11
Shawlumon gaw maigan numsha law law hpe tsaw ra wu ai. Egutu hkawhkam a shayi sha hta kaga, Hiti numsha ni, Moba, Amon, Edom hte Sidon mung na numsha ni hpe hkungran la wu ai.Ref 11:1: Trj 17:17. Dai Madu gaw Israela masha ni kaga amyu n bung ai num la ni hte n la hkat na matu hkang da nga ai; hpa majaw nga yang shanhte gaw Israela masha ni hpe kaga karai ni hta sadi dung mat wa shangun lu nga ai.Ref 11:2: Pru 34:16; Trj 7:3-4. Shawlumon gaw hkawhkam shayi sha sanit tsa hte hpe hkungran la ai hta lashi num ni masum tsa mung naw lu wu ai. Shanhte gaw shi hpe Karai Kasang kaw nna kayin mat wa shangun nhtawm, shi asak kaba wa ai aten hta maigan karai ni hpe nawku ai hta shanhte shi hpe lam woi yit kau manu ai. Shi gaw shi a kawa Dawi zawn dai Madu shi a Karai Kasang hta sadi dung nga nu ai n rai. Shi gaw Sidon karai num Astarte, matsat shabat re ai Amon karai Molek ni hpe nawku mat wu ai. Shi gaw dai Madu hpe yubak galaw shut kau nu ai rai nna, shi a kawa Dawi zawn shi hta teng man nga wu ai n rai. Yerusalem mare a sinpraw maga na bum ntsa e, matsat shabat re ai Moba karai Hkemosha hte matsat shabat re ai Amon a Molek hpe nawku na shara ni gaw da nga wu ai. Shi a maigan madu jan ni yawng manam pyaw ai baw nat nawng nna shanhte a karai ni hpe shagu hkungga nawng ya lu hkra nga, nawku shara ni hpe mung shi gap da ya wu ai. 9-10 Dai Madu Israela a Karai Kasang gaw Shawlumon hpang de lahkawng lang dan pru nna maigan karai ni hpe n nawku na matu shi hpe hkang da tim, dai Madu a ga hpe Shawlumon n madat ya ai hta sha n-ga, shi kaw na myi man kayin mat wa wu ai. Dai rai nna dai Madu gaw Shawlumon hpe pawt wu ai. 11 Shi hpe, ?Ngai hte tawn da ai na a ga shaka hpe nang dasang jahten kau nhtawm nye a hkang da ai ga ni hpe n madat n mara nga nit dai majaw na a lata kaw na mungdan hpe ngai la nna, na a du salang ni hta na marai langai ngai a lata de ap kau ya na we ai, ngu nna ngai ga sadi jaw de ai. 12 Hpa lam hku mi rai tim, na nwa Dawi a majaw ndai amu hpe na a prat e ngai galaw na n rai; rai ti mung, na a kasha hkaw dung ai aten hta galaw na we ai. 13 Mungdan ting hpe shi a lata kaw na ngai la na nngai n rai; shing rai na malai nye a shangun ma Dawi a majaw mung, nye a matu ngu nna galaw da ai Yerusalem mare a majaw mung shi hpe amyu bawsang langai mi hku tawn kau da na we ai,? ngu nna tsun wu ai.
