5
(2Hl 2:1-18)
Turu hkawhkam Hiram gaw Dawi a jinghku tut nawng a rai nga ai. Shi kawa Dawi a magam tingnyang hta Shawlumon hkaw galai dung ai shiga hpe shi na jang, Hiram gaw shi a shangun dat kasa ni hpe Shawlumon hpang de shangun dat wu ai. Shawlumon gaw ndai mungga hte Hiram hpang de bai shana dat wu ai: ?Nye kawa Dawi gaw shi hpe wang shinggrup da ai gumlau mungdan ni yawng hpe htim gasat ai n htum majan ni a majaw shi a gumlau hpyen ni yawng hpe gasat dang kau lu ai awng padang dai Madu shi hpe jaw ya ai shani du hkra, dai Madu shi a Karai Kasang hpe nawku na htingnu langai shi gap lu na wu ai n rai nga ai hpe nang chye nga ndai. Rai ti mung, ya chyawm gaw nye a mungdan lamu ga jarit yawng hkan du hkra ngwi pyaw sim sa nga ai lam dai Madu nye a Karai Kasang ngai hpe jaw ya ni ai. Ngai hta gumlau hpyen ni n nga, hkrit hpa gasat gala lam mung n nga mat sai. Dai Madu gaw nye a kawa Dawi hpe, ?Na a hpang ngai hkawhkam dang da na nsha mahtang nye a matu ngu na Nawku Htingnu langai gap da na ra ai,? ngu nna ga sadi jaw da nga ai. Dai rai nna dai Madu nye a Karai Kasang hpe nawku na matu Htingnu gaw gap na, ya ngai myit daw dan da ni ai.Ref 5:5: 2Sa 7:12-13. Dai re ai majaw, arit hpun kran na matu Lebanon mung de na a masha ni hpe shangun dat u. Nye a masha ni mung shanhte hte rau amu jawm galaw na mara ai. Nang daw dan ai shabrai hte maren na a masha ni hpe ngai jahpu jaw ya na nngai. Na a masha ni galaw ai zawn nye a masha ni mailung n chye kran nga ma ai gaw, nang hkrak sha chye nga ndai.?
Shawlumon htet dat ai ga hpe shi lu la jang, Hiram nachying kabu sharawng nga wu ai rai nna shi gaw, ?Ndai amyu kaba a hkawhkam magam tingnyang dung na matu, ndai zawn hpaji rawng ai shadang sha Dawi hpe jaw ya ai dai Madu hpe dai ni shakawn kungdawn ga law!,? ngu nna tsun wu ai. Dai hpang Hiram mung ndai mungga hte hpawn Shawlumon hpang de shiga bai shana dat wu ai: ?Na a ga hpe ngai lu la nngai, nang hpyi ai hte maren galaw na matu ngai jin jin rai nga nngai. Arit hpun hte marau hpun ni hpe ngai jaw na nngai. Nye a masha ni mung Lebanon kaw nna panglai du hkra mailung ni hpe garawt shayu la nna, dai ni hte wawn shachyaw nhtawm nang lata san da ai shara na hkin-gau de du hkra ngai shayawng yu wa na nngai. Dai yang e, nye a masha ni wawn run nna na a masha ni mahtang dai ni hpe hkap hparan lajang na rai nga ai. Na a maga hku na chyawm gaw nye a masha ni a matu ra ai lusha hpe karum madi shadaw la ya na ngai ra nngai.
10 Dai rai nna Hiram gaw Shawlumon ra nga ai arit hpun hte marau mailung ni yawng hpe jaw ya wu ai. 11 Shawlumon mung Hiram hpe hkaulan mam dang 62,500, tsanlun sau jet galan 110,000 hpe shaning shagu Hiram a masha ni hpe jaw ya wu ai.
12 Dai Madu gaw shi a ga sadi hpe shatup nu ai hte Shawlumon hpe hpaji byeng-ya jaw ya wu ai. Hiram hte Shawlumon gaw shada da ga shaka shagrin da nga ma ai majaw shan a lapran e ngwi pyaw sim sa ai lam nga nga ai.
13 Hkawhkam Shawlumon gaw bungli galaw masha shatai na matu Israela mung ting na marai 30,000 hpe shaga la wu ai, 14 Adoniram hpe shanhte a hpa-awn shatai nga ai. Shing rai shi gaw hpung mi hta masha mun mun di nna hpung masum garan tawn wu ai; hpung shagu gaw Lebanon bum e shata mi wa galaw nna tinang a nta de shata lahkawng wa nga nga rai ma ai. 15 Shawlumon gaw bum ga e nlung tawk ai masha 80,000 hte dai ni hpe hpai na masha 70,000 mung lu nga ai; 16 shanhte galaw ai magam bungli ni hpe reng hkang na matu hpareng masha 3,300 hpe mung san tawn da wu ai. 17 Hkawhkam wa hkang da ai hte maren Nawku Htingnu a npawt nhpang a matu tsawm ai nlung kaba ni hpe tawk ma ai. 18 Shawlumon hte Hiram a bungli galaw masha ni hte Biblos mare masha ni mahtang Nawku Htingnu gap na matu nlung ni hte hpunpyen ni hpe lajang shachyip da nga ma ai.