50
Ndai gaw Babelon mare hte de a mare masha ni hte seng nna dai Madu ngai hpe tsun ai mungga rai nga ai: Ref 50:1-51:64: Esa 13:1-14:23; 47:1-15.
?Masha amyu baw ni hpang de shiga tsun shana mu! Dai hpe htawn tsun mu!
Masat kumla sharawt mu, shiga ndau shana mu!
Dai lam hpe hkum ip da myit!
Babelon gaw hkrat sum mat sahka!
Shi a Marduk karai daw gamang mat sai!
Babelon a hpara sumla ni kaya kahpa hkrum masai;
shi a matsat shabat re ai gawkngu sumla ni agrawp ayai mat sai!
?Dingdung maga de nna amyu baw mi gaw Babelon mare hpe gasat na matu du sa na mara ai; dai mare hpe katsi katsang shara shatai kau na mara ai. Masha hte yam nga ni hprawng pru wa nna, dai shara hta kadai mung de nga na mara ai n rai.?
Dai Madu gaw, ?Dai aten du ai shaloi, Israela hte Yuda masha ni gaw hkrap ngu hkrap ngoi ai hte wa nna shanhte a Karai Kasang rai nga ai ngai hpe wa tam na mara ai. Shanhte gaw Ziun de sa wa ai lam hpe san na mara ai, dai shara de du sa wa na mara ai. Shanhte gaw ngai hte htani htana na ga shaka tawn da na mara ai, dai gaw galoi mung hten run mat na ra ai n rai.
?Nye a amyu masha ni gaw sagu rem ai ni shanhte a sagu ni hpe bum ga hkan dat shadam kau ai ni zawn rai nga masai. Sagu ni gaw shanhte a sagu lawng ni hpe malap kau nna bum shara mi kaw nna shara mi de kahkrang nga ma ai zawn, shanhte mung kahkrang jawt hkawm nga masai. Shanhte hpe mu ai ni yawng gaw shanhte hpe gasat kau nga ma ai. Shanhte a gumlau hpyen ni gaw, ?Shanhte gaw dai Madu hpe yubak galaw shut kau manu ai, dai rai nna anhte galaw kau ai amu gaw shut ai n rai. Shanhte a kaji kawa ni gaw dai Madu hpe kam hpa ma ai, shanhte hkum nan mung shi hta sadi dung nga ang ma ai,? ngu nna tsun ma ai.
?Israela amyu masha ni e, Babelon mung kaw nna hprawng mat wa mu! Dai mung kaw nna pru mat wa mu! Pru wa na shawng shajin mu! Ref 50:8: Shr 18:4. Ngai gaw dingdung maga nga ai n-gun ja ai masha amyu baw hpung mi hpe wa shadut shalut dat ai hte Babelon mung hpe gasat shangun na nngai. Shanhte gaw dai mung na majan pa hta tsap dingren nga ai hte dai mung hpe dang la kau na mara ai. Shanhte gaw shanhte shading da ai shara hpe n shut n shai hkra gap lu ai kung kyang jaugawng ni hte ndan gap ai masha ni rai ma ai. 10 Babelon mung gaw lanep tai mat na ra ai, dai mung na lanep hta ai ni mung shanhte ra ai arai yawng mayawng hpe hta la na mara ai. Dai Madu ngai nan tsun ni ai.
11 Dai Madu gaw, ?Babelon mung masha ni e, nang gaw nye a amyu hpe hpya sha kau nit dai; nanhte gaw mam kabye nga ai dumsu shing n rai shabam ai gumra zawn kabu gara ai hte kayin hkawm nga myit dai, 12 rai ti mung, na a galu kaba ai mare gaw shagrit kau ai hkrum nna jahpoi jahpyak hkrum na ra ai. Babelon mung gaw yawng hta kaji htum ai hte hka n rawng, hkun hkraw ai zaibru jang tai mat na ra ai. 13 Nye a pawt sindawng ai a majaw, kadai mung Babelon mung hta shanu nga lu na ra ai n rai; dai mung gaw katsi katsang hten run taw nga na ra ai; dai mung hku lai sa ai ni yawng gaw dai hpe mu nna mau kajawng ai hte kahpra mat na mara ai.
14 ?Ndan gap ai ni e, Babelon hpe gasat na matu dai mare hpe wang shinggrup nna tsap dingren nga mu. Dai mare gaw ngai hpe gumlau ai hte yubak galaw shut manu ai majaw nanhte a ndan pala mahkra hte Babelon hpe gap mu. 15 Mare grup yin yawng hkan e majan nsen sharawt mu! Ya chyawm gaw Babelon mung hkrat sum mat sai. Shi a mare bunghku ni daw agrawp mat nna run mat nu ai. Ngai gaw Babelon masha ni hpe matai dawp nga nngai majaw, nanhte mung matai dawp la mu, shanhte gaw kaga ni hpe di kau mu ai hte maren, shanhte hpe mung di mu. 16 Dai mung hta nli hkum gat myit; shinggyin la na matu nmut hkum shang myit. Dai mung hta shanu nga ai maigan masha shagu hte gaw majan gasat nga ai hpyen luksuk hpe hkrit na mara ai rai nna shanhte a buga de nhtang mat wa na mara ai,? ngu nna tsun ai.
