2
1 Ya Dawi si aten du wa jang, shi a kasha Shawlumon hpe shaga la nhtawm hpang jahtum ga matsun ni jaw ya wu ai:
2 ?Ngai si wa na aten gaw du wa nga sai, dai rai nna kam sham ai hte myit jahkut daw dan u;
3 dai Madu na a Karai Kasang nang hpe galaw shangun ai amu hpe hkan galaw nga u. Nang hkawm sa ai shara shagu hta nang galaw ai amu magup shagu ngamu ngamai wa lit ga, Mawshe a Tara hta ka da ai hte maren, shi a tara ni hte hkang da ai ga ni yawng hpe madat mara let hkan sa nga u.
4 Shi a ga hpe nang madat mara ndai rai yang, nye a amyu matu ni shi a hkang da ai ga ni hpe sadi sahka let shanhte a myit kraw lawang mahkra hte myit masin mahkra hte sadi let madat mara nga dingsa Israela mung hpe up hkang lu na rai nga ai, nga nna shi ngai hpe tsun da sai ga sadi hpe dai Madu shatup na rai wu ai.
5 ?Dai hta kaga lama mi naw nga nga ai, dai gaw Israela a hpyen luksuk ni hpe up hkang ai du lahkawng ngu na Nera a kasha Abna hte Yehtera a kasha Amasa yan hpe sat kau nna Yoab ngai hpe galaw ai lam nang dum na ndai. Bai majan byin ai aten hta shanhte galaw shapraw dat ai si hkrung si htan amu a matu ngwi pyaw simsa ai aten hta matai dawp nna shan hpe shi kaning rai sat kau ai hpe mung adum nga u. Shi gaw mara n kap ai masha ni hpe sat kau nu ai rai nna shi galaw ai amu a matu ngai hta lit lu nga nngai a majaw dai mara a nni nkri hpe ngai hkam sha nga nngai.Ref 2:5: 2Sa 3:27, 20:10.
6 Kaning rai galaw na mung nang chye nga ndai; shi hpe shi hkrai shi si wa ai hku n re ai sha si shangun lu na ndai.
7 ?Rai ti mung na a nhpu Absalom kaw na ngai hprawng mat wa ai shaloi Gilead mung na Barazilai a shadang sha ni ngai hpe matsan dum la nga ma ai majaw shanhte hpe matsan dum ai lam madun dan nhtawm lanu lahku na rai ndai.Ref 2:7: 2Sa 17:27-29.
8 ?Bai Benyamin mung, Bahurim mare kaw na Gera a kasha Shime mung naw nga nga ai. Yawdan hka kau e shi ngai hpe sa tau la nna Mahanim mare de ngai lung wa ai shani, shi ngai hpe ahkup ahka nga mat hkra matsa kau nga nu ai. Ngai chyawm gaw shi hpe n sat kau na we ai ngu nna dai Madu a mying ningsang hta dagam shaka ai ga sadi ngai shi hpe jaw da nngai.Ref 2:8: 2Sa 16:5-13.
9 Rai ti mung shi hpe ari n jaw gaw hkum rai et. Kaning rai galaw na gaw nang chye nga ndai majaw shi si lu na rai nga ai, dai lam hpe nang lajang lu na rai ndai.
10 Ya Dawi si sai rai nna Dawi a mare hta lup makoi da nga ma ai.
11 Shi gaw mali shi ning tup Israela a hkawhkam tai nga ai; Hebron mare hta sanit ning, Yerusalem mare hta sumshi masum ning hkaw dung nna up hkang nga ai.Ref 2:11: 2Sa 5:4-5; 1Hl 3:4.
12 Shawlumon gaw shi kawa Dawi a magam tingnyang hta hkawhkam tai ai rai nna shi a hkawhkam daru magam n-gun gaw ngang ngang kang kang shagrin da lu nga ai.Ref 2:12: 1Hl 29:23.
13 Dai hpang Hagit a kasha Adoniya gaw Shawlumon a kanu Batsheba kaw sa wu ai. Batsheba chyawm gaw, ?Ndai gaw jinghku hku sa du chyai ai lam rai nga a ni?,? ngu nna hkap san wu ai.
Dai hpang shi gaw, ?Jinghku hku sa du chyai nngai,? ngu nna htan wu ai;
14 dai hpang shi gaw, ?Nang hpe san mayu ai lam lama mi lu nngai,? ngu nna tsun jat wu ai.
Shaloi Batsheba gaw, ?Hpa wa rai ta?,? ngu nna bai san wu ai.
15 Shi mahtang, ?Israela mung na masha shagu hte chyawm gaw ngai mahtang she hkawhkam tai ang ai nga nna dai hpe myit mada jawng nga ma ai hpe mung nang chye nga ndai. Rai ti mung dai gaw myit mada da ai hte shai mat nga sai; dai Madu a myit ra ai lam rai nga ai majaw nye kanau mahtang hkawhkam tai wa nu ga.
