18
1 Ya hkun hkraw ai masum ning hta dai Madu gaw Elia hpe, ?Nang hkum nan Hkawhkam Ahab kaw sa du su; shaloi ngai marang jahtu dat na nngai,? ngu nna tsun wu ai.
2 Dai re ai majaw Elia pru sa wa wu ai.
Ya Samari mung e grai sawng ai hkuwa byin wa ai rai nna,
3 Ahab gaw hkawhkam htingnu hpe hpareng ai Obadia hpe shaga jashawn la wu ai. (Dai Obadia gaw dai Madu hpe kam sham nawku ai wa rai nga ai.
4 Yezebela gaw dai Madu a myihtoi ni hpe sat kau wu yang, shanhte hta na marai latsa hpe hpung lahkawng garan nhtawm, hpung mi hta marai manga shi shi di nna lungpu hku ni hkan woi makoi da nna shahpa hte lu hka ntsin jaw nhtawm bau da wu ai.)
5 Ahab gaw Obadia hpe, ?Sa, ndai mung hta nga ai hka hpawk hka shi shagu hpe hkan yu hkawm ga; gumra ni hte lawze ni hkrung nga lu hkra bau rem lu ai tsingdu tsingman alaw alam tu ai udat shara hpe mu lu ga ai rai yang, anhte a yam nga ni hpe n jasat kau ra na ga ai,? ngu nna tsun wu ai.
6 Shan lahkawng gaw mungdan a maga ga de hkan tam sawk yu na matu kadai mung kadai tinang man ang ai lam de pru sa wa na myit jahkrum da ma ai.
7 Obadia gaw shi a hkrun lam hta hkawm sa wa nga yang, Elia hte akajawng sha hkrum wu ai. Obadia mung shi hpe yu matsing wu ai rai nna shi a man e gum dagup let, ?Madu e, nang gaw Elia teng teng rai nga n ni?,? ngu nna hkap san wu ai.
8 Elia mung, ?Rai sa, ngai Elia rai nga nngai, ngai nang e nga nga ai lam, na a madu hkawhkam wa hpe wa tsun su,? ngu nna htan wu ai.
9 Obadia mung, ?Ahab a lata hta sat kau hkrum na hkrit hpa lam hta nang ngai hpe tawn da mayu na daram ngai hpa wa galaw shut kau nga a ni?
10 Mungkan ting na mungdan shagu hta hkawhkam wa nang hpe hkan tam shangun nga ai gaw ahkrung nga ai dai Madu na a Karai Kasang hta ngai dagam nga nngai. Nang gaw shi a mungdan hta n nga nga ndai ngu nna dai mungdan hpe up hkang ai wa tang madun ai shaloi pyi, nang hpe n mu tam lu nga ai ngu nna up hkang du wa dagam na hpe she Ahab hpyi na wu ai.
11 Ya mung, ndai yang e nang nga nga ai lam nang ngai hpe sa tsun shangun mayu nga n ni?
12 Ngai pru mat wa ai shaloi jang, dai Madu a wenyi gaw n chye ai shara nkau mi de nang hpe woi mat wa na ra ai n rai ni? Dai hpang nang ndai yang e nga nga ai ngu nna Ahab hpe ngai tsun jang, shi nang hpe n mu tam ai shaloi ngai hpe sat kau na ra ai. Ngai chyawm gaw ma aten kaw nna dai Madu hpe kam sham nawku ai wa rai nga nngai hpe dum u law.
13 Yezebela gaw dai Madu a myihtoi ni hpe sat ai shaloi, hpung mi hta manga shi shi di nna hpung lahkawng garan nhtawm marai latsa hpe lungpu ni hta makoi da let, shanhte hpe lusha hte ntsin jaw nna bau da we ai hpe nang n na yu da wu ni?
14 Dai rai nna nang ndai yang e nga nga ai lam, hkawhkam wa hpe sa tsun dan lu hkra, nang ngai hpe kaning rai hkang da lu nga n ta? Shi ngai hpe sat kau na ra ai!,? ngu nna htan wu ai.
15 Elia mahtang, ?Dai ni jang, ngai hkum nan hkawhkam wa kaw dan pru na nngai, ngu nna ngai daw jau ai dai ahkrung nga ai chyahtum chyalai n-gun rawng ai dai Madu hta ga sadi tawn da nngai,? ngu nna htan wu ai.
16 Dai rai nna Obadia gaw Hkawhkam Ahab hpe sa tsun dan wu ai rai nna Ahab mung Elia hpe sa hkrum na nga pru sa wa wu ai.
17 Ahab shi hpe mu jang, Ahab gaw, ?Israela mung hta ru yak tsin-yam tsindam sawng hkra jaw ai wa gaw nang she rai nga n hka i!,? ngu nna tsun wu ai.
