39
1 Yuda Hkawhkam Zedekia hkaw dung ai jahku ning e shata shi hta e, Babelon Hkawhkam Nebuhkadneza gaw shi a hpyen luksuk kaba mahkra hte Yerusalem hpe htim gasat wu ai.
2 Hkawhkam Zedekia hkaw dung ai shi langai ning a shata mali nhtoi jahku ya shani e, mare bunghku ni adawt agrawp kau hkrum nga sai.
3 (Yerusalem hkrat sum mat ai shaloi, Babelon hkawhkam wa a lahta tsang du salang ni yawng hte gaw Ka-ang Chyinghka lam e shara sa la da ma ai; dai ni hta Nergala Shareze, Samgara Nebo, Sashehkim, Nergala Shareze (kaga langai mi), ni lawm nga ma ai.)
4 Hkawhkam Zedekia hte shi a share shagan hpyen masha ni mahkra dai byin nga ai masa hpe mu ma ai shaloi, shanhte gaw dai shana jang mare kaw nna hprawng pru mat wa na matu shakut nga ma ai. Shanhte gaw hkawhkam wa a sun de sa wa ai lam hku pru mat wa nhtawm bunghku lahkawng hpe matut da ai lapran chyinghka lam hku Yawdan Kadit de hprawng mat wa ma ai.
5 Rai ti mung, Babelon hpyen luksuk ni gaw shanhte hpe hkan shachyut ai hte Yerihko mare makau na pa hta e Zedekia hpe rim la lu ma ai. Shanhte gaw Hamat mung na Ribla mare e nga ai Babelon Hkawhkam Nebuhkadneza hpang de shi hpe woi wa ma ai, shaloi Nebuhkadneza gaw shi hpe jeyang daw dan wu ai.
6 Shi gaw Ribla mare e Zedekia a shadang sha ni hpe Zedekia yu nga yang, shi a man e sat kau ma ai; Yuda mung na du salang ni hpe mung sat kau ma ai.
7 Dai hpang, shi gaw Zedekia a myi hpe achyaw baw kau ya nna, Babelon mung de woi mat wa na matu hpri sumri hte gyit sumroi da ma ai.
8 Dai laman hta, Babelon masha ni gaw hkawhkam htingnu hte mung masha ni a dum nta ni hpe nat kau nna, Yerusalem mare bunghku ni hpe run kau ma ai.
9 Hpang jahtum, hpyen luksuk ni a hpyen du Nebuzaradan gaw mare hta naw ngam nga ai amyu masha ni hte shi hpang maga de lata sharawt shang wa ai masha ni hte hpawn, Babelon mung de bawng rim mat wa ma ai.
10 Shi gaw sut gan hpa mung n lu ai matsan mayan masha nkau mi hpe Yuda mung e ngam tawn da nhtawm sabyi sun ni hte yi hkauna ni, shanhte hpe jaw da wu ai.
11 Rai ti mung, Hkawhkam Nebuhkadneza gaw shi a luksuk hpyen du rai nga ai Nebuzaradan hpe hkan galaw na aming hkang dat wu ai:
12 ?Nang sa nna Yeremia hpe hkan tam nhtawm shi hpe atsawm sha yu lanu lahku u; shi hpe hpa mung hkum zingri et, shi ra ai lam hpa hpe rai ti mung, shi a matu lajang ya u.?
13 Dai rai nna, Nebuzaradan gaw shi hte rau lahta tsang du salang ni rai nga ai Nebushaban, Nergala Shereze hte kaga Babelon hkawhkam wa a du kaba ni mahkra gaw,
14 ngai hpe hkawhkam wang, htawng wang kata kaw na sa woi la ma ai. Shanhte gaw ngai dum nta de shim ai hte du wa sai hpe mu mayu nga ai Shahpan a kashu Ahikam a kasha Gedalia a lanu lahku ai npu hta ngai hpe wa ap da ma ai. Ngai gaw dai shara hta mung masha ni hte rau nga nga nngai.
15 Ya ngai hkawhkam wang na htawng wang kata e sharen da ai naw hkrum nga yang,
16 Chyahtum Chyalai N-gun Rawng ai dai Madu Israela a Karai Kasang gaw Ehtiopi masha Ebedmelek hpe tsun na matu ngai hpe hkang da ni ai. Dai Madu gaw, ?Ngai tsun ni ai hpe ngai shadik sai hte maren, amyu masha ni a sut gan n rai, ndai mare hpe ngai jahten sharun kau na nngai. Ndai lam byin wa ai shaloi, dai byin ai lam hpe mu lu na matu nang gaw dai shara e nga nga na rin dai.
17 Rai ti mung, dai Madu ngai nan nang hpe makawp maga na nngai, nang gaw nang hkrit nga ai masha ni a lata de ap kau hkrum na ndai n rai.
18 Ngai gaw nang hpe shim lum hkra makawp da na nngai, nang si na ra ai n rai. Nang ngai hpe kam hpa nga ndai majaw na a asak lawt lu na ra ai. Dai Madu ngai nan tsun ni ai,? ngu nna tsun wu ai.