YEREMIA LAIKA
(JEREMIAH)
Ga Nhpaw
Myihtoi Yeremia gaw B.C. Jaw sanit a hpang daw na aten hte B.C. Jaw kru a shawng daw na aten laman hta ngai lai wa sai. Shi a galu la ai mu gun ladaw laman shi gaw Karai Kasang a amyu masha ni hpara sumla nawku ai lai hte yubak mara a majaw shanhte a ntsa de tsin-yam tsindam du bang wa sai lam hpe sadi jaw nu ai. Shi gaw Babelon hkawhkam Nebuhkadneza a lata de Yerusalem hkrat mat ai lam, mare hte Nawku Htingnu hten run mat ai lam, Yuda hkawhkam hte amyu masha law law wa Babelon mung de bawng dung hkrum mat ai lam ni hte seng nna tau tsun da ai ga ni teng teng byin wa nga sai hpe mu lu hkra asak hkrung nga wu ai. Shi gaw bawng dung hkrum ai kaw na hpang jahtum nhtang wa na amyu masha ni a lam hte mungdan bai gram lajang na lam ni hpe mung tau tsun da nga ai.
Yeremia Laika hpe lawu na hte maren garan da lu nga ai: 1) Yeremia a shaga la hkrum ai lam. 2) Yuda amyu baw hte dai mung na mung du ni rai nga ai Yoshia, Yehoiakim, Yehoiahkin hte Zedekia ni up hkang ai laman Karai Kasang kaw na lu la ai mungga ni. 3) Yeremia a amu madu Baruk a mahkrum madup hta ka matsing da ai laika kaw lawm ai myihtoi ga amyu myu, hte Yeremia a asak hkrun lam kaw na ahkyak mabyin lam ni rai nga ai. 4) Maigan masha amyu baw law law ni hte seng nna Madu kaw na lu la ai mungga ni. 5) Yerusalem hkrat sum mat ai hte Babelon mung de bawng dung hkrum mat wa ai lam ni hpe gawn dan ai labau hte seng ai lam rai nga ai.
Yeremia gaw grai chye hkam sha ai wa rai nna shi a amyu masha ni hpe dik hkra tsaw ra ai wa hte shanhte a ntsa e tara jeyang na tsun ndau na hpe n dawng ai wa rai nga ai. Karai Kasang gaw shi hpe myihtoi galaw na matu shaga la nu ai majaw mungga law law hta, shi gaw shi hkrum sha lai wa sai nni nkri amu ni hte seng nna sung sung myit hkra ai hte tsun wu ai. Madu a mungga gaw shi a myit masin hta wan zawn grung nga ai rai nna shi gaw dai hpe n lu sharang da lu nga ai.
Ndai laika hta rawng ai galu kaba htum ai mungga nkau mi gaw Yeremia shi nan hkrum hkra ai tsin-yam tsindam tawt nna Karai Kasang galaw na ga shaka pru wa ai aten du hkra na lam ni hpe madun da nga ai. Dai ga shaka ningnan hpe Karai Kasang a amyu masha ni adum nga na matu, shadum jahprang ya ai sara n ra ai sha, shatup lu na ma ai; hpa majaw nga yang, dai gaw shanhte a myit kraw lawang ni hta ka matsing da na ma ai (31:31-34).
1
1 Ndai laika gaw Benyamin a mungdaw na Anahtot mare e nga ai hkinjawng ni hta na Hilkia a shadang sha Yeremia tsun tawn ai myihtoi ga ni hpe ka da ai laika rai nga ai.
2 Dai Madu gaw Yeremia hpe Yuda hkawhkam Amon a kasha Yoshia hkaw dung ai shi masum ning hta e tsun ai hte Ref 1:2: 2Hk 22:3-23:27; 2Hl 34:8-35:19.
3 shi gaw shi hpe Yoshia a kasha Yehoiakim hkawhkam tai wa ai shaloi kalang mi bai tsun wu ai. Dai hpang dai Madu gaw Yoshia a kasha Zedekia hkaw dung ai shi langai ning du hkra law law lang shi hpe tsun nu ai. Dai shaning a shata manga hta Yerusalem na amyu masha ni gaw bawng rim mat wa ai hkrum ma ai. Ref 1:3: 2Hk 23:36-24:7; 2Hl 36:5-8; 2Hk 24:18-25:21; 2Hl 36:11-21.