17 Dai Madu gaw, ?Israela amyu masha ni gaw hkanghkyi ni e shachyut jahtaw kau dat ai sagu ni zawn rai ma ai. Shanhte gaw shawng nnan e Asuri hkawseng wa htim gasat ai hkrum ma ai; dai hpang Babelon Hkawhkam Nebuhkadneza gaw shanhte a nrut nra ni hpe makrut sha kau nu ai. 18 Dai lam a majaw, Chyahtum Chyalai N-gun rawng ai dai Madu Israela a Karai Kasang ngai gaw Asuri hkawseng wa hpe ari jaw sai zawn, Hkawhkam Nebuhkadneza hte shi a mungdan hpe ari jaw na nngai. 19 Ngai gaw Israela amyu masha ni hpe shanhte a mungdan de nhtang wa shangun na nngai; shanhte gaw Hkarmela bum ntsa hte Bashan ginwang hkan tu ai namlaw namlap lusha ni sha nna, Ehprim hte Gilead mungdaw hkan shanhte ra ai made tu ai nsi naisi ni sha lu na mara ai. 20 Dai nhtoi du jang, ngai ngam tawn da ai ndai amyu masha ni a mara ni hpe raw dat ya na nngai majaw, Israela amyu masha ni hta hpa yubak mung mu lu na ra ai n rai. Yuda ni hta mung n hkru n shawp ai amu hpa mung kap na ra ai n rai. Dai Madu ngai nan tsun ni ai,? ngu nna tsun ai.
21 Dai Madu gaw, ?Merahtam hte Pekod masha ni hpe gasat mu. Shanhte hpe sat shamyit kau mu. Ngai hkang da mada hte maren galaw mu; dai Madu ngai nan tsun ni ai. 22 Dai mungdan hta majan gasat ai nsen hte jahten sharun ai nsen kaba hpe na lu nga ai. 23 Babelon gaw mungkan ga ting hpe adup mani kau nu ai; ya chyawm gaw, dai sumdu agrawp mat nu hka! Masha amyu baw ni yawng hte gaw dai mungdan hta byin ai lam a majaw mau kajawng nga ma ai. 24 Babelon e, nang gaw ngai hpe gasat gumlang nit dai; na a matu ngai hkam da ai mahkam hta lu nit dai, rai ti mung, dai amu hpe nang chye ai n rai. 25 Chyahtum Chyalai N-gun rawng ai Tsaw Htum ai Madu ngai gaw Babelon mung hta galaw ra ai amu nga ai majaw, nye a laknak dum ni hpe ngai hpaw nna shanhte hpe ngai gau shapraw kau ni ai. 26 Dai mung hpe lamu ga man shara shagu de na gasat mu; dai mung na mam dum ni hpe adawt hpaw mu! Mam sumpum zawn lanep ni hpe magawn sumpum da mu! Mungdan hpe jahten sharun kau mu! Arung arai hpa mung hkum ngam da myit! 27 Shanhte a hpyenla yawng hpe sat kau mu! Shanhte hpe sat sharu kau mu! Babelon masha ni gaw tara daw dan ai hkrum nga manu ai! Shanhte hpe ari jaw na aten du nga sai!,? ngu nna tsun ai.
28 (Babelon mung kaw na hprawng lawt wa ai tsin-yam hkrum sha ai masha ni gaw Yerusalem de du wa nna, dai Madu anhte a Karai Kasang gaw shi a Nawku Htingnu hpe Babelon masha ni shaza kau mu ai majaw, kaning rai matai dawp nga ai lam, shanhte tsun ma ai.)
29 ?Babelon mung hpe gasat na matu, ndan gap ai ni hpe tsun mu. Ndan chye lang, pala chye gap ai masha shagu hpe shangun dat mu. Dai mare kata na masha langai mi mung n hprawng lawt lu hkra, wang shinggrup da mu. Ndai masha ni gaw Israela a Chyoi Pra ai Wa ngu ai ngai hpe gumrawng gumtawng ai arawn alai shapraw dan manu ai majaw shanhte galaw ai hte maren bai tai mu, kaga masha ni hpe shanhte pagawn para di mu ai hte maren shanhte hpe mung di mu. Ref 50:29: Shr 18:6. 30 Dai lam ni a majaw, dai mung na shabrang ni gaw mare nmaw lam hkan e sat kau hkrum na mara ai; dai mung na hpyenla ni gaw dai shani e, jahten shaza ai hkrum na mara ai. Dai Madu ngai nan tsun ni ai.
31 ?Babelon e, nang gaw gumrawng gumtawng ai myit hte hpring nga ndai majaw, Chyahtum Chyalai N-gun rawng ai Tsaw Htum ai dai Madu ngai nan nang hpe hkap daw na nngai! Nye a matu nang hpe ari jaw na aten gaw du nga sai. 32 Na a myit tsaw myit dap ai amyu gaw ahtu kataw na ra ai; nang hpe sharawt la na matu kadai mung karum la na ra ai n rai. Ngai gaw na a mare ni hpe nat kau ya na nngai; grup yin hkan nga ai arai yawng mayawng mung hten za mat na ra ai,? nga ai.
