8
1 ?Dai aten e, Yuda hkawhkam ni hte du salang ni a nrut nra ni, hkinjawng ni hte myihtoi ni a nrut nra ni hte Yerusalem hta shanu nga ai kaga tsasam masha ni a nrut nra ni mung shanhte a lup ni hta na shaw la kau hkrum na mara ai.
2 Sumpum da na hte lup kau na malai, shanhte a nrut nra ni gaw ga ntsa e namhpun zawn taw nga na mara ai. Shanhte gaw shanhte tsaw ra ai hte daw jau yu nna shanhte bawng ban jahkrup ai hte nawku yu sai ajan, shata hte shagan ni a man e lam da ai hkrum na mara ai.
3 Ngai shanhte hpe shaden kau dat ai shara ni hta e naw ngam nga ai ndai n hkru ai amyu masha ni gaw asak hkrung matut nga na hta si mat na hpe grau ra sharawng wa na mara ai. Chyahtum Chyalai N-gun rawng ai dai Madu ngai nan tsun ni ai.?
4 Dai Madu gaw shi a amyu masha ni hpe ning ngu tsun na matu tsun wu ai: ?Marai langai ngai kataw ai shaloi shi bai n rawt lu a ni? Marai langai ngai lam yit ai rai yang, shi bai nhtang wa ai n rai ni?
5 Dai re ai mi, nye a amyu masha ni e, nanhte gaw n nhtang wa ai sha, ngai kaw na hpa majaw tut nawng kayin mat wa nga myit ni? Nang gaw na a hpara sumla ni hpe myit noi ai hte ngai hpang de nhtang wa na matu ningdang nga ndai.
6 Ngai atsawm sha madat yu nngai, rai ti mung, nang gaw teng man ai ga n tsun ndai. Nanhte hta na langai mi mung na a n hkru ai amu a jaw e yawn nga ma ai n rai; nanhte hta na langai mi mung, ?Ngai hpa galaw shut ni ai kun?,? nga nna san myit dai n rai. Masha hkum shagu hte gaw majan pa de htim sa wa ai gumra zawn shi a lam hta ahkawm nga ai.
7 Mali tau u ni pyi bai pyen nhtang wa na aten hpe chye ma ai; hkrudu, pilan hte u kawp ni gaw htawt hkawm na aten hpe chye ma ai. Rai ti mung, nye a amyu masha ni e, ngai nang hpe up hkang ai tara ni hpe pyi nang n chye ndai.
8 Nang gaw hpaji rawng ai wa hte nye a tara lam ni hpe chye nga ndai ngu nna kaning rai tsun lu na rai ta? Yu u, tara lam ni gaw n ding n man ai laika ka sara ni a majaw shai mat nga sai.
9 Hpaji rawng ai na a masha ni gaw kaya kahpa hkrum ma ai; shanhte gaw kashuk kashak rai nna mahkam hkrum nga ma ai. Shanhte gaw nye a mungga hpe gang kau manu ai; shanhte hta ya kaning re ai hpaji rawng nga ma ni?
10 Dai re ai majaw, ngai gaw shanhte a yi hkauna ni hpe madu nnan ni a lata de jaw kau na we ai; shanhte a madu jan ni hpe mung kaga masha ni a lata de ap kau na we ai. Masha kaji kaba yawng hte gaw n ding n man ai hku gumhpraw tam shakut ma ai. Myihtoi ni hte hkinjawng ni pyi amyu masha ni hpe masu hkalem nga ma ai.
11 Masha yawng hte wa n hkam kaja nga yang, ?Yawng hkra hkam kaja ga ai,? nga nna shanhte tsun let nye a amyu masha ni a nma ni hpe mahkyit agret kau ai zawn chyu, shanhte nawn la ma ai. Ref 8:11: Eze 13:10.
