38
Matan a kasha Shehpatia, Pashura a kasha Gedalia, Shelemia a kasha Yehuhkala hte Malhkiya a kasha Pashura ni gaw amyu masha ni hpe ngai tsun ni ai dai Madu a mungga hpe na ma ai. Dai Madu gaw, ?Ndai mare hta nga nga ai wa gaw hpyen majan hta mung, kawsi hpang gara ai hta mung, ana zinli hta mung si mat na mara ai. Rai ti mung, ndai mare kaw na pru mat wa nhtawm Babelon masha ni hpang de asum hkam shang mat wa ai wa chyawm gaw sat kau hkrum na ra ai n rai, shi gaw shi a asak a matu sha gaw hprawng lawt lu na ra ai,? ngu nna tsun wu ai. Ngai gaw shanhte hpe mung dai Madu ning nga tsun ai lam hpe tsun nngai: ?Ngai gaw ndai mare hpe Babelon hpyen luksuk ni a lata de ap kau na nngai. Shing rai shanhte gaw ndai mare hpe madu la kau na mara ai.?
Dai hpang, du salang ni gaw hkawhkam wa hpang de sa nna, ?Ndai masha wa gaw si ging nga ai. Shi gaw dai zawn nga ai ga tsun shaga ai majaw mare kata na hpyenla ni hpe shanhte a n-gun marai shadaw kau ya nu ai; shi gaw ndai mare hta naw ngam nga ai masha shagu hte hpe karum na matu, shakut ai wa n rai, shanhte hpe nchyi nmu machyi shangun na ra sharawng ai wa sha rai nga ai,? ngu nna tsun dan ma ai.
Hkawhkam Zedekia gaw, ?Ara rai sa, grai kaja sai, shing nga jang gaw, nanhte shi hpe galaw mayu ai hku galaw mu, ngai nanhte hpe n hkum lu ni ai,? ngu nna htan wu ai. Dai rai nna, shanhte gaw ngai hpe woi la nhtawm sumri hte gyit nna hkawhkam wang kata hkawhkam kasha Malhkiya a hka htung kata de ngai hpe shayu dat ma ai. Dai hka htung hta hka n rawng nga ai, hkumpup hkrai rai nga nna, ngai gaw dai hta lup nga nngai.
Gara hku mi rai rai, shanhte ngai hpe hka htung kata de jahkrat bang kau ai lam hkawhkam htingnu hta amu galaw nga ai unuk, Ehtiopi masha Ebedmelek na wu ai. Dai aten hta hkawhkam wa gaw Benyamin Chyinghka lam hta sa dung nga ai. Dai rai nna Ebedmelek gaw hkawhkam wa nga ai shara de pru sa wa nna hkawhkam wa hpe, ?Nye a hkawhkam wa e, ndai masha ni galaw ai amu gaw shut nga masai. Shanhte gaw Yeremia hpe hka htung kata de jahkrat bang kau manu ai, bai nna ndai mare hta lusha hpa mung n nga sai majaw shi gaw teng teng kawsi kyet ai hte si mat na ra ai,? ngu nna tsun wu ai. 10 Dai hpang, ngai garai n si yang, ngai hpe hka htung kata kaw nna gang shaw la na matu Ebedmelek hte rau la marai masum sa na matu hkawhkam wa hkang dat wu ai. 11 Dai rai nna, Ebedmelek gaw dai masha ni hte rau htingnu wang na sut mahkawng gawk de sa wa nhtawm, tsupni palawng dingsa ni la nna, ngai rawng nga ai hka htung kata de sumri hte shayu ya ma ai. 12 Shi gaw ngai hpe dai tsupni hte nye a lahpa npu hta e tsi bang da na ngai hpe tsun wu ai. Dai gaw sumri hte gang shaw ai shaloi ngai hta machyi n hkrum na matu rai nga ai. Ngai mung dai hku hkan galaw ai hte 13 shanhte gaw ngai hpe hka htung kata kaw nna gang shaw la ma ai. Dai hpang ngai gaw hkaw wang kata hta sharen da ai hkrum nngai.
14 Aten langai mi hta, Hkawhkam Zedekia gaw Nawku Htingnu de sa ai masum ngu na chyinghka de ngai hpe woi mat wa nhtawm, ?Ngai nang hpe ga san langai san yu na nngai, ngai hpe teng man ai lam yawng tsun dan na matu nang hpe ra nga nngai,? ngu nna tsun wu ai.
15 Ngai gaw, ?Nang ngai hpe teng man ai ga tsun ai rai yang, nang ngai hpe sat kau na ndai, ngai nang hpe hpaji jaw ai sha rai yang mung, nang hpa zawn nawn ya na ndai n rai,? ngu nna htan ni ai.
