36
1 Yuda Hkawhkam Yoshia a kasha Yehoiakim hkaw dung ai mali ning hta e, dai Madu gaw ngai hpe, Ref 36:1: 2Hk 24:1; 2Hl 36:5-7; Dan 1:1-2.
2 ?Laika katsu langai la nhtawm ngai nang hpe tsun dan sai Israela, Yuda hte amyu baw ni yawng hpe lakap ai magup sumhpa lam ni hpe dai hta e ka tawn u. Dai sha n-ga, Yoshia hkawhkam tai nga ai shaloi, ngai nang hpe shawng shaga ai shani kaw nna dai ni du hkra ngai nang hpe tsun sai ga mahkra ka tawn u.
3 Yuda amyu masha ni hta, ngai shanhte a ntsa e galaw na myit shatawng shada da ai jahten shabyak lam mahkra hte seng ai hpe na wa ai shaloi, shanhte gaw n hkru n shawp ai amu kaw na kayin wa dam nhten. Shaloi, ngai gaw shanhte a n hkru n shawp ai hte shut hpyit kau ai yubak mara ni hpe raw dat kau ya na nngai,? ngu nna tsun wu ai.
4 Dai rai nna, ngai gaw Neria a kasha Baruk hpe shaga la nna dai Madu ngai hpe tsun dan sai lam mahkra hpe ka shangun we ai. Baruk mung dai lam yawng mayawng hte hpe laika katsu hta e ka da wu ai.
5 Dai hpang, ngai gaw Baruk hpe lawu de na matsun maroi ga ni hpe tsun dan ni ai: ?Ngai gaw Nawku Htingnu kata de shang na ahkang loi mi mung n lu nngai.
6 Rai ti mung, amyu masha ni lusha gam nga ai shara de nang bai shang sa wa na ngai ra nga nngai. Shing rai laika katsu hta ka da sai hte maren, ja ja nang hti dan u; shaloi dai Madu ngai hpe tsun dan sai lam hte ngai nang hpe ka da shangun ai lam ni mahkra hpe shanhte na la na mara ai. Ndai lam hpe masha hkum shagu hte shanhte a mare kahtawng ni kaw nna du sa wa ai Yuda mung masha ni yawng lawm nna na lu hkra hti dan u.
7 Dai Madu gaw ndai amyu masha ni hpe shi a hkrit hpa pawt sindawng ai hte myit kahtet let jahkrit shama nu ai majaw, shanhte gaw n hkru n shawp ai amu kaw na kayin wa nhtawm dai Madu hpe akyu hpyi dam wa ma nhten.?
8 Dai rai nna, Baruk gaw ngai shi hpe hkang da sai hte maren, Nawku Htingnu kata e, dai Madu a mungga hpe tup hkrak hti dan wu ai.
9 Ya Yuda Hkawhkam Yehoiakim hkaw dung ai manga ning e shata jahku hta, dai Madu a matsan dum la ai hkrum na matu, amyu masha ni lusha gam nga ma ai. Dai lusha gam ai amu hpe Yerusalem hta shanu nga ai amyu masha ni mahkra hte Yuda mung mare kahtawng kaw na Yerusalem de lung wa ai ni mahkra hte wa galaw nga ma ai.
10 Dai hpang, amyu masha ni yawng madat nga ma yang, Baruk gaw ngai tsun dan sai lam mahkra hpe laika katsu kaw na hti dan nu ai. Shi gaw dai laika katsu hpe Nawku Htingnu kata na amu madu Shahpan a kasha Gemaria a gawk kaw nna hti dan nga ai. Shi a gawk gaw Nawku Htingnu a Chyinghka Nnan de shang wa ai ntsa htap e rai nga lu ai.
11 Shahpan a kashu, Gemaria a kasha Mihkaia gaw Baruk hti dan sai laika katsu hta rawng ai dai Madu tsun da sai mungga ni hpe na wu ai.
12 Dai hpang, shi gaw hkawhkam htingnu de sa wa nhtawm du salang ni yawng zup hpawng dung nga ai htingnu amu madu wa a gawk de yu wa ai. Dai shara hta e, Elshama ngu ai htingnu amu madu wa, Shemaia a kasha Delaia, Akbora a kasha Elnahtan, Shahpan a kasha Gemaria, Hanania a kasha Zedekia hte kaga du salang ni yawng nga nga ma ai.
13 Mihkaia gaw amyu masha ni hpe Baruk hti dan sai laika ga hpe shi na la sai hte maren, shanhte hpe mahkra htawn tsun dan wu ai.
14 Dai hpang, du salang ni gaw (Hkushi a shu mashi, Shelemia a kashu, Nehtania a kasha) Yehudi hpe Baruk hpang de shangun dat nna, amyu masha ni a man e shi hti dan sai laika katsu la wa na matu tsun dat ma ai. Baruk mung shanhte hpang de laika katsu la sa wa wu ai.
