3
1 Dai Madu gaw,
?Dai aten hta, ngai gaw
Yuda hte Yerusalem a ngamu ngamai lam hpe bai jaw na nngai.
2 Ngai gaw masha amyu baw ni yawng hpe jahpawng da nna,
shanhte hpe Tara Jeyang ai Kadit de woi sa wa na nngai.
Dai yang e, nye a amyu masha ni hpe
shanhte galaw manu ai yawng mayawng a matu ngai shanhte hpe jeyang na nngai.
Shanhte gaw Israela amyu masha ni hpe maigan mung de shaden kau nna
nye a mungdan Israela hpe karan kau manu ai.
3 Shanhte gaw bawng masha ni hpe kadai wa madu la lu na matu
hpaida da let daw dan la ma ai.
Shanhte gaw shawa num ni hte sabyi ntsin manu jaw na matu,
numsha, lasha ni hpe mayam hku dut sha kau ma ai.
4 ?Turu, Sidon hte Hpilisti ginwang ni yawng hte e, nanhte ngai hpe hpa galaw mayu nga myit ni? Nanhte gaw lam lama ma a majaw ngai hpe matai htang mayu myit ni? Dai zawn galaw mayu ai rai yang, ngai nanhte hpe alawan matai htang na made ai! Ref 3:4-8: Esa 23:1-18; Eze 26:1-28:26; Amo 1:9-10; Zeh 9:1-4; Mat 11:21-22; Luk 10:13-14.
5 Nanhte gaw nye a ja gumhpraw ni la mat wa nhtawm nye a hpu reng ai sut rai hpe nanhte a nawku nta de hpai shawn da myit dai.
6 Nanhte gaw Yuda hte Yerusalem mare masha ni hpe shanhte a mungdan kaw nna woi mat wa nhtawm Grik masha ni hpang de dut kau nga myit dai.
7 Ya chyawm gaw nanhte gaw shanhte hpe dut kau dat ai shara ni kaw nna ngai bai woi la na nngai. Nanhte shanhte hpe galaw manit dai hte maren ngai mung nanhte hpe galaw na made ai.
8 Ngai gaw nanhte a shayi shadang sha ni hpe Yuda masha ni a lata de dut kau na nngai; shing rai shanhte gaw dai ma ni hpe tsan tsan e nga ai Sabean masha ni hpe dut ya na mara ai. Dai Madu ngai nan tsun ni ai.
9 ?Masha amyu baw ni hpe ndai lam ndau shabra mu:
?Hpyen majan a matu hkyen mu;
nanhte a share ninghkrin ni hpe shaga da mu;
nanhte a hpyenla ni hpe shinggyin la nna rawt lung wa manu!
10 Nanhte a majawn ni hpe nhtu,
hpun lakying krum ai nhkyi ni hpe nri hku dup mu.
N-gun kya ai wa pyi majan gasat lu na rai nga ai. Ref 3:10: Esa 2:4; Mik 4:3.
11 Grup yin masha amyu baw yawng hte e, alawan sa wa nna,
kadit e jahpawng nga mu,?? ngu nna tsun wu ai.
O Madu e, shanhte hpe gasat na matu na a hpyen hpung dat dat u.
12 ?Masha amyu baw ni gaw
Tara Jeyang ai Kadit de sa na jin jin rai nga lu na rai ma ai.
Dai yang e, dai Madu ngai nan grup yin masha amyu baw ni
yawng hpe tara jeyang na matu dung nga na nngai.
13 Shanhte gaw grai wa n hkru nga ma ai;
mam shu la ai aten na nsi naisi zawn
shanhte hpe gadoi la mu ai;
sabyi ntsin kabrat mat ai aten du hkra,
sabyi si ni hpe sabyi htumbyen hta hpring hkra kabye mu ai zawn shanhte hpe
kabye agrawp kau u.? Ref 3:13: Shr 14:14-16.
14 Hkying hkying law nga ai masha wunawng wuwa gaw
Tara Jeyang ai Kadit hta nga nga ma ai.
Dai yang e, dai Madu a nhtoi kade n na yang
du wa na ra ai.
15 Ajan hte shata sin mat wa nna,
shagan ni loi mi mung htoi na ra ai n rai.
16 Dai Madu gaw Ziun Bum kaw nna shabam dat nhtawm,
shi a nsen Yerusalem kaw na ngoi kadu nga ai;
Ginding aga hte sumsing lamu gari ashun nga ai.
Rai ti mung, shi gaw shi a amyu masha ni hpe makawp ninggang tai ya na ra ai. Ref 3:16: Amo 1:2.
17 ?Dai hpang, Israela e, ngai gaw dai Madu nanhte a Karai Kasang rai nga nngai hpe nanhte chye na marin dai.
Ngai gaw Ziun ngu ai nye a chyoi pra ai kawng hta nga nga nngai.
Yerusalem gaw chyoi pra ai mare tai wa nna;
maigan masha ni dai mare hpe galoi mung bai ka-up lu na mara ai n rai.
18 Dai aten hta, bum ni gaw sabyi sun ni hte hpring na ra ai;
yam nga ni hpe kawng shagu a ntsa hkan e mu lu na ra ai;
dai yang e, Yuda hka shi hka gai yawng hkan hka lwi na ra ai.
Dai Madu a Nawku Htingnu kaw na hka shi langai lwi wa na ra ai,
dai gaw Akasia Kadit hpe madit ya na ra ai.
19 ?Shanhte gaw Yuda mung hpe gasat nna,
dai hta nga ai mara n kap ai masha ni hpe sat kau mu ai majaw,
Egutu mung gaw zaibru jang tai mat nna,
Edom gaw katsi katsang hten run mat na ra ai.
20-21 Ngai gaw sat kau hkrum sai ni a matu matai dawp na nngai;
mara kap ai ni hpe ngam tawn da na n rai.
Rai ti mung, Yuda hte Yerusalem yan gaw htani htana agrin nga na ra ai;
dai Madu ngai nan Ziun Bum ntsa e nga nga na nngai.?