16 Hkawhkam Zedekia gaw ngai hpe, ?Anhte hpe asak jaw ya ai Karai Kasang, dai ahkrung nga ai Karai Kasang hta ngai dagam nngai. Ngai gaw nang hpe sat kau na n rai; nang hpe sat kau na matu tam nga ai masha ni a lata de mung ap ya na n rai,? ngu nna mayun ga sadi jaw da wu ai.
17 Dai hpang, Chyahtum Chyalai N-gun Rawng ai dai Madu Israela a Karai Kasang gaw, ?Babelon hkawhkam wa a du salang ni kaw nang lata sharawt shang wa ai rai yang, na a asak lawt lu na rin dai; ndai mare mung hkru mat na ra ai n rai, nang hte na a dinghku masha ni mung hkrung nga lu na mara ai. 18 Rai ti mung, nang lata sharawt n shang wa ai rai yang chyawm gaw ndai mare hpe Babelon masha ni a lata de ap kau nhtawm shanhte gaw dai mare hpe nat kau na mara ai. Nang gaw shanhte a lata kaw nna hprawng lawt lu na ra ai n rai,? ngu nna tsun ai ga hpe Hkawhkam Zedekia hpe tsun dan wu ai.
19 Rai ti mung, hkawhkam wa gaw, ?Babelon masha ni a lata de hprawng du nga sai anhte a mung masha ni hpe ngai hkrit nga nngai. Ngai gaw shanhte a lata hta ap kau hkrum nna adip arip zingri hkrum chye na nngai,? ngu nna htan we ai.
20 Ngai gaw, ?Nang shanhte a lata hta ap kau ai hkrum na n rai; Dai Madu a mungga hpe madat mara na matu, ngai nang hpe lajin nga nngai; shaloi nang hta dingbai dingna hpa mung hkrum hkra na ra ai n rai; na a asak mung ahkrung nga lu na ra ai. 21 Rai ti mung, nang lata sharawt shang wa na matu ningdang kau ai rai yang, kaning rai byin wa na gaw, dai Madu gaw ngai hpe shingran hta madun da ni ai. 22 Dai shingran gaw Yuda hkawhkam htingnu hta naw ngam nga ai numsha ni yawng hte gaw Babelon hkawhkam a du salang ni hpang de woi wa ma ai hpe ngai mu nngai. Shanhte pru sa mat wa ma yang, shanhte tsun ai ga hpe madat yu mu:
?Dai hkawhkam wa a kaja htum ai manang ni gaw shi hpe lam woi shadam kau ma ai,
shanhte gaw shi hpe dang kau masai.
Ya chyawm gaw shi a lagaw hkumpup hta lup mat nna,
shi a manang ni shi hpe kau da manu ai.??
23 Dai hpang, ngai gaw, ?Na a numsha ni hte kashu kasha ni yawng gaw Babelon masha ni hpang de woi la hkrum na mara ai; nang nan mung shanhte a lata kaw na lawt lu na ra ai n rai. Nang gaw Babelon hkawhkam a lata de bawng dung hkrum na ndai, ndai mare gaw wan dap byin mat hkra hkru mat na ra ai,? ngu nna kahtap tsun wu ai.
24 Zedekia gaw, ?Ndai zawn tsun jahta ai ga kadai hpe mung hkum chye shangun et; shi asak hkrit tsang shara n nga nga ai. 25 Nang hte ngai shaga hkat ai lam du salang ni na ai rai yang, shanhte gaw nang kaw sa nna an tsun shaga ai ga ni hpe san na mara ai. Nang shanhte hpe an tsun shaga ai ga mahkra tsun dan ai rai yang, nang hpe n sat kau na matu shanhte ga sadi jaw na mara ai. 26 Nang gaw ngai n si hkra, dai Yonahtan a nta de ngai hpe bai n shangun dat na matu nang ngai hpe hpyi nem ai lam, shanhte hpe tsun dan u,? ngu nna ngai hpe bai htan wu ai. 27 Dai hpang, du salang ni yawng gaw ngai kaw sa san ma ai; ngai gaw hkawhkam wa ngai hpe tsun matsun da ai lam hte maren, shanhte hpe tup hkrak tsun dan ni ai. Kaning ngu tsun shaga ai ga kadai mung n na hkrup ma ai majaw, shanhte hpa mung n lu galaw nga ma ai. 28 Ngai gaw Yerusalem mare zing la hkrum mat ai shani du hkra, hkaw wang kata e sharen da ai hkrum nga nngai. Ref 38:28: Eze 33:21.