9
(2Hl 7:11-22)
1 Hkawhkam Shawlumon gaw Nawku Htingnu hpe mung, hkawhkam htingnu hpe mung, shi galaw mayu ai arai yawng mayawng hpe galaw ngut jang,
2 Gibeon shara e dai Madu dan pru ai zawn Shawlumon kaw bai shi dan pru wu ai.Ref 9:2: 1Hk 3:5; 2Hl 1:7.
3 Shaloi dai Madu gaw shi hpe, ?Na a akyu hpyi ga hpe ngai na se ai. Ngai hpe htani htana nawku na shara hta nang gap nit dai ndai Nawku Htingnu hpe ngai shachyoi shapra se ai. Dai hpe ngai sin yu nhtawm prat dingsa makawp maga na nngai.
4 Na nwa Dawi galaw ai zawn myit malang ai hte ding hpring ai myit hte ngai hpe nang daw jau nna nye a tara ni hpe madat mara hkan sa nhtawm ngai nang hpe hkang da mada lam magup hpe hkan galaw ai rai yang,
5 ngai gaw Israela mungdan tingnyang hta na a amyu matu kaw na langai mi matut manoi up hkang na ra ai, ngu nna na nwa Dawi hpe ga sadi tawn da ai hte maren, dai ga sadi hpe ngai hkan shatup nga na nngai.
6 Rai ti mung, nang mung, na a amyu matu ni mung, ngai kaw n hkan nang ai sha, ngai nang hpe jaw ya se ai tara ni hte hkang da ai ga ni hpe n madat n mara ai sha kaga karai ni hpe nawku ai rai yang,
7 shanhte hpe ngai jaw da ai mungdan kaw nna nye a amyu masha ni hpe yeng kau nna, ngai hpe nawku na shara ngu nna ngai majai da sai ndai Nawku Htingnu hpe mung ngai kau da na nngai. Shara shagu hkan nga nga ai masha amyu baw ni mung Israela hpe asawng asang rai nna n gawn n sawn di kau na mara ai.
8 Ndai Nawku Htingnu gaw sumpum kaba langai zawn hten run mat nna lam hku lai wa ai masha shagu hte gaw mau kajawng mat nhtawm, ?Dai Madu gaw hpa majaw ndai mungdan hpe mung, Nawku Htingnu hpe mung ndai zawn galaw kau a ta?,? nga nna san na mara ai.
9 Shaloi masha ni gaw, ?Shing re ai lam gaw Egutu mung kaw nna shanhte a kaji kawa ni hpe woi wa ai dai Madu shanhte a Karai Kasang hpe shanhte kau da nga ma ai majaw rai nga ai. Shanhte gaw kaga karai ni a hpang de hkan nang ai hte dai ni hpe nawku ma ai. Dai lam a majaw dai Madu mung shanhte a ntsa e ndai ru yak tsin-yam tsindam shapraw dat nga ai,?? ngu nna htan na mara ai.
(2Hl 8:1-2)
10 Shawlumon gaw Nawku Htingnu hte shi a hkawhkam htingnu hpe hkun ning tup aten la gaw gap da nga ai.
11 Turu hkawhkam Hiram gaw shi a magam bungli hta lang ra ai arit hpun, marau hpun hte aja ni yawng hpe shi ra ai made jaw ya wu ai. Shing re ai magam bungli ngut jang Hkawhkam Shawlumon gaw Galile ginwang hta nga ai mare hkun, Hiram hpe jaw ya wu ai.
12 Hiram gaw dai ni hpe sa gawan yu wu yang, dai mare ni hpe n yu sharawng da nga wu ai.
13 Dai rai nna shi gaw Shawlumon hpe, ?Ngai hpu wa e, nang ngai hpe ndai mare ni she jaw nga n hka i!,? ngu nna tsun wu ai. Dai lam a majaw shara dai ni hpe Hkabula ngu nna naw shamying da nga ai.