18 Elia mahtang, ?Ngai gaw ru yak tsin-yam tsindam jaw ai wa n rai nngai. Nang she-nang hte na nwa rai nga myit dai. Nang mahtang dai Madu a hkang da ai ga ni hpe n madat n mara ai sha, Bala hpara sumla ni hpe nawku nga ndai.
19 Hkarmela Bum e ngai hte hkrum na matu Israela amyu masha ni yawng hpe ya hkang dat u. Bala myihtoi 450 hte hpawn hkawhkam jan Yezebela e karum da ai Ashera karai num a myihtoi 400 hpe mung woi sa wa u,? ngu nna htan wu ai.
20 Dai rai nna Ahab gaw Israela masha ni yawng hpe mung, Bala myihtoi ni hpe mung Hkarmela Bum e sa hkrum hkat na matu hkang dat wu ai.
21 Elia mung amyu masha ni nga ai de lung wa nhtawm, ?Nanhte gaw gade na hkra hpa mung n daw dan ai nga nga na ngu nga myit ni? Dai Madu gaw Karai Kasang rai nga ai rai yang, shi hpe nawku mu; rai ti mung Bala mahtang karai kasang rai yang gaw shi hpe nawku mu!,? ngu nna tsun wu ai. Rai ti mung amyu masha ni chyawm gaw ga hkaw mi pyi n htan ai sha nga nga ma ai.
22 Elia gaw, ?Dai Madu a myihtoi ngu na ngai chyu sha she ngam nga nngai, rai ti mung Bala myihtoi ni chyawm gaw 450 ting wa rai ma ai.
23 Ya usu lahkawng dun wa mi; Bala myihtoi ni langai mi la nna dai hpe sat nhtawm hpya nna hpun ntsa hta mara da mu ga, rai ti mung wan n shachyi mu ga. Ngai mung kaga usu langai mi hpe dai hte maren galaw na nngai.
24 Dai hpang Bala myihtoi ni mung shanhte a karai hpe hpyi mu ga; ngai mung dai Madu kaw hpyi na we ai; shing rai wan dat dat nna mahtai jaw ai wa mahtang, Karai Kasang rai nga u ga,? ngu nna tsun wu ai.
Shaloi amyu masha ni mung na sharawng ai hte jahtau garu ma ai.
25 Dai hpang Elia gaw Bala myihtoi ni hpe, ?Nanhte law law rai nga myit dai majaw usu langai la nna dai hpe shawng hkyen shachyip mu. Nanhte a karai kaw hpyi myit tim, hpun hta wan garai hkum shachyip myit,? ngu nna tsun wu ai.
26 Shanhte hpe jaw da ai usu hpe shanhte hpya la nna dai hpe hkyen shachyip tawn nhtawm shana de du hkra, Bala kaw hpyi ma ai. Shanhte gaw, ?Bala e, anhte hpe htan ya mi law!,? ngu nna jahtau tsun ma ai. Shing rai shanhte galaw tawn ai tawn hkungri grup grup hta ka manawt nga ma ai. Rai ti mung hpa mahtai mi n pru nga malu ai.
27 Jan pungding madi ai aten hta chyawm gaw Elia mung shanhte hpe mani shakre hpang wa nu ai: ?Ja ja jahtau nna hpyi mu le! Shi gaw karai langai mi rai nga ai! Shani e yup mang mang nga a dawng! Shing n rai hkum tsan nga a dawng! Shing n rai bu hkawm dam nga nhten! Shi mi she yup pyaw nga ai kun? Nanhte madaw shi hpe jasu sharawt la ra na myit dai!?
28 Dai rai nna myihtoi ni gaw aja awa jahtau nna shanhte htung nga ai hte maren, tinang hkum hta asai lwi pru wa hkra nhtu nhkyi ni hte gadoi jahpye kau ma ai.
29 Shanhte gaw shana de jan kangai mat wa ai aten du hkra jahtau marawn let abrawp shajang nga ma ti mung, hpa mahtai mi n pru, nsen langai mi mung n shara rai nga ai.
30 Dai hpang Elia gaw amyu masha ni hpe, ?Ngai hpang de sit sa wa mi,? ngu nna tsun wu yang, shanhte yawng mung shi a grup grup e wa hpawng nga ma ai. Sharun jahten kau hkrum sai dai Madu a tawn hkungri hpe mung shi lajang da wu ai.
31 Dai Madu e Israela ngu nna shamying da hkrum sai Yaku a shadang sha ni a mying hku hkan nna amyu bawsang shi lahkawng a matu nlung langai hpra hpra di nna nlung shi lahkawng la wu ai. Ref 18:31: Nin 32:28; 35:10.
