17
Yosep a kasha alat Manashe a amyu matu hta na lakung lama nkau mi hpe masat ya ai lamu ga sali gaw Yawdan hka a sinna maga nga ai lamu ga chyen mi rai nga ai. Manashe a kasha alat Gilead a kawa Mahkira chyawm gaw hpyen amu hta share shagan lu ai wa rai nna, Yawdan hka a sinpraw maga de na Gilead hte Bashan shi hpe masat ya ma ai. Manashe hte naw ngam nga ai lakung lama ni ngu na Abieza, Helek, Asriela, Shehkem, Hehpera hte Shemida ni hpe Yawdan hka a sinna hkran na lamu ga masat ya mu ai. Dai ni gaw Yosep a shadang sha Manashe kaw na lasha amyu matu ni rai nga ai majaw dai lakung lama ni a ningbaw ni rai ma ai. Manashe, Mahkira, Gilead hte Hehpera ni hta na hkrat yu wa ai Zelohpehad gaw shadang sha n lu ai shayi sha ni hkrai rai ma ai. Shanhte a mying ni gaw Mala, Noa, Hogla, Milhka hte Tiza ni rai nga ai. Shanhte gaw hkinjawng Eleaza, Nun a shadang sha Yawshu hte ningbaw ni kaw sa nna, ?Anhte hpe mung, anhte a hpu nau lasha ni hpe mung sali ga jaw na lam dai Madu Mawshe hpe hkang da nu ai,? ngu nna tsun mu ai. Dai rai nna, dai Madu hkang da sai hte maren, shanhte a hpu nau lasha ni hte rau sali ga jaw ai hkrum nga ma ai. Ref 17:4: Bhk 27:1-7. Dai re ai majaw Yawdan hka a sinpraw maga na Gilead hte Bashan hta kaga gambum shi mung Manashe lu la nga ai, hpa majaw nga yang, shi a shayi sha matu ni mung lamu ga sali masat ya ai hkrum nga ma ai. Gilead chyawm gaw ngam nga ai Manashe a amyu matu a matu masat da nga ai.
Manashe a lamu ga jarit gaw Ashera mare kaw nna Shehkem mare a sinpraw maga nga ai Mikmehta de hprang rai nga ai. Dai jarit gaw dingda maga de yu wa nna Entapua masha ni nga ai shara de byawn rai nga ai. Tapua a ginwang hpe Manashe madu la wu ti mung, jarit ntsa na Tapua mare hpe chyawm gaw Ehprim amyu matu ni madu da ma ai. Dai lamu ga jarit gaw Kana hka shi nga ai de hkan yu wa nhtawm dai hka shi a dingda daw de na mare ni, Manashe a lamu ga hta ang nga ti mung, Ehprim madu da nga ai. Manashe a lamu ga jarit gaw dai hka shi a dingdung maga hku shanang lung wa nhtawm Ka-ang Panglai e htuk rai nga ai. 10 Ehprim gaw dingda, Manashe gaw dingdung rai nna, Ka-ang Panglai gaw shan a sinna maga de na lamu ga jarit rai nga ai. Ashe gaw sinna dingdung maga de, Yisahka gaw sinpraw dingdung maga de rai nga ai. 11 Manashe gaw Yisahka hte Ashera lamu ga hta na Bet Shan hte Iblim hte de a grup yin mare ni, Dora (Hkin-gau ntsa na mare langai), Endora, Tanak hte Megido mare ni hte de a grup yin mare ni hpe madu la nga ai. 12 Rai ti mung, Manashe amyu matu ni mahtang dai mare ni hta nga ai masha ni hpe n lu gawt shapraw kau lu ma ai majaw dai shara ni hkan Hkanani masha ni matut nga nga ma ai. 13 Israela amyu masha ni n-gun ja nga ti mung, Hkanani masha ni yawng hpe shanhte n gawt shapraw kau lu nga ma ai. Shanhte gaw dai ni hpe shanhte a matu bungli adip arip shangun sha nga ma ai.
14 Yosep a amyu matu ni gaw Yawshu hpe, ?Dai Madu anhte hpe shaman ya mani ai majaw anhte grai law htam wa saga ai wa, anhte madu la na lamu ga sali langai sha, anhte hpe hpa majaw jaw n ta?,? ngu nna tsun ma ai.
15 Yawshu gaw, ?Nanhte law htam nna Ehprim a bum ga nanhte a matu nau wa kaji dum myit yang, Perizi hte Rehpim masha ni a lamu ga na maling ga de lung wa nhtawm nanhte a matu hkyen lajang la mu,? ngu nna htan dat wu ai.
16 Shanhte gaw, ?Dai bum ga gaw anhte a matu n kaba nga mali ai; rai ti mung Bet Shan hte de a grup yin na mare ni hte Yezrela Kadit pa hkan nga ai Hkanani masha ni chyawm gaw hpri leng lu ai ni rai nga ma ai,? ngu nna htan ma ai.
17 Yawshu gaw Ehprim hte sinna maga de nga ai Manashe amyu bawsang ni hpe, ?Nanhte teng teng law htam nna daru magam n-gun grai ja nga myit dai majaw gambum langai sha n-ga, nanhte lu la na rai myit dai. 18 Dai bum ga gaw nanhte a matu rai na myit dai, dai majaw nam maling mi rai nga ti mung, dai nam maling ni hpe hkyen jasan nna, maga mi kaw nna maga mi de htum hkra kaba ai lamu ga hpe madu la na rai myit dai. Hkanani masha ni hpri leng lu nna n-gun ja ai masha ni rai nga ti mung, shanhte hpe gawt shapraw kau na rai myit dai,? ngu nna tsun wu ai.