20
(Mat 28:1-8; Mrk 16:1-8; Luk 24:1-12)
Laban jahpawt nhtoi garai n htoi lu yang, Magdala Mari gaw jau jau e lup de sa wa ai rai nna, lup chyinghka pat da ai nlung sit mat nga ai hpe mu wu ai. Dai majaw shi gaw, Simun Petru hte Yesu tsaw ra ai sape kaga hpang de gat wa nhtawm, ?Dai Madu hpe lup kaw na la mat wa masai, shanhte shi hpe kanang e tawn da masai kun? Anhte n chye ga ai!,? ngu nna shan hpe tsun mu ai.
Dai shaloi Petru hte kaga sape gaw, lup de gat sa wa ma ai. Shan lahkawng gaw rau gat sa wa ma ai, rai ti mung kaga sape mahtang Petru hta grau gat chyang ai rai nna lup de shawng sa du ai. Shaloi shi gum yu dat wu yang, lup kata e lachyit sumpan gin-yan taw nga ai sha mu wu ai; rai ti mung shi gaw kata de n shang ai. Shi a hpang e hkan gat nang ai Simun Petru gaw dai de du jang kata de shang yu wu yang, Yesu hpe kayawp ai sumpan gin-yan taw nga ai hpe mung, baw kayawp ai hpajet gaw sumpan hte rau n re ai, kaga shara mi kaw san rai nna makai taw nga ai hpe mung mu wu ai. Dai hpang mi lup de shawng du taw nga ai dai kaga sape mung hkan shang wa nna, mu lu ai hte kam sham wu ai. (Madu gaw si ai kaw na bai hkrung rawt wa na ra ai, nga nna rawng ai Chyum Laika hpe shan garai n chye na ma ai.) 10 Shaloi dai sape yan gaw nta de bai wa mat ma ai.
(Mat 28:9-10; Mrk 16:9-11)
11 Mari chyawm gaw, dai lup shinggan e hkrap let tsap nga ai. Shing rai hkrap let shi gum nna, lup kata de yu yu di wu yang 12 hpraw tu ai hpun palawng bu hpun ai lamu kasa lahkawng gaw Yesu a moi mang tawn da ai shara a baw ngu na de langai mi, lagaw ngu na de langai mi, dung nga ai hpe mu wu ai. 13 Dai yan gaw, ?Numsha e, hpa rai hkrap nga n ta?,? ngu nna san mu ai.
Shi gaw, ?Nye a Madu hpe shanhte la mat wa nna kanang tawn da ma ai mung, ngai n chye ai majaw rai nngai,? ngu nna shan hpe htan mu ai.
14 Shing nga nhtawm shingdu de kayin yu dat yang, Yesu tsap nga ai hpe mu wu ai; rai ti mung dai wa Yesu rai nga ai gaw, shi n chye wu ai. 15 Yesu gaw, ?Num sha e, hpa rai hkrap nga n ta? Nang kadai hpe tam nga n ta?,? ngu nna shi hpe san wu ai.
Shi chyawm gaw, dai wa hpe sun sin ai wa rai sam ai ngu shadu nna, ?Tsa e, nang shi hpe hpai la kau ndai rai yang gaw, nang shi hpe kanang tawn da ai ngai hpe tsun dan rit. Ngai sa la wa na nngai,? ngu nna shi hpe tsun wu ai.
16 Yesu gaw, ?Mari e,? ngu nna shaga wu ai. Shaloi shi mung kayin let, ?Raboni!,? ngu nna Hebre ga hte htan wu ai. (Dai gaw ?Sara? nga ai rai nga ai.)
17 Yesu gaw, ?Ngai e hkum hkra et, hpa majaw nga yang, ngai Wa hpang de garai n lung wa nngai. Rai ti mung ngai nau ni hpang de wa nna nye a Kawa ngu ai nanhte a Kawa, nye a Karai Kasang ngu ai nanhte a Karai Kasang hpang de ngai lung wa sana da, ngu nna shanhte hpe wa tsun dan su,? ngu nna shi hpe tsun dat wu ai.
