6
Benyamin amyu masha ni e, Shim lum lam a matu kagat mu! Yerusalem kaw na lawt hkra hprawng mu! Tekoa mare hta pahtau dum mu, Bet Hahkerem e kumla madun ai wan madun ai shara galaw mu. Tsin-yam tsindam hte jahten shabyak ai gaw dingdung maga de nna du sa wa hkyen nga ai. Ziun mare gaw tsawm htap nga ai, rai ti mung hten za mat na ra ai; Hkawhkam ni gaw shanhte a hpyen luksuk ni hte rau dai yang e dabang but na mara ai. Shanhte gaw shanhte a sum ni hpe mare grup grup hkan gap na mara ai; shanhte langai hte langai gaw tinang ra sharawng ai gara shara hta mung dabang but na mara ai. Shanhte gaw, ?Yerusalem hpe gasat hkyen manu! Jin jin rai nga mu! Anhte shani chyingtung e gasat na ga ai!,? ngu nna tsun na mara ai. Rai ti mung shanhte gaw, ?Nau hpang hkrat mat sai, nhtoi gaw ganoi lai wa magang nga sai, shana maga de na shingnip ni galu nga ai. Anhte gaw shana e gasat na ga ai; anhte gaw mare a bunghku ni hpe jahten sharun kau na ga ai,? ngu nna tsun ma ai.
Chyahtum Chyalai N-gun rawng ai dai Madu gaw, ?Hpun ni hpe kran kau nna Yerusalem hpe wang tawn na matu kaduk ni galaw na dai hkawhkam ni hpe hkang da wu ai. Shi gaw, ?Ndai mare gaw dip gamyet sha ai lam hpring nga sai majaw ndai mare hpe ngai ari jaw na nngai. Hka htung gaw dai kaw na mu ai hka shapraw ya ai zawn, Yerusalem shi a n hkru ai amu hpe shapraw nga ai. Ngai gaw dai mare na kashun kashe du daw sai hkaw amu hte jahten shaza lam hpe na nngai; machyi makaw hte hkala nba lam yawng hpe mung ngai mu nngai. Yerusalem amyu masha ni e, ndai ru yak tsin-yam tsindam ni gaw nang hpe sadi jaw ai lam tai u ga, shing n rai jang, ngai nang hpe kau da na nngai; ngai gaw na a mare hpe kadai mung n nga ai zaibru jang shatai kau na we ai,? ngu nna tsun ai.
Chyahtum Chyalai N-gun rawng ai dai Madu gaw ngai hpe, ?Israela gaw sabyi si nlim gut ai zawn asan awan raw sharun kau hkrum na ra ai. Dai rai nna nang gaw aten naw nga nga yang, nang dang lu ai made masha shagu hpe hkye mawai la lu na rai ndai,? ngu nna tsun wu ai.
10 Ngai gaw, ?Ngai shanhte hpe ga shaga nna sadi jaw ai rai yang, nye a ga hpe kadai madat ya na rai ta? Shanhte gaw du ja ai hte na a mungga hpe n kam madat ma ai; nang ngai hpe tsun shangun ai lam hpe shanhte mani asawng kau ya nga ai. 11 Madu e, shanhte hpe hkru shangun ai na a myit kahtet ai gaw ngai hta mung hkru nga ai; ngai gaw dai hpe loi mi mung n sharang lu nga nngai,? ngu nna htan ni ai.
Dai hpang, dai Madu gaw ngai hpe, ?Nmaw lam ntsa hkan e nga ai ma kaji ni a ntsa e mung, zup hpawng nga ai shabrang ni a ntsa de mung, nye a myit kahtet ai hpe ru dat u. Madu wa ni hte madu jan ni gaw woi la hkrum nna aprat kaba u-gut gu sai ni pyi ngam tawn da hkrum na mara ai n rai. 12 Shanhte a nta ni hte hpawn yi hkauna ni hte madu jan ni gaw kaga masha ni a lata de du mat wa na mara ai. Ngai gaw ndai mungdan a amyu masha ni hpe ari jaw na we ai. 13 Masha kaji kaba yawng hte gaw n ding n man ai hku gumhpraw tam shakut nga ma ai; myihtoi ni hte hkinjawng ni pyi amyu masha ni hpe masu hkalem nga ma ai. 14 Masha yawng hte wa n hkam kaja nga yang, ?Yawng hkra hkam kaja nga ga ai,? nga nna shanhte tsun let, nye a amyu masha ni a nma ni gaw mahkyit agret kau ai zawn chyu sha rai nga ai ngu, shanhte myit nawn la ma ai. Ref 6:14: Ezk 13:10. 15 Shanhte galaw sai ndai matsat shabat amu ni a majaw shanhte kaya mat sani? N rai law, shanhte gaw dik hkra n chye kaya nga ma ai. Kaning rai kaya hkrum ai baw re pyi shanhte n chye ma ai. Dai rai nna, shanhte gaw kaga masha ni kataw ai zawn kataw mat na mara ai; ngai shanhte hpe ari jaw ai shaloi, dai gaw shanhte a matu jahtum rai na ra ai. Dai Madu ngai nan tsun ni ai,? nga nna tsun ai. Ref 6:12-15: Yer 8:10-12.
