatsai ya na matu ngai nang hpe ra sharawng nga nngai.?
Israela hkawhkam wa dai laika hpe hti jang, hkrit gari ai hte shi a palawng ni hpe gang je kau nhtawm, ?Ndai masha wa a manggang ana hpe shamai ya na matu Suri hkawhkam ngai hpe gara hku myit mada lu nu ai kun? Ngai gaw Karai Kasang rai nna asak jahkrung ya ai hte si hkrung si htan shabyin lu ai daru magam n-gun lu ai wa re ngu myit nawn la nga a ni? Shi gaw ngai hte ga li ga law na matu jahte tam hpang wa nga ai gaw asan sha rai nga sai!,? ngu nna jahtau tsun wu ai.
Shing rai byin ai lam hpe myihtoi Elisha na jang, hkawhkam wa hpang de ning nga nna ga htet dat wu ai: ?Nang hpa majaw dai daram wa myit ru nga n ni? Dai wa hpe ngai hpang de shangun dat ru; Israela mung e myihtoi langai nga ai lam ngai shi hpe madun dan na we ai!?
Dai rai nna Naman gaw shi a gumra ni hte shi a leng hte sa du nna, Elisha a nta ndaw e sa hkring nga wu ai. 10 Elisha gaw shi hpang de shangun ma langai mi shangun dat nhtawm shi hkum hpe Yawdan hka e sanit lang sa tsing jang shi a manggang ana tsep kawp mai tsai mat na ra ai lam, tsun shangun wu ai. 11 Rai ti mung, Naman gaw masin pawt let pru mat wa nhtawm, ?Myihtoi wa ngai hpang de kaja wa pru sa wa nna, dai Madu shi a Karai Kasang kaw akyu hpyi let shi a lata hte machyi ai shara e masawp ya nna ngai hpe shamai ya na zawn ngai myit nawn nngai re wa! 12 Dai hta kaga, Damasku mare a shingdu maga na Abana hka hte Hparpa hka yan gaw Israela mung e lwi ai kaga hka mahkra hta grau kaja nga ai n rai ni? Dai hka ni hta ngai shin nna shamai shatsai la lu na n rai hka!,? ngu nna tsun wu ai.
13 Shi a shangun ma ni shi kaw lung wa nhtawm, ?Madu e, myihtoi wa gaw yak ai amu lama mi galaw na matu nang hpe tsun ai rai yang, nang dai amu hpe galaw ang nga ndai. Shi tsun nu ai hte maren, na hkum nang ya hpa majaw n lu shin na rai ta? Shamai shatsai hkrum na n rai ni?,? ngu nna tsun wu ai. 14 Dai rai nna Naman gaw Yawdan hka de yu sa nna shi hpe Elisha matsun ai hte maren, shi hkum hpe sanit lang tsing dat wu yang tsep kawp shamai shatsai ai hkrum wu ai. Shi a hkum shan mung ma kaji a hkum zawn ting ting hkang hkang rai hkam kaja wa nga ai. 15 Shi gaw shi a masha ni yawng hte Elisha hpang de nhtang wa nhtawm, ?Ya chyawm gaw Israela Karai Kasang hta lai nna kaga karai n nga nga ai hpe ngai chye ni ai: dai re ai majaw madu e, chyeju hte ngai kaw na kumhpaw kumhpa hkap la ya e,? ngu nna tsun wu ai.
16 Elisha gaw, ?Ngai kumhpaw kumhpa n hkap la na nngai ngu nna ngai daw jau ai dai ahkrung nga ai dai Madu hta ngai dagam nngai.
