YAWHAN A LAIKA
(JOHN)
Ga Nhpaw
Yawhan a Kabu Gara Shiga Laika hpe ka da ai wa a mying ndai laika hta n rawng ai; rai ti mung laika ka ai wa gaw Yawhan shi nan re ai lam tsun nga ai (21:24-25.) Yawhan yan Yaku gaw Zebedi yan Salome a kasha yan rai nna, Salome mahtang Madu Yesu a kanu a kanau rai ang ai (Mrk 15:40-41; Yhn 19:25.) Shi a daidaw shara gaw Betsaida rai lu ai. Shi gaw Yesu hte grai ni htep ai hku kanawn mazum ai wa re ai lam, ?Yesu tsaw ra ai sape,? ngu nna tsun ai ga hta chye na lu ai (Yhn 23:13.) Dai lam a majaw shi gaw Madu Yesu a myit masin hta rawng ai lam hpe mungkan masha ni hpang de shapraw shadan dan lu nga ai.
Kabu Gara Shiga laika mali hte seng nna Mahte gaw Madu Yesu hpe Yuda masha ni myit mada ala nga ai Dawi a aru arat hta na Meshia nan rai nga ai lam tang madun ai. Marku gaw Madu Yesu hpe kangka ai shangun ma rai nga ai lam Roma ni a matu tang madun ai. Luka gaw Grik masha ni a matu shatawng shada ai hte, Madu Yesu gaw kasi kaja re ai, ra n rawng ai shinggyim masha rai nga ai lam tang madun ai. Yawhan gaw, masha amyu yawng a matu Kabu Gara Shiga hpe ka da sai (Eze 1:10.) Shi gaw shawng daw de Hkalup Sara Yawhan a sape rai nna, asak 25 ning daram hta Madu Yesu a sape bai tai wa sai. Madu Yesu lamu de lung mat wa ai hpang, Roma Hkawseng Domitian a lak htak hta Patmu zunlawng de bawng hku sa kau ai hkrum nna Domitian si ai hpang Ehpesu mare de wa nna dingla ugut gu hkra dai mare e hpung up sara tai wa sai.
Yawhan a laika hpe tsa ning langai htum wa mahka A.D. 90-100 lapran, Ga Shaka Ningnan laika ni yawng ka da ngut ai hpang ka da sai. Yawhan ka ai Kabu Gara Shiga laika hta, Madu Yesu gaw shinggyim hkum shan dagraw nna anhte hta nga nga ai Karai Kasang a Mungga re ai lam tang madun da nga ai (1:14.)
Ndai laika ka ai lam a yaw shada ai lam gaw, Madu Yesu gaw Karai Kasang a Kasha, Karai Kasang ga sadi jaw da sai hte maren shangai wa ai Hkye Hkrang la ai Madu re ai lam, laika hti ai ni kam sham mu ga hte, shing rai kam sham ai a marang e htani htana asak lu la mu ga ngu ka da ai rai nga ai (20:31.)
Daw kaba 1-12 hta Madu Yesu gaw Karai Kasang a htani htana Mungga rai nga ai lam ga nhpaw tsun ngut ai hpang, dai Kabu Gara Shiga a shawng daw hta Madu Yesu gaw Karai Kasang a Kasha ngu ai Karai Kasang ga sadi jaw da ai Hkye hkrang la ai Madu re ai lam sakse madun ai lamik kumla hkum sumhpa hte, dai lamik kumla ni hpe lachyum hpyan dan nna sharin shaga ai lam ni hpe tang madun nga ai. Ndai shawng na daw hta, masha nkau mi Madu Yesu hpe gara hku kam sham wa nna, nkau mi gaw dai Madu hpe gara hku ninghkap shingdang ma ai lam tsun nga ai.
Daw 13-17 hta Madu Yesu ap kau hkrum na shana e, sape ni hpe Yesu grai ni htep ai hku kanawn mazum nna, wudang ntsa hta si hkam na ntawn e sape ni hta hkrum hkra na ra ai lam ni hpe gara hku hkrum katut sa wa na hkyen lajang ra ai lam hte seng nna n-gun jaw ai ga ni hpe galu galang tsun matsun da nga ai. Jahtum daw 18-21 hta gaw, Madu Yesu rim la hkrum nna daw dan hkrum ai lam, wudang hta si hkam nna bai hkrung rawt wa ai lam hte sape ni hpe shi hkum shadan dan ai lam ni tsun dan nga ai. N se n sa galaw nga yang rim la hkrum ai numsha a maumwi (8:1-11) Yawhan A Kabu Gara Shiga Laika hta chyu sha rawng ai. Hpa majaw nga yang, shawng ningnan lata hte ka da ai laika ni (Manuscripts) hta n rawng ai. Kasa Yawhan gaw Madu Yesu a marang e lu la ai htani htana asak ngu ai chyeju kumhpa a lam, Madu Yesu gaw lam rai nna teng man ai hte asak mung rai nga ai lam tang madun nga ai.
