17
Yuda Hkawhkam Ahaza hkaw dung ai shi lahkawng ning hta Ela a kasha Hoshea mung Israela hkawhkam tai wa nna Samari mare e hkaw dung let shata jahku up nga ai. Shi gaw dai Madu hpe shut hpyit kau wu ti mung shi a shawng e Israela mung hpe up hkang ai hkawhkam ni daram gaw n sawng nga wu ai. Asuri Hkawseng Shalmanesa gaw shi hpe gasat wu ai. Hoshea asum jaw wu ai rai nna shaning shagu ahkun hkanse shi hpe jaw ya wu ai. Rai ti mung laning mi hta, Hoshea gaw karum hpyi na nga, Egutu Hkawhkam So hpang de dat kasa ni hpe shangun dat wu ai. Asuri Hkawseng hpang de shaning shagu jaw ya nga ai ahkun hkanse hpe jahkring kau ya wu ai. Shing rai galaw ai lam hpe Shalmanesa chye jang, Hoshea hpe rim la nna htawng hta sharen da wu ai.
Shalmanesa gaw Israela mung hpe shang gasat nhtawm Samari mare hpe wang tawn da wu ai. Wang da ai masum ning ngu na Hoshea hkaw dung ai jahku ning hta, Asuri hkawseng wa gaw Samari mare hpe gasat la nna Israela masha ni hpe bawng masha hku Asuri mungdan de woi mat wa nga ai. Shanhte hta na nkau mi gaw Hala mare e nga nna, nkau mi mahtang Gozan ginwang na Habora hka makau hku mung, Medi mare ni hkan mung nga nga ma ai.
Israela masha ni gaw Egutu hkawhkam a lata kaw na hkye mawai la ai hte Egutu mung kaw nna shanhte hpe woi shapraw wa ai dai Madu shanhte a Karai Kasang hpe shut hpyit kau nna karai kaga ni hpe nawku nhtawm, shi a amyu masha ni rawt lung wa ma yang, dai Madu e gawt shapraw kau dat ai masha ni a htung lailen hta hkan dagraw nang nna Israela hkawhkam ni shachyen la nna hkan galaw ai arawn alai ni a majaw Samari mare hkrat mat nga ai. Dai Madu shanhte a Karai Kasang n ra sharawng ai amu ni hpe Israela amyu masha ni galaw mu ai rai nna shanhte a mare yawng ngu na kaji htum ai kahtawng kaw nna kaba htum ai mare du hkra hkan tara maigan masha ni a matu nawku shara ni hpe shanhte gap ma ai. 10 Kawng ni yawng a ntsa hkan e mung, shingnip hpun npu shagu hkan e mung, nlung shadaw ni hte Ashera karai num a gawkngu sumla ni hpe shanhte shadun da nhtawm, Ref 17:10: 1Hk 14:23. 11 tara maigan tawn hkungri ni yawng a ntsa hkan manam pyaw ai baw nat nawng nna, mungdan kaw nna dai Madu shaden shapraw kau ai masha amyu ni a lailen hta hkan dagraw nga ma ai. Shanhte galaw ai n hkru n shawp ai amu ni hpe galaw nna dai Madu a masin pawt ai hpe shanhte jasu sharawt ya ma ai; 12 shanhte gaw hpara sumla ni hpe n nawku na matu dai Madu hkang da ai ga hpe mung n madat ya nga ma ai.
