35
1 Yuda Hkawhkam Yoshia a kasha Yehoiakim hkaw dung ai shaloi, dai Madu gaw ngai hpe, Ref 35:1: 2Hk 23:36-24:6; 2Hl 36:5-7.
2 ?Rahkab amyu lakying ni a masha ni hpang de shang sa nna shanhte hpe ga tsun u. Dai hpang, shanhte hpe Nawku Htingnu kata na gawk langai mi de woi bang nna shanhte hpe sabyi ntsin loi mi jaw lu u,? nga nna hkang da nga ai.
3 Dai rai nna, ngai gaw Habazinia a kashu, (kaga Yeremia a kasha Habazinia) hte shi a kahpu kanau ni, shadang sha ni yawng hte Rehkab amyu lakying ting hpe woi la nna,
4 Nawku Htingnu kata de woi jashawn ni ai. Igdalia a kasha myihtoi Hanan a sape ni a gawk de shanhte hpe woi bang wa ni ai. Dai gawk gaw Nawku Htingnu kata na grai ahkyak ai myit su salang Shalum a kasha Masea a gawk ntsa htap hta nga nna kaga du salang ni a amu bawng gawk ni hte mung ni ai shara rai nga ai.
5 Dai hpang, ngai gaw Rehkab amyu lakying ni a man e sabyi ntsin hpring ai gawm hte ban ni hpe jahkrat tawn da ya nna, ?Dai sabyi ntsin hpe la lu mu,? ngu nna shanhte hpe ngai tsun we ai.
6 Rai ti mung, shanhte gaw, ?Anhte sabyi n lu na ga ai. Anhte a kaji kawa rai nga ai Rehkab a kasha Yonadab gaw anhte mi rai rai, anhte a aru arat ni mi rai rai, kaning re ai sabyi hpe mung n lu na matu hkang da mi ai.
7 Nta gaw gap na, sun galaw na, sabyi sun hkai na hte mari na lam, n galaw na matu mung shi anhte hpe hkang da mi ai. Shi gaw anhte hpe tut nawng e sum nta hta nga na matu hkang da mani ai, shing rai anhte gaw malet nhprang manam ni zawn anhte shanu nga ai ndai mung hta nga lu na ga ai.
8 Yonadab anhte hpe hkang da ai sharin shaga ai lam ni yawng hpe anhte hkan sa shadik nga saga ai. Anhte gaw anhte hkum nan sabyi galoi mung n lu ga ai, shing rai anhte a madu jan ni mung, anhte a shadang sha ni mung, anhte a shayi sha ni mung prat tup n lu nga ga ai.
9-10 Anhte nga na matu dum nta ni hpe n gaw gap ga ai, shing rai anhte gaw sum nta ni hta rawng ga ai. Anhte gaw sabyi sun ni hpe mung, yi sun hkauna hpa hpe mung madu da ga ai n rai, anhte gaw nli mung n gat ga ai. Anhte gaw anhte a kaji kawa Yonadab anhte hpe hkang da mada lam mahkra hpe hpring hpring tup tup hkan sa madat mara ga ai.
11 Rai ti mung, Hkawhkam Nebuhkadneza gaw mungdan hpe gasat shang wa ai shaloi Babelon hte Suri hpyen luksuk ni a lata kaw na hprawng yen mat wa na matu, Yerusalem mare de lung wa na anhte myit jahkut kau saga ai. Dai lam a majaw, anhte Yerusalem mare hta shanu nga ga ai,? ngu nna htan ma ai.
12-13 Dai hpang, Chyahtum Chyalai N-gun Rawng ai dai Madu Israela a Karai Kasang gaw Yuda hte Yerusalem na amyu masha ni hpe mungga sa tsun na matu, ngai hpe hkang dat ni ai: ?Nang hpa majaw nye a ga hpe lale nna nye a sharin achyin ai ga ni hpe n madat ai hpe ya dai Madu ngai nan nang hpe san nga nngai.
14 Yonadab a aru arat ni gaw sabyi n lu na matu shi hkang da ai ga hpe madat mara nga ma ai majaw dai ni du hkra, shanhte hta na langai wa mi mung loi mi pyi chyim yu nga ma ai n rai. Ngai nanhte hpe atsun nga ti mung, nanhte nye a ga hpe n madat myit dai.
15 Ngai gaw nanhte hpang de nye a shangun ma ni rai nga ai myihtoi ni yawng hpe matut shangun dat ni ai; shanhte gaw nanhte hpe nanhte a n hkru ai amu ni koi kau na matu hte, ding hpring ai amu galaw na matu tsun shadum manu ai. Shanhte gaw kaga hpara sumla ni hpe nawku daw jau ai lam n galaw na matu nanhte hpe tsun shadum manu ai, shing rai jang, ngai gaw nanhte hte nanhte a nji nwa ni hpe jaw da ai mungdan hta nanhte matut shanu nga lu na myit dai. Rai ti mung, nanhte gaw nye a ga hpe n madat myit dai hte hpa zawn n nawn ya nga myit dai.
16 Yonadab aru arat ni gaw shanhte a kaji kawa ni hkang da ai matsun maroi ga ni hpe hkan shatup madat mara ma ai, rai ti mung, nanhte amyu masha ni gaw nye a ga hpe n madat n mara nga myit dai.
17 Ya chyawm gaw, Chyahtum Chyalai N-gun Rawng ai dai Madu Israela a Karai Kasang ngai nan ga shaka tawn da sai hte maren, jahten shabyak ai lam mahkra hpe Yuda mung masha ni hte Yerusalem masha ni yawng a ntsa e shapraw dan na we ai. Ngai nanhte hpe tsun ai shaloi, nanhte nye a ga hpe n madat myit dai, ngai nanhte hpe shaga yang, nanhte n htan ya myit dai majaw, ndai amu hpe ngai shabyin dat na nngai,? ngu nna tsun wu ai.
18 Dai hpang, ngai gaw Rehkab amyu lakying ni hpe Chyahtum Chyalai N-gun Rawng ai dai Madu Israela a Karai Kasang tsun ai mungga hpe ning ngu tsun ni ai: ?Nanhte gaw nanhte a kaji kawa Yonadab nanhte hpe hkang da ai matsun maroi ga ni hpe hkan shatup madat mara manit dai; shi a sharin achyin ai ga ni hta mung nanhte hkan sa nga manit dai; shi nanhte hpe hkang da mada lam shagu hpe nanhte hkan galaw manit dai.
19 Dai majaw, Chyahtum Chyalai N-gun Rawng ai dai Madu Israela a Karai Kasang ngai nan Rehkab a kasha Yonadab hta na ngai hpe daw jau na matu shadang sha aru arat, tut nawng anga nga na ra ai nga nna ga sadi jaw nngai.?