3
(2Hl 1:3-12)
Shawlumon gaw Egutu hkawhkam wa a shayi sha hpe hkungran la let jinghku galaw da wu ai. Hkawhkam wa gaw shi hpe Dawi a mare e shi a hkawhkam hkaw hpe mung, Nawku Htingnu hpe mung, Yerusalem mare hpe kum gawan da ai mare bunghku ni yawng gaw gap ngut ai shani du hkra, shi hpe nga shangun nga ai. Dai Madu a matu Nawku Htingnu langai garai n lu gaw da nga ai majaw, amyu masha ni mahtang tawn hkungri amyu myu galaw la ai shara law law hkan shagu hkungga ni hpe naw sak nawng ya nga ma ai. Shawlumon gaw shi a kawa Dawi a matsun maroi ga hkan let, dai Madu hpe tsaw ra nga ai; rai ti mung shi mung yam nga law law sat nhtawm tawn hkungri amyu myu a ntsa e shagu hkungga sak nawng ya wu ai.
Shi gaw kalang mi na aten hta Gibeon mare de sa nna shagu hkungga ni hpe sak nawng ya wu ai; hpa majaw nga yang, dai mare e gumhkawng htum ai tawn hkungri langai nga nga ai. Lai sai aten hta dai yang e wan nat hkungga hkying mi hpe shi nawng ya yu wu ai. Dai Madu gaw dai shana e yup mang hta shi kaw dan pru nhtawm, ?Ngai nang hpe hpa jaw na hpyi e,? ngu nna shi hpe san wu ai.
Shawlumon gaw, ?Na a shangun ma nye a kawa Dawi gaw mai kaja ai, sadi dung ai hte myit malang ai hku hkan let nang hte matut mahkai nga ai majaw nang shi hpe tut nawng tsaw ra myit kaba madun dan ya nga ndai; shi a magam tingnyang hta dai ni hkaw galai dung let up hkang na shadang sha langai mi mung shi hpe jaw ya let na a galu kaba ai hte dinggrin tsaw ra myit matut nna shi hpe madun dan nga ndai. O Madu Karai Kasang e, ngai grai naw kaji nna kaning rai up hkang sa wa na lam n chye ti mung, nye wa a hkawhkam aya hta nang ngai hpe galai dung shangun nga nit dai. Na a amyu masha majing tai na matu nang lata la nna n dang hti hkra grai law htam ai amyu masha hta ngai lawm nga nngai. Dai re ai majaw kaja ai hte n kaja ai hpe chye ginhka nna, na a amyu masha ni hpe teng man ai hku chye up hkang na ngai hta ra ai hpaji byeng-ya ngai hpe jaw e law. Shing n rai yang, ndai na a galu kaba ai amyu masha ni hpe ngai kaning rai tut nawng up hkang lu na rai nga a ta?,? ngu nna htan wu ai.
10 Shawlumon ndai lam hpe hpyi wu ai majaw dai Madu mung awng sharawng nga ai rai nna, 11 dai Madu gaw shi hpe, ?Nang hkum nan asak galu ugut gu na matu mung, sut su ngamu ngamai na matu mung, na a gumlau hpyen ni hpe sat kau lu na matu mung nang n hpyi ai sha, teng man ai hte up hkang lu na hpaji byeng-ya hpe sha nang hpyi nga ndai majaw, 12 nang hpyi ai hte maren, ngai galaw ya na we ai. Shawng de mung n nga yu, htawm hpang de mung n nga yu na sai, masha kadai hta mung grau ai hpaji byeng-ya hte chye na hkawn hkrang ai hpaji ngai nang hpe jaw na de ai. 13 Nang n hpyi shalawm ai na a asak hkrun lam yawng hta nang hkam la na sut gan hte arawng sadang hpe mung ngai jaw na de ai; dai gaw kaga hkawhkam ni hkam la ai hta grau na ra ai. 14 Na nwa Dawi galaw ai zawn, nye a ga hpe madat mara let, nye a tara ni hte hkang da ai ga ni hpe hkan galaw ai rai yang, na a prat hpe mung galu shangun na nngai,? ngu nna tsun wu ai.
