2
Dai Madu gaw ngai hpe Yerusalem hta nga ai masha shagu hte hpe ndai mungga tsun na matu tsun wu ai.
?Nang ram prat naw rai nga yang, nang kade wa kangka nga ndai hpe mung,
anhte shawng nnan hkungran ga ai shaloi, nang ngai hpe kade tsaw ra ai hpe mung,
zaibru jang hku mung,
hkun hkraw ai lamu ga hku mung nang ngai kaw hkan nang nga ndai hpe ngai dum nga nngai.
Israela e, nang hpe chyu sha ngai madu nngai;
nang gaw nye a matu chyoi pra nga ndai.
Ngai gaw nang hpe machyi shangun ai masha shagu a ntsa e
nni nkri hte tsin-yam tsindam dat dat nngai.
Dai Madu ngai nan tsun ni ai,? ngu nna tsun ai.
Yaku a aru arat ni hte Israela a amyu bawsang ni e, dai Madu a mungga hpe madat mu. Dai Madu gaw ning nga tsun ai:
?Na a nji nwa ni gaw kaning re ai mara hte ngai hpe mara shagun ma ta?
Hpa lam a majaw shanhte hpe ngai kaw na kayin kau shangun nga a ta?
Shanhte gaw akyu n jaw ai hpara sumla ni hpe nawku nna
shanhte nan manu n dan ai ni tai wa masai.
Ngai gaw shanhte hpe Egutu mung kaw nna hkye mawai la nhtawm
kadai mung n nga ai hte kadai mung pyi n lai hkawm yu ai
dai zaibru jang ga hte zaibru nhkun ni,
hkun hkraw ai hte hkrit tsang hpa lamu ga ngu ai nam mali hku
shanhte hpe woi wa tim pyi shanhte ngai hpe hpa zawn n nawn ma ai.
Ngai gaw shanhte hpe ga sau kaja ai mung de woi jashawn nna
dai mung na nsi naisi ni hte kaga kaja ai sut rai ni hta kabu gara shangun ni ai.
Rai ti mung shing rai na malai, shanhte gaw nye a mungdan hpe jahten sharun kau nna;
ngai shanhte hpe jaw sai mungdan hpe shanhte awu asin di kau manu ai.
Hkinjawng ni gaw, ?Dai Madu gaw kanang rai nga a ta?,? nga nna san ma ai n rai.
Nye a hkinjawng majing ni ngai hpe n chye ma ai.
Mung du ni ngai hpe gumlau ma ai;
myihtoi ni gaw Bala a mying hta ga shaga ai hte
akyu n jaw ai hpara sumla ni hpe nawku ma ai.
?Dai rai nna, dai Madu ngai gaw nye a amyu masha ni hte kalang bai dangrang hkat na nngai.
Ngai gaw shanhte a aru arat ni hte mung dangrang hkat na nngai.
10 Sinna maga nga ai Kupru zunlawng de sa nna,
sinpraw maga de nga ai Kedara mung de masha langai mi hpe shangun dat u.
Shawng de ndai zawn galoi mung n byin yu ai amu hpe nang mu na rai ndai.
11 Kaga amyu baw gaw shanhte a karai ni ajet n rai nga tim pyi
galoi mung n galai kau yu ma ai.
Rai ti mung nye a amyu masha ni chyawm gaw
shanhte hpe arawng sadang jaw ya ai Karai Kasang hpe
shanhte a matu hpa mung n galaw ya lu ai karai ni hte ngai hpe galai kau manu ai.
12 Dai rai nna, ngai gaw shamau kau na matu hte mau mahka mat na matu,
ja ja hkrit gari ai hte ashun na matu sumsing lamu hpe hkang da nngai, 13 hpa majaw nga yang, nye a amyu masha ni gaw yubak lahkawng shut hpyit kau manu ai:
shanhte gaw mu ai hka hpawk ngu ai ngai kaw na
myi man kayin mat wa nhtawm,
hka n rawng lu ai hka htung ni hpe htu manu ai.
14 ?Israela gaw mayam n rai;
shi gaw mayam tai na matu shangai wa ai n rai.
Dai rai yang shi a gumlau hpyen ni shi hpe hpa majaw hkan shachyut rim ma ni?
15 Shanhte gaw hkanghkyi ni zawn shi hpe shabam ma ai;
shanhte gaw shi a mungdan hpe zaibru jang shatai kau ma ai,
shi a mare ni gaw hten run taw mat nna tsep kawp kabai kau nga masai.
16 Rai sa, Memhpi hte Tahpan masha ni gaw shi a baw pungkum hpe kayat ga kau manu ai.
17 Israela e, ngai nang hpe hkrun lam dingyang woi wa ai shaloi,
dai Madu na a Karai Kasang rai nga ai ngai hpe kau da nit dai majaw,
nang nan ndai zawn re ai ari hkrum nga ndai.
18 Nang gaw Nila hka lu na matu Egutu mung de sa ai gaw
hpa baw akyu lu la na re ngu, myit nawn da wu ni?
Uhprat hka lu lu na matu Asuri mung de sa ai gaw
hpa baw akyu lu la na re ngu, myit nawn da wu ni?
19 Nang nan galaw ai n hkru ai amu gaw nang hpe ari jaw na ra ai,
ngai kaw na kayin mat wa ai gaw nang hpe daw dan na ra ai.
Dai Madu na a Karai Kasang ngai hpe kau da nna,
ngai hta loi mi pyi sadi n dung nga ndai gaw kade sha ahkup ahka nga nna shut hpyit nga ai hpe
nang chye wa na rai ndai.
Chyahtum Chyalai N-gun rawng ai Tsaw Htum ai dai Madu ngai nan tsun ni ai,? ngu nna tsun ai.