Naman mahtang dai hpe hkap la ya na matu shi shadut wu ti mung shi ningdang kau wu ai. 17 Dai rai nna Naman gaw, ?Ndai kumhpaw kumhpa hpe nang n hkap la ai rai yang, ya kaw nna wan nat hkungga rai ti mung, dai Madu hta lai, kaga karai kadai hpe mung n jaw jau na sai majaw aga lawze daw lahkawng ngai hpe jaw dat e. Hpa majaw nga yang ya kaw nna dai Madu hta lai kaga hpara shaje ni hpe shagu hkungga mung, wan nat hkungga ni mung ngai n nawng na nngai. 18 Ngai gaw nye a hkawhkam kaw hkan nang nna, Rimon htingnu de sa nna Suri karai hpe nawku ai shaloi dai Madu ngai hpe mara raw dat ya na rai nga ai hpe ngai myit mada nngai. Kaja wa teng teng dai Madu ngai hpe mara dat ya na ra ai!,? ngu nna tsun wu ai.
19 Elisha gaw, ?Ngwi pyaw sim sa ai hte wa sanu,? ngu nna tsun wu ai. Shaloi Naman pru mat wa wu ai.
Ya shi lam daw mi kaw sha naw du yang, 20 Elisha a shangun ma Gehazi gaw, ?Nye a madu gaw arai hpa mung n jaw shangun ai sha dat kau nga nu hka! Suri masha wa shi hpe sak jaw ai kumhpa hpe shi la ging nga ai. Dai re ai majaw ahkrung nga ai dai Madu hta shi kaw na arai lama ma sha pyi la lu hkra, shi hpang de ngai hkan kagat nang na nngai,? ngu nna kraw kata e tsun nga ai. 21 Dai rai nna Naman a hpang de hkan rawt nang mat wa wu ai. Ya masha langai mi shi a hpang e hkan nang nga ai hpe Naman mu jang shi hte hkrum na nga, shi a leng hta na yu nhtawm, ?Lama ma hkoi shut mat sani?,? ngu nna hkap san wu ai.
22 Gehazi gaw, ?N rai law, rai ti mung Ehprim bum ga na myihtoi hpung na marai lahkawng ya sha du yu wa ma ai rai nna shan hpe gumhpraw dengga hkying masum hte mani tsawm ai hpun palawng gahti galai di na man lahkawng nang hpe jaw shangun na lam ngai hpe sa tsun shangun ma ai,? ngu nna htan wu ai.
23 Naman chyawm gaw, ?Chyeju hte gumhpraw dengga hkying kru la mat wa u,? ngu nna tsun htang wu ai. Shi dai lam shadut ai rai nna gumhpraw dai ni hpe tingsan lahkawng hta bang nhtawm gyit let mani tsawm ai hpun palawng man lahkawng hte hpawn shi a shangun ma yan hte rau jaw dat nna, Gehazi a shawng e shan hpe shangun dat wu ai. 24 Shanhte gaw Elisha nga ai bum de du jang, Gehazi gaw dai tingsan lahkawng hpe la nhtawm nta nhku de hpai shang mat wa wu ai. Dai hpang Naman a shangun ma yan hpe nhtang wa shangun wu ai. 25 Shi mung nta nhku de bai shang mat wa yang, Elisha gaw shi hpe, ?Nang kanang de sa mat n ni?,? ngu nna hkap san wu ai.
Shi chyawm gaw, ?Oh madu e, kanang de mung n sa nngai,? ngu nna htan wu ai.
26 Rai ti mung Elisha gaw, ?Nang hte hkrum na nga, shi a leng kaw nna dai masha wa yu wa ai shaloi dai yang e wenyi hta ngai n nga ai zawn nawn da wu ni? Ya aten gumhpraw hte hpun palawng ni, tsanlun sun, sabyi sun, sagu hte dumsu yam nga ni hte shangun ma ni hpe hkap la na aten n rai nga ai law! 27 Ya chyawm gaw Naman a manggang na a ntsa e du nna, nang hte na a amyu matu ni dai hpe htani htana hkam sha lu na rai myit dai!,? ngu nna tsun wu ai.
Gehazi gaw hkyen zawn hpraw ai manggang kap ai wa tai mat wa ai hte pru mat wa nu ai.