1-2 Dai hpang, dai Madu gaw Israela amyu masha ni hpe ning ngu tsun na matu Yawshu hpe hkang dat wu ai: ?Nanhte hpe tsun dan na matu Mawshe hpe ngai hkang da ni ai hte maren, hprawng shingbyi na mare ni hpe lata san da mu. Ref 20:1-9: Bhk 35:9-34; Trj 4:41-43; 19:1-13. 3 Marai langai ngai hpe n dum shami sat kau hkrup ai wa gaw matai htang na wa a lata kaw na lawt lu na matu dai shara de sa wa lu na rai wu ai. 4 Shi gaw mare langai ngai de hprawng sa nna, mare chyinghka e nga ai tara daw dan ai shara de sa wa lu na rai wu ai. Shing rai mare ningbaw ni hpe byin ai lam tsun dan na rai wu ai. Dai ni gaw mare kata de shi hpe woi jashawn la nna, dai yang e shi nga nga lu na matu shara hkap jaw na rai mu ai. 5 Matai htang mayu ai wa dai yang e shi kaw hkan nang ai rai yang, mare masha ni dai wa a lata de ap ya dat lu na n rai. Dai wa gaw masin pawt ai n re ai sha, ndum shami shi hpe sat kau hkrup nga ai majaw shi hpe makawp maga la lu na rai ma ai. 6 Dai wa gaw shawa hpawng a man e daw dan ai shani du hkra rai yang rai, Hkinjawng Kaba wa si mat ai aten du hkra rai yang rai, dai mare hta anga nga na rai wu ai. Dai hpang mahtang shi bai wa nna shawng e shi hprawng kau da ai tinang a buga mare de bai nhtang wa mai nga ai.

7 Dai rai nna, Yawdan hka a sinna maga ngu na de Naphtali bum ga Galile ginwang hta Kedesha mare e mung, Ehprim bum ga hta Shehkem mare e mung, Yuda bum ga hta Hebron mare ni hpe san da nga ma ai. 8 Yawdan hka a sinpraw hkran Yerihko a sinpraw maga nam mali kawng layang na Rubin a lamu ga hta nga ai Bezera mare, Gad a lamu ga Gilead mung e Ramot, Manashe a lamu ga Bashan mung e Golan mare ni hpe lata san da ma ai. 9 Ndai mare ni gaw Israela amyu masha ni yawng hte shanhte hta hkan nga nang ai maigan masha ni a matu lata da ai hprawng shingbyi na mare ni rai nga ai. Masha langai ngai hpe ndum shami sat kau hkrup ai wa kadai mung matai htang ai wa a lata kaw na makawp maga la hkrum ai lam dai yang e mu tam la lu nga ai. Shawa hpawng a daw dan ai lam hpe shi shawng garai n hkam la dingsa sat kau hkrum na rai wu ai n rai.