11
1 Israela amyu masha ni hkam la ai awng padang shiga hpe Hazora Hkawhkam Yabin na ai shaloi, shi gaw Madon Hkawhkam Yobab, Shimron hkawhkam hte Ahkashahpa hkawhkam ni,
2 dingdung maga de nga ai bum ga, Galile Nawng a dingda maga de nga ai Yawdan Kadit ga, pa ga, Dora makau nga ai hkin-gau ntsa nga ai hkawhkam ni hpang de shiga shana dat wu ai.
3 Shi gaw Yawdan hka a lahkawng maga hkran de nga ai Hkanani masha ni, Amori masha ni, Hiti masha ni, Perizi masha ni hte bum ga hkan nga ai Yebusi masha ni, Mizpa mung na Hermon bum lagaw hkan e nga ai Hiwi masha ni hpe mung shiga shana dat wu ai.
4 Shanhte gaw panglai hkin-gau na zaibru zawn law la ai luksuk kaba ni hte mung, gumra hte hpyen leng law law hte mung pru sa wa ma ai.
5 Ndai hkawhkam ni yawng rau hpawng nna n-gun galung la nhtawm Israela amyu masha ni hpe htim gasat na matu Merom hka shi makau e dap jung da nga ma ai.
6 Dai Madu gaw Yawshu hpe, ?Shanhte hpe hkum hkrit et. Hpawt ni ndai ahkying hta Israela a matu shanhte yawng hpe ngai sat kau na we ai. Nang mung shanhte a gumra lahkap dan kau nna, leng ni nat kau na rai ndai,? ngu nna tsun wu ai.
7 Shaloi Yawshu hte shi a masha ni yawng gaw Merom hka shi makau e shanhte hpe akajawng sha htim gasat dat ma ai.
8 Dai Madu mung shanhte hpe Israela masha ni a lata de ap ya nna awng padang jaw ya wu ai rai nna, Israela ni mung shanhte hpe dingdung maga Misrehpot Ma-in hte Sidon du hkra mung, sinpraw maga Mizpa Kadit du hkra mung hkan shachyut gasat ma ai. Gumlau hpyen langai mung n ngam mat hkra matut gasat nga ai.
9 Dai Madu hkang da nu ai hte maren, Yawshu gaw shanhte hpe shakrip mu ai rai nna shanhte a gumra lahkap dan ya nhtawm leng ni hpe nat kau ya wu ai.
10 Dai hpang, Yawshu gaw nhtang wa nhtawm Hazora mare hpe gasat dang la nna de a hkawhkam wa hpe sat kau wu ai. (Dai aten hta Hazora mungdan gaw yawng hta daru magam n-gun kaba htum rai nga ai.)
11 Dai yang e nga ai masha shagu hte hpe shanhte sat kau nna langai mi hpe mung n jahkrung da ma ai. Mare hpe mung nat kau ma ai.
12 Yawshu gaw dai mare ni yawng hte shanhte a hkawhkam ni hpe gasat dang kau nhtawm masha shagu hte hpe dai Madu a shangun kasa Mawshe hkang da nu ai hte maren, sat kau wu ai.
13 Rai ti mung, Yawshu nat kau ai Hazora mare hta jan nna kawng ntsa e de da ai mare gara hpe mung Israela amyu masha ni n nat kau ma ai.
14 Israela amyu masha ni gaw dai mare hkan na manu dan ai lanep arai ni hte yam nga ni yawng la nna shanhte a matu dai ni hpe kyem da nga ma ai. Rai ti mung, masha shagu hte hpe chyawm gaw sat kau nna kadai mung n hkrung lu nga ma ai.
15 Dai Madu gaw shi a shangun kasa Mawshe hpe hkang da wu ai hte maren, Mawshe gaw Yawshu hpe bai hti ya wu ai. Yawshu mung dai ga ni hpe madat mara wu ai. Dai Madu Mawshe hpe hkang da mada lam magup hpe shi galaw wu ai.
16 Yawshu gaw mungdan yawng ngu na bum ga, pa layang ga, dingdung dingda ga ting, Goshen mung ting hte de a dingda daw de hkun hkraw ai shara hte Yawdan Kadit du hkra hpe mung gasat dang la wu ai.
17-18 Dingda maga Edom mung makau na Halak bum kaw na Hermon Bum a dingda Lebanon Kadit du hkra mungdan hpe maden da nga ai. Yawshu gaw ndai mung na hkawhkam ni hte tsawmra mi na hkra majan gasat wu ai. Rai ti mung shi gaw shanhte yawng hpe gasat dang kau nna sat shamyit kau wu ai.
19 Israela amyu masha ni hte ngwi pyaw sim sa lam galaw da ai mare gaw Gibeon chyu sha rai nna dai mare hta Hiwi masha nkau mi nga nga ma ai. Kaga mare ni yawng hpe chyawm gaw gasat dip la lu nga ai.
20 Israela amyu masha ni hpe hkap gasat gwi hkra dai Madu shanhte hpe daw dan shangun wu ai. Shaloi shanhte mahtang atsai awai jahten sharun kau na matu daw dan ai hkrum nna matsan dum myit n rawng ai sha shanhte yawng sat kau ai hkrum na rai ma ai. Ndai gaw dai Madu Mawshe hpe hkang da ai hte maren rai nga ai.
21 Dai aten hta, Yawshu sa nna Anakim ngu shamying ai masha kaba ni nga ai bum ga hkan na mung, Hebron, Debira hte Anab mare na mung, Yuda hte Israela bum ga hkan na ni yawng hpe mung, jahten shabyak kau wu ai. Shanhte hpe mung, shanhte a mare ni hpe mung Yawshu tsep kawp shamyit kau ya wu ai.
22 Anakim masha ni kadai mung Israela mungdan hta ngam nga lu na ma ai n rai; Gaza, Gat hte Ashdod mare ni hta sha loi mi nga nga ma ai.
23 Yawshu gaw dai Madu Mawshe hpe hkang da nu ai hte maren, mungdan ting gasat la nhtawm Israela amyu masha ni hpe shanhte a sali ga hku shi jaw nhtawm amyu bawsang shagu hte hpe sali karan ya wu ai.
Dai rai nna, shanhte gaw majan man hta na mung hkring sa la lu ma ai.