Yawhan ka ai Kabu Gara Shiga laika a laklai ai lam langai mi gaw, masha ni shani shagu mu chye nga ai; ntsin, muk, nhtoi, sagu rem wa hte sagu ni, sabyi ru hte sabyi si ni a lam ga shadawn la nna teng man ai Wenyi asak hkrung lam hpe lachyum shapraw shadan dan ai lam rai nga ai.
1
1 Shawng ningpawt e Mungga nga ai; dai Mungga gaw Karai Kasang hte rau rai nga ai, dai Mungga nan Karai Kasang rai nga ai. Shi gaw Karai Kasang hte maren rai nga ai.
2 Shawng ningpawt kaw nna dai Mungga gaw Karai Kasang hte rau rai nga ai.
3 Karai Kasang gaw dai Mungga hku nna arai yawng mayawng hpe hpan da nu ai. Hpan da ai arai yawng mayawng hta dai Mungga n lawm ai tai wa ai gaw langai mi mung n nga ai. Ref 1:3: Yhn 1:10; Ehp 3:9; Kol 1:16; Heb 1:2.
4 Mungga gaw asak a npawt daju rai nga ai; dai asak gaw masha ni a matu nhtoi rai nga ai.
5 Dai nhtoi gaw nsin hta e htoi nga ai rai nna, nsin mahtang gaw nhtoi hpe galoi mung ka-up kau lu ai n rai.
6 Karai Kasang gaw Yawhan mying ai masha langai mi hpe shi a kasa hku nna shangun dat wu ai.Ref 1:6: Yhn 1:33; Mal 3:1; Mat 3:11; Luk 3:1-2.
7 Karai Kasang a mungga hpe masha yawng na la nna kam sham wa mu ga nga, dai wa gaw dai nhtoi a lam sakse hkam ya na matu du sa ai.
8 Dai wa gaw shi nan dai nhtoi n rai, nhtoi a lam sakse hkam ya na she du sa ai.
9 Dai nhtoi gaw mungkan ga de du sa nna, masha nlang hte a ntsa e jahtoi ya ai nhtoi majing rai nga ai.
10 Mungga gaw mungkan ga e nga nga ai hte, Karai Kasang gaw mungkan ga hpe dai Mungga hku nna hpan da nu ai; rai ti mung mungkan ga mahtang dai Mungga hpe n chye wu ai.
11 Mungga gaw shi a buga mungdan de du sa ra ai, rai ti mung shi a amyu bawsang ni shi hpe n hkap la ma ai.
12 Rai ti mung nkau mi shi hpe hkap la kam sham ma ai rai nna, shi gaw shanhte hpe Karai Kasang a kasha ni tai lu ai ahkang jaw mu ai.
13 Shanhte gaw shingra maka tara hkan nna shinggyim kawa a kasha ni tai ai hku Karai Kasang a kasha ni tai wa ma ai n rai, Karai Kasang e nan, kasha shatai la hkrum ai ni she rai ma ai.
14 Mungga gaw shinggyim hkum hkrang dagraw la nna, chyeju hte teng man ai hpring let anhte hta nga nga yu sai. Anhte gaw shi a hpung shingkang hpe mu lu sagaw ai. Dai hpung shingkang gaw Kawa Karai Kasang a Kasha shingtai ngu ai hpe shi hkam la lu ai lam rai nga ai.
15 Shi a lam Yawhan sakse hkam ya wu ai gaw, ?Nye a hpang e du sa ai wa gaw, ngai garai n shangai kaw nna nga nga sai wa rai nna, ngai hta grau kaba ai wa rai nga ai, ngu nna ngai sakse hkam ya ai wa gaw ndai wa nan rai nga ai,? ngu nna jahtau tsun ai.
16 Shi gaw chyeju hte hpring tsup nga ai hte maren shi anhte nlang hte hpe shaman ya mi ai rai nna, chyeju htap mi hte htap mi lu la saga ai.
