27
Yoshia a kasha Zedekia gaw Yuda hkawhkam tai wa ai kade n na yang, dai Madu gaw ngai hpe, Ref 27:1: 2Hk 24:18-20; 2Hl 36:11-13. nang hkum nan shanhpyi jinghpa hte hpun kandang langai mi galaw nna, dai hpe na a du hta mara tawn da u, ngu nna tsun wu ai. Dai hpang, dai Madu gaw Edom, Moba, Amon, Turu hte Sidon hkawhkam ni hpang de Hkawhkam Zedekia hpe mu lu na matu Yerusalem de du sa nga sai shanhte a dat kasa ni a lata hku nna ndai mungga hpe shagun dat na matu ngai hpe tsun ni ai. Chyahtum Chyalai N-gun Rawng ai dai Madu Israela a Karai Kasang gaw shanhte a hkawhkam ni hpe wa tsun dan na matu shanhte hpe hkang dat na, ngai hpe tsun ni ai, shing rai dai Madu gaw, ?Nye a galu kaba ai daru magam n-gun, lahpum marai hte ngai gaw mungkan ga hpe mung, shinggyim masha hpe mung, ginding aga ntsa e shanu nga ai yam nga mahkra hpe mung, hpan tawn da ni ai; ngai lata la sai masha kadai hpe mung dai ni hpe ngai jaw ya nngai. Ngai gaw masha amyu baw ni yawng hpe nye a shangun ma Babelon Hkawhkam Nebuhkadneza a lata hta ap kau ai wa rai nga nngai; nam na matse labye dusat ni pyi shi hpe daw jau na matu ngai ap da ni ai. Masha amyu baw ni yawng hte gaw shi a mungdan hkrat sum mat wa ai aten du hkra shi hpe mung, shi a kasha hpe mung, shi a kashu hpe mung daw jau na mara ai. Dai hpang, shi a amyu ni gaw daru magam n-gun ja ai masha amyu baw ni hte hkawhkam kaba ni hpe daw jau na mara ai.
?Rai ti mung, kaning re ai amyu, kaning re ai mungdan mi rai tim, shi a up hkang ai hpe hkan sa madat mara ai lam n nga ai rai yang, shanhte hpe atsai awai shamyit kau na matu Nebuhkadneza hpe shangun dat ai aten du hkra dai masha amyu baw ni hpe hpyen majan, kawsi hpang gara ai hte ana zinli hte ngai shanhte hpe ari jaw na mawe ai. Babelon hkawhkam wa a ga n madat n mara lu na nga nna nanhte hpe tsun ai nanhte a myihtoi ni a ga hte du na ra ai aten a lam hpe tsun lu ai wa langai ngai a ga, yup mang mu ai wa a ga, si mat sai ni a wenyi minla hpe jasu sharawt shaga ai hte gumhpan hpan ai ga ni hpe hkum madat nga myit. 10 Shanhte gaw nang hpe masu hkalem nga ma ai, nang hpe na a mungdan kaw na tsan tsan de woi mat wa na matu amu shabyin nga ma ai. Ngai gaw nang hpe shaden kau na nngai, nang gaw shamyit kau ai hkrum na rai ndai. 11 Rai ti mung, Babelon hkawhkam wa a ga hpe madat mara hkan sa nna shi hpe daw jau ai rai yang, gara amyu baw hpe rai ti mung, tinang a mungdan hta nga nga shangun nna, dai mung hta galaw lu galaw sha ai hte shanu nga lu na mara ai. Dai Madu ngai nan tsun ni ai,? ngu nna tsun wu ai.
12  Ngai gaw dai hte maren Yuda Hkawhkam Zedekia hpe, ?Babelon hkawhkam wa a ga hpe madat mara hkan sa nga mu. Shi hte shi a amyu masha ni hpe daw jau nga mu, shaloi nanhte ahkrung nga lu na marin dai. 13 Nang hte na a amyu masha ni gaw hpyen majan, kawsi hpang gara ai hte ana zinli hta hpa majaw si ang na rai myit ta? Dai gaw Babelon hkawhkam a ga hpe n madat n mara ai gara amyu baw hta rai tim, dai Madu tsun da sai hte maren byin wa na ra ai. 14 Shi hpe dingnyawm asum n hkam na matu tsun ai myihtoi ni a ga hpe hkum madat nga myit. Shanhte gaw nanhte hpe masu hkalem nga ma ai. 15 Shi gaw shanhte hpe shangun dat ai n rai, shanhte gaw nanhte hpe shi a mying hta masu magaw ga tsun nga ma ai nga nna dai Madu shi hkum nan tsun nu ai. Shi gaw nanhte hpe shaden kau nhtawm nanhte hpe ndai masu hkalem ga ni hte tsun nga ai nang hte myihtoi ni gaw sat kau ai hkrum na mara ai,? ngu nna tsun ni ai.
16 Dai hpang, ngai gaw dai Madu tsun da sai ga hte maren, hkinjawng ni hte mung masha ni hpe, ?Nawku Htingnu sut gan ni hpe kade n na yang, Babelon mung kaw nna bai la wa lu na re nga nna tsun ai myihtoi ni a ga hpe hkum madat nga myit; shanhte gaw nanhte hpe masu hkalem nga ma ai. 17 Shanhte a ga hkum madat myit! Babelon hkawhkam wa a ga hpe hkan sa madat mara nga mu, shing rai yang, nanhte hkrung nga na marin dai! Ndai mare gaw hpa majaw hpya sumpum da ai shara tai ang a ni? 18 Shanhte gaw teng teng myihtoi ni hte nye a mungga lu la ai ni rai yang gaw, Nawku Htingnu hte hkawhkam htingnu ni hta naw ngam nga ai sut gan ni hpe Babelon mung de n la wa lu na lam, Chyahtum Chyalai N-gun Rawng ai dai Madu ngai hpe shanhte hpyi nem mu ga,? ngu nna tsun ni ai.
19-20 (Hkawhkam Nebuhkadneza gaw Yuda Hkawhkam Yehoiakim a kasha Yehoiahkin hte Yuda mung hte Yerusalem na arawng lu ai masha ni hpe Babelon mung de woi wa ai shaloi, shi gaw shadaw ni, magri mang hka lawng, leng ni hte kaga Nawku Htingnu sut gan nkau mi hpe ngam tawn da nu ai.)
21 ?Nawku Htingnu kata hta mung, Yerusalem na hkawhkam htingnu hta mung naw ngam tawn da ai sut gan ni hte seng nna Chyahtum Chyalai N-gun Rawng ai dai Madu Israela a Karai Kasang tsun ai ga hpe madat mara mu. 22 Dai sut gan ni gaw Babelon mung de la mat wa na mara ai, shanhte hta nye a myit jung wa ai aten du hkra dai shara hta hti ngam nga na mara ai. Dai hpang ngai gaw dai arai ni hpe bai la wa nna ndai shara hta wa tawn da na nngai. Dai Madu ngai nan dai ga tsun ni ai,? ngu nna tsun wu ai.