14 Dai re ai majaw Shawlumon hpe nhtang gumlau na matu, dai Madu mung Edom magam dinghku na Hadad hpe shabyin dat wu ai. 15-16 Ndai lam garai n byin yang, Dawi gaw Edom mung hpe gasat dang la yu ai shaloi shi a luksuk hpe up hkang ai Yoab gaw dai mung de si mang ni hpe lup makoi na nga, dai shara de sa wa wu ai. Shing rai shi hte shi a masha ni Edom mung e shata kru dang naw nga nga ai laman hta, 17 Hadad hte Egutu mung de hprawng lawt mat wa ai shi kawa a shangun ma ni rai nga ai Edom masha nkau mi hta kaga Edom mung na lasha nlang ni hpe shanhte sat kau mu ai. (Dai aten hta Hadad gaw ma kaji sha naw rai nga ai.) 18 Shanhte gaw Midian mung kaw nna pru wa nhtawm Paran de sa wa let kaga masha nkau mi hte jawm hkrum la ma ai. Dai hpang shanhte gaw Egutu mung de yu sa nhtawm hkawhkam wa kaw du ma ai; hkawhkam wa mung Hadad hpe lusha hte hpawn lamu ga kau chyen hte nta langai hkap jaw wu ai. 19 Hadad chyawm gaw hkawhkam wa a manang jinghku zawn myi man pa nga ai rai nna hkawhkam wa mung shi a kanam ngu na hkawhkam jan Tahpene a kanau hte Hadad hpe hkungran la shangun wu ai. 20 Shi gaw Hadad a matu Genubat mying ai shadang sha langai mi shangai ya wu ai rai nna hkawhkam hkaw kata de hkawhkam jan woi la ai hte bau maka dat wu ai. Shi mung hkawhkam wa a shadang sha ni hte rau nga kaba wa nga ai. 21 Dawi hte shi a luksuk hpe up hkang ai Yoab yan si mat sai shiga hpe Hadad nga ai Egutu mung de hkrang pru wa jang, Hadad gaw hkawhkam wa hpe, ?Nye a mung ga de bai nhtang wa shangun e law,? ngu nna tsun wu ai.
22 Hkawhkam wa gaw, ?Hpa majaw law? Ngai nang hpe karum na matu ngai lit hprai kau sani? Dai lam a majaw dum nta de nhtang wa mayu ai n rai ni?,? ngu nna san wu ai.
Hadad gaw hkawhkam wa hpe, ?Ngai hpe she wa shangun e law,? ngu nna htan wu ai. Shing rai shi mung shi a mungdan de nhtang mat wa wu ai.
Edom hkawhkam Hadad gaw n hkru nga ai wa rai nna Israela a hpyen majing tai wa nga sai. 23 Karai Kasang gaw Shawlumon hpe kayin gumlau na matu Eliada a kasha Rezon hpe mung shabyin dat wu ai. Rezon gaw shi a madu ngu na Zoba hkawhkam Hadadeza kaw nna hprawng mat wa nhtawm, 24 tara shinggan de male nga ai masha hpung mi a ningbaw tai nga ai. (Ndai gaw Dawi mahtang Hadadeza hpe gasat dang kau nna shi a jinghku hpyen hpung rai nga ai Suri masha ni hpe sat sharu kau ai hpang byin ai lam rai nga ai.) Rezon gaw shi a masha shi hpe Suri hkawhkam shatai ai Damasku mare de shi a masha ni hte rau sa nga nga wu ai. 25 Shi gaw Shawlumon a prat e Israela a gumlau hpyen tai nga ai wa rai nga ai.
26 Hkawhkam Shawlumon hpe kayin gumlau ai kaga masha gaw shi a du salang ni hta langai mi rai nga ai Ehprim mung Zereda mare na Nebat a kasha Yeroboam rai nga ai. Shi a kanu gaw Zerua mying ai gaida jan rai nga ai. 27 Ndai gaw kasu kabrawng rai gumlau rawt hpang wa ai a maumwi rai nga ai.