33 Chyahtum Chyalai N-gun rawng ai dai Madu gaw, ?Israela hte Yuda amyu masha ni gaw dip gamyet sha hkrum nga ma ai hte zingri zingrat hkrum nga masai. Shanhte hpe rim tawn da ai ni yawng gaw shanhte hpe ni htum ai hku sin tawn nga ma ai hte shanhte hpe wa shangun ma ai n rai. 34 Rai ti mung, shanhte hpe hkye mawai la ai wa gaw n-gun rawng nga ai wa rai nna, shi a amying gaw Chyahtum Chyalai N-gun Rawng ai dai Madu rai nga ai. Shi hkum nan shanhte a amu hpe lit la nna, mungkan ga de ngwi pyaw sim sa lam jaw ya na ra ai, rai ti mung, Babelon masha ni hpang de gaw ru yak tsin-yam tsindam rai na ra ai,? ngu nna tsun ai.
35 Dai Madu gaw,
?Babelon mung gaw si hkrung si htan!
dai mung na masha ni, de a mung du ni,
hpaji byeng-ya rawng ai masha ni si hkrung si htan hkrai!
36 Dai mung na masu nga ai myihtoi ni si hkrung si htan-
shanhte gaw kade wa angawk nga ma hka!
Dai mung na hpyenla ni si hkrung si htan-
shanhte gaw kade sha hkrit gari nga ma hka!
37 Dai mung na gumra ni hte hpyen leng ni hpe jahten mu!
Dai mung na saw shaga da hkrum ai hpyenla ni si hkrung si htan-
shanhte gaw kade sha n-gun kya nga ma hka!
Dai mung na sut gan ni hpe jahten mu;
hpya lu hpya sha nna lanep hta la mu.
38 Dai mung a ntsa e jan gri ai hte
dai mung na hka nu ni hkun hkraw mat na ra ai.
Babelon mung gaw hkrit hpa hpara sumla ni nga ai mung re,
dai gaw mung masha ni hpe angawk angak di kau nga ai.
39 Dai rai nna, Babelon mung gaw nat matse ni, n seng ai nat ni hte u matse ni de nga ai shara tai mat na ra ai. Dai shara hta masha amyu ni galoi mung bai shanu nga na mara ai n rai, kadai mung prat mi hte prat mi shanu nga na mara ai n rai Ref 50:39: Shr 18:2. 40 Sodom hte Gomora, de a makau grup yin hkan na mare ni hpe ngai shamyit kau ai zawn, Babelon mung hta mung byin wa na ra ai. Kadai mung dai shara hta bai shanu nga na mara ai n rai. Dai Madu ngai nan tsun ni ai.
41 ?Dingdung maga de nga ai mungdan langai mi kaw na masha ni du sa wa ra ai,
tsan ai shara na chyalai n-gun rawng ai masha amyu baw langai rai nga ai;
hkawhkam law law ni gaw majan a matu shachyip nga ma ai.
42 Shanhte gaw shanhte a ndan ni hte nhtu ni hpe shaw da manu ai;
shanhte gaw gumshem ai hte matsan n chye dum ma ai.
Shanhte gumra ni jawn sa wa ma yang,
dai nsen gaw panglai hka wu kadu ai zawn rai nga ai.
Shanhte gaw Babelon hpe gasat na jin jin rai nga masai.
43 Babelon hkawhkam gaw shiga na nga ai,
shi a lata ni kya noi mat nu ai.
Shi gaw makyin madut hte wang da hkrum nna,
shinggyim machyi ai num zawn nchyi nmu ngu nga wu ai.
44 ?Hkanghkyi gaw htat ai maling kata kaw na gumlawt pru wa ai zawn, Yawdan hka mayan kaw nna lahta de tsit lali ai udat shara du hkra dai Madu ngai nan du hkawm nna, Babelon masha ni hpe shanhte a mare kaw nna akajawng sha hprawng pru shangun na nngai. Dai hpang, ngai san da ai ningbaw wa gaw dai amyu baw hpe up hkang na ra ai. Ngai hpe kadai hte shabung lu nga a ta? Ngai hpe kadai wa dakat lu na rai ta? Ngai hpe kaning re ai ningbaw wa ninghkap lu yu a ni? 45 Dai rai nna, Babelon mare hpe ngai htim na matu hpaji jaw ai lam hte de a amyu masha ni hpe ngai galaw na matu shatawng shada ai lam hpe madat mu. Shanhte a kashu kasha ni pyi dun garawt kau ai hkrum nna masha shagu hte gaw hkrit kajawng na mara ai. 46 Babelon hkrat sum mat ai shaloi, dai hkrat sum ai nsen gaw mungkan ga ting hpe ashun awam na ra ai, dai hkrit kajawng shangun ai shabam ai nsen hpe kaga amyu baw ni na lu na mara ai.?