15 Shawlumon gaw yup hprang wa nna dai gaw yup mang hta Karai Kasang shi hpe ga shaga nga ai hpe dum hprang wa wu ai. Dai hpang shi gaw Yerusalem mare de sa wa nhtawm dai Madu a Sakse Sumpu man e tsap let wan nat hkungga hte mahku hkungga ni dai Madu a matu nawng ya wu ai. Dai hpang shi a du salang ni yawng a matu lusha poi langai galaw ya wu ai.
16 Lani mi na aten hta, shawa num lahkawng gaw hkawhkam Shawlumon hpang de sa nna shi a man e tsap nga ma ai. 17 Shan hta na langai mi gaw, ?Madu hkawhkam e, ndai numsha hte ngai gaw nta langai hta rau nga ga ai. Shing rai jawm nga ga yang, dai nta e la kasha langai shaprat we ai. 18 Ngai kasha shangai ai lahkawng ya na jang, shi mung shadang sha langai shaprat wu ai. Ndai nta hta an hta kaga kadai mung n nga ai; shi hte an hkrai nga ga ai. 19 Dai hpang lana mi na shana e shi a kasha hpe n dum shami shi a hkum kayin dat nhtawm dip apyet nna sat kau wu ai. 20 Shi gaw shana e rawt wa nhtawm ngai naw yup nga yang nye a makau na nye a ma hpe shi pawn la nna shi a yup ra de pawn mat wa wu ai; dai hpang shi a si ai ma hpe nye a yup ra hta wa tawn da ya nga ai. 21 Hpang jahpawt e, nye a ma hpe chyu shachyu na ngu rawt wa yang, yu u, ma dai chyasi rai nga ai hpe ngai mu nngai. Shing rai ma dai hpe atsawm sha htep rai yu we yang, dai gaw nye a kasha n rai nga ai hpe mu we ai,? ngu nna tsun wu ai.
22 Rai ti mung kaga numsha mahtang, ?N rai law, hkrung nga ai ma gaw nye a, si mat ai ma mahtang na a rai nga lit dai,? ngu nna tsun wu ai.
Shawng na num gaw, ?N rai law, si ai ma mahtang na a rai nga ai; hkrung nga ai ma chyawm gaw nye a rai nga li ai!,? ngu nna bai htan wu ai.
Dai rai nna shan gaw hkawhkam wa a man e ndang kalang hkat nga ma ai. 23 Dai hpang hkawhkam Shawlumon gaw, ?Nan gaw hkrung nga ai ma hpe shi na, ngai na, nga nna si mat ai mahtang kaga wa hte seng ai hku tsun nga myit dai,? ngu nna tsun wu ai. 24 Shi gaw nhtu la wa na matu shangun dat nna dai hpe la wa jang, 25 shi gaw, ?Dai hkrung nga ai ma hpe ka-ang brang di kahtam nna, dai numsha yan hpe chyen hpra hpra garan ya mu,? ngu nna tsun wu ai.
26 Kanu majing mahtang gaw shi a kasha a majaw shi a myit masin hta tsaw ra myit hpring nga wu ai rai nna hkawhkam wa hpe, ?Madu hkawhkam e, chyeju hte ma hpe hkum sat kau et! Shi hpe mahtang ma dai hpe jaw kau nu!,? ngu nna tsun wu ai.
Rai ti mung kaga numsha mahtang, ?An hta na kadai hpe mung hkum jaw sa. Ma dai hpe lahkawng brang di kahtam di kau sanu,? ngu nna tsun wu ai.
27 Dai hpang Shawlumon gaw, ?Dai ma hpe hkum sat kau et! Shawng na num hpe mahtang jaw kau dat u. Shi gaw ma a kanu majing rai nga ai,? ngu nna tsun wu ai.
28 Shawlumon a daw dan hparan ai hpe Israela masha ni na ma yang, Karai Kasang shi hpe jaw ya ai hpaji byeng-ya hta amu rawng ai lam hpe rap ra ai hku daw dan hparan ya nga ai hpe shanhte chye mu ai majaw shanhte yawng shi hpe grai hkrit hkungga nga ma ai.