13 Dai Madu gaw Israela hte Yuda hpe shadum jahprang na matu shi a dat kasa ni hte myihtoi ni hpe shangun dat wu ai: ?Nanhte galaw ai n hkru ai amu ni hpe kau da nna nanhte a kaji kawa ni hpe ngai jaw ai Tara hta lawm ai nye a hkang da ai ga ni hpe mung, nye a shangun ma ni rai nga ai myihtoi ni hku nna nanhte hpe shalai jaw ai hkang da ai ga ni hpe madat mara mu.? 14 Rai ti mung shanhte mahtang n madat n mara nga ma ai hte, dai Madu shanhte a Karai Kasang hpe n kam n sham ai shanhte a kaji kawa ni zawn du ja nga ma ai. 15 Shanhte gaw shi a matsun maroi ga ni hpe madat mara na matu ningdang kau nhtawm shi hte shanhte a kaji kawa ni hte tawn da ai ga shaka hpe n hkan shatup ai hte shi a shadum jahprang ai ga ni hpe shanhte n kaw n law di kau ma ai. Shanhte gaw manu n dan ai hpara sumla ni hpe nawku nhtawm tinang hkum hpe manu shagrit kau ma ai; shanhte gaw grup yin masha amyu baw ni a htung lailen ni hta hkan nhtawm shanhte a arawn alai ni hpe len n la na matu dai Madu a hkang da ai ga ni hpe mung n madat nga ma ai. 16 Shanhte gaw dai Madu shanhte a Karai Kasang a tara ni yawng hpe jahten sharun kau nhtawm shanhte nawku na matu nhprang arai hte shachyaw ai dumsu kasha sumla lahkawng hpe galaw ma ai. Shanhte gaw Ashera karai num a gawkngu sumla langai mi hpe galaw nna, shagan ni hpe nawku let Bala karai ni hpe daw jau nga ma ai.Ref 17:16: 1Hk 12:28. 17 Shanhte gaw tara maigan karai ni a matu shanhte a shayi shadang sha ni hpe wan nat hkungga shatai nna nawng ya ma ai; shanhte gaw nat num ni hte gumhpan hpan ai ni hpe san yu nhtawm dai Madu hpe pawt sindawng shangun na nga, shi a man e shut hpyit ai amu htum hkra galaw shapraw na matu shanhte hkum nan myit jung nga ma ai. Ref 17:17: Trj 18:10. 18 Dai Madu gaw Israela amyu masha ni hpe pawt sindawng nga ai rai nna Yuda mungdan hpe chyu sha ngam da nhtawm shi a man kaw nna shanhte hpe gawt shapraw kau wu ai.
19 Rai ti mung Yuda amyu masha ni pyi dai Madu shanhte a Karai Kasang a tara ni hpe n madat nga ma ai rai nna, shanhte mung Israela amyu masha ni a htung lailen ni hta hkan dagraw nga ma ai. 20 Dai Madu gaw Israela amyu masha ni yawng hpe ningdang kau wu ai rai nna hpang jahtum shi a man kaw nna shanhte hpe gawt shapraw kau ai aten du hkra shanhte hpe ari jaw nna mazut ai gumlau hpyen ni a lata de shanhte hpe ap kau nga wu ai.
21 Dai Madu gaw Israela hpe Yuda kaw nna jahka kau dat ai hpang, Israela masha ni mahtang Nebat a kasha Yeroboam hpe shanhte a hkawhkam shatai da ma ai. Yeroboam gaw shanhte hpe dai Madu hpe kau da shangun nhtawm hkrit hpa yubak lam de lam woi shadam kau wu ai. 22 Dai Madu gaw shi a shangun ma myihtoi ni yawng a n-gup hte tsun sai hte maren shi a myi man kaw nna Israela amyu masha ni hpe gawt shapraw kau dat ai shani du hkra, 23 Israela masha ni gaw Yeroboam a hpang hkan nna, shi shut kau nu ai yubak yawng hta matut nna hkan galaw nga ma ai. Dai rai nna Israela amyu masha ni Asuri mung de bawng rim mat wa ai hkrum nna dai ni du hkra nga nga ma ai.
24 Asuri hkawseng gaw Babelon, Hkuhta, Awa, Hamat hte Sehparim masha ni hpe woi la nna, bawng dung hkrum ai Israela masha ni a malai Samari mare ni hta shanhte hpe nga shangun ma ai. Shanhte gaw dai mare ni hpe madu la nna dai yang e nga nga ma ai. 25 Shanhte dai yang e nnan sa nga ma ai shaloi, dai Madu hpe shanhte n nawku ma ai, shi gaw hkanghkyi nkau mi hpe dat dat nhtawm shanhte hta na nkau mi hpe sha kau nga ai. 26 Asuri hkawseng hpe Samari mare ni hta shi woi htawt tawn da ai masha amyu ni mahtang dai mung na karai a tara hpe n chye nga ma ai majaw shanhte hpe sha kau na matu karai gaw hkanghkyi ni hpe shangun dat nga ai ngu nna tsun dan ma ai. 27 Dai rai nna hkawseng wa gaw ning ngu nna hkang dat wu ai: ?Anhte rim woi wa ai bawng masha hkinjawng ni hta na langai mi hpe nhtang wa shangun dat mu; shing rai dai yang e, shi sa nga nga nna dai mung na karai a tara dai masha ni hpe sharin ya u ga.? 28 Dai re ai majaw Samari mare na bawng rim hkrum ai Israela hkinjawng langai mi gaw Behtela mare e sa shanu nga nhtawm dai Madu hpe gara hku nawku na lam masha ni hpe sharin ya mu ai.
