49
1 Ndai gaw Amon masha ni hte seng nna tsun ai dai Madu a mungga rai nga ai: ?Israela lasha ni kanang rai nga ma ta? Shanhte a mungdan hpe makawp maga na lasha kadai mung n nga sani? Shanhte gaw Molek hpara hpe nawku ai masha ni, Gad a mungdaw hpe hpa majaw madu la ai hte dai shara hta de nga ma ni? Ref 49:1-6: Eze 21:28-32; 25:1-7; Amo 1:13-15; Zep 2:8-11.
2 Rai ti mung, dai Raba mare daju na mare masha ni hpe majan gasat ai nsen ngai na shangun ai aten du wa na ra ai; dai mare gaw hten run taw mat nhtawm de a kahtawng ningchyawng ni hkru sumpum taw nga na mara ai. Dai shaloi Israela masha ni gaw shanhte a lata kaw na tat kau dat ai dai mungdan hpe bai madu la lu na mara ai.
3 Heshbon mare masha ni e, marawn jahtau nga mu! Ai mare gaw hten za mat sai! Raba shayi sha ni e, sharung shayawt nga mu! Lachyit nba bu hpun nna sharung shayawt nga mu! Waw de kagat, le de kagat rai kagat kahkrang hkawm nga mu. Nanhte a Molek hpara gaw shi a hkinjawng ni hte hkawhkam shadang sha ni hte rau bawng rim mat wa hkrum na mara ai.
4 Sadi sahka myit n rawng ai masha ni hpa majaw gumrawng nga myit ta? Na a n-gun gaw yawm nga lit dai. Kadai mung nang hpe n sa htim gasat gwi ai nga tsun let, na a daru magam n-gun hta hpa majaw kamhpa nga n ta?
5 Ngai gaw nang hpe grup yin man shagu kaw na hkrit kajawng shangun na nngai. Nanhte yawng hprawng mat na rai myit dai. Langai hte langai gaw tinang a asak lawt daw, hprawng na mara ai. Dai shara hta nanhte a hpyenla ni hpe bai shaga shinggyin ai wa kadai mung nga na ra ai n rai.
6 ?Rai ti mung, kade n na yang, ngai gaw Amon hpe bai ngamu ngamai shangun na nngai. Dai Madu ngai nan tsun ni ai.?
7 Ndai gaw Chyahtum Chyalai N-gun rawng ai dai Madu, Edom mung hte seng nna tsun da ai mungga rai nga ai: ?Edom masha ni hta shanhte a mai kaja ai tara daw dan ai lam n nga mat sani? Shanhte hpe hpaji jaw ai ni shanhte hpe kaning re ai amu galaw na loi mi pyi hpaji n lu jaw manu ni? Shanhte a hpaji yawng hkoi mat manu ni? Ref 49:7-22: Esa 34:5-17; 63:1-6; Eze 25:12-14; 35:1-15; Amo 1:11-12; Oba 1-14; Mal 1:2-5.
8 Dedan masha ni e, kayin mat wa nna hprawng mu! Makoi gyem nga mu! Esaw a aru arat ni hpe ari jaw na aten du sai majaw, ngai gaw shanhte hpe jahten kau na nngai.
9 Lasha ni sabyi si di ai shaloi, shanhte gaw sabyi ru ni hta nlim ngam da ya ma ai, Damya ni shana e shang mya ai shaloi, shanhte ra ai made hpe sha mya la chye nga ma ai.
10 Rai ti mung, ngai gaw Esaw a aru arat ni hpe atsai awai singgu krin di kau nngai; shanhte a shim ai shara ni hpe mung hpaw malang da ya na nngai, shanhte gaw loi mi pyi n lu makoi lu ma ai. Edom masha ni yawng jahten shaza kau hkrum nga masai. Shanhte kaw na langai wa mi mung ngam nga lu na ra ai n rai.
11 Na a jahkrai nmai ni hpe ngai hte tawn da u, shaloi ngai gaw shanhte hpe lanu lahku la na nngai. Na a gaida gaina ni ngai hta shamyet shanat lu nga ma ai.
12 ?Ari hkrum sha na n ging ai masha ni pyi, dai ari gawm hpe lu nga ma ai rai yang, nang gaw ari kaw nna lawt lu na re ngu, myit nawn da wu ni? N rai law, nang gaw dai gawm kaw na lu lu na rai ndai!