16 Ya chyawm gaw lam langai mi nang kaw ngai hpyi de ga; chyeju hte hkum ndang kau ya e,? ngu nna htan wu ai.
Shaloi Batsheba gaw, ?Hpa rai ta?,? ngu nna san wu ai.
17 Shi gaw, ?Nye a madu jan tai ya na dai Shunem numsha Abishaga hpe nye a matu rai u ga; chyeju hte hkawhkam wa hpe san ya e-nang san ai ga hpe shi n ningdang kau na gaw ngai chye nga nngai,? ngu nna htan wu ai.Ref 2:17: 1Hk 1:3-4.
18 Batsheba gaw, ?Grai kaja sai, na a matu hkawhkam wa hpe ngai tsun ya na nngai,? ngu nna htan wu ai.
19 Dai rai nna Batsheba gaw Adoniya a malai Shawlumon hpe sa tsun na nga hkawhkam wa hpang de shang wa wu ai. Shaloi hkawhkam wa gaw shi a kanu hpe shakram la na nga, rawt tsap let shi hpe gum let hkungga jaw wu ai. Dai hpang shi gaw shi magam tingnyang hta dung nga ai; shi kanu a matu kaga langai mi mung la shang wa ya ai hte Batsheba mung shi a hkra maga e dung nga ai.
20 Batsheba gaw, ?Lam kaji sha mi nang kaw hpyi na lam lu nga nngai; chyeju hte hkum ningdang kau ya e,? ngu nna tsun wu ai.
Dai rai nna hkawhkam wa gaw, ?Nu e, hpa wa rai ta? Ngai nang hpe ndang kau na nngai n rai,? ngu nna tsun wu ai.
21 Batsheba gaw, ?Abishaga hpe na nhpu Adoniya a madu jan shatai ya gaw,? ngu nna tsun wu ai.
22 Hkawhkam wa gaw, ?Abishaga hpe jaw sha na lam, nang hpa majaw ngai hpe san n ta? Dai gaw magam tingnyang shi hpe ap ya na matu san ai lam sha rai nga ai; chyahtum chyalai tsun ga nga yang, shi gaw ngai hpu wa nan rai nga ai; hkinjawng Abiahta hte Yoab yan gaw shi a maga de nga ai yan rai nga ma ai!,? ngu nna tsun wu ai.
23 Dai hpang Shawlumon gaw dai Madu a mying ningsang hta dagam shaka ai ga sadi tawn da let, ?Ning nga nna san ai a majaw, Adoniya a asak hpe ngai n jasum kau ai rai yang, Karai Kasang ngai hpe adup sat nu ga law!
24 Dai Madu gaw nye wa a magam tingnyang hta ngai hpe ngang ngang kang kang shagrin da ya ni ai: shi a ga sadi hpe shi shatup nu ai hte maren ngai hte nye a amyu matu ni a lata hta mungdan mung ap ya nu ai. Adoniya gaw dai ni jang si na ra ai gaw ahkrung nga ai dai Madu hta ngai dagam se ai!,? ngu nna majai tsun wu ai.
25 Dai re ai majaw, Hkawhkam Shawlumon gaw Benaia hpe hkang dat wu ai hte shi mung pru sa nna Adoniya hpe sat kau wu ai.
26 Dai hpang hkawhkam Shawlumon gaw hkinjawng Abiahta hpe, ?Na a daidaw buga Anahtot mare de nhtang wa su; nang gaw si ging ai wa rai nga ndai, rai ti mung nye wa Dawi hte rau nang nga nga ai hte yang dai Madu a Ga Shaka Sumpu amu hpe woi hpareng yu nit dai hte shi a ru yak tsin-yam tsindam yawng hpe nang gun hpai karum nit dai majaw ya ngai nang hpe sat kau na de ai n rai,? ngu nna tsun wu ai.Ref 2:26: 1Sa 22:20-23; 2Sa 15:24.
27 Shing rai dai Madu gaw Shilo mare hta Eli a amyu matu ni a lam tsun dan ai ga teng wa u ga, Shawlumon gaw Abiahta hpe dai Madu hpe hkinjawng amu galaw daw jau nga ai kaw nna Abiahta hpe shapraw kau wu ai.Ref 2:27: 1Sa 2:27-36.
28 Shaloi hpa byin ai lam Yoab na wu ai. (Shi chyawm gaw Adoniya hpe madi shadaw ya nu ai; rai ti mung Absalom hpe gaw madi shadaw da wu ai n rai.) Dai rai nna dai Madu a hpung shingkang shanu nga ai Sum de hprawng sa mat wa nhtawm tawn hkungri a jut nrung ni hpe sa jum nga ai.
29 Yoab gaw Sum de hprawng sa nna tawn hkungri makau e nga nga ai shiga hkawhkam Shawlumon kaw du jang, hpa lam a majaw tawn hkungri de hprawng sa mat wa ai lam, shi hpe san yu na nga, Shawlumon gaw kasa langai mi hpe shangun dat wu ai. Yoab chyawm gaw Shawlumon hpe hkrit wu ai rai nna dai Madu hpang de hprawng sa nngai, ngu nna htan wu ai. Dai rai nna hkawhkam Shawlumon gaw Yoab hpe sat kau na matu Benaia hpe shangun dat wu ai.
