48
1 Ndai gaw Moba hpe lakap nna Chyahtum Chyalai N-gun rawng ai dai Madu tsun ai mungga rai nga ai:
Nebo a masha ni matsan dum hpa rai sai-
shanhte a mare hten za mat sai!
Kiriahtim gaw sum mat sai,
de a chyalai n-gun rawng ai hpyen dap gaw hpya hkrum nga sai,
de a mare masha ni kaya kahpa hkrum nga masai; Ref 48:1-47: Esa 15:1-16:14; 25:10-12; Eze 25:8-11; Amo 2:1-3; Zep 2:8-11.
2 Moba a hkik hkam ai gaw n nga mat sai.
Gumlau hpyen gaw Heshbon hpe wang tawn da nhtawm
Moba masha ni hpe shamyit kau na maw mawn nga ma ai.
Madmen mare gaw shingran katsi mat nna,
hpyen luksuk ni dai mare hpe lung gasat na mara ai.
3 Horonaim masha ni gaw,
?Kashun Kashe du daw sai hkaw law! Jahten shabyak lam law!,? nga nna marawn jahtau ma ai.
4 ?Moba gaw jahten shabyak kau hkrum nu ai;
ma kaji ni hkrap nga ai nsen hpe madat mu.
5 Luhit mare de lung wa ai lam dingyang hta,
shanhte a hkrap agru ai nsen hte
Horonaim de yu wa ai hkrun lam hta
myit ru myit yak ai a hkrap agru ai nsen hpe na lu nga ai.
6 Shanhte gaw, ?Nanhte asak lawt na matu tin tin hprawng mu,
nam ga na lawze zawn kagat hprawng mu!,? ngu nna tsun ma ai.
7 ?Moba e, nang gaw na a n-gun hte sut gan hpe kam hpa nga ndai,
rai ti mung, ya chyawm gaw nang hkrat sum mat nit dai;
na a Hkemosha hpara mung shi a hkawhkam shadang sha ni hte
hkinjawng ni hte hpawn bawng rim la hkrum na mara ai.
8 Mare langai mi mung jahten sharun ai kaw na lawt lu na n rai;
kadit hte layang ni mung hten run mat na mara ai.
Dai Madu ngai nan tsun ni ai.
9 Moba a matu lup shadaw masat langai jung da mu;
dai mung kade n na yang, hten run mat na ra ai.
De a kahtawng ni hten run taw mat nna,
kadai mung dai yang e bai nga na mara ai n rai,? nga nna tsun ai.
10 (Dai Madu a amu hpe myit masin mahkra hte n galaw ai wa hpe dagam kau u! Nhtu hte masha n sat hkraw ai wa gaw dagam dala hkrum u ga!)
11 Dai Madu gaw, ?Moba gaw tut nawng shim nga lu nna galoi mung maigan mung de bawng dung hkrum yu nga ai n rai. Moba mung gaw shara mi hta asim sha jen bang da ai sabyi ntsin zawn rai nna, namtau langai mi kaw nna langai mi de galoi mung n htawt ru bang ra nga ai. Shi a mu bat gaw galoi mung n hten n mat ai hte shi a namchyim mung mi na hte maren kaja nga ai.
12 ?Dai rai nna ya chyawm gaw, ngai gaw ru jaw kau ai sabyi ntsin zawn Moba mung de masha shangun dat ai aten gaw du wa nga sai. Shanhte gaw sabyi ntsin namtau ni hpe asan sha ru kau nhtawm, dai ni hpe agrawp jahten kau na mara ai.
13 Dai hpang, Israela amyu masha ni gaw shanhte kam hpa nga ai Behtela hpara hta kaya dum ma ai zawn, Moba masha ni mung shanhte a Hkemosha hpara a majaw kaya dum na mara ai.
14 ?Moba lasha ni e, nanhte gaw share shagan ai ni,
majan hta chyam hkrum ai magrau grang ai hpyenla ni rai ga ai ngu kaning rai tsun lu na rai ta?
15 Moba mung hte de a mare ni gaw hten run mat sai;
dai mung na ram dik ai shabrang ma ni htau sat kau hkrum masai.
Ngai gaw Chyahtum Chyalai N-gun rawng ai dai Madu ngu ai hkawhkam wa rai nga nngai,
Ngai tsun ni ai.