Shawlumon gaw Yerusalem mare a sinpraw maga na lamu ga hpe jahpring nhtawm mare bunghku ni hpe gram lajang wu ai. 28 Yeroboam gaw marai rawng ai shabrang wa rai nna shi amu gade galaw shaja nga ai hpe Shawlumon yu matsing da wu ai. Manashe hte Ehprim amyu bawsang ni a lamu ga hta amu galaw nga ai masha ni yawng hpe woi hpareng na matu shi hpe san tawn da wu ai. 29 Lani mi na aten hta, Yeroboam mahtang Yerusalem mare kaw nna pru sa wa wu yang, Shilo mare na myihtoi Ahiya hte pa ga na lam ntsa e shi hte chyu sha hkrum wu ai. 30 Ahiya mung shi hpun ai palawng galu nnan hpe raw la nhtawm daw shi lahkawng di nna gang je kau wu ai. 31 Shi gaw Yeroboam hpe, ?Ndai daw shi na a matu hkap la u; dai Madu Israela a Karai Kasang gaw nang hpe, ?Shawlumon a mungdan hpe ngai la nhtawm na a lata hta amyu bawsang shi jaw na de ai. 32 Shawlumon chyawm gaw nye a shangun ma Dawi a jaw e mung, Israela mung ting hta nye a matu ngu nna ngai lata san da ai Yerusalem mare a jaw e mung, amyu bawsang langai mi hpe lu la na rai wu ai. 33 Shawlumon gaw ngai hpe ningdang kau nna maigan karai ni rai nga ai Sidon karai num Astarte hpe mung, Moba karai Hkemosha hpe mung, Amon karai Molek hpe mung nawku wu ai majaw, ndai amu hpe ngai galaw na we ai. Shawlumon gaw shi a kawa Dawi galaw ai zawn nye a ga hpe n madat n mara ai hte shut hpyit ai amu galaw nhtawm nye a Tara ni hte hkang da ai ga ni hpe n hkan shatup nga nu ai. 34 Rai ti mung, ngai gaw Shawlumon a lata kaw nna mungdan ting hpe la kau na nngai n rai; shi hkrung nga dingsa ngai shi hpe daru magam n-gun hte up hkang shangun na nngai. Ngai lata san da nna nye a tara ni hte hkang da ai ga ni hpe hkan sa madat mara nga ai nye a shangun ma Dawi a jaw e sha, ndai amu hpe ngai galaw na we ai. 35 Ngai gaw Shawlumon a shadang sha a lata kaw nna mungdan hpe la nhtawm nang hpe amyu bawsang shi jaw na de ai, 36 rai ti mung ngai hpe nawku na shara ngu nna ngai lata san da sai Yerusalem mare hta nye a shangun ma Dawi a amyu matu kaw na langai tut nawng a up nga nga lu hkra Shawlumon a kasha hpe amyu bawsang langai ngai jaw na we ai. 37 Yeroboam e, ngai nang hpe Israela hkawhkam shatai na de ai, nang ra mara hte maren lamu ga ting hpe up hkang lu na rai ndai. 38 Nye a ga hpe tsep kawp nang madat mara nna, nye a tara ni hta manoi nga let nye a man e ding man ai amu shachyen nhtawm nye a shangun ma Dawi galaw ai hte maren ngai hkang da ai ga hpe hkan galaw ai rai yang, ngai gaw nang hte rau tut nawng anga nga na nngai. Ngai nang hpe Israela hkawhkam shatai na we ai; Dawi hpe ngai galaw ni ai zawn na a hpang e mung na a amyu matu ni teng teng up hkang na mara ai. 39 Shawlumon galaw hkrup ai yubak mara ni a majaw Dawi a amyu matu ni hpe ari jaw na we ai, rai ti mung tut nawng ari jaw na n rai,?? ngu nna tsun wu ai.
40 Dai re ai majaw Shawlumon gaw Yeroboam hpe sat na matu tam shakut nga ai, rai ti mung shi mahtang Egutu hkawhkam Shishak hpang de hprawng mat wa nna dai mung e Shawlumon si mat ai aten du hkra sa nga nga wu ai.
(2Hl 9:29-31)
41 Shawlumon galaw nu ai shi a amu magam hte shi a hpaji byeng-ya lam magup hpe Shawlumon a Labau Laika hta yawng ka matsing da nga ai. 42 Shawlumon gaw Yerusalem mare hta hkaw dung nna Israela mungdan ting hpe shaning mali shi ning tup up nga ai. 43 Shi si mat sai rai nna Dawi a Mare hta shi hpe lup makoi da nga ai; shi a hkang hta kasha Rehoboam hkaw dung nga ai.