20 Tsaw Htum ai dai Madu gaw,
Israela e, nang gaw moi kaw nna nye a ahkang aya hpe ningdang kau ndai;
nang gaw nye a ga madat na matu hte ngai hpe nawku na matu ningdang kau ndai.
Tsaw ai kawng shagu a ntsa hte tsit lali ai
hpun npu shagu hta mayat maya ai karai ni hpe nang nawku ndai.
21 Ngai gaw nang hpe grai kaja htum ai nli tum kaw na
sabyi ru hpe hkai da ni ai.
Rai ti mung, nang hpa baw tai mat nga nit dai hpe yu yu u!
Nang gaw yat mat nna manu n dan ai sabyi ru zawn rai nga ndai.
22 Kaja htum ai sabya hte nang kashin kau tim pyi,
na a mara numsha hpe ngai naw mu nngai.
23 Nang nan matsat shabat n galaw ai hte
Bala hpe galoi mung n nawku nngai nga nna nang kaning rai tsun lu na rai ta?
Kadit hta nang kaning rai yubak galaw nit dai hpe mung yu yu u;
nang galaw kau nit dai amu ni hpe mada yu u.
Nang gaw zaibru jang hta kagat gasit hkawm nna wuli shalun ai
aten kahtet katu hkawm nga ai gawla-uk yi shazai hte bung nga ndai.
24 Shi kahtet katu ai shaloi, shi hpe kadai hkang lu a ta?
Dai wuyi hpe ra gasit nga ai wula gaw shi hkum hpe shi sharu shatsang nga ai n rai;
wunli shalun ai aten hta shi hpe galoi mung mu lu nga ai.
25 Israela e, kaga karai ni a hpang hkan let
na a lagaw hpe hkum tsu shangun et,
na a yuhkraw hkraw hkra hkum rai nga et.
Rai ti mung nang gaw, ?N rai law! Ngai n kayin wa lu na nngai.
Ngai gaw maigan karai ni hpe tsaw ra ni ai,
dai ni a hpang de hkan na nngai,?? ngu nna nang tsun ai.
26 Dai Madu gaw, ?Lagut gaw shi rim hkrum ai shaloi jahpoi hkrum nga ai zawn Israela a amyu masha ni yawng ngu na, na a hkawhkam ni, du salang ni, na a hkinjawng ni hte myihtoi ni gaw kaya kahpa hkrum na mara ai. 27 Hpun gaw na a kawa, lunghkrung gaw na a kanu ngu nna tsun ai nanhte yawng hte gaw jahpoi hkrum na rai myit dai. Nanhte gaw ngai kaw kayin wa na malai, nanhte mahtang ngai kaw na kayin mat wa manit dai majaw dai amu byin wa na ra ai. Rai ri mung nang ru yak tsin-yam tsindam hkrum ai shaloi, nang hpe sa hkye hkrang la na matu nang ngai hpe hpyi nem ndai.
28 ?Na a matu ngu nna nang galaw da ai karai ni kanang rai nga ma ta? Nang tsin-yam tsindam hkrum ai shaloi, shanhte rai lu mu yang gaw, shanhte nang hpe hkye la mu ga, nang gaw mare law law lu nga ndai zawn karai law law mung lu nga ndai. 29 Na a aput angun ai gaw hpa wa rai nga a ta? Nang ngai hpe hpa majaw gumlau n ta? 30 Ngai nang hpe ari jaw nngai, rai ti mung dai gaw mai kaja lam hpa mung n galaw ya nga ai; nang gaw ngai hpe shading sharai shangun nga ai n rai. N-yun bu ai hkanghkyi langai zawn na a myihtoi ni hpe nang sat kau nit dai. 31 Israela amyu masha ni e, ngai tsun nga ai ga madat mu. Ngai gaw na a matu zaibru jang zawn, nsin zawn hte hkrit hpa lamu ga langai zawn tai yu nga a ni? Dai re ai mi, nang ra sharawng ai hku nang galaw nna, ngai hpang de galoi mung n wa na nga nna hpa majaw tsun n ta? 32 Numsha mahkawn gaw shi a ja rai, num nnan gaw shi a hkungran hpun palawng hpe malap da mai nga a ni? Rai ti mung, nye a amyu masha ni chyawm gaw ngai hpe malap kau ai nhtoi ni n dang hti hkra law nga sai. 33 Nang gaw sumtsaw ni a hpang kaning rai hkan na kaja wa chye nga ndai. N kaja htum ai numsha ni pyi nang kaw na sharin la lu nga ma ai. 34 Na a hpun palawng ni gaw lagu lagut ni a asai hte n rai, matsan mayan masha ni hte mara n kap ai ni a asai hte numsha nga ai.
?Rai ti mung, ndai zawn re ai amu yawng byin nga ti mung, 35 nang gaw, ?Ngai gaw mara n kap nngai; kaja wa dai Madu gaw ngai hpe galoi mung masin n pawt ai,? nga nna tsun ndai. Rai ti mung, dai Madu ngai gaw nang yubak galaw ai hpe ningdang ndai majaw nang hpe ari jaw na nngai. 36 Nang gaw kaga masha amyu baw ni a karai ni hpang de kayin mat wa ai hku nna na a hkum hpe manu shayawm kau nga ndai. Nang gaw Asuri a majaw myit daw mat ai zawn Egutu a majaw myit daw mat ai hkrum na rai ndai. 37 Nang gaw kaya kahpa hte na a baw gum let, Egutu mung kaw na kayin mat wa na rai ndai. Dai Madu ngai nan nang kam hpa ai ni hpe ningdang kau ni ai; nang gaw shanhte kaw na hpa mung lu la na ndai n rai,? ngu nna tsun ai.