16 Moba a jeyang daw dan ai aten gaw ni wa nga ai;
de a hten run ai gaw kade n na yang du wa nga sai.
17 ?Shi a makau grup yin e nga nna, shi a mying dan hkung ai hpe
chye ai ni nanhte yawng gaw, dai masha amyu baw a matu sharung shayawt nga mu.
?Dai mung a daru magam n-gun hte hpring ai up hkang lam gaw
daw agrawp mat nga sai; de a arawng sadang hte chyalai n-gun gaw galoi mung dawng pru lu na sai n rai,? nga nna tsun ai.
18 Dibon shara hta shanu nga ai nanhte gaw,
nanhte a arawng sadang shara kaw na hkrat nhtawm
ga ntsa na ga nhpu hta e dung nga mu;
Moba hpe jahten sharun ai wa gaw ndai shara hta nga nga nna;
shi a hpyen dap ni hpe sharun jahten kau na wu ai.
19 Aroera mare hta shanu ai ni e,
nanhte gaw lam makau e la tsap nga nna;
hprawng kagat mat wa ai ni hpe san yu nna
shanhte hta hpa byin sai lam hpe sawk sagawn mu.
20 Shanhte gaw, ?Moba gaw hkrat mat sai,
shi a matu hkrap mu; dai gaw jahpoi jahpyak hkrum nga sai.
Moba jahten sharun hkrum sai lam hpe
Arnon hka nu mayan hku tsun shana ya mu!,? ngu nna htan na mara ai.
21 ?Bum kawng layang ga na mare ni rai nga ai Holon, Yaza, Mahpat,
22 Dibon, Nebo, Bet Diblahtim,
23 Kiriahtim, Betgamula, Betmeon,
24 Keriot hte Bozra ni a ntsa e tara jeyang ai gaw du ra ai. Ni ai tsan ai Moba mare ni mahkra a ntsa e mung tara jeyang ai gaw du sai.
25 Moba a chyalai n-gun gaw agrawp ayai mat nna, shi a daru magam n-gun mung shamyit kau hkrum nga sai. Dai Madu ngai nan tsun ni ai,? ngu nna tsun we ai.
26 Dai Madu gaw, ?Moba gaw ngai hpe gumlau ai majaw, shi hpe chyaru nang kau shangun mu. Moba gaw shi a nhpat hta galwi la na ra ai, masha ni gaw shi hpe mani asawng kau na mara ai.
27 Moba e, nang gaw Israela amyu masha ni hpe kaning rai ashu kau nit ta? Dai hpe dum nga u. Shanhte gaw mya lu mya sha ai damya hpung mi a lata hta rim hkrum ma ai zawn nang shanhte hpe di kau nit dai.
28 ?Moba mung hta shanu nga ai masha ni e, nanhte a nga shara mare ni hpe kau da nhtawm n-gam hkan e sa nga masu. Krung sinwa n-gam mahka hkan e tsip tsip ai hkrudu ni zawn tai nga mu.
29 Moba gaw grai gumrawng gumtawng nga a hka! Moba amyu masha ni kade daram gumrawng gumtawng ai, myit kaba ai hte myit tsaw myit dap nga ai hpe mung, shanhte kade daram myit kung nga ma ai hpe mung, ngai na ni ai.
30 Shanhte a myit tsaw myit dap ai hpe dai Madu ngai nan chye nga nngai. Shanhte a grang dakat ai gaw hpa mung n shabyin lu nga ai; shanhte galaw ai amu ni mung grin nga na ra ai n rai.
31 Ngai gaw Moba mung hta shanu nga ai masha shagu a matu mung, Kira Here masha ni a matu mung hkrap nga na nngai.
32 Ngai gaw Sibma masha ni a matu hte dai hta grau nna Yazera masha ni a matu mung, marawn hkrap na nngai. Sibma mare e, nang gaw Jum Nawng lai di nna, Yazera de du hkra hkrawn sa wa ai sabyi lakung ni zawn rai nga ndai. Rai ti mung, ya chyawm gaw, na a mangai nsi naisi ni hte na a sabyi si ni gaw jahten sharun kau ai hkrum nga sai.
