15
(2Hl 13:1-14:1)
1 Israela Hkawhkam Yeroboam hkaw dung ai shi matsat ning hta Abiya gaw Yuda hkawhkam tai wa nu ai rai nna,
2 Yerusalem mare hta masum ning tup up hkang nga ai. Shi a kanu gaw Absalom a shayi sha Mahka rai nga ai.
3 Shi mung shi a kawa zawn yubak mara shut hpyit nga ai majaw shi a kaji ke Dawi zawn dai Madu hta tsep kawp sadi dung nga ai n rai.
4 Rai ti mung Dawi a majaw dai Madu shi a Karai Kasang gaw Abiya a hpang Yerusalem mare hpe up hkang na matu hte Yerusalem mare hpe shim lum hkra sin na matu shi hpe shadang sha langai jaw ya wu ai.Ref 15:4: 1Hk 11:36.
5 Dawi gaw dai Madu awng sharawng ai amu hpe galaw nu ai rai nna Hiti masha Uria lam hta kaga, shi a hkang da ai ga ni hpe galoi mung madat mara nga ai majaw dai Madu ndai amu hpe galaw nga ai.Ref 15: 5: 2Sa 11:1-27.
6 Rehoboam hte Yeroboam yan a lapran e byin hpang wa ai majan gaw Abiya a prat hta mung matut byin nga ai.
7 Abiya galaw ai lam magup hte hpe Yuda Hkawhkam ni a Labau Laika hta ka matsing da nga ai.
8 Abiya si mat sai rai nna Dawi a Mare hta lup makoi da mu ai; shi a kasha Asa mahtang shi a hkang hta hkaw matut dung nga ai.
(2Hl 15:16-16:6)
9 Israela Hkawhkam Yeroboam hkaw dung ai hkun ning hta Asa gaw Yuda hkawhkam tai wa nhtawm,
10 Yerusalem mare hta mali shi langai ning hkaw dung nna up hkang nga ai. Shi a kawoi gaw Absalom a shayi sha Mahka rai nga ai.
11 Asa chyawm gaw shi a kaji kawa Dawi galaw dan nu ai amu zawn dai Madu awng sharawng ai amu hpe galaw wu ai.
12 Shi gaw tara maigan masha ni a nawku shara ni hkan nga ai shawa num shawa la ni yawng hpe mungdan kaw nna shaden kau nhtawm shi a shawng na hpu shawng hpu ba ni galaw da ai hpara sumla ni yawng hpe seng kau wu ai.
13 Shi a kawoi Mahka mung matsat shabat re ai Ashera karai num a mayat maya ai hpara sumla hpe galaw wu ai majaw shi hpe hkawhkam jan a kanu aya kaw nna jahkrat kau wu ai. Shing rai Asa gaw hpara sumla hpe kahtam daw kau nhtawm Kidron Kadit e dai hpe nat kau wu ai.
14 Tara maigan masha ni a nawku shara ni yawng hpe Asa n dang jahten shama kau lu tim, dai Madu hta prat dingsa sadi naw dung nga wu ai.
15 Shi a kawa gaw Karai Kasang kaw majai da sai arung arai ni hte hpawn shi hkum nan majai da ai ja rai, gumhpraw arai ni hpe Nawku Htingnu kata hta shi tawn da wu ai.
16 Yuda Hkawhkam Asa hte Israela hkawhkam Basha yan shan hkaw dung nga dingsa shada da majan ayan gasat hkat nga ma ai.
17 Ya Basha gaw Yuda mung hpe shang gasat nhtawm Yuda mung de pru pru shang shang re ai lam yawng hpe dan di kau na nga, Rama mare hpe bunghku kum hpang wa wu ai.
18 Dai re ai majaw Hkawhkam Asa gaw Nawku Htingnu hte hkawhkam htingnu kata e ngam da ai ja, gumhpraw ni hpe la nhtawm Hezion a kashu Tabrimon a kasha Damasku e hkaw dung ai Suri Hkawhkam Benhadad hpang de dai arai hte rau ndai mungga hte hpawn shi a du salang nkau mi hpe shangun dat wu ai:
19 ?Anhte a kawa ni zawn anhte mung jinghku tai nga ga law. Ndai aja, gumhpraw gaw na a matu kumhpa rai nga ai. Dai rai nna nang hte jinghku ga shaka shagrin da nga ai Israela Hkawhkam Basha a ga shaka hpe ya jang run kau u; shaloi nye a mung daw kaw na shi a hpyen hpung ni hpe dawm la kau na ra ai.?