12 Nye a amyu masha ni e, nang galaw ai matsat shabat amu ni a majaw, nang kaya nga n ni? N rai law, nang gaw dik hkra n chye kaya nga ndai; kaning rai kaya hkrum myi man sum rai na pyi, nang n chye nga ndai! Nang gaw kaga masha ni kataw ai zawn kataw mat na rai ndai; ngai nang hpe ari jaw ai shaloi dai gaw na a matu jahtum rai na ra ai. Dai Madu ngai nan tsun ni ai. Ref 8:10-12: Yer 6:12-15.
13 ?Masha gaw nsi naisi shu la ai zawn, ngai mung nye a amyu masha ni hpe shinggyin la na matu ra sharawng nga nngai; rai ti mung, shanhte gaw sabyi si n si ai sabyi ru, lakum si n si ai lakum hpun, de a alap ni pyi nyip mat ai hpun ni zawn rai ma ai. Dai majaw, ngai gaw dai mungdan hpe madu la kau ya na matu, tsasam ni hpe ahkang jaw kau ni ai.?
14 ?Anhte gaw hpa majaw atsin sha dung nga ga ta?,? nga nna Karai Kasang a masha wa san nga ai. ?Sa marit, anhte gaw bunghku kum ai mare ni de kagat sa nna, dai shara ni hta atsin sha sa si nga ga. Dai Madu anhte a Karai Kasang gaw anhte shi hpe shut kau ai yubak mara ni a majaw, anhte atsin sha si na matu jahten shaza kau nu ai hte anhte hpe gung ntsin lu shangun mi ai.
15 Anhte gaw ngwi pyaw sim sa lam hte shamai shatsai na aten hpe myit mada nga ga ai; rai ti mung dai gaw hpa akyu mi n nga sai; de a malai hkrit hpa lam dan pru wa nga sai.
16 Anhte a gumlau hpyen ni gaw Dan a mare hta nga nga masai; shanhte a gumra ladi sharat ai nsen ni hpe mung anhte na lu ga ai. Shanhte a gumra ni shabam dat ai shaloi, mung ting gari ganan nga ai. Anhte a gumlau hpyen ni gaw anhte a mungdan hte dai hta rawng ai arai nga manga ni hpe mung, anhte a mare hte dai hta shanu nga ai mare masha ni yawng hte hpe jahten kau na matu du shang wa masai.?
17 Dai Madu gaw, ?Yu u, Mandan hpaji hte n shangap lu ai atuk ja ai lapu pu htum ni, ngai nang hpang de shangun dat nga nngai, dai ni gaw nang hpe achye na mara ai,? ngu nna tsun ai.
18 Nye a yawn hkyen ai gaw shamai shatsai lu na n rai;
Ngai gaw myit masin hta machyi nga nngai.
19 Madat u! Nye a amyu masha ni a hkrap shabam
nga ai nsen hpe mungdan ting hta ngai na nngai.
Dai Madu gaw Ziun mare hta n nga sani?
Ziun a hkawhkam gaw dai yang e n nga sani?
Dai Madu shanhte a hkawhkam wa gaw,
?Na a hpara sumla ni hpe nawku ai hte
akyu n rawng ai na a maigan karai ni hpe gum dagup ai hku ngai hpe hpa majaw pawt sindawng shangun myit ta?,? ngu nna htang shana wu ai.
20 Amyu masha ni gaw,
?Ginhtawng ta htum sai, nmut ta mung lai sai,
rai ti mung anhte chyawm gaw hkye hkrang la n hkrum nga ga ai,? nga nna jahtau nga ma ai.
21 Nye a amyu masha ni agrawp mani mat ma ai majaw,
nye a myit masin mung agrawp mani mat ni ai;
Ngai yawn nga nngai; ngai gaw tsep kawp hkrit gari mak mat nngai.
22 Gilead mung e tsi mawan hpun ru hpa mung n nga nga a ni?
Dai mung hta tsi sara ni n nga ma ni?
Dai rai yang, nye a amyu masha ni hpa majaw shamai shatsai n hkrum nga ma ni?