29 Rai ti mung Samari mung e nga ai masha ni mahtang hpara sumla ni hpe matut galaw nna Israela masha ni gap da ai nawku shara nta ni hta dai ni hpe tawn da nga ai. Shanhte nga nga ai mare ni hta amyu lakung shagu hpara sumla ni galaw ma ai rai nna, 30 Babelon masha ni gaw Suhko Benot karai a hpara sumla ni hpe mung, Hkuhta masha ni gaw Nergala hpara sumla ni hpe mung, Hamat masha ni gaw Ashima hpara sumla ni hpe mung, 31 Awa masha ni gaw Nibhaza hte Tartak hpara sumla ni hpe mung, Sehparim masha ni gaw shanhte a kasha ni hpe wan nat hkungga shatai nna nawng jau na matu shanhte a karai rai nga ai Adramelek hte Anamelek yan hpe mung galaw shajang nga ma ai. 32 Dai masha ni gaw dai Madu hpe nawku nga ma ti mung, tara maigan masha ni a nawku shara ni hta shanhte a matu nawng jau ya na hkinjawng amu galaw na matu amyu baw hpan ni hpe shanhte hta na lata san da nga ma ai. 33 Dai rai nna shanhte gaw dai Madu hpe nawku nga ma ti mung, shanhte du sa wa ai mungdan hkan na htung lailen ni hte maren shanhte a karai ni hpe mung nawku daw jau nga ma ai.
34 Dai ni du hkra pyi, shanhte gaw moi na htunghking hte maren naw hkan galaw nga ma ai. Shanhte gaw dai Madu hpe nawku ma ai n rai; Israela ngu nna shi shamying da sai Yaku a amyu matu ni hpe jaw ai tara ni hte hkang da ai ga ni hpe shanhte madat ma ai n rai. 35 Dai Madu gaw shanhte hpe ga shaka tawn da nna hkang da nu ai: ?Karai shaje ni hpe nawku lu na n rai; shanhte hpe nawku dingnyawm ai mung, daw jau ai mung shagu hkungga ni hpe nawng jau ai mung galaw lu na n rai. Ref 17:35: Pru 20:5; Trj 5:9. 36 Daru magam n-gun kaba hte mung, atsam marai hte mung Egutu mung kaw nna nanhte hpe woi shapraw wa ai dai Madu ngu ai nye a ga hpe nanhte madat mara na rai myit dai; ngai hpe nawku dingnyawm nna ngai hpe shagu hkungga ni nawng jau na rai myit dai. Ref 17:36: Trj 6:13. 37 Nanhte a matu ngu nna ngai ka da ya se ai tara ni hte hkang da ai ga ni hpe nanhte tut nawng madat mara na rai myit dai. Nanhte gaw kaga karai ni a ga hpe madat mara lu na myit dai n rai. 38 Nanhte hte ngai shagrin da sai ga shaka hpe nanhte malap kau lu na myit dai n rai. 39 Dai Madu nanhte a Karai Kasang rai nga ai nye a ga hpe nanhte madat mara na rai myit dai. Nanhte a gumlau hpyen ni a lata kaw nna nanhte hpe ngai hkye mawai la na made ai.? 40 Rai ti mung ndai masha ni n madat n mara ai sha shanhte a moi na htunghking dingsa lailen ni hta matut hkan nga ma ai.
41 Dai rai nna ndai amyu masha ni gaw dai Madu hpe nawku nga ma ai; rai ti mung shanhte a hpara sumla ni hpe mung nawku ma ai, dai ni du hkra shanhte a amyu matu ni dai zawn sha agalaw nga ma ai.