20 Hkawhkam Benhadad mung Asa tang shawn ai ga hpe myit hkrum ya wu ai rai nna, Israela mare ni hpe gasat na matu shi a up hkang du salang ni hte hpyen luksuk ni hpe shangun dat wu ai. Shing rai shanhte gaw Iyon, Dan, Abela Bet Mahka, Galile Nawng makau na shara hte Naphtali lamu ga ting hpe gasat dang la mu ai.
21 Shing rai byin sai lam hpe Hkawhkam Basha na jang, Rama hpe bunghku n kum sai sha, Tiza mare de wa mat wa wu ai.
22 Dai hpang Hkawhkam Asa gaw masha shagu n lawt ai sha, mare hpe gaw de ai hta Basha lang ai nlung hte hpunpyen ni hpe Rama mare kaw nna hpai shapraw karum na matu Yuda mung ting de hkang dat wu ai. Asa chyawm gaw Benyamin a lamu ga hta nga ai Mizpa hte Geba mare ni hpe gaw de da wu ai.
23 Hkawhkam Asa galaw nu ai lam magup ngu na shi a share shagan ai amu ni a lam hte shi gaw de da ai mare ni a lam yawng mayawng hpe Yuda Hkawhkam ni a Labau Laika hta ka matsing da nga ai. Rai ti mung shi asak kaba wa jang lagaw ana a majaw hten htu mat wu ai.
24 Asa si mat sai rai nna, Dawi a Mare na Hkawhkam ni a lupwa hta shi hpe makoi mayang da nga ai. Shi a kasha Yehoshahpat gaw shi a hkang hta hkaw matut dung ai hte hkawhkam tai wa sai.
25 Yuda Hkawhkam Asa hkaw dung ai lahkawng ning hta Hkawhkam Yeroboam a kasha Nadab mahtang Israela hkawhkam tai wa nhtawm lahkawng ning up nga ai.
26 Shi a kawa zawn shi a man e dai Madu hpe shut hpyit kau nhtawm Israela masha ni hpe yubak lam de woi sa wa wu ai.
27 Yisahka amyu bawsang na Ahiya a kasha Basha gaw Nadab hpe gumlau na maw mawn ai rai nna Nadab hte shi a hpyen luksuk ni Hpilisti mung na Gibehton mare hpe wang da nga yang, Nadab hpe sat kau wu ai.
28 Yuda Hkawhkam Asa hkaw dung ai masum ning rai jang, dai lam byin wa ai rai nna, Basha gaw Israela Hkawhkam Nadab a hkang hta hkaw galai dung nga ai.
29 Basha hkaw dung ai hte rau Yeroboam a dinghku masha ni yawng hpe kalang lata sat kau hpang wa nga ai. Shilo mare na shi a shangun ma myihtoi Ahiya a n-gup hku nna dai Madu tsun da sai hte maren, Yeroboam a dinghku masha ni yawng sat kau ai hkrum nga ma ai. Langai mi mung hkrung nga lu ma ai n rai.Ref 15:29: 1Hk 14:10.
30 Yeroboam gaw shi shut kau ai yubak mara ni hte shi nan Israela hpe yubak galaw shangun let dai Madu Israela a Karai Kasang hpe masin pawt shangun nga wu ai majaw ndai zawn byin wa nga sai.
31 Nadab galaw sai amu lam magup Israela Hkawhkam ni a Labau Laika hta ka matsing da nga ai.
32 Yuda Hkawhkam Asa hte Israela Hkawhkam Basha yan hkaw dung nga dingsa shan shada da majan ayan gasat hkat nga ma ai.
33 Yuda Hkawhkam Asa hkaw dung ai masum ning hta, Ahiya a kasha Basha mung Israela mung ting a hkawhkam tai wa sai. Shi gaw Tiza mare hta e hkaw dung let hkun mali ning up nga ai.
34 Shi a shawng na Hkawhkam Yeroboam zawn shi a man e dai Madu hpe shut hpyit kau nhtawm Israela amyu masha ni hpe yubak lam de woi sa kau wu ai.