33 Ga sau kaja ai Moba mung kaw na dai kabu gara ai hte kabu pyaw hpa lam hkoi mat sai. Sabyi htumbyen kaw na sabyi ntsin n lwi pru na matu mung, ngai galaw kau ni ai. Sabyi ntsin galaw shapraw ai mung kadai n nga sai majaw kadai mung n kabu lu nga masai.
34 ?Heshbon masha ni hte Eleale masha ni marawn jahtau ai shanhte a nsen hpe Yahaza du hkra na lu nga ai; dai nsen hpe Zoara mare hta nga ai masha ni mung na lu ma ai; Horonaim hte Eglat Shelishiya du hkra mung na lu nga ai; Nimrim hka shi pyi hkyet mat sai.
35 Shanhte nawku ai shara ni hta wan nat hkungga nawng jau nna, hpara ni hpe shagu hkungga nawng jau ya nga ai Moba amyu masha ni hpe ngai jahtum kau na we ai. Dai Madu ngai nan tsun ni ai.
36 ?Dai rai nna, shanhte madu da ai sut gan ni htum mat ai majaw, marai langai ngai makoi mayang mahkawn hpe dum shapyaw dat ai zawn, nye a myit masin mung Moba hte Kira Here masha ni a matu sharung shayawt nga nngai.
37 Shanhte yawng gaw kara shangun kau ma ai; shanhte a nhka mun ni hpe mung shangun ma ai. Shanhte yawng gaw shanhte a lata ni hpe jahpye kau nhtawm marai hkum shagu lachyit nba hpun ma ai.
38 Kadai mung n ra mat sai di bu hpe shaga kau ai zawn, ngai gaw Moba mung hpe ga kau ni ai majaw, Moba mung na nta ntsa shagu e mung, shawa mare lam ni yawng hta mung, kaga lam hpa mung n nga ai sha, sharung shayawt nga ma ai.
39 Moba gaw agrawp mat sahka! Marawn jahtau mu! Moba gaw kaya kahpa hkrum nu ai! Dai mung gaw hten run mat sai majaw grup yin e nga ai masha amyu baw ni shi hpe asawng asang rai ashu nga ma ai. Dai Madu ngai nan tsun ni ai.?
40 Galang gaw shi a singkaw shachyen da let ntsa kaw na htim ai zawn masha amyu baw mi gaw Moba mung hpe htim gasat ai hte,
41 mare ni hte hpyen dap ni zing la hkrum na ra ai nga nna dai Madu ga sadi tawn da nu ai. Dai shani e, Moba hpyenla ni gaw shinggyim machyi hkrum ai num zawn hkrit kajawng mat na mara ai.
42 Moba mung gaw ngai hpe gumlau nga ai majaw, dai mungdan gaw jahten sharun kau hkrum ai hte galoi mung amyu hku tai na ra ai n rai.
43 Hkrit kajawng lam, nhkun ni hte mahkam ni gaw Moba masha ni hpe la dingda nga ma ai. Dai Madu ngai nan tsun ni ai.
44 Hkrit kajawng lam kaw na hprawng lawt na matu shakut ai wa kadai mung nhkun ni de di hkrat bang na ra ai, nhkun kata kaw na mahkyit lung wa ai ni kadai mung mahkam ni hta lu na mara ai, hpa majaw nga yang, dai Madu gaw Moba a hten run mat na aten ladaw hpe masat da ya nu ai.
45 Matsan mayan tsin-yam tsindam hkrum ai ni gaw Heshbon shara ngu ai lang mi Hkawhkam Sihon up hkang lai wa sai rai tim, wan hkru mat sai mare hta shingbyi shara tam shakut ma ai. Dai wan gaw majan shawng lam hte Moba mung na majan asai marit ai Moba masha ni a tsaw ai bum ni kaw du hkra hkru kau nga ai.
46 Moba masha ni gaw matsan dum hpa shara rai nga sahka! Hkemosha hpara hpe nawku ai masha ni shamyit kau hkrum sai, shanhte a shayi shadang sha ni hte shayi sha ni mung bawng rim hkrum mat wa nga masai.
47 Rai ti mung, du na ra ai aten hta, dai Madu gaw Moba hpe kalang mi bai ngamu ngamai shangun na ra ai. Dai Madu tsun ai ndai lam yawng mayawng gaw Moba mung hta byin wa na ra ai.