13 Bozra mare gaw yu hkrit hpa shara hte shingran sharat katsi ai shara tai mat na ra ai; masha ni gaw dai mare hpe ashu kau nna, dai mare a mying hpe dagam dala ga zawn tsun na mara ai. Dai mare hte ni nawn ai kahtawng ni yawng mung htani htana shaza kau hkrum na mara ai, ngu nna ngai hkum nan dagam da se ai. Dai Madu ngai nan tsun ni ai.?
14 Ngai gaw, ?Edom e, ngai gaw dai Madu kaw na mungga lu la ni ai. Shi gaw kasa langai mi hpe masha amyu baw ni shanhte a hpyen luksuk ni hpe zup hpawng da na matu mung, nang hpe gasat na jin jin galaw da na matu mung sa tsun shangun nu ai.
15 Dai Madu gaw nang hpe n-gun shayawm kau ya ai hte kadai mung nang hpe hkungga lara di na ma ai n rai.
16 Na a gumrawng gumtawng ai myit gaw nang hpe hkalem kau nit dai. Nang myit nawn ai daram, kadai mung nang hpe n hkrit nga masai. Nang gaw lunghkrung ninggam ni hte tsaw ai bum pungding hkan e shanu machyu nga nna, galang zawn tsaw ai shara hta machyu nga ti mung, dai Madu gaw nang hpe shayu kau na ra ai. Dai Madu ngai nan tsun ni ai,? nga nna tsun wu ai.
17 Dai Madu gaw, ?Edom mung a ntsa e byin wa na jahten sharun ai gaw grai yu hkrit hpa shara tai nga ai majaw, dai lam hku lai sa ai marai hkum shagu hte gaw mau kajawng ai hte hkrit gari mat na mara ai.
18 Sodom yan Gomora hte grup yin na mare ni yawng hten run mat nna dai mare ni hta kadai mung bai n de nga ai zawn, Edom mung hta mung byin wa na ra ai. Dai Madu ngai nan tsun ni ai. Ref 49:18: Nin 19:24-25.
19 Hkanghkyi gaw htat ai maling kaw na gumtawng pru wa ai zawn, Yawdan hka mayan kaw nna tsit lali ai udat shara du hkra, ngai sa du nhtawm Edom masha ni hpe shanhte a mungdan kaw nna akajawng sha hprawng shangun na nngai. Shaloi ngai san da ai ningbaw wa gaw dai mung hpe up na ra ai. Ngai hte shabung lu ai wa kadai nga nga a ta? Kadai wa ngai hpe dakat lu nga a ni? Kaning re ai up hkang du wa gaw ngai hpe ninghkap shadang lu nga a ni?
20 Dai rai nna, Edom masha ni a ntsa e ngai hpaji daw ai lam hte Teman mare masha ni a ntsa e, ngai galaw na maw mawn ai lam ni hpe madat mu. Dai mung na shanhte a kashu kasha ni gaw dun garawt kau ai pyi hkrum na mara ai; masha shagu hkrit kahpra na mara ai.
21 Edom mung hkrat sum mat ai shaloi, dai mung na hkrat sum mat ai nsen gaw mungkan ga ting hpe ashun awam nga nna, dai hkrit kajawng shangun ai shabam nsen hpe Nawng Hkyeng du hkra na na mara ai.
22 Galang gaw shi a singkaw ni hpe shachyen nna ntsa kaw nna htim yu wa ai zawn, hpyen wa gaw Bozra mare hpe htim gasat na ra ai. Dai shani e, Edom a share shagan hpyenla ni gaw shinggyim machyi hkrum ai num zawn hkrit gari na mara ai,? ngu nna tsun wu ai.
23 Ndai gaw Damasku hte seng nna dai Madu tsun da ai mungga rai nga ai: ?Hamat hte Arpad mare ni hta shanu nga ai masha ni gaw n kaja ai shiga na ma ai majaw, myit ru myit yak ai hte ru yak jamjau hkrum nga ma ai. Shanhte a myit tsang lam gaw shanhte a ntsa e panglai hka zawn ka-up da nga ai majaw shanhte asim sha n nga lu ma ai. Ref 49:23-27: Esa 17:1-3; Amo 1:3-5; Zeh 9:1.