4 Dai Madu gaw ngai hpe,
5 ?Ngai gaw nang hpe asak garai n jaw ai kaw nna lata la ni ai, ngai gaw nang garai n shangai aten kaw nna pyi masha amyu baw ni a matu myihtoi tai na lata la ni ai,? ngu nna tsun wu ai.
6 Ngai gaw, ?Tsaw Htum ai Madu e, ngai gaw kaning ngu shaga na n chye nngai; ngai gaw nau naw kaji nga nngai,? ngu nna htan we ai.
7 Rai ti mung dai Madu gaw ngai hpe, ?Nang naw kaji nga nngai ngu nna hkum tsun et, rai ti mung ngai nang hpe shangun dat ai amyu masha ni hpang de sa nna ngai nang hpe tsun shaga na matu hkang dat ai lam shagu, shanhte hpe tsun na rai ndai.
8 Shanhte hpe hkum hkrit nga et, ngai gaw nang hpe makawp maga na matu nang hte rau nga nga na nngai. Dai Madu ngai nan tsun ni ai!,? ngu nna tsun wu ai.
9 Dai hpang dai Madu gaw lata ladawn let nye a nten hpe ahtawk nna ngai hpe, ?Madat u, ngai nang hpe jaw ya nga ai mungga hpe nang tsun lu na rai ndai.
10 Baw kau na hte run kau na matu mung, jahten shabyak kau na hte gumlau jahten kau na matu mung, gaw da na hte hkai da na matu mung, masha amyu baw ni hte mungdan ni a ntsa hta e up na ahkaw ahkang, dai ni jang, ngai nang hpe ap nga nngai,? ngu nna tsun wu ai.
11 Dai Madu gaw ngai hpe, ?Yeremia e, nang hpa mu n ta?,? ngu nna san wu ai.
Ngai chyawm gaw, ?Batan hpun lakung langai,? ngu nna htan we ai.
12 Dai Madu gaw, ?Nang jaw nga ndai, ngai gaw nye a mungga ni teng nga ai hpe mu lu na matu sin yu nga na nngai,? ngu nna tsun wu ai.
13 Dai hpang dai Madu gaw ngai hpe bai tsun let, ?Nang hpa naw mu n ta?,? ngu nna san wu ai.
Ngai gaw, ?Dingdung maga hta prut nga ai di bu langai hpe ngai mu nngai, dai gaw dagup mat hkyen na zawn rai nga ai,? ngu nna htan nngai.
14 Shi gaw ngai hpe, ?Dingdung maga de na jahten sharun ai gaw ndai mungdan hta shanu nga ai ni yawng a ntsa e prut pru wa na ra ai,
15 hpa majaw nga yang, ngai gaw dingdung maga de nga ai masha amyu baw ni yawng sa du na matu shaga dat nngai. Shanhte a hkawhkam ni gaw shanhte a tingnyang ni hpe Yerusalem a chyinghka lam ni hte de a bunghku grup yin hkan e mung, Yuda mung na kaga mare ni a grup yin hkan mung sharawt da na mara ai.
16 Shanhte gaw yubak shut hpyit masai; shanhte ni ngai hpe kau da masai, kaga karai ni hpe shagu hkungga nawng ya masai, hpara sumla ni galaw nna dai ni hpe nawku nga masai majaw nye a amyu masha ni hpe ngai ari jaw na nngai.
17 Yeremia e, tsun na matu ngai nang hpe hkang da ai lam magup shanhte hpe sa tsun dan su. Ya shanhte hpe hkum hkrit nga et, nang shanhte hte rau nga ai shaloi, ngai nang hpe grau nna pyi hkrit shangun na nngai.
18-19 Yeremia e, madat u! Ndai mungdan na masha hkum shagu hte Yuda hkawhkam ni, du salang ni, hkinjawng ni hte amyu masha ni gaw nang hpe gumlau na mara ai. Rai ti mung ngai gaw nang hpe shanhte hpe ninghkap na n-gun dai ni jaw ya nga nngai; nang gaw bunghku kum ai mare, hpri shadaw hte magri mang shakum zawn tai na ra ai. Nang hpe makawp maga na matu ngai gaw nang hte rau rai nga nngai majaw shanhte nang hpe dang kau lu na ma n rai. Dai Madu ngai nan tsun ni ai,? ngu nna tsun wu ai.