1 Ya aten ram ram na mat ai hpang, dai Madu mung shanhte a grup yin hta nga ai gumlau hpyen ni a sharu shatsang ai lam hta na shim lum ai lam Israela hpe jaw ya wu ai. Dai aten hta Yawshu gaw grai dingla wa nu ai rai nna, 2 Israela amyu masha ni yawng, salang myit su ni, ningbaw ni, tara agyi ni hte amyu masha ni hta na du magam ni hpe shaga la nhtawm, ?Ya ngai aprat kaba nna grai dingla wa ni ai. 3 Nanhte a majaw dai Madu nanhte a Karai Kasang ndai masha amyu baw ni yawng hta galaw dan nu ai lam magup hpe nanhte mu manit dai. Dai Madu nanhte a Karai Kasang gaw nanhte a matu gasat ya manit dai. 4 Ngai gasat dang la kau sai sinpraw maga, Yawdan hka kaw nna sinna maga Ka-ang Panglai du hkra nga ai masha amyu baw ni yawng hte naw ngam nga ai masha amyu baw ni a lamu ga ni hpe nanhte a amyu bawsang ni madu la na matu ngai masat ya da mase ai. 5 Dai Madu nanhte a Karai Kasang gaw shanhte hpe hprawng htingnut wa shangun nna nanhte rawt lung wa myit yang, shachyut kau na wu ai. Dai Madu nanhte a Karai Kasang ga sadi tawn da nu ai hte maren shanhte a lamu ga hpe nanhte madu la lu na myit dai. 6 Dai rai nna Mawshe a Tara Laika hta ka da sai lam magup hte hpe sadi sahka hte madat mara let hkan galaw shatup nga mu. Kaning re ai tara daw hpe mung n gawn n sawn hkum rai myit. 7 Dai hpang nanhte hta naw ngam nga ai ni gaw ndai kaga masha amyu ni hte n kanawn, shanhte a hpara mying n gang, n dagam ai hte dai hpara sumla ni hpe n dingnyawm nawku lu na rai myit dai. 8 Shing rai galaw na malai, ya du hkra nanhte hkan nga myit dai hte maren, dai Madu hta kam sham nga mu. 9 Nanhte rawt lung wa myit yang, dai galu kaba nna daru magam n-gun rawng ai masha amyu baw ni hpe dai Madu shaden kau nu ai rai nna, kadai mung nanhte a man e galoi mung rawt tsap lu ma ai n rai. 10 Dai Madu nanhte a Karai Kasang gaw shi a ga sadi hte maren, nanhte a matu majan gasat ya nga ai majaw nanhte hta na marai langai mi masha hkying mi hpe jahtaw kau lu nga myit dai. Ref 23:10: Trj 32:30; Trj 3:22. 11 Dai re ai majaw sadi sahka hte dai Madu nanhte a Karai Kasang hpe tsaw ra nga mu. 12 Nanhte mahtang sadi n dung ai sha, dai ni du hkra nanhte hta naw ngam nga ai kaga amyu baw ni hte makyit mahkai let num la num ya rai myit yang chyawm gaw, 13 nanhte rawt lung wa myit ti mung, dai Madu nanhte a Karai Kasang gaw dai masha amyu baw ni hpe teng teng shaden kau na wu ai n rai nga ai hpe nanhte chye da mu. Shanhte gaw nanhte a matu mahkam dawnggawng, nsung hku, shingma kayat ai shingna hte myi hta rawng ai aju ni zawn ram ram hkrit hpa shara tai na mara ai. Dai sha n-ga, dai Madu nanhte a Karai Kasang nanhte hpe jaw manit dai ndai mai kaja ai mungdan hta nanhte langai mi mung n nga mat wa ai aten du hkra ndai amu hpe shabyin na ra ai.

14 ?Ya chyawm gaw ngai si wa na aten du wa nga sali ai. Dai Madu nanhte a Karai Kasang a ga sadi hte maren, mai kaja ai chyeju yawng mayawng nanhte hpe jaw ya manit dai hpe nanhte langai hte langai tinang a myit kraw lawang hte myit masin hta chye nga myit dai; shi jaw ai ga sadi shagu hpe n hprai ai sha galaw shatup nu ai. 15 Rai ti mung, nanhte hpe tsun dan sai ga sadi shagu hpe shi shadik shatup ya nu ai zawn hkrit hpa ari hkum sumhpa hpe mung shi shapraw na ra ai. 16 Dai Madu nanhte a Karai Kasang gaw nanhte hkan shatup na matu hkang da ai ga shaka hpe nanhte tawt lai nna, kaga hpara shaje hpe nawku daw jau myit dai rai yang, shi pawt sindawng ai a majaw nanhte hpe ari jaw na ra ai; shi nanhte hpe jaw da ai ndai kaja ai mungdan hta na kade n na yang, nanhte htum mat na rai myit dai,? ngu nna tsun mu ai.