24 Damasku masha ni gaw n-gun yawm nga ma ai; shanhte gaw hkrit gari ai hte hprawng mat masai. Shanhte gaw shinggyim machyi hkrum ai numsha zawn kawa machyi ai hte nchyi nmu hkrum sha nga ma ai.
25 Kabu gara shangun nna dan hkung yu sai mare gaw tsep kawp shingran katsi mat sahka!
26 Dai shani e, shabrang ni gaw mare lam nmaw ni hta sat kau hkrum na mara ai; shi a hpyen luksuk ni gaw jahten shaza kau hkrum na mara ai.
27 Ngai gaw Damasku mare bunghku ni hpe wan nat nna, dai gaw Hkawhkam Benhadad a htingnu du hkra hkru mat na ra ai. Chyahtum Chyalai N-gun rawng ai dai Madu ngai nan tsun ni ai.?
28 Ndai gaw Babelon Hkawhkam Nebuhkadneza gasat dang kau sai shara ni rai nhtawm dai hkan nga ai Kedara amyu bawsang ni hte Hazora wa up hkang ai ginwang ni hte seng nna dai Madu tsun da ai mungga rai nga ai: ?Kedara masha ni hpe gasat nna sinpraw maga de nga ai masha amyu bawsang ni hpe jahten kau mu!
29 Shanhte a ginsum janghpang hte sagu yam nga hpung ni, shanhte a ginsum nba grang ni hte ginsum kata hta rawng ai arai yawng mayawng ni hpe madu la kau ya mu. Shanhte madu da ai gawla-uk ni hpe la kau ya nna, dai masha ni hpe, ?Hkrit hpa shoihpa shoirang gaw nanhte yawng hpe wang shinggrup da sai!,? ngu nna tsun mu.
30 ?Hazora mung masha ni e, Babelon Hkawhkam Nebuhkadneza gaw nanhte hpe gumlau na hpaji daw maw mawn nu ai majaw, tsan tsan de hprawng makoi na matu dai Madu ngai nan nanhte hpe shadum nga nngai. Ndai gaw shi tsun ai ga rai nga ai,
31 ?Sa marit! Myit sim myit sa hte shim nga ai ndai masha ni hte mare chyinghka ni mung, mare htinggrang ni mung, makawp maga lam hpa mung n nga ai shanhte a mare ni hpe anhte gasat ga,? ngu nna tsun wu ai.
32 ?Shanhte a gawla-uk ni hte yam nga hpung ni yawng hpe madu la kau mu! Kara kadun rep ai dai masha ni hpe shara shagu de ngai shabra kau nna shara shagu hkan na tsin-yam tsindam shanhte a ntsa e ngai shapraw na we ai.
33 Hazora mung gaw htani htana shingran sharat katsi ai shara tai mat nna, nam gwi ni chyu sha dai shara ni hkan machyu nga na mara ai. Kadi mung dai shara hta bai nga nga na mara ai n rai. Dai Madu ngai nan tsun ni ai.?
34 Yuda Hkawhkam Zedekia hkaw dung ai kade n na ai hpang, Chyahtum Chyalai N-gun rawng ai dai Madu gaw Elam mung hte seng nna ngai hpe tsun ai.
35 Shi gaw, ?Elam hpe n-gun atsam shaja ya ai ndan gap masha ni hpe ngai sat kau na we ai.
36 Ngai gaw shara shagu hkan na nbung ni hte Elam hpe ahpawt kau shangun na we ai, tsin-yam hkrum sha ai masha ni n du hkawm ai mungdan mi n nga ai aten du hkra, dai mung masha ni hpe shara shagu hkan shabra kau na we ai.
37 Shanhte hpe sat kau na matu asak gyam ai shanhte a gumlau hpyen ni hpe hkrit shangun na we ai. Nye a sindawng kahtet ai hta, ngai gaw Elam mung masha ni hpe shamyit kau na nngai, shing rai ngai gaw shanhte hpe gasat shamyit kau ngut ai aten du hkra, shanhte hpang de hpyen luksuk ni hpe shangun dat na nngai.
38 Shanhte a hkawhkam ni hte ningbaw ni, hpe ngai shamyit kau nna, dai shara hta nye a tingnyang hpe shadun na nngai.
39 Rai ti mung, hpang e, ngai gaw Elam mung masha ni hpe bai ngamu ngamai shangun na nngai. Dai Madu ngai nan tsun ni ai.?