14 Hiram chyawm gaw Shawlumon hpang de ja tan manga daram shagun dat ya wu ai.
(2Hl 8:3-18)
15 Hkawhkam Shawlumon gaw Nawku Htingnu hte hkawhkam htingnu ni hpe gaw gap na matu mung, mare a sinpraw maga hta ga jahpring na matu mung, mare bunghku gaw na matu mung, bungli galaw shangun na matu hkang dat wu ai. Shi gaw Hazora, Megido hte Gezera mare ni hpe bai gaw gap ai hta mung dai ni hpe lang nga ai.
16 (Egutu hkawhkam gaw Gezera mare hpe lung gasat la nhtawm mare masha ni hpe sat kau nna mare hpe nat kau wu ai. Dai hpang Shawlumon kaw wa ai shi a shayi sha a hkungran poi kumhpa hku sharung shakau jaw ya wu ai;
17 dai hpe Shawlumon bai gaw gap da nga ai.) Shawlumon mung shi a bungli galaw masha ni hpe shaga la nhtawm Lawu Bet Horan,
18 Yuda mung na nam mali hta nga ai Balat hte Tama hpe mung,
19 shi a sut gan ni hpe mahkawng da ai mare ni, shi a gumra ni hte gumra leng ni hpe tawn da ai mare ni, Yerusalem, Lebanon hte shi a mungdan shara shagu hkan e galaw mayu ai made lam shagu hpe gaw da nga ai.
20-21 Shawlumon gaw Israela masha ni Hkanan mung hpe madu la ai shaloi shanhte n sat kau ai Hkanan masha ni a amyu matu ni hpe magam bungli galaw shangun ai hta lang da wu ai. Shing re ai amyu matu ni hta Amori, Hiti, Perizi, Hiwi hte Yebusi masha ni lawm nga ma ai rai nna dai ni du hkra de a amyu matu ni hpe mayam shatai da wu ai.
22 Israela masha ni hpe chyawm gaw mayam n shatai da wu ai; shanhte gaw shi a hpyenla ni, du salang ni, up hkang du ni, gumra leng hkang ai ni hte gumra jawn ai ni a du agyi amu ni hpe galaw nga ma ai.
23 Shawlumon a gaw gap magam bungli masing amyu myu hta bungli galaw masha ni hpe woi hpareng ai du salang ni marai 550 nga nga ma ai.
24 Shawlumon gaw mare a sinpraw maga hta lamu ga hpe lajang ngut jang, shi a madu jan rai nga ai Egutu hkawhkam a shayi sha gaw shi a matu Shawlumon gap da ya ai hkawhkam htingnu de Dawi a Mare kaw nna htawt lung wa wu ai.
25 Shawlumon gaw dai Madu a matu gaw tawn da nu ai tawn hkungri ntsa hta wan nat hkungga hte mahku hkungga ni hpe laning mi hta masum lang hkungga sak nawng ya wu ai. Shi gaw dai Madu hpe manam pyaw ai baw mung nat nawng ya wu ai. Shing rai shi gaw Nawku Htingnu gaw gap ai amu hpe shangut nu ai.Ref 9:25: Pru 23:17; 34:23; Trj 16:16.
26 Hkawhkam Shawlumon gaw Edom mung Nawng Hkyeng hkin-gau ntsa e nga ai Elat mare makau na Eziongebera hta e sanghpaw li hpung langai mi hpe mung shachyaw wu ai.
27 Hkawhkam Hiram mung shi a sanghpaw li hpung kaw na panglai hka lam hta mahkrum, madup lu la sai masha nkau mi hpe shangun dat ya wu ai rai nna Shawlumon a masha ni hte rau amu jawm galaw ma ai.
28 Shanhte gaw Ohpira mung de li jawn sa nhtawm Shawlumon hpang de ja tan shi kru daram la wa ya mu ai.