16 Dai Madu gaw shi a amyu masha ni hpe, ?Lam numshe hkan e tsap nga nna yu yu mu. Lam dingsa ni hte kaja htum ai lam hpe san mu; shing rai dai lam hta hkawm sa mu, shaloi nang gaw myit masin sim sa ai hte nga lu na rai ndai,? ngu nna tsun ni ai.
Rai ti mung, shanhte gaw, ?N rai law, anhte n hkan na ga ai!,? ngu nna tsun ma ai. 17 Dai hpang, dai Madu gaw pahtau hte sadi jaw ai nsen hpe madat na matu sin langa masha ni hpe lit jaw da nu ai. Rai ti mung shanhte gaw, ?Anhte n madat na ga ai,? ngu nna bai tsun ma ai.
18 Dai rai nna, dai Madu gaw, ?Amyu baw masha ni e, madat mu; nye a amyu masha ni hta hpa byin wa na ra ai lam hpe sharin la mu. 19 Ginding aga e, madat u! Shanhte gaw nye a sharin shaga ai ga ni hpe shinggan kau ya ai hte nye a matsun maroi mungga ni hpe n hkan ma ai majaw, shanhte a myit mang yaw shada ai lam yawng a matu ari, ndai amyu masha ni a ntsa e sharun shabyak ai tsin-yam tsindam shapraw dan na we ai. 20 Shanhte gaw nye a matu Sheba mung kaw nna la sa wa ai manam pyaw ai baw lawban hte sumtsan mung kaw nna la sa ai namji namya ni hpe hpa lam a majaw ngai sharawng awng na rai nga a ta? Ngai gaw shanhte a hkungga ni hpe hkap la na n rai, shanhte a shagu hkungga ni hta ra sharawng na nngai n rai. 21 Dai rai nna, ngai gaw ndai amyu masha ni hpe ahtu kataw shangun na nngai. Kanu kawa ni hte ma ni si na mara ai, manang ni hte htingbu ni mung dai zawn byin na mara ai,? ngu nna tsun ai.
22 Dai Madu gaw, ?Dingdung maga de nga ai mungdan kaw nna masha amyu ni du sa wa mara ai; shanhte gaw tsan ai shara kaw nna n-gun rawng ai amyu baw ni rai nna majan a matu hkyen da nga ma ai. 23 Shanhte gaw shanhte a ndan ni hte nhtu ni hpe lang da ma ai; gumshem nna matsan n chye dum ai ni rai ma ai. Shanhte gumra jawn sa wa ma ai shaloi, shanhte a nsen gaw panglai hka wu kadu ai zawn rai nga ai. Shanhte gaw Yerusalem hpe htim gasat na matu jin jin rai nga masai,? ngu nna tsun ai.
24 Yerusalem amyu masha ni gaw, ?Anhte dai shiga na saga ai; anhte a lata ni kya noi mat sai; anhte gaw shinggyim machyi hkrum ai numsha zawn ru yak kyindut hte nchyi nmu hkrum sha nga saga ai. 25 Anhte a gumlau hpyen ni laknak hpai ma ai, hkrit hpa kajawng kaja gaw anhte yawng hte hpe wang shinggrup da mi ai majaw, mare shinggan de mung anhte n gwi pru ga ai, nmaw lam hkan e mung n hkawm sa gwi nga saga ai,? ngu nna tsun ma ai.
26 Dai Madu gaw shi a amyu masha ni hpe, ?Lachyit nba bu hpun nna wan dap hta galwi nga mu; nang hpe jahten sharun na matu akajawng sha htim gasat sa wa ai a majaw, shadang sha shingtai si mat wa ai zawn, aja awa sharung shayawt nga mu. 27 Yeremia e, Hpri nhprang hpe ju nna nang jen yu ai zawn nye a amyu masha ni hpe mung chyam dinglik yu u, shanhte gaw hpa hte bung nga ma ai hpe sawk tam yu u. 28 Shanhte yawng hte gaw hpri hte magri mang ja ai zawn, du ja ai gumle gumlau ni rai ma ai. Shanhte yawng hte gaw n san n seng nga ai hte shiga htawn, shatan hkawm ai ni rai ma ai. 29 Wan htung gaw kang kahtet hkra hkru nga ti mung, nhprang hkyi ni gaw n byawng lu nga ai. N hkru ai masha ni hpe n tsan kau lu ai majaw nye a amyu masha ni hpe matut jen yu na matu akyu n rawng nga ai. 30 Dai Madu ngai nan shanhte hpe kau da ni ai majaw, shanhte gaw manu n dan ai nhprang hkyi ni ngu shamying hkrum na mara ai,? ngu nna tsun ai.