30 Shi gaw dai Madu a hpung shingkang shanu nga ai Sum de sa wa nhtawm Yoab hpe, ?Hkawhkam wa nang hpe hkan wa rit,? nga nna tsun ai.
Yoab chyawm gaw, ?N rai law, nang e she ngai si na nngai,? ngu nna htan wu ai.
Benaia mung hkawhkam wa hpang de nhtang wa nhtawm Yoab kaning nga tsun ai ga shi hpe tsun dan wu ai.
31 Shawlumon gaw, ?Yoab tsun ai hte maren galaw u. Mara n kap ai masha ni hpe Yoab sat kau ai gaw shi galaw ai amu a majaw ngai hte kaga Dawi a amyu kaw na lit shaprai kau na matu, shi hpe sat nna lup makoi kau u.
32 Yoab gaw shi hta grau kaja nna mara n kap ai masha lahkawng rai nga ai Israela hpyen luksuk hpe up hkang ai Abna hte Yuda hpyen luksuk hpe up hkang ai Amasa yan hpe, nye wa Dawi n chye ai sha sat kau nna shut kau ai ru hka amu a majaw dai Madu gaw shi hpe ari jaw na rai wu ai.
33 Shan hpe sat kau ai ru hka amu a ari gaw Yoab a ntsa e mung, shi a amyu matu ni a ntsa e mung, htani htana prat dingsa a nga nga na ra ai. Rai ti mung dai Madu gaw Dawi a magam tingnyang hta dung nga ai shi a amyu matu ni hpe awng dang ai lam tut nawng jaw ya nga nu ga law,? ngu nna htan wu ai.
34 Dai rai nna Benaia gaw dai Madu a hpung shingkang shanu nga ai Sum de sa wa nhtawm Yoab hpe sat kau wu ai. Shi hpe pa ga na shi a nta hta makoi mayang da mu ai.
35 Hkawhkam wa gaw Yoab a shara hta hpyen luksuk hpe up hkang na matu Benaia hpe mung, Abiahta a shara hta hkinjawng Zadok hpe mung san tawn da wu ai.
36 Dai hpang hkawhkam wa gaw Shime hpe shaga la nhtawm shi hpe, ?Yerusalem mare e na a matu nta langai gap u. Mare shinggan de n pru hkawm ai sha dai hta e nga nga u.
37 Nang rai nna Kidron hka shi lai hkra pru mat wa ai rai yang teng teng si lu na ndai; nang hkum nan mara jaw hkrum na rai ndai,? ngu nna tsun wu ai.
38 Shime chyawm gaw, ?Madu hkawhkam e, dai gaw grai kaja ai amu rai sai. Nang tsun ai hte maren hkan galaw na nngai,? ngu nna htan wu ai. Dai rai nna Yerusalem mare e aten na na shi nga nga wu ai.
39 Ya masum ning na jang, Shime a mayam lahkawng yan gaw Gat hkawhkam Mahka a kasha Ahkisha hpang de hprawng shang mat wa ma ai. Dai mayam yan Gat mare e nga nga ma ai shiga hpe Shime na jang,
40 shi a mayam yan hpe sa tam la na nga shi a lawze byau la nhtawm Gat mare e hkaw dung ai hkawhkam Ahkisha hpang de sa wa wu ai. Shing rai shan hpe sa mu tam la ai hte nta de bai woi wa wu ai.
41 Ya Shime hpa galaw kau ai hpe Shawlumon na jang,
42 shi hpe shaga la nhtawm, ?Ndai Yerusalem mare kaw nna n pru hkawm na matu dai Madu a mying ningsang hta ngai nang hpe ga sadi tawn da ni ai. Shing n rai nang pru hkawm ai rai yang nang teng teng si lu na rai ndai ngu nna nang hpe ngai sadi jaw da ni ai. Ngai tsun ai ga hpe nang madat mara hkan sa na nga nna tsun ai ga hpe nang myit n hkrum kau wu ni?
43 Dai she rai yang me, na a ga sadi hpe nang jahten kau nhtawm nye a hkang da ai ga ni hpe hpa majaw n madat n mara kau nit ni?
44 Nye a kawa Dawi hpe nang galaw nit dai shut hpyit amu yawng mayawng a lam hpe nang atsawm sha chye nga ndai. Dai amu a majaw dai Madu gaw nang hpe ari jaw na ra ai.
45 Shi chyawm gaw ngai hpe shaman ya nna Dawi a mungdan hpe htani htana ngwi pyaw sim sa shangun na ra ai,? ngu nna tsun wu ai.
46 Dai hpang hkawhkam wa gaw Benaia hpe hkang dat wu ai; shi gaw Shime hpe sat kau wu ai. Ya Shawlumon chyawm gaw mungdan hpe atsawm sha up hkang da nga wu ai.