13
1 Yawshu chyawm gaw asak grai kaba sai rai nna dingla wa nga sai. Dai Madu gaw shi hpe, ?Ya nang grai dingla mat nit dai, rai ti mung naw gasat la ra ai lamu ga gaw grai wa naw law nga ai. Dai lamu ga ni gaw:
2 Hpilisti hte Geshuri lamu ga yawng,
3 dingda maga de Awim lamu ga yawng ngu na (Egutu lamu ga jarit htep rai nga ai Shihora hka kaw na Hkanani mung hta lawm ai dingdung man de na Ekron mare du hkra nga ai Hpilisti hkawhkam ni nga ai Gaza, Ashdod, Ashkelon, Gat, hte Ekron ni rai nga ai.)
4 Hkanani masha ni a mung ting hte (Sidon masha ni madu da ai) Meara mare du hkra, Amori mung a lamu ga jarit Ahpek shara du hkra,
5 Gebali masha ni a lamu ga; sinpraw maga de nga ai Lebanon lamu ga yawng, Hermon Bum a dingda maga nga ai Balagad kaw na Hamat uhkan du hkra naw nga nga ai.
6 Lebanon Bum ni kaw nna Misrehpot Ma-in lapran hta nga ai bum ga na masha nlang ngu ai Sidon masha mahkra a lamu ga lawm nga ai. Israela amyu masha ni rawt lung wa yang, ndai masha ni hpe ngai shaden kau na we ai. Ngai nang hpe hkang da ni ai hte maren, Israela amyu masha ni hpe dai lamu ga karan jaw lu na rai ndai. Ref 13:6: Bhk 33:54.
7 Dai lamu ga hpe dai amyu bawsang jahku hte Manashe amyu bawsang kau chyen ni madu la na matu karan jaw na rai ndai,? ngu nna tsun wu ai.
8 Dai Madu a shangun kasa Mawshe gaw shanhte hpe karan jaw manu ai hte maren, Rubin, Gad hte Manashe amyu bawsang kau chyen ni gaw Yawdan Hka a sinpraw hkran maga de nga ai lamu ga ni hpe lu la chyalu rai nga masai. Ref 13:8: Bhk 32:33; Trj 3:12.
9 Shanhte a lamu ga gaw (Arnon Kadit mahka e nga ai) Aroera mare hte dai kadit ka-ang e nga ai mare hte Medeba kaw nna Dibon du hkra bum layang ga ting lawm nga ai.
10 Dai hta Amon a lamu ga jarit du hkra up ai Heshbon mare e hkaw dung ai Amori Hkawhkam Sihon a mare ni yawng lawm nga ai.
11 Gilead mung, Geshuri hte Mahkahti ginwang ni, Hermon bum yawng, Saleka du hkra dam ai Bashan mung ting mung lawm nga ai.
12 Ashtarot hte Edri mare ni hpe up ai Rehpim amyu hta na hpang jahtum hkaw dung ai Oga a mungdan ting lawm nga ai. Dai masha amyu ni hpe Mawshe gasat dang nna gawt shapraw kau wu ai.
13 Rai tim, Israela amyu masha ni mahtang Geshuri hte Mahkahti masha ni hpe n gasat shapraw kau ma ai majaw Israela mung hta naw nga ma ai.
14 Lewi amyu bawsang ni hpe chyawm gaw lamu ga sali Mawshe n jaw wu ai. Dai Madu gaw Mawshe hpe hkang da nu ai hte maren, dai Madu Israela a Karai Kasang hpe tawn hkungri ntsa wan hte nawng jau ai shagu hkungga a kumhtaw hpe sha shanhte hkam la lu na rai ma ai.
15 Mawshe gaw Rubin amyu bawsang hta na lakung lama ni hpe shanhte madu la na lamu ga sali jaw ya wu ai.
16 Shanhte a lamu ga gaw (Arnon Kadit mahka) e de ai Aroera mare hte dai kadit ka-ang e nga ai mare kaw nna Medeba grup grup na bum layang ga yawng lawm nga ai.
17 Heshbon hte bum layang ga e de ai mare ni ngu na,
18 Dibon, Bamot Bala, Bet Balameon, Yahaza,
19 Kedemot, Mepat, Kiriahtim, Sibma, kadit na kawng e de ai Zeret Shahara;
20 Betpeora, Pisga bum nhkrem hte Bet Yeshimot ni lawm nga ai.
21 Dai hta bum layang e de da ai mare ni yawng hte Heshbon e hkaw dung nna up hkang ai Amori Hkawhkam Sihon a mungdan mahkra mung lawm nga ai. Mawshe gaw shi hte hpawn Midian mung du ni rai nga ai Ewi, Rekem, Zura, Hura hte Reba ni hpe gasat dang kau wu ai. Shanhte yawng gaw Hkawhkam Sihon a mungdaw ni hpe up ai ni rai ma ai.
22 Beora a shadang sha lakle sara Balam hpe mung dai ni hte rau sat kau ma ai.
23 Yawdan hka gaw Rubin amyu bawsang ni a sinna maga de na lamu ga jarit rai nga ai. Dai mare kahtawng ni gaw Rubin amyu bawsang hta na lakung lama ni madu la na lamu ga sali ni rai nga ai.
24 Mawshe gaw Gad amyu bawsang hta na lakung lama ni hpe shanhte madu la na lamu ga sali jaw ya wu ai.
25 Shanhte a lamu ga gaw Yezera mare hte Gilead mung ting na mare ni yawng hte Raba sinpraw ang de na Aroera du hkra,
26 Amon mung chyen mi, Heshbon kaw nna Ramat Mizpa hte Betonim du hkra, Mahanim kaw nna Lodeba jarit du hkra rai nga ai.
27 Yawdan Kadit hta de ai Bet Haram, Betnimra, Suhkot, Zahpon mare ni hte Heshbon Hkawhkam Sihon a mungdan lamu ga ngam ni lawm nga ai. Sinna maga de na shanhte a lamu ga jarit gaw Yawdan hka a dingdung Galile Nawng du hkra rai nga ai.
28 Dai mare kahtawng ni gaw Gad amyu bawsang hta na lakung lama ni madu la na lamu ga sali ni rai nga ai.
29 Mawshe gaw Manashe amyu bawsang chyen mi na lakung lama ni madu la na lamu ga sali jaw ya wu ai.
30 Shanhte a lamu ga gaw Mahanim hte Bashan yawng hte Bashan Hkawhkam Oga a mungdan ting, Bashan mung Yaira kahtawng kru shi yawng lawm nga ai.
31 Dai gaw Gilead mungdaw ka-ang hkup hte Bashan mung Hkawhkam Oga a mungdan mare daju rai nga ai Ashtarot hte Edri mare ni lawm nga ai. Ndai ni yawng Manashe a kasha Mahkira a kashu kasha ka-ang hkup hpe jaw ya nga ai.
32 Dai hte gaw Mawshe Moba pa e nga nga yang, Yawdan hka hte Yerihko mare a sinpraw hkran na lamu ga hpe karan ya ai lam rai nga ai.
33 Rai ti mung, Lewi amyu bawsang ni hpe chyawm gaw lamu ga sali loi mi mung Mawshe n masat ya nga ai. Dai Madu Israela a Karai Kasang hpe sak jaw ai hkungga kumhtaw chyu sha shanhte a sali rai nga ai lam shi shanhte hpe tsun dan wu ai. Ref 13:33: Bhk 18:20; Trj 18:2.