18 Dai rai nna Magdala Mari gaw sape ni hpang de wa nna, dai Madu hpe shi mu lu sai lam hte Madu kaning nga nna shi hpe tsun htet dat ai lam ni hpe tsun hkai dan mu ai.
(Mat 28:16-20; Mrk 16:14-18; Luk 24:36-49)
19 Sape ni gaw Yuda masha ni hpe hkrit ai majaw, Laban shana nrim rim ai ten hta, nta chyinghka ni la da nna hpawng nga m a ai. Dai shaloi Yesu du sa nna shanhte a ka-ang e tsap let, ?Nanhte ngwi pyaw nga myit ga,? ngu nna shanhte hpe tsun mu ai. 20 Shing nga tsun ngut jang, shi shanhte hpe shi a lata ni hte garep madun dan wu ai. Sape ni mung Madu hpe mu lu yang, kabu gara ma ai. 21 Yesu gaw shanhte hpe kalang mi bai, ?Nanhte ngwi pyaw nga myit ga; nye Wa gaw ngai hpe shangun dat ai hte maren, ngai mung nanhte hpe shangun dat made ai,? ngu nna tsun mu ai. 22 Shing nga tsun nhtawm, sape ni a ntsa e shi kawut nna, ?Chyoi Pra ai Wenyi hpe hkap la mu. 23 Nanhte gaw gade a yubak mara ni hpe raw dat kau ya myit yang gaw,shanhte yubak mara raw dat ya ai hkrum na mara ai. Gade a yubak mara ni hpe rai ti mung, nanhte n raw dat kau ya myit yang gaw, shanhte yubak raw dat ai hkrum na mara ai n rai,? ngu nna shanhte hpe tsun mu ai.
24 Shing rai Yesu sa du nga ai ten hta sape shi lahkawng hta lawm ai marun ngu ai Htawma gaw, shanhte hte rau n nga ai. 25 Dai rai nna kaga sape ni shi hpe, ?Anhte gaw Madu hpe mu lu saga ai,? ngu nna tsun dan mu ai. Shaloi Htawma gaw, ?Shi a lata ni hta na hpri hkang ni ngai n mu, dai hpri hkang ni hta nye a layung nan ngai n shawn yu, shi a garep hta nye a lata n manaw lu yang gaw, ngai kam na nngai n rai,? ngu nna shanhte hpe tsun mu ai.
26 Dai hpang matsat ya rai jang, sape ni gaw nhku e bai rawng nga ma ai rai nna Htawma mung shanhte hte rau rai nga ai. Chyinghka ni mung la da nga ai; rai ti mung Yesu sa du nna shanhte a ka-ang e tsap let, ?Nanhte ngwi pyaw nga myit ga law,? ngu wu ai. 27 Shaloi Yesu gaw Htawma hpe, ?Na a layung nang e shawn yu nna, nye a lata ni hpe yu u; na a lata ladawn nna, nye a garep hpe mung manaw yu u; n kam hkum rai et, kam sham nga u!,? ngu wu ai.
28 Dai rai nna Htawma gaw, ?Nye a Madu nye a Karai Kasang rai nga ndai,? ngu nna shi hpe htan wu ai. 29 Yesu gaw, ?Nang gaw ngai e mu lu ai majaw sha kam n ni? Ngai hpe n mu lu ai sha kam sham ai ni gaw a lu ma ai!,? ngu nna Htawma hpe tsun wu ai.
30 Ndai laika buk hta n ka da ai lamik kumla kaga law law mung, Yesu gaw shi a sape ni a aman e galaw dan nu ai. 31 Rai ti mung, Yesu gaw Karai Kasang a Kasha ngu ai Meshia rai nga ai hpe, nanhte kam sham lu nna, shi hpe kam sham ai a marang e asak hkrung ai lu la myit ga, ngu nna ndai hte wa ka tawn da nga ai.