17 Karai Kasang gaw Mawshe hku nna dai Jep ai Tara jaw ya mi ai; rai ti mung chyeju hte tengman ai lam gaw Yesu Hkristu a gawp e jaw ya mi ai.
18 Karai Kasang hpe gade e mung, galoi mung n mu yu ai. Kawa Karai Kasang a makau e nga nga ai, Karai Kasang rai nga ai Kasha shingtai chyu sha shi hpe shadan dan nu ai.
(Mat 3:1-12; Mrk 1:1-8 Luk 3:1-18)
19 Yerusalem mare na ahkang aya lu ai Yuda masha ni gaw hkinjawng agyi ni hte Lewi masha nkau mi hpe Yawhan hpang de shangun dat nna, ?Nang gaw kadai rai nga n ta?,? ngu nna san mu ai.
20 Shaloi Yawhan gaw, ?Ngai Meshia n rai nngai nga nna n ip n nyet ai, asan sha yin la wu ai.
21 Shaloi shanhte gaw, ?Dai rai yang gaw nang kadai rai n ta? Nang Elia rai n ni?,? ngu nna bai san mu yang, ?N rai nngai,? ngu nna bai htan wu ai.
?Dai myihtoi rai n ni?,? ngu nna bai san mu yang ?N rai nngai,? ngu nna bai htan wu ai.Ref 1:21: Trj 18:15; Mal 4:5; Mat 17:10.
22 Dai rai nna shanhte gaw, ?Anhte hpe shangun dat ai ni hpang de mahtai lama mi gaw la wa ra nga ga ai rai nna, nang hkum nan kadai re ai, ngu nga n ta?,? ngu nna shi hpe bai san mu ai.
23 Yawhan gaw, ?Ngai gaw myihtoi Esaia htawn tsun ai hte maren,
?Dai Madu a matu shi hkawm sa na lam shading mu,?
nga nna nam e jahtau ai nsen rai nga nngai,? ngu mu ai.Ref 1:23: Esa 40:3; Mat 3:3; Mrk 1:3; Luk 3:4.
24 Dai shangun kasa ni chyawm gaw, Hparishe ni kaw na rai ma ai.
25 Bai shanhte gaw, ?Nang gaw Meshia mung n rai, Elia mung n rai, dai myihtoi wa mung n rai yang gaw, nang hpa rai hkalup jaw n ta?,? ngu nna shi hpe san mu ai.
26 Yawhan gaw, ?Ngai gaw hka hta hkalup jaw nngai, rai ti mung nanhte a ka-ang e nanhte n chye ai wa langai mi tsap nga ai.
27 Dai wa gaw nye a hpang e du sa ai wa rai nga ai; shi a kyepdin sumri hpe raw ya na pyi ngai n ging nngai,? ngu nna shanhte hpe htan mu ai.
28 Ndai lam ni yawng gaw Yawhan hkalup jaw nga ai Yawdan hka a sinpraw hkran na Behtani kahtawng e byin ai rai nga ai.
29 Hpang shani e Yawhan gaw, shi hpang de Yesu sa wa ai hpe mu wu yang, ?Mungkan masha ni a yubak gun kau ya ai, Karai Kasang a Sagu Kasha rai nga ai law!
30 ?Masha langai mi nye a hpang e du sa na ra ai, rai ti mung shi gaw ngai hta grau kaba ai wa rai nga ai, hpa majaw nga yang, shi gaw ngai garai n shangai ai shawng kaw nna nga nga sai wa rai nga ai, ngu nna ngai tsun ai gaw ndai wa rai nga ai.?
31 Shi kadai re ai mung ngai n chye nngai, rai ti mung Israela amyu masha ni shi hpe chye lu hkra shadan dan na matu, hka hte hkalup jaw na ngai du sa nngai,? nga ai.
32 Dai hpang Yawhan gaw, ?Wenyi gaw sumsing lamu de nna hkrudu zawn yu hkrat wa nna, shi a ntsa e nga nga ai.
33 Ngai gaw, shi kadai re ai mung garai n chye nngai; rai ti mung ngai hpe hka hta hkalup jaw na matu shangun dat ai Karai Kasang gaw, ?Dai Wenyi yu hkrat wa nna, masha langai wa a ntsa e nga nga ai hpe nang mu na rin dai. Dai wa gaw Chyoi Pra ai Wenyi hte hkalup jaw na ra ai wa rai nga ai,?