15 Shaloi, shanhte gaw, ?Dung u, anhte hpe hti dan mi,? ngu nna tsun ma ai. Baruk gaw shanhte a man e hti dan wu ai.
16 Shi dai laika hti dan ngut ai hpang, shanhte gaw hkrit kajawng ai hte shada da mada yu nna, ?Anhte gaw ndai ga mahkra hkawhkam wa hpe tang madun raga ai,? ngu nna Baruk hpe tsun ma ai.
17 Dai hpang, shanhte gaw shi hpe, ?Ndai lam ni hpe nang kaning rai ka da wu ni? Nang hpe ndai lam ka na matu Yeremia matsun a ni? Ya anhte hpe tsun dan mi,? ngu nna san ma ai.
18 Baruk chyawm gaw, ?Yeremia gaw ndai laika ga hkum shagu ngai hpe tsun dan ni ai; ngai gaw laika katsu hta tsi hte ka da ni ai,? ngu nna htan wu ai.
19 Dai shaloi, shanhte gaw shi hpe, ?Nang hte Yeremia gaw sa makoi nga masu. Nan gara shara hkan makoi nga ai hpe kadai hpe mung hkum chye shangun myit,? ngu nna tsun dat ma ai.
20 Du salang ni gaw htingnu amu madu rai nga ai Elishama a gawk kata de dai laika katsu tawn da nna, byin lai wa sai lam mahkra hkawhkam wa hpe tang madun na nga, hkawhkam htingnu de shang mat wa ma ai.
21 Dai hpang, hkawhkam wa gaw dai laika katsu hpe sa la na matu, Yehudi hpe shangun dat nna shi gaw dai hpe htingnu amu madu Elishama a gawk na shaw la nhtawm hkawhkam wa hte shi a makau e tsap nga ai du salang ni a man e hti dan wu ai.
22 Ya dai byin ai gaw nshung ta hta rai nga ai hte hkawhkam wa gaw nshung ta hta rawng ai htingnu kata hta shi dung nga ai; shi a man e wan kra na wan htung mung nga nga wu ai.
23 Yehudi gaw laika daw masum mali hpe sha naw hti ngut ai hte rau hkawhkam wa gaw nhkyi kaji hte dai laika katsu hpe gadoi ashin kau nhtawm wan htung kata de kabai bang kau wu ai. Shi gaw dai laika katsu ting hkru mat hkra nat kau wu ai.
24 Rai ti mung, ndai lam yawng hpe na ai hkawhkam wa mung, shi a du salang ni mung hkrit nga ma ai n rai; yawn hkyen ai kumla hpa mung n madun dan ma ai.
25 Ndai laika katsu hpe n nat kau na matu, Elnahtan, Delaia hte Gemaria ni gaw hkawhkam wa hpe tawng ban yu ma ai, rai ti mung shi gaw shanhte tsun ai ga hpe hpa zawn n nawn ya nga wu ai.
26 Dai hpang, ngai hte nye a amu madu rai nga ai Baruk hpe rim la na matu hkawhkam wa gaw shi a kasha Yeramela hte rau Azriela a kasha Seraia hte Abdela a kasha Shelemia ni hpe hkang dat nu ai. Rai ti mung, dai Madu gaw an hpe makoi da mi ai.
27 Ngai hkai dan ai hte maren, Baruk ka da ai laika katsu hpe Hkawhkam Yehoiakim nat kau ya ai hpang, dai Madu gaw ngai hpe
28 shawng na laika katsu hta rawng ai ga mahkra hte maren, kaga laika katsu hta ka da na matu hkang da ni ai.
29 Dai Madu gaw hkawhkam wa hpe tsun na matu ngai hpe ning nga nna hkang da wu ai: ?Nang gaw ndai laika katsu nat kau nit dai, Babelon hkawhkam wa gaw ndai mung de du shang wa nna, mungdan hpe mung shamyit kau nga sai; dai mung na amyu masha ni hte yam nga ni hpe sat kau na ru ai nga nna shi hpa majaw ka da wu ta?, ngu nna nang Yeremia hpe san nit dai.
30 Ya chyawm gaw, Dawi a mungdan hpe up hkang na na a aru arat ni kadai mung paw pru na ra ai n rai, nga nna nang hkawhkam Yehoiakim hpe dai Madu ngai nan tsun nga nngai. Na a moi mang gaw shani na nhtoi hta jan prang hte shana e hkyen hta kabai tawn da ai hkrum na ndai.
31 Nanhte yawng shut hpyit kau ai yubak mara ni a majaw, nang hpe mung, na a aru arat ni hte du salang ni hpe mung, ngai ari jaw na we ai. Nang mung, Yerusalem mare masha ni hte Yuda mung masha ni mung nye a shadum jahprang ai ga ni hpe hpa zawn n nawn ya myit dai majaw, jahkrit shama na matu ngai san da ai tsin-yam tsindam hpe nanhte yawng a ntsa e ngai shapraw dat na nngai.?
32 Dai hpang, ngai gaw kaga laika katsu hpe la nna nye a amu madu Baruk a lata hta ap ya ni ai; shi gaw ngai hkai dan ai lam mahkra hpe ka tawn wu ai. Shi gaw shawng na laika katsu hta ka da ai hte ngai shi hpe hkai dan ai hte maren mungga ni hpe mung ka bang da wu ai.