32 Dai nlung ni hte dai Madu hpe nawku na matu tawn hkungri bai galaw wu ai; de a grup grup hta hka galan mali daram hpe sha-ing da lu ai hka hkawng langai mi hpe htu wu ai.
33 Dai hpang tawn hkungri a ntsa e hpun mara nhtawm usu hpe hpya la nna hpun a ntsa e mara da wu ai. Shaloi shi gaw, ?Hka yam mali hta hka jahpring nna hkungga hte hpun a ntsa e ru bun mu,? ngu nna tsun wu ai. Shaloi shanhte mung dai hte maren hkan galaw ma ai.
34 Shi gaw, ?Kalang bai jaw mu,? ngu dat wu yang, shanhte mung jaw ma ai. Shi gaw, ?Kalang sha mi naw jaw mu,? ngu wu yang, shanhte mung jaw ma ai.
35 Hka gaw tawn hkungri grup grup hku lwi hkrat wa ai rai nna hka hkawng hta hpring nga ai.
36 Ya shana de hkungga nawng ya na aten hta, myihtoi Elia gaw tawn hkungri de sit sa nna, ?Abraham, Isak hte Yaku ni a Madu Karai Kasang e, nang gaw Israela a Karai Kasang rai nga ndai mung, ngai gaw na a shangun ma rai nga nngai mung, na a hkang da ai ga hte sha ndai amu ni yawng hpe galaw nngai mung, ya jang sakse shapraw dan u law.
37 Madu e, nang gaw shanhte hpe nang hpang maga de nhtang kayin la ai Madu Karai Kasang rai nga ndai hpe ndai amyu masha ni chye wa lu hkra, ngai hpe htan ya e law; Madu e, ngai hpe htan ya e law,? ngu nna hpyi wu ai.
38 Dai Madu gaw wan hpe jahkrat dat nhtawm shagu hkungga mung, hpun mung, nlung ni mung hkru kau ai hte aga hpe kahtet kang shangun nna hka lawng kata na hka hpe mung jahkyet kau wu ai.
39 Shing re ai lam hpe amyu masha ni mu jang, ga ntsa e shanhte gum dagup nhtawm, ?Dai Madu gaw Karai Kasang rai nga ai; dai Madu chyu sha Karai Kasang rai nga ai law!,? ngu nna jahtau tsun ma ai.
40 Elia gaw, ?Bala myihtoi ni hpe rim la mu; shanhte hta na langai mi hpe mung hkum shalawt kau mu!,? ngu nna hkang dat wu ai. Amyu masha ni mung shanhte yawng hpe rim la nna Kishon hka de shanhte hpe woi sa nhtawm sat kau mu ai.
41 Dai hpang Elia gaw Hkawhkam Ahab hpe, ?Ya chyawm gaw sa sha su; Marang htu ni wa ai nsen hpe ngai na nngai,? ngu nna tsun wu ai.
42 Ahab sa sha nga yang, Elia gaw Hkarmela Bum pungding de lung wa nna, dai shara e shi a lahput lapran hta shi a baw matep bang nhtawm ga de gum dagup wu ai.
43 Shi gaw shi a shangun ma wa hpe, ?Panglai nga ai maga de sa yu yu su,? ngu nna tsun wu ai.
Shaloi shangun ma wa mung sa yu nhtawm bai nhtang wa let, ?Hpa nga ai mung ngai n mu nngai,? ngu nna tsun wu ai. Ya Elia gaw sanit lang du hkra sa yu na matu tsun wu ai.
44 Sanit lang ngu na lang hta shi nhtang wa nna, ?Masha a lata daram kaba ai sumwi kaji langai mi panglai hka na dawng pru nga ai hpe ngai mu nngai,? ngu nna tsun wu ai.
Elia gaw shi a shangun ma wa hpe, ?Marang e shi hpe garai n shadang da yang, shi a gumra leng hta jawn nna nta de nhtang wa na lam hkawhkam Ahab hpe sa tsun su,? ngu nna hkang dat wu ai.
45 Gade mi n na yang, lamu gaw chyang ai sumwi ni hte ka-up lung wa nhtawm nbung bung hpang wa ai hte marang kaba ja ja htu hpang wa nga ai. Shaloi Ahab gaw shi a leng de gat shang wa nhtawm pa mare de nhtang mat wa wu ai.
46 Dai Madu a daru magam n-gun gaw Elia kaw du sa nga ai rai nna shi a hpun palawng ni hpe nshang hta ngang ngang kyit let Ahab a shawng e Yezrela mare lam de gat du wa wu ai.