34 ngu tsun ai hte maren byin wa sai hpe ngai mu se ai,? nga ai. Matut nna Yawhan gaw, ?Bai ngai nanhte hpe tsun made ga, ndai wa gaw Karai Kasang a Kasha rai nga ai,? nga tsun ai.
35 Bai hpang shani e, Yawhan hte shi a sape lahkawng rau tsap nga ma ai rai nna,
36 Yesu lai sa wa ai hpe Yawhan mu wu yang, ?Karai Kasang a Sagu Kasha hpe yu yu mu!,? ngu mu ai.
37 Dai sape yan gaw shi tsun ai ga na nna, Yesu kaw hkan sa ma ai.
38 Yesu gaw hpang de kayin yu nna, dai yan hkan sa ai hpe mu wu yang, ?Nan hpa tam myit ta?,? ngu nna san mu ai. Shan gaw, ?Rabai e, nang kanang nga n ta?,? ngu nna shi hpe nhtang san mu ai. (Rabai ngu ai gaw, ?Sara? ngu ai ga re.)
39 Yesu gaw,?sa nna yu yu mu,? ngu mu ai. Dai re ai majaw shan hkan sa nna, shi nga ai shara kanang re ai mung mu ma jang, dai shani tup shi hte rau nga nga ma ai. (Dai ahkying gaw shana de daw hkying mali daram hta rai nga ai.)
40 Yawhan tsun ai ga na nna, shi kaw hkan sa ai yan hta na langai mi gaw Simun Petru a kanau Andre rai nga ai.
41 Shi gaw shi a kahpu rai nga ai Simun hpe shaloi jang tam la nna, ?Meshia hpe anhte mu saga ai,? ngu nna shi hpe tsun dan wu ai. (Meshia ngu ai gaw Hkristu nga ai rai nga ai.)
42 Dai hpang shi gaw Simun hpe Yesu hpang de woi sa wu ai.
Yesu gaw shi hpe hkap yu nna, ?Nang gaw Yawhan a kasha Simun rai nga ndai; rai ti mung nang hpe Kehpa ngu nna shamying na rai nga ai,? ngu wu ai. (Kehpa ngu ai gaw Petru (Nlung) ngu ai lachyum re.
43 Hpang shani e Yesu gaw Galile mung de rai wa na myit daw dan wu ai. Shaloi Hpilip hpe mu wu ai rai nna, shi hpe, ?Ngai kaw hkan nang rit,? ngu wu ai.
44 (Hpilip gaw Andre yan Petru nga ai Betsaida mare na rai nga ai.)
45 Hpilip gaw Nahtanela hpe mu nna, ?Mawshe gaw Tara Laika ni hta, myihtoi ni mung myihtoi laika ni hta, sha-ang nna ka da ai, Yosep a kasha Nazaret mare na Yesu hpe anhte mu sagaw ai,? ngu nna shi hpe tsun dan wu ai.
46 Nahtanela gaw, ?Nazaret mare na arai kaja lama mi pru lu a ni?,? ngu nna htan wu ai. Hpilip gaw
?She sa yu rit,? ngu nna htan wu ai.
47 Yesu hpang de Nahtanela sa wa nga ai hpe mu wu ai shaloi, shi hpe sha-ang nna, ?Sawt ai myit n rawng ai, Israela masha majing hpe yu yu mu,? ngu wu ai.
48 Nahtanela gaw, ?Nang ngai hpe gara hku nna chye n ta?,? ngu nna san wu ai.
Yesu gaw, ?Nang hpe Hpilip garai n shaga kaw nna dai maihpang hpun npu e nang naw nga nga yang, ngai nang hpe mu de ai,? ngu nna htan wu ai.
49 Nahtanela gaw, ?Sara e, nang gaw Karai Kasang a Kasha rai nga ndai,? ngu nna shi hpe htan wu ai.
50 Shaloi Yesu gaw, ?Ngai nang hpe maihpang hpun npu e mu de ai ngu ai majaw sha nang kam n ni? Dai hta grau kaba ai amu ni hpe nang mu na rin dai!,? ngu wu ai.
51 Bai Yesu gaw, ?Ngai nanhte hpe teng teng tsun made ga, sumsing lamu hpaw malang wa nna, Karai Kasang a lamu kasa ni gaw, Masha Kasha a ntsa e lung wa, yu wa, rai nga ai hpe nanhte mu na marin dai,? ngu nna shanhte hpe tsun mu ai.Ref 1:51: Nin 28:12; Mat 4:11; Luk 2:9,13.