17
1 Gilead mung Tishbi mare kaw na Elia mying ai myihtoi langai mi gaw Hkawhkam Ahab hpe, ?Dai Madu a mying ningsang hta mung, ngai daw jau nga ai dai ahkrung nga ai Israela a Karai Kasang hta mung ngai bai tsun ai aten du hkra, ndai lahkawng masum ning laman numri mung n hkrat, marang mung n htu na ra ai gaw ngai nang hpe tsun nga nngai,? ngu nna tsun wu ai.Ref 17:1: Yak 5:17.
2 Dai shaloi dai Madu gaw Elia hpe,
3 ?Ndai shara kaw nna pru mat wa nhtawm sinpraw maga de shanang sa wa let Yawdan hka a sinpraw hkran Hkerit hka shi makau e nang nan sa makoi nga su.
4 Dai hka shi gaw nang lu na hka ntsin jaw ya na ra ai; ngai hkang da ni ai hte maren uhka ni mung dai yang e nang hpe shahpa la sa ya na mara ai,? ngu nna tsun wu ai.
5 Elia mung dai Madu a hkang da ai ga hpe madat mara nhtawm Hkerit hka shi makau e sa nga nga wu ai.
6 Uhka ni gaw jahpawt hte shana de shagu muk hte shan hpai jaw mu ai; hka shi na hka mung shi lu lu nga wu ai.
7 Tawng marang mi na jang, marang n htu mat ai majaw hka shi dai hkun hkraw mat nga ai.
8 Shaloi dai Madu gaw Elia hpe,
9 ?Ya chyawm gaw Sidon makau e nga ai Zarephta mare de sa wa su, dai yang e shanu nga ai gaida jan langai nang hpe lusha jaw na matu ngai hkang da ni ai,? ngu nna tsun wu ai. Ref 17:9: Luk 4:25-26.
10 Dai rai nna Elia gaw Zarephta hpang de sa mat wa wu ai; mare chyinghka lam e shi du jang, hpun hta nga ai gaida jan langai mi hpe mu wu ai. Elia gaw shi hpe, ?Chyeju hte lu hka ntsin jaw e law,? ngu nna tsun wu ai.
11 Shi gaw dai lu hka ntsin sa la nga yang, ?Chyeju hte muk loi mi mung naw la wa ya e law,? ngu nna shaga la let tsun wu ai.
12 Shi gaw, ?Ngai muk hpa mung n lu nngai gaw, ahkrung nga ai dai Madu na a Karai Kasang hta ngai dagam lu nga nngai. Ban hta muk shadung latup mi hte yam e tsanlun sau kahte mi sha lu nngai; dai gaw ngai lu ai yawng rai sai. Nang e ju hpun loi mi hpe ngai sa hta nna dai hpe nta de la wa nhtawm nye kasha hte nye a matu ngai lu ai kachyi mi hte lajang shachyip na nngai. Dai gaw an nu a matu hpang jahtum ngu na lusha rai sai; dai hpang an gaw kyet si mat na saga ai,? ngu nna htan wu ai.
13 Elia gaw shi hpe, ?Hkum tsang et; shawng wa magang nna na a shahpa wa lajang shachyip magang su. Rai ti mung nang lu malu hta na muk kaji mi shawng galaw nna ngai hpe la sa jaw e, dai hpang na a matu hte na a shadang sha a matu dai naw ngam ai hte hkyen la u.
14 Ndai lam a majaw, dai Madu Israela a Karai Kasang ning nga ai: ?Ngai Madu nan marang htu shangun ai aten du hkra, hka wan na muk shadung ma mat na n rai; yam na namman sau mung yawm mat na n rai,?? ngu nna tsun wu ai.
15 Elia shi hpe tsun dat nu ai hte maren, dai gaida jan wa galaw nu ai rai nna shanhte yawng gaw nhtoi law law a matu shahpa alaw alam lu tawn da nga masai.
16 Dai Madu gaw Elia a n-gup ga hku ga sadi jaw nu ai hte maren hka wan hta muk shadung ma ai n rai; yam na namman sau mung yawm mat nga ai n rai.
17 Ya aten ram ram na a hpang, gaida jan a kasha machyi taw nga ai. Shi gaw grau grau machyi sawng wa ai hte si mat nga sai.
18 Shi gaw Elia hpe, ?Karai Kasang a masha wa e, nang hpa majaw ndai zawn ngai hpe galaw kau n ta? Karai Kasang hpe nye a yubak shadum ya nhtawm nye a kasha hpe si mat shangun na matu ndai yang e nang du sa ai n rai ni?,? ngu nna san wu ai.
19 Elia gaw, ?Dai ma ngai hpe jaw rit,? ngu nna tsun wu ai. Shaloi Elia gaw ma dai hpe kanu a lata na pawn la nhtawm ntsa gawk shi nga ai shara de pawn lung wa let, yupra ntsa e wa kaleng da wu ai.
20 Dai hpang shi gaw, ?O Madu, nye a Karai Kasang e, nang gaw hpa majaw ndai zawn re ai hkrit hpa amu, ndai gaida jan hta galaw dat wu ni? Shi gaw ngai hpe ram ging ai made matsan dum la ai hte ngai hpe lanu lahku la ni ai. Ya chyawm gaw shi a kasha hpe sat kau ya nit hka!,? ngu nna ja ja hpyi jahtau wu ai.
21 Dai hpang Elia gaw shi a hkum hpe ma a ntsa e masum lang hkrawn gum nna, ?O Madu nye a Karai Kasang e, ndai ma hta asak bai bang ya u law!,? ngu nna hpyi wu ai.Ref 17:21: 2Hk 4:34-35.
22 Dai Madu mung Elia a akyu hpyi ga hpe htan ya wu ai rai nna dai ma hta nsa bai shang wa nhtawm hkrung wa nga ai.
23 Shing rai ma dai hpe Elia sharawt la nna lawu htap de woi yu wa nhtawm kanu hpe ap ya let, ?Yu u, na nsha hkrung nga sai!,? ngu nna shi hpe tsun wu ai.
24 Shi mung, ?Nang gaw Karai Kasang a masha rai nga ndai mung, dai Madu gaw nang hku nna teng teng ga shaga nga ai hpe mung, ya ngai chye ni ai!,? ngu nna htan wu ai.