YAWSHU A LAIKA
(JOSHUA)
Ga Nhpaw
Ndai Yawshu A Laika gaw Mawshe a hkang hta hkringhtawng dagraw hkam la ai Yawshu a lam madun woi awn ningbaw ai npu hta Hkanan mung hpe shang gasat ai Israela amyu masha ni a labau rai nga ai. Ndai laika hta matsing la mai ai mabyin lam ngu na, Yawdan hka rap di ai lam, Yerihko mare hkrat sum mat ai lam, Ai mare hta majan byin ai lam, Karai Kasang hte shi a amyu masha ni a lapran tawn da ai ga shaka hpe bai shagrin da ai lam ni lawm nga ai. Ndai laika hta grau ahkyak shatai ai ja chyum ga gaw, ?Nanhte gara mahtang hpe daw jau na myit dai gaw, dai ni jang, daw dan la mu; ngai hte nye a nta masha ni chyawm gaw, dai Madu hpe daw jau na ga ai,? (24:15) ngu ai rai nga ai.
1
1 Dai Madu a shangun kasa Mawshe si mat ai hpang, shi hpe karum ai Nun a kasha Yawshu hpe dai Madu ga shaga wu ai.
2 Shi gaw, ?Nye a shangun kasa Mawshe si mat sai. Dai rai nna nang hte Israela amyu masha ni yawng ngai shanhte hpe jaw na ngu ai mungdan de, Yawdan hka rap sa wa na matu, ya jang jin jin rai nga mu.
3 Ngai gaw Mawshe hpe ndat da ai hte maren nanhte kabye du na rai myit dai, dai mungdan ting hpe nang hte nye a amyu masha ni yawng hpe jaw da made ai. Ref 1:3-5: Trj 11:24-25.
4 Nanhte a lamu ga jarit gaw dingda maga nam mali kaw nna dingdung maga Lebanon Bum ni nga ai de du hkra, sinpraw maga Uhprat hka nu kaw nna Hiti mung hkren, sinna maga nga ai Ka-ang Panglai de du hkra rai na rai nga ai.
5 Yawshu e, nang ahkrung nga dingsa kadai mung nang hpe dang lu na ma ai n rai; ngai gaw Mawshe hte rau nga lai wa ai zawn nang hte mung rau nga nga na nngai. Ngai gaw nang hte tut nawng rau anga nga na nngai; ngai nang hpe galoi mung kau da na nngai n rai. Ref 1:5: Trj 31:6-8; Heb 13:5.
6 Myit jahkut daw dan nna kam hpa nga u; ngai gaw shanhte a kaji kawa ni hpe ga sadi tawn da sai ndai mungdan hpe shanhte madu la ma ai shaloi, nang gaw dai amyu masha ni a ningbaw tai na rai ndai.Ref 1:6: Trj 31:6-7, 23.
7 Myit jahkut daw dan nna kam hpa u; nye a shangun ma Mawshe nang hpe jaw ya sai Tara mahkra hpe teng teng madat mara hkan sa na rai ndai. Dai tara daw chyen mi hpe pyi n gawn n sawn hkum di kau et; shing rai jang, nang du hkawm ai shara shagu hta awng dang ai chyeju hkam la lu na rai ndai.
8 Nanhte a nawku hpawng hta ndai tara laika hpe teng teng ahti nga lu na rai nga ai. Dai hpe shani shana hti yu nhtawm dai hta ka da mada yawng hpe nang teng teng madat mara hkan sa lu na rai ndai. Shaloi nanhte ngamu ngamai wa nna awng dang lu na rai myit dai.
9 Ngai nang hpe hkang da sade ai hte maren, myit jahkut daw dan nna kam hpa nga na hpe adum nga u! Hkum hkrit et; myit hkum daw hkum hten et. Dai Madu na a Karai Kasang ngai gaw nang hkawm sa ai shara shagu hta nang hte rau rai nga nngai,? ngu nna tsun wu ai.
10 Dai hpang, Yawshu gaw ningbaw ni hpe dap de ga sa wa na matu hkang dat nhtawm,
11 amyu masha ni hpe, ?Dai Madu nanhte a Karai Kasang nanhte hpe jaw ya ai mungdan hpe madu la na matu masum ya e, ndai Yawdan hka rap na rai nga manit dai majaw, lusha jarit jin jin jahting da manu,? ngu nna tsun wu ai.
12 Yawshu gaw Rubin amyu bawsang, Gad amyu bawsang hte Manashe amyu ka-ang hkup hpe, ?Dai Madu nanhte a Karai Kasang gaw nanhte hpe,
13 ?Yawdan hka a sinpraw hkran na lamu ga hpe nanhte a buga dum nta shatai ya na nga, dai Madu a shangun ma Mawshe kaning ngu nanhte hpe tsun da sai hpe dum nga mu.
14 Nanhte a madu jan ni, kashu kasha ni hte yam nga ni chyawm gaw ndai ga e nga nga na myit dai, rai ti mung share shagan hpyenla ni mahtang shanhte a kahpu kanau rai nga ai Israela hpu nau ni hpe karum na matu shanhte a shawng e Yawdan hka rap na rai ma ai.
15 Ndai hku galaw ai hpe nanhte a Madu Karai Kasang e shanhte hpe jaw da ai Yawdan hka a sinna maga na lamu ga hpe shanhte lu madu la ai aten du hkra galaw na rai myit dai. Israela amyu bawsang yawng hpe shim lum ai lam lajang da ya ngut jang, nanhte mung bai nhtang wa mai nhtawm, dai Madu a shangun ma Mawshe nanhte hpe jaw sai dai Yawdan hka a sinpraw hkran na nanhte a mung ngu na ndai yang e wa nga na rai myit dai,? ngu nna tsun mu ai.Ref 1:12-15: Bhk 32:28-32; Trj 3:18-20; Ysh 22:1-6.
16 Shanhte gaw Yawshu hpe, ?Nang anhte hpe tsun matsun ai hte maren anhte galaw na ga ai rai nna anhte hpe shangun dat ai gara shara de mung sa na ga ai.
17 Anhte gaw Mawshe a ga tut nawng madat ga ai zawn, na a ga hpe mung anhte madat na ga ai. Dai Madu na a Karai Kasang gaw Mawshe hte rau nga nga ai zawn nang hte rau mung anga nga u ga law!
18 Na a daru magam ahkang aya hpe san nna na a hkang da ai ga hpe n madat n mara ai wa kadai rai ti mung, sat kau ai hkrum lu na rai nga ai. Dai rai nna myit jahkut daw dan ai hte kam hpa